Maleyaki 3:16 - Ala Wone Peenok Peebi Mbanak

¹⁶ Yorage nagagerik, it aap Aliku ALA inagabiti mbako nogogwaarak nogo nen it-it wone mbanggo logonet, it nen yogwi iinok, at Aliku ALA liippege, aruk konengge, eereegerak o. It aap Aliku ALA inagabiti mbakwi, at endage tiyappogo logonet ayuk wukwi, eeko nogogwaarak nogo inendage aberak logowak nduk, at Aliku ALA enggaanom paga mbuku pirik-perek aago paga inendage liiru mbanogo pereegwaarak.

Maleyaki 3:16 ပူးပေါင်းရင်းမြစ်များ

Wakkagagerak 22:12

Yoge mbareegi, at Ala yonggo malayikat nogo nen, “Wulaga ti warugun o. Kaput ambolom ambit aret kwe, ili yuulik an nake mondok nggaruk togon aret wo'negendak ti paga kat abet aret Ala kagabiti mbake keegirak me, kaput ti, oba andi-pandi eeppugun o,” yinuk, yoreegerak.

2 Tamuwen 7:1

At Aliku ALA nen Ndawut awim enaagan-ambokan wonogwe nogo, abok aret tebenogo piinok, aap endagembogut Ndawut awi o nggwok abe wurik me nogome iniki ugun tayenak logowak nduk, eeppege mbareegi,

1 Endagembogut 18:12

yori nage neegak, Aliku ALA Aberiniki nen kat wokkeren o an neenggo'lek me pagi namenggerak wonage keegak, aap Akap pekkeya wage logomenggerik, keebe lek keenok, an noorigin aret o. Nooriyak aret kwe, an kayeloman yi, wulaga mbuuluk paga nen aret Aliku ALA mugurok nage minggirak me, op aret o.

1 Endagembogut 18:3

at Akap nen at awi o nggwok abe wurik arum menggerak Aliku ALA abet mba'nuk agabiti mbake menggerak aap Obaya nogo, woraawak nduk, wiireegerak.

2 Mbinineegwaarak 6:7

Nogoba Ndawut nen Aliku Iterali inogoba Ala endage ki logorak awi wuriyak iniki kooneegerak kwe,

Nekemiya 1:11

nogoba wae. An kayeloman tamban eeke yi inom, it kayeloman mini iniki nen kayuk wuko logonet, tamban eekwi ti inom, karuk liirogon konenu o. Ndi, konengge logomenggendik, o yogondak aret an aap ti, yori unggwage neegak, E o, yuwak nduk, an kayeloman yi, nabuwa mbaru o,” yinuk, tamban eereegirak. An ti, aap endagembogut ake agi toolak wonok nega aret wonagagirak.

Etet 2:23

Yoge mbareegi, wone ti, alom kwaake nagagerik, abet aret mbareegi, it aap ineebe mbere nogo inenggaanok keele yilinogo eyo paga tugumbiyareegwaarak. Ti eereegwaarak nogo abok aret aap endagembogut Akatiwerot enegen kagak it aap inendagembogut eeko menggaarak liiru mbanogo pugwi nogome inom liiru mbanogo pereegwaarak.

Etet 6:1

At aap endagembogut nogo oonikiya ti eyom paga nogo yuurak abu meek eeke mbareegi, at abu'me piinok wonage logonet, eerit nage nagagerak mbuku paga liiru mbanak wonage nogo at enggaanom paga lunuwak nduk, “Wonok woraanip o.” Yorage mbareegi,

Ayup 28:28

Aakumi yorage logonet, Kiniki warak ti, kinogoba Ala kinagabiti mbakwi, Yi wone ndi wone yelok kaga nogo ti, maluk kenok ogole nen mbaganggwi, Eeriyak ti aret o, Yinuk, yereegerak o,” yoragagerak.

Ndawi 10:4

“An iya,” mbarit nogo logonet, Ala mugurok nogwe lek mbo pugwi, “Ala lek,” mba'nuk, ugun koonit nugwi, Eeko menggaarak kwe,

Ndawi 104:33

An kangga'lek awo neenik wonage logonet, Kaliku ALA kale'nggen kaanok nduk, ndawi wake, An awo wonage logonet, Kat nogoba Ala ndawi paga kendage tiyappege, Eeke logogin o.

Ndawi 111:10

Aap iniki warak mamunggolaawok nduk eekwi nogo ti, Aliku ALA inagabiti mbakwi ti aret. Ndi, aap abok aret at wone lengganogo yorage nogo, Mugurok nogwe iinok, Yi wone ndi wone abok ineenu eeppiige menggerak. Togop me, ninoone puk aga'lek mondok-mondok at tiyappogo logowok o.

Ndawi 115:13

It aap Aliku ALA inagabiti mbakwi Inendage warak inom, inendage lek inom, Abok aret ale'nggen inoba piige, Eeke logogin o.

