Maleyaki 3:5 - Ala Wone Peenok Peebi Mbanak

⁵ “An nen inowak loonogo maluk onggo eeppiyaakit nduk woraagin o. Wage logominggirik, it aap tili pagangga inom, aap kumi ugun-ugun eeginaka inom, pilit pugunogo, Ndogop eeke kagarak, yaga inom, onggo koloorak eyabu eekwi wi-wi eeginaka inom, it aap kumi togwe kunduk, elege moono kunduk, tebenogo piiga inom, it aap nggiru inawone yaga-taga eerogo piiga inom, it an inagabiti nombakulik nogo mendek abok aret, Ndogop eekwi kiigirak o, yinuk, yorage logokit nduk, woraagin o,” yinuk, at Omaawi Lombok Menggerak Aliku ALA nen aret yegerak me, yokkiragi o.

Maleyaki 3:5 ပူးပေါင်းရင်းမြစ်များ

Wakkagagerak 20:11

Yoge mbareegi, at Abarakam nen, “An niniki mbake logonet, It aakumi yime Ala inagabiti mbaka'lek me, an nooko logonet, nakwe ndinogo wagun ilik? mba'nuk, yagarak o.”

Wakkagagerak 42:18

Nogome keele maarogo mambiyareegerak nogo mbere yippunuk, ko'lu paga at Yutup nen it nogo yorage logonet, “An togon Ala nagabiti mbake minggirak me, kineenik op logorak nduk, yogop ee'nip o.

Nekemiya 5:15

an o unde mippanega'lek kagak inaa'nduk o unde wonogogwaarak nogo nen it aakumi aaninggin-paaninggin inoba piigo logonet, “Mbi inom, anggur amburu toolak inom, wo'nira wogo logonet, wu mbuti perak aaninggin oolo wakkagak inom wo'nira wogo logonip o,” yinuk, yorogwe, ndi, inawuri kunduk, inoone omaawi paga yorogo logonet, tebenogo piigwi, eeko nogogwaarak kwe, an perak, Ala nagabiti mbake minggirak me, togop eeke logolik.

Ayup 31:12

Ti eeke logonetak nen Kani pup eerogo nengge menggi kwak, An togop aret eerogo panege, Ndi, kuwak eerogo pigirak nogo kunduk, Mondok lek eerogo pege, Ee'netak o.

Ayup 7:2

It nogo ti, Aap ambi ayeloman mini nen, O nggun lamunninabi woraawak lak, Ao, mbakwi, Aap yabu eekaatak onggo kolaga nen, Onggo koloorak, iniki lunik wonogwe, Eeko mengga kwak Aret wonogwe nogo lek a?

Ndawi 36:1

It maluk eeka nen maluk eerit nugwi nogo o. Ninikime lombok menggerak nogo Ambi yuurak mbakirak me, mbininogo yi o. It aap maluk eeka nogo ti, Ala inagabiti mbakwi ambi mondok lek aret o.

Ndawi 81:8

Togop me, kit an napuri Iterali mendek yi wae. Kurumbi yokkirage yi, liippugwi, Iterali mendek yi wae. Noone koneniyak mbakwi kenok, kinaruk konenggwi, Eeko logonip o.

Wundeegwaarak 1:17

Wone togop aret lengganinabeegerak kwe, it kumi elege ndaganaka nogo nen Ala inagabiti mbako logonet, aap endagembogut Metit mendek nen yoragagerak nogo ndak-ndak inooko logolik ineenik teppiigo nogogwaarak.

Wundeegwaarak 18:21

yeenggwa kugo logowak nduk, it aakumi inanebunu lombok inenggela'me nen aap ineebe wone koongga kenok, Ala inagabiti mbaka kenok, wone yo'nuk, Abet aret eerigin, mbaka kenok, iniki yanggo yuwak nduk, wu wogogaatak waganggeelik kenok, leenogo piige logomenggendik, at ambi nen aakumi ineebe seribu unde logowak nduk mippege, at ambi nen aakumi ineebe 100 unde logowak nduk mippege, at ambi nen aakumi ineebe 50 unde logowak nduk mippege, at ambi nen aakumi ineebe 10 unde logowak nduk mippege, eeru o.

Wundeegwaarak 20:7

Naliku an kinogoba Ala nendage we ugun yuurak ti mage o. Aap ambi nen an nendage we ugun agan nege kenok, Naliku an ALA nen aap ti mondok maluk eeppigin o.

Wundeegwaarak 22:20

It aakumi nen Naliku an ALA mban nalut eeriyak kagak, kugi alut eeko logonet, ake warogo pugwi kenok, it ineebe mondok inoorogo piyaawak o,” yinuk, yoraawak nduk, yoreegerak.

