Matiyut 24:31 - Ala Wone Peenok Peebi Mbanak

³¹ Ndi, oone nggwok eeka trompet nogo oone eeke kenok, it nayeloman mini malayikat nogo nappiya wage neenok, wogo logomenggaarik, an napuri miirogo leeninabeegirak o agi-ogu nen, aru-ogwe nen, ilin-unggut wonogwe nogo abok aret kuwak eerogo piya woraagun o,” yinuk, yoragagerak.

Matiyut 24:31 ပူးပေါင်းရင်းမြစ်များ

Ndawi 22:27

Kaliku ALA yi o ndi o unde wonage, Yi aakumi ndi aakumi abok aret Wone lengganogo yorage, Eeke menggendak me, It aakumi o irip-irip menggaarak nogo Kaliku ALA koba abeppunuk, Melak togon kowagam wogwe, Yi aakumi ndi aakumi inanebunu lombok kat kabu'me tebe yi wa'nuk kayuk wukwi, Eeko logogun o.

Ndawi 67:7

Kale'nggen ninoba pinanege keenok, aakumi o nggween irip-irip wonogwe abok aret kayuk wuko logogun o.

Ndawi 81:3

Tut awo ngget penengge paga, Tut abu penengge kenok, ninale'nggen nen laago lariyak koonak nogo paga, Ndomba eyak paga oone pu eeko logonip o.

Wundeegwaarak 19:16

Yorage nagagerik, wonogwe me, nogo mbere yinuk, ko'lu kuubondendok paga o ngguurubu eeke, o yabok eeke, puut nogo paga tit kunogo pege, eeke logonet, trompet oone nggwok lombok pu eeke mbareegi, it aakumi inawooliyana wonogogwaarak nogo abok aret inagabiti nen inaganak wareegerak.

Yetaya 11:12

At nogo nen yi aakumi ndi aakumi abok inake ineenu agak mippege, Iterali wogoren mbo piya nogogwaarak nogo kuwak eerogo piya wage, It aakumi Yekura mendek yi o ndi o irip agi-ogu, aru-ogwe, ma'nogogwaarak nogo Kuwak eeppiinok, iniyokan piya wage, Eerigin o.

Yetaya 13:5

An nawuri wim eeka inawi o ndaanda nen wogwe, Nggween irip-irip me nen wogwe, Eekwi iinok, Naliku ALA nanini aakumi eeppiyoorak mbake nogo it nen eeppiyaawok nduk, kuwak eeri wogwe me, It nen aakumi o nggween paga wonogwe abok aret lek eerogo piyaagun o.

Yetaya 27:13

Ndi, ne ti eyom paga mban oone nggwok eeka trompet nogo oone pu nggwok eeke kenok, it aakumi Iterali mendek o Atiyut kobak ogogwaarak nogo inom, o Metit mbo nappiya nogogwaarak nogo inom, puut alik leenak Tiyon kota Yerutalem nogome kuwak ari wogo logomenggaarik, Aliku ALA alut eeko logogun o.

Yetaya 42:10

Kit aakumi nggween irip-irip wonogwe yi, wae. Ndawi ngget mendek Aliku ALA ake wakwi, At mban alut eekwi, Eeko logonip o. Kat niyo laut kinikime wonogwe kinom yi wae. At alut eekwi, Laut iniki me kit nggween ku'mbanak inom, it kit paga wonogwe inom, at alut eekwi, Eeko logonip o.

Yetaya 43:6

Napuri wo'niru o, yinuk, o omarip paga pa'nggwe yoge, Napuri inili ari mage o, yinuk, o ame pa'nggwe yoge, Eeke logonet, Napuri wologwe o nda nen, Napuri komologwe o nggween irip-irip nen,

Yetaya 45:22

It aakumi o nggween irip-irip wonogwe ti, Ala alik ambi lek, an nalik mban aret wonage me, Iniyokan yungguninuk neya wogwe iinok, inagap ndarigin o.

Yetaya 49:18

Kat kaagalogwe wologwe kuwak ari wogwe, kat kowagam wogwe, eekwi yi, kuut pilak yinuk, kenegen pegiyet o. Kwe aap lambumbuurak nduk, obaanggi-obaangge li'luk eerogo pogo mengga kwak, It kuwak a'nuk wonogwe nogo paga kat kiniki ale'nggen nggwok eerogo pagagun o, yinuk, An neenik minggirak Naliku ALA nen mondok abet aret yokkigi o.

Yetaya 60:4

At aagalogwe wologwe o nda nen wogwe, Aagalogwe komologwe inaagalogwe yarugu-yonggolak aago wogwe, It abok aret at owagam kuwak ari wogwe, Eekwi ti, Enggaawak pila yinuk, enegen yendok-wandok pegiyaawak o.