Ndawi 119:63

It aap kat kayuk wukwi, Eeko logorak koone yugu mugurok nogwe, Eeko menggaarak abok aret Ninom niniki kunik minggirak o.

Ndawi 139:4

Kaliku ALA wae. Wone nambe paga awo wumbega'lek neegak, An yuurak nogo kat abok keenu wonage, Eeke menggendak o.

Ndawi 147:11

It aap at inagabiti ombakwi kenok perak, Aliku ALA nen inikilom mbake, Iniki kunik eeginabit wundi wage nogo Yi aap ndi aap iniki ti paga lunik wonogwe iinok, Ale'nggen inombake, Eeke menggerak o.

Ndawi 16:3

It kapuri alik leenak nggween yi paga wonogwe nogo It mban tiyanak mondok iya wonogwe, It eekwi paga nale'nggen alik negen eeppanugwi, Eeko agaarik o.

Ndawi 20:7

It ando inanggweendo paga iniki panggombugwi, It ando inaguda paga iniki panggombugwi, Eeko menggaarak kwe, Nit perak, niniki Aliku ninogoba Ala oba panggonak ogoorik o.

Ndawi 33:18

Togop aret kwe, It aap Aliku ALA inagabiti mbakwi nogo Iniki kunik mban eeginake menggerak me, “Nit kunduk iniki kunik ee'nabigin o,” yinuk, Iniki at paga lunik wonogwe ti, It kanggwi iyo, inagap ndake, Mbi noogelo wonogwe kwe, Ineebe op logowak nduk eeppiige, Eerikit nduk, Aliku ALA nen enegen wogonake menggerak o.

Ndawi 34:15

Aap iniki abe koonak menggaarak nogo Aliku ALA enegen wogoren nege, Iniki puru yogo logonet yogwi iinok, at aruk liirogon konengge, Eeke menggerak kwe,

Ndawi 56:8

An mbaganit o ambime agak nege neegak Kat keenggi linggingge, Nale amburu wangge nogo kayiwa'na toologo pege, Eekendak nogo abok aret Liiru mbanogo pegendak nogo lek a? Liiru mbanak aret wonage me,

Ndawi 56:9

Noone paga, “Yeenggwa niru o,” yokkege neenok, Nawim nogo kole mbaganit nogwe paga Kat Ala nimbirak wonage neenu arigin o.

Ndawi 66:16

Kit Ala kinagabiti mbako monggotak yi wae. Ala nen eeppanit wage kagarak nogo Mbininogo yokkirage neegak, Kinaruk liirogon konenggo logobagip nduk, woraanip o.

Ndawi 94:19

Niniki piirik-paarik lombok ee'nake kenok, Nale'nggen kaakit nduk, eyak wappanege, Eekendak o.

Wundeegwaarak 32:32

yogondak kat nen inomaluk ti lek eerogo pu o, nogoba. Ndi, togop eeriyak lek kenok, aakumi inendage kambuku mbanak me, an nendage inom mbanggendak nogo kagaaru o.”

Kini Wuppiige 13:20

Aap ambi nen aap iniki warak imbirak kunggolage kenok, at iniki warak aret age, Ndi, aap ambi nen aap wi negen imbirak kunggolage kenok perak, at eebe aret maluk eekkolage, Eeko menggaarak.

Yetaya 26:3

Aap ambi Aliku ALA oba panggonak wonage kenok, iniki nu'lek wonage nogo, Iniki ugun mondok tayenak logowak nduk, Aliku ALA nen eeppege menggerak o.

Yetaya 26:8

Kaliku ALA wae. Ninawone amburu mbani woraanok nduk, tokkeego ogoorik o. “Kat kendage kunggwi, koba abekwi, eeruwok lak, ao,” lombok mbako monggoorak.

Yetaya 4:3

It aakumi o Tiyon piinok mbaganemenggaarak o kota Yerutalem wonogwe iinok, “Inili aago o Yerutalem logowak o,” yinuk, liiru mbanak wonage nogo, “Abu abe alik leenak wonogwe o,” yogwe, eeko logogun o.

Yetaya 50:10

Kit kinenggela'me nen at Aliku ALA agabiti mbake, At ayeloman wone ari kenok liirogon eeke, Eeke menggerak ta wonage agaarik o? At o eya paga nageelik apit paga wonage logonet eerit nage nogo nen Aliku ALA abet mbake, At ogoba Ala iniki oba panggombege, Eeruwak o.

Yetaya 65:6

Liiru mbanak nenggaawak paga wonage nogo yi aret. An puk arigin lek eekaatak onggo abu ndak-ndak inoba piige, It maluk eekwi inom, inombomini maluk eeko nogogwaarak inom, maluk onggo mondok nggwik togon inoba kwippiige, Eerigin o, Yereegerak liiru mbanak nogo ti aret. Puut-puut paga inagugi aanggo warogo kani kunit nogwe, Puut-puut teberogon paga meek eerogo panugo logonet eekwi, Eereegwaarak me, Aa'nduk eerit wogo nogogwaarak abok aret onggo mondok a'me nggelok inoba kwippiyaagin o,” yinuk, Aliku ALA nen yegerak o.