Kini Wuppiige 16:6

It aakumi nen Aliku ALA iniki kunik eekwi, Yegetak liirogon mban eerit nugwi, Eekwi paga Aliku ALA nen inomaluk lek eerogo pege menggerak. Ndi, Aliku ALA inagabiti mbakwi paga maluk ogole nen mbaganggo menggaarak.

Kini Wuppiige 8:13

Aliku ALA inagabiti mbakwi ti, “Maluk nineebi o,” mbakwi ti aret. Iniki wogoppakwi, Nit iya, mbakwi, Ineraambe maluk lombok eerit nogwe, Inambokan laganuwak nduk agan nugwi, Eekwi ti, An neebi lombok mbake minggirak o.

Yetaya 57:3

“Togop kwe, it kumi tili mbangga inaagalogwe ti, Kumi ugun-ugun eeginabit nega mendek wiganak inom, kumi mbabilu paga ndarak inom, nogo aret me, it yime woraawak o.

Yeremiya 23:10

It aap inakuwi mbo piinok, kumi ugun eeginabit nugu mengga kwak, O yime it aakumi Ala mbo punuk nugwi nogo mban ndak warak wonogwe paga nggween pulunik aret me, mbuk age, Ndomba inagari'ngga nenet nugu menggam teebat age, Eerak aret agaarik o. It aap Ala nen yorage kagak yoraga nogo nen aret maluk eeriyak mban mugurok nogwe, Eeko logorak mippiyareegwaarak nogo kagak ndak-ndak eekwi lek, alik eerit nugwi, Eeko agaarik.

Yeremiya 27:10

It aap ti, pilit pugunogo yorogwe nogo konenggwi paga an nen it inanggween paga time nen wumbiinok, inenggaawak lek eerogo piyaagin o.

Yeremiya 27:9

Togop me, Ndogop age koorak, yaga nen yorogwe, tili pagangga nen yorogwe, Nabi kagarak o, yinuk, yorogwe, inobagari yaga nen yorogwe, inogoma inom wone mbangga nen yorage, eeko logonet, Aap Mbaben mendek endagembogut ayeloman a'nuk ake eeko logomunggup lek o, yinuk, yorogwe nogo inoone konenugwaarik o.

Yeremiya 29:23

It aap mbere ti, Iterali inenggela'me wonogo logonet, eeriyak lek mendek eerit nugwi, it inoreewi inakuwi aret kwe, kagak wuginakwi, ndi, an nen wone yoroolik neegak nendage kunogo inoone pilit agan nugwi, eeko menggaarak nogo an neenu wonage, ndi, yorogwe nogo nenegen iige, eeke minggirak me, it togop aret eerogo piyaagin o,” yinuk, Aliku ALA nen aret yegerak me, liiru yi mbanggiragi o, yinuk, liiru mbanogo nappiyareegerak ti aret.

Yeremiya 42:5

Yorage mbareegi, it nen Yeremiya yogo logonet, “Wone kat kogoba Aliku Ala nen, Yoret o, yokkege kenok, nit yo'nirage nogo liirogon eeka'lek niinok, at pilit lek abet aret ari, liippunuk ndak-ndak ari, eeke menggerak Aliku ALA nen enegen wo'ninake logowak o.

Yeremiya 5:2

It nen, Nit abet aret ndogop eeko logowok o, yinuk, at eenik menggerak Aliku ALA endage kumbunuk yogo o, yinuk, kumbuk mbanggwi kwe, Inoone piliret kumbuk mbanogo yogo menggaarak o,” yinuk, yegerak o.

Yeremiya 5:29

Ti eerit nugwi iigak, an nen onggo eeppiiga'lek teppiyoorak op mbakop? It aakumi togop mban eekwi paga nanini mbake nogo tayo yuwak nduk, eeppiyoorak lek mbakop?

Ala Unde 19:13

It inom menggaarak nogo wi-wi aganakwi, inamendek yogoot waganggwi, eeriyak mage o. Ndi, onggo wogoroorak nduk, ineyabu eeppiyamenggaarak nogo, wogoraga'lek iigak nogo ambi yuurak mage o.

Ala Unde 20:10

Aap ambi nen at inom menggaarak ambi akwe wuke kenok, aap kwe nogo imbirak kambuwak nduk, inoorogo piigo logowak o.

Ala Unde 20:27

Ndi, aap ambi ilik, kwe ambi a, aakumi kanggaatak inogoma nen abinggaanggo paga yogwi iigak aakumi yorage, tili pagangge, eeke kenok, kambuwak nduk, yugum paga togu eerogo wako logowak o. At waremenggaarak kambigin kenok, amiya wundigin nogo ti, wone ambi yuurak lek obaalombok aret oba logowak, yegerak, yoret o,” yinuk, yoreegerak.