Ndaniyen 7:2

At Ndaniyen nen liiru mbangge logonet, “An oonikiya paga nabi kagarak nogo yi o. O wiya 4 kuli mbogut oolo ya'i wake menggerak nogo agi-ogu nen, aru-ogwe nen warit wage logonet, niyo nggwok yenggenak laut nogo kilaarak-mogonik eerogo pege kagak,

Takariya 14:5

Ti eeke kenok, o kobak nonggologo pemenggerak ti, kota Yerutalem nen nok, o Atat kuli ari nagin me, aap Yekura mendek inowe endagembogut Utiya wonage eyom paga, o mi nuk-nuk eeke kenok, mbaganeegutak togop nogo aret tu ti paga mbaganumunggup o. Mbaganggwi kiigak, Aliku an nogoba Ala nogo, it kikak naka'lek alik leenak menggaarak abok aret inom wambi woraagun o.

Takariya 2:6

Aliku ALA nen ari logonet, “O wiya agi-ogu nen, aru-ogwe nen, nage menggim nogome mappinagareegirak me, kit o omarip paga pa'nggwe wonogwe nogo woraanip o! Woraanip o!

Takariya 6:5

Yoge mbaki, at malayikat nen an yo'nege logonet, “Kenegen iigendak ti, at o yi abok aret unde menggerak enggaanom paga ake eeko menggaarak ineebe 4 nogo, o wiya agi-ogu nen, aru-ogwe nen, warit wage menggim time nogo menggaarak it aret.

Takariya 9:10

At nen yi nggweendo ndi nggweendo o Eparayim wonage inom, Yi kuda ndi kuda wim eeka o kota Yerutalem wonage inom, lek eerogo pege, Yigin agale wurik mbanogo pege, Eeppunuk, Kiniki ugun ale'nggen mbako logonip o, yinuk, yi aakumi ndi aakumi yorage logogin o. At wone lengganogo yorage logowam wiganit niyo nggwok yenggenak laut ambi kuli nen nok, ambi kuli ari nage, Niyo Eparat nen nok, o nggween irip-irip ndak wa'narit nage, Eeke logogin o.

Takariya 9:14

Ti eeke kenok, Aliku ALA nen at apuri inirimbaga kin ari wage logonet, O kimbik pindanogo pege menggi kwak, at omaale namburogo nappigin o. At Itok Menggerak Aliku ALA nen oone nggwok eeka trompet nogo oone pu eeke, O ame pa'nggwe nen o wiya nombok-kombok eerit wage enggela'me at wage,

Matiyut 13:41

An aap aret nda'nagagirak nogo nen it malayikat nogo nappiya wage neenok, wogo logomenggaarik, it Ala abu'me piige menggim logonet, aakumi maluk eeruwak nduk, inikime manabit nogo menggaarak ineebe inom, yi aap ndi aap maluk eeko menggaarak ineebe inom, kuwak eerogo

Matiyut 24:22

Aaninggin-paaninggin inoba piyoorak eyom nogo ti, Ala nen kuli panggoppi woraagin lek kenok, aakumi inagap ndarigin lek abok aret inoorigin me, at Ala nen at apuri miirogo leeninabeegerak mendek nogo inookwi iyo, kuli pigin aret o.

Matiyut 24:24

It ando nen we piliret, Keritut nogo an aret o, ndi, Ala nen yo'nege kagak yokkiraga mendek ti, an aret o, yinuk, agan wogo logomenggaarik, it aakumi ugun iniki nomoninakwi, ndi, it Ala apuri miirogo leeninabeegerak nogo, iniki nomoninaburak op kaamun ilik? yinuk, nomoninakwi, eeruwok nduk, inagabiti warak mendek inom, eerubok mendek inom, eeremenggaarak kwe, it agan woraagun ti, kiniki abet mbarubok o.

Matiyut 24:32

Yorage nagagerik, ambi yorage logonet, “Eyo wuli anggup larikit nduk eeke menggerak nogo kiniki wakkaanip o. Eno'mbak paga agarip wungge nagaatik, anggup lake kenok, O kiniyak muk panggo yegerak kagi o, yogo monggotak nogo pogom,

Matiyut 25:31

Yetut wone ambinom yorage logonet, “An aap aret nda'nagagirak nobanggi-nobangge li'luk eekko'nok, it malayikat abok aret ninom wage logominggirik, an wone lengganinake minggim tiyanak nogome neegak,

Matiyut 28:18

Yetut nogo inowagam panggo yi wage nagagerik, yorage logonet, “Ala nen mbogut paga inom, nggween paga inom, an unde logokit nduk, awone abok aret kili'nereegerak me,

Marakut 13:27

Wage logominggirik, it nayonggo nugu menggaarak malayikat nogo nappiige neenok, nogo logomenggaarik, an napuri miirogo leeninabeegirak nogo, agi-ogu nen, aru-ogwe nen, ilin-unggut time wonogwe nogo abok aret kuwak eerogo piya woraagun o,” yinuk, yoragagerak.

Lukat 24:47

Kit maluk eeko monggotak nogo kiniki koombunuk, kinomaluk mbo pugwi kiinok, Ala nen kinomaluk lek eerogo pinagagin o, yinuk, wone nogo at endage kumbunuk, iyaalok o Yerutalem nen yi awi ndi awi abok aret yoranet wundi nogo logogun o, yinuk, Ala wone liiru mbaneegwaarak nogo yi aret eeppanggaarak o.