Ala Unde 20:6

Kwe ambi ogonggelo mbo punuk, aap alik wuruwak nduk, ngginoorage menggi kwak, it an mbo paninuk aakumi kambak inogoma inom, tili pagangga inom, yoraawak nduk ngginoora nogwe iinok, it aap ti pegiyoorak neebi nen nambokan piinok, inoreewi inenggela'me nen inenggaawak lek eerogo pigin o.

Mika 1:2

At Aliku kinogoba Ala awi alik leenak menggim logonet, “Ndogop eekwi kiigirak o,” yinuk, yokkiraawak nduk, Kit yi aakumi ndi aakumi abok aret yi wae. Kinaruk konenggwi, O nggween inom, o nggween paga wonogwe inom, abok aret yi wae. Kinaruk liirogon konenggwi, Eeko logonip o.

Abakuk 1:12

Kaliku ALA wae. Kat kanggeelik mondok kitok menggendak nogo lek a? Kat nogoba Ala maluk eekeelik nogoba obeelom mban wonage menggendak o. It Mbaben mendek nen nit aaninggin-paaninggin eerogo pinanuwak nduk, koonogo piige, Kat yugum kole lunik kwak ninogoba wae. Nit maluk eekwi onggo ninoba kwippinanuwak nduk, kat nen aret it mippiige, Eereegindak kagi o.

Takariya 11:12

Ineenu ogo mbareegwa, an nen it yorage logonet, “An nen kinake yabu eeke nagagirak onggo wo'niriyak op aret mbakwi kiinok, wo'nugwi, ndi, wo'niriyak lek mbakwi kenok, mbo pugwi, ee'nip o.” Yorage mbareegi, it onggo wu mbuti perak we 30 iluk wo'nereegwaarak.

Maleyaki 1:6

At Omaawi Lombok Menggerak Aliku ALA nen ari logonet, “Aap ambi aput nen ogoba ayuk wuke, ndi, aap ambi ayeloman nen ogoba ake eeke nogo ayuk wuke, eeko menggaarak me, an inogoba kenok, nayuk wuko logorak op aret kwe, wuka'lek nonggop nduk agaarik o. Ndi, it an nayeloman mini nake eeka aret kenok, an nayuk wuko logonet, inagabiti mbako logorak op aret kwe, mbaka'lek ti, nonggop nduk agaarik o,” yinuk, yegerak o. “It aap an neebe unde nen aret an nendage maluk eerogo pogo agaarik o. Nendage maluk eerogo pogo logonet kwe, Nit nonggop negen at endage maluk eerogo pogoorak me, yo'nirage agaarik? yinuk, yogwe,

Maleyaki 2:14

Eeko logonet, Alom nano eekoorak paga eeki o, yinuk, yogo monggotak nogo alom an yokkira o. Kit awo tawe logonet, kinakuwi kinom lambumbinagagwi eyom ti paga Aliku ALA enggaanom, Nit yogop eeko logowok o, yinuk, kinoone yereegutak nogo, yogondak kinakuwi kinom lambumbinagareegwaarak kinoreewi aret iigak kwe, kinoone yereegutak nogo ndak-ndak liirogon eeka'lek taganogo mbo pugwi nogo, Aliku ALA nen kiyareegerak me, alom ti paga eeppinagage agaarik o.

Maleyaki 2:17

Kinoone agan nugwi paga at Aliku ALA koneniyak anggon eerogo pogotak kagak kit nen yogo logonet, “Ninoone nonggop yogwe paga at koneniyak anggon eerogo pogoorak?” yogwe ti paga an yokkira o. Kit nen yogo logonet, “It aakumi maluk eeko menggaarak ti, at Ala nen inooka'lek teppiige me, Op aret eekwi, mbake,” yogwe, ndi, “A'me nggelok eeke menggerak Ala nogo ngge o?” yinuk, yogwe, eekwi ti paga at Aliku ALA kinoone koneniyak anggon eerogo pogotak me nduk, yokkirage agaarik o.

Lukat 23:40

Yoreegerak kwe, ore nogo nen at mberege logonet, “At oba lenggenogo puurak koonggaarak ndak-ndak kat koba lenggenogo pagage me, kat Ala kagabiti mbaka'lek ya?

Oroma 3:8

“Obeelom mendek kenom aruwak nduk maluk eeruwok, yogo menggaarak o,” yinuk, nit yaga'lek niigak kwe, ninendage maluk eeruwak nduk, yogwe, ndi, “It abet aret togop yogo menggaarak o,” yogwe, eeko menggaarak ndak-ndak, nit nen, “Obeelom mendek kenom aruwak nduk, maluk eeruwok o,” yinuk, agan nugu logorak op mbakop? Nit ninendage maluk aruwak nduk agan nugwi ti, Ala nen maluk onggo eeppiyaagin ti, op aret o.

Pelaareegerak 15:13

Ndi, wondet eerogo teppugwi ti eyom paga at eenggime lek we aret teppuurak mage o.

Pelaareegerak 18:10

Kit kinenggela'me time it ambi nen inaagalogwe-inapuri wologwe ilik, komologwe a, agugi inake waganogo kani kumbiigwi, ambi nen iniki koombunuk kugi eeka age, ambi nen magagirak inooka age, ambi nen tili pagangga age, ambi nen kuguruwo nibininaka age,

Pelaareegerak 24:17

Aap nggiru inom, elege moono inom, Meek, mba'nuk inawone ugun-ugun koonogo piigwi, kumi nanu kunduk, Kinamendek wogorogo logonet, ninamendek obaane'me pegak kola woraamunggup o, yinuk, inayum waganggwi, eeriyak mage o.

Pelaareegerak 27:19

It aakumi nggiru inom, elege moono inom, kumi nanu inom, inawone liirogon koonogo piigwi lek ti, pulunik aret logowak o, yogwe iinok, It aakumi abok nen, Abet aret o, yogwe,

Pelaareegerak 5:11

At Aliku kinogoba Ala endage we ugun yuurak ti mage o. Aap ambi nen at endage we ugun agan nage kenok, at Aliku ALA nen aap ti mondok maluk eeppigin o.

1 Tetalonika 4:6

Nit maluk eerit nugu logowok nduk, at Ala nen mii'ninabulik o. Ata, maluk eeka'lek at ake leenak logowok nduk, mii'ninabeegerak me, nit aa'nduk ninoone omaawi paga yokkirogo nogogurak nogo ndak-ndak, maluk togoti eekwi iinok, Ala nen onggo koonogo eeppinanege menggerak me, kinoreeluk ambi maluk eeppege logonet, at akwe kote wuriyak mage o.

Iberani 13:4

It aap kumi kundugume wurinabit nugwi, komologwe tawe ugun wurinabit nugwi, eekwi iinok, Ala nen inowak loonogo maluk onggo wogoraagin me, aap ambi akwe koloorak nduk, lambumbiigwi nogo ti, abu obeelom aret me, tiyappuurak aret o. Ndi, kolage logomenggerik, imbirak nogo yuurak ti kunduk, abu obeelom mban aret me, nogo yugu menggam maluk age kero, arum liirogon logowak o.

Yakobut 5:12

Togop me, nowe-nawot o. Ala endage we lek me ugun yuurak mage o. Mbogut endage inom, nggween endage inom, yi mendek ndi mendek endage abok aret kumbunuk, “Yokkiragi o,” yinuk, yoroorak mage o. Kit maluk yogwe paga Ala nen aaninggin kinoba pinagage kero, “E o,” mbakwi kiinok, “E o,” aret yuurak. Ndi, “Lek o,” mbakwi kiinok, “Lek aret o,” yuurak. Wone iya lombok nogo ti aret yokkiragi o.

Yakobut 5:4

It kineyabu eeppinagagaarak nogo, onggo ndak-ndak wogoroorak kagak eeko nogogutak me, it inoone mumun kokop yokkirogwe yi, iyaanip o. It ando anggen yugu wonok kira wogwe nogo kunduk, inoone yogwe at Omaawi Lombok Menggerak ninogoba nogo, muk aruk konengge agaarik o.

Wayu 21:8

it Ala wone mugurok noorak inagabiti mbaka inom, abet mbariyak ineebi mbaka inom, maluk peyak wurik kagak ugun eerit nega inom, aakumi inooka inom, kumi ugun wurinaka inom, magagirak iyagalo inom, kugiwak amili kungga inom, pilit pugungga inom, it abok aret it logowam pipuk eerogo pereegim kani omoonuk wunuk mban ari menggim nogome mbo nappiyaagin o. Aa'nduk ineenik logonuk, kambemenggaarak kwe, kani omoonu'me nappiyoorak nogo ti, peebi ne ambi kanggwi nogo kokwak aret o,” yinuk, yo'nege kagarak.

Wayu 22:15

it nggeewo pogom eeko menggaarak inom, magagirak iyagalo inom, yawukak mbabilu inom, aap inooka inom, kugi eeka inom, ndi, yi aap ndi aap pilit puguniyak inikilom mbako logonet, pilit-pilit pugungga inom, it perak, o kota time unggwi naga'lek yagat endekem logogun o.