Yaya 11:52

Aakumi Iterali mendek inake mban ti lek o. Ata, it aap Ala apuri yi awi ndi awi mak eerak wonogwe nogo kuwak eeppiyamenggerak iniki ambit lambunik logorak inake kambuurak me nduk, yoragagerak.

Oroma 10:18

Togop kwe, it abok obeelom wone awo konengga'lek aret wonogogwaarak kenok, yokkirage mbako ogotik? Lek o. “It inoone nogo o nggween paga yime abok aret wiganinuk, nage, Iname yoragaatak nogo, o irip-irip ndak wa'narit nage, Eereegerak o,” yinuk, liiru mbanak ti paga it abok koneneegwaarak aret kenok yokkiragi o.

Epetut 1:10

At Ala nen, “An eeriyak mbareegirak nogo, ndiyom paga a'me lik yigin o,” yinuk, kooneegerak nogo ti, mbogut paga mendek inom, nggween paga mendek inom, yi mendek ndi mendek abok aret Keritut abu'me pege logomenggerik, at eebe mondok tiyanak logorak kooneegerak nogo ti aret o.

Pelaareegerak 30:4

Ndi, kit ando nggween irip me mak eerogo pinagamenggerak nogo kunduk, ne ambit ti paga mban kuwak eerogo wokkiren,

Pelaareegerak 4:32

Yorage nagagerik, ambinom yorage logonet, “Wone iya lombok yogop awo paga agagerak ambi kineenu mbakop? Wone iya lombok togoti awo paga agagerak ambi koneneegutak mbakop? Kit nen kani omoonuk wunuk ari enggela'me Ala oone ari kinaruk koneneegutak nogo kokwak, it inanebunu alik ambi nen Ala oone ari inaruk konembunuk, ineenik ambi wonogwe kineenu a? Kit kinigen kiigak, kinake at Aliku kinogoba Ala nen aakumi Metit mendek iniki wakkaawak nduk eeke, inoba tam warak mendek agago piige, inagabiti aruwak nduk agago piige, inom wim eeke, eenggi omaawi paga eeppiige, eenggi titik eeke kenok eeppiige, Ia, yinuk, inaganak waruwak nduk eeppiige, eerit wagagerak nogo kokwak, it kugi nen togop aret it aakumi alik mendek ambi wonogwe me, inenggela'me nen it aakumi alik mendek ambi nggiginogo inagap ndareegerak kineenu a? Lek aret me, kit kineebe nda'naga'lek kiigak, maan at Ala nen o nggween paga yime aakumi lek me ogobakkigirinabeegerak kuli nen nok, nda'narit wundi wogogwaarak ineebe abok aret ineegwa'me waganggwi, mbogut alom me nen irip me wonage nogo iniki kwaakwi, eeko logonip o.

1 Tetalonika 4:16

At ninowe lombok kuum ari, yonggo mbogut paga inowe nogo oone ari, Ala amendek oone nggwok eeka trompet nogo oone eeke, eeko logonet, ninowe mbogut paga nen wambi wage kagak, it aap Keritut inom kunik logonet, kambeegwaarak nogo, at Ala nen inaa'nduk mippiyaagin o.

2 Tetalonika 2:1

At ninowe Yetut Keritut wage kenok, nit at ninom kuwak eeriyak wone nogo yokkiraawi o.

Wayu 1:20

Laaluguragan 7 neenggi abe'nggan paga kagandak nogo inom, ndi, ndi wuninogo pegak 7 mbuti emas paga ogobakkigirik kagandak nogo inom, ti wone nobarak negen wonage me, alom liirogon yokkiri o. Laaluguragan 7 nogo ti, it Ala apuri nggereya 7 paga kuwak eekwi inarum menggaarak malayikat nogo aret iigen. Ndi, ndi wuninogo pegak 7 nogo ti, Ala apuri nggereya 7 paga kuwak eeko menggaarak nogo aret iigen o,” yinuk yo'nege kagarak o.

Wayu 11:15

Yo'nege mbaki, nenegen wonage me, malayikat 6 inarompet oone eeko mbaka, ambi nogo nen arompet nogo oone eeke mbaki, it mbogut paga time nen inoone nggwok yogo logonet, “O nggween paga time aakumi inabu'me piinok menggam abok aret, at ninogoba inom, at leenogo mippereegerak Keritut inom, imbirak inoone konenggo logowok nduk, inabu'me ari waga o. Ari wogwe iinok, Keritut nogo nen inowe endagembogut logonet, mondok-mondok wone lengganogo yorage logogin o,” yinuk, yogwe iigirak.

Wayu 7:1

Ti eekwi iige nagarik, o yi irip 4 wonage me nen o wiya ndak-ndak 4 aret warit wundi wage menggerak me, o nggween paga inom, yi nggwok yenggenak laut inom, iri'ngga-kale'ngga inom, o wiya nen abolok eerit nage kero, malayikat ineebe 4 nen panggomborogo wonogwe iigirak.

Wayu 8:2

it malayikat ineebe 7 Ala abu'me mi'ndak menggaarak nogo oone nggwok eeka trompet 7 wogorage kagarak.