Yeremiya 31:18

“At Eparayim nen le ari logonet, an yo'nege konenggirak nogo yi aret. Wam enegen mbolok kenok owaanggo eerogo pogo mengga kwak, niniki koonnaruwak nduk, togop eerogo paneegindak paga niniki koonnagagerak o. Kat nogoba Kaliku Ala aret me, an aa'nduk wonagagi kwak logokit nduk, niyokan wo'neren pani wage logot o.

Yeremiya 8:6

It aakumi yi, yogwe nogo naruk liirogon konengge nagagirak kwe, abe koonak yogwe ambi naruk konengge, An maluk nonggop eeki? mba'nuk, Mbo pi o, yogwe ambi konengge, Eeka'lek aret agarik o. It aap wim namburiyak kuda paga kwi'ndak mbe agan nogo mengga kwak, It yungguninuk waga'lek eeriyak mbakwi nogo mban mugurok nogo menggaarak.

Yetikiyen 9:4

at yoge logonet, “O kota Yerutalem time nege logonet, it yi aakumi ndi aakumi nen, O kota yime maluk ogole warak mendek eerit nogwe yi, ao, yinuk, iniki wakkologwe, le yogwe, eekwi iinok, ineenu agak inenggaawak paga liiru mbanogo piyet o,” yinuk, yoge koneneegirak.

Ndaniyen 12:1

Ari nagagerik, at aakumi inete kwak nogo nen ambinom ari logonet, “Ne ti eyom paga it aakumi kat mendek inarum waka endage abu tiyanak nagawan Mikayen nogo mi'narigin o. Mi'nage kenok, aakumi aaninggin-paaninggin mondok alik negen inoba kwi'narigin o. Aaninggin-paaninggin inoba kwi'narigin nogo ti, yi aakumi ndi aakumi wiganit wundi wogo logonet, inanebunu awo kin aga'lek kuli nen nok, at mi'naremenggerak kuli, aaninggin togop inoba kwi'nageelik kwe, ti eyom paga aret kwi'narigin o. Togop kwe, ne ti eyom paga it aakumi kat mendek Ala ambuku paga inendage liiru mbanak wonage kenok inagap ndarigin o.

Ndaniyen 7:10

At kwi'ndak menggim time nen niyo nage menggi kwak kani wuninogo nagabit nage, Aap ineebe ambik ineenggi lingginiyak meek lombok at ake eekwi, Aap yogolik mendek aago at owagam mi'ndak wonogwe, Ndi, it aap aakumi inowak loongga nogo kwi'na'nuk, aakumi eeko nogogwaarak mbuku paga liiru mbanak nogo ponggonogo pit nogwe, Eekwi iigirak o.

Maleyaki 3:5

“An nen inowak loonogo maluk onggo eeppiyaakit nduk woraagin o. Wage logominggirik, it aap tili pagangga inom, aap kumi ugun-ugun eeginaka inom, pilit pugunogo, Ndogop eeke kagarak, yaga inom, onggo koloorak eyabu eekwi wi-wi eeginaka inom, it aap kumi togwe kunduk, elege moono kunduk, tebenogo piiga inom, it aap nggiru inawone yaga-taga eerogo piiga inom, it an inagabiti nombakulik nogo mendek abok aret, Ndogop eekwi kiigirak o, yinuk, yorage logokit nduk, woraagin o,” yinuk, at Omaawi Lombok Menggerak Aliku ALA nen aret yegerak me, yokkiragi o.

Maleyaki 4:2

It an nendage tiyappogo logonet, nayuk wuko menggaarak iinok perak, oonegen wundi wage logonet, aakumi inagabolo mbiganogo piige menggi kwak, at obeelom eeppiinet nega nogo, wundi wa'nuk, towe kwak wiga agan it obeelom eeppiinet nage logogin o. Tapi aagaluk anggenogona wonage me, wumbugwi iinok, ale'nggen paga kunu wonet nege menggi kwak, it inale'nggen nen togop aret agan nugu logogun o.

Lukat 2:38

Ne ti eyom paga lombok kwe nogo wage nagagerik, “Nogoba Ala wa!” yinuk, at ambi nen aakumi Yerutalem mendek piinogo piya woroorak tokkogwe nogo, elege ndarak abok paganogo yorage nagagerak.

Nappiigak 1:13

O kota Yerutalem unggwi wogo nogogwaarik, it wonogo menggam tilaabaga nogome lagi nogogwaarak. It lagi nogogwaarak nogo ineebe ti, Peterut Yaya imbirak, Yakobut Andereyat imbirak, Piliput Tomat imbirak, Mbarotolomeyut Matiyut imbirak, Alepeyut aput Yakobut togon, at “Ninalik aruwok o,” yaga Timon togon, Yakobut aput Yurat togon, nogo aret.

Nappiigak 10:2

At aap nogo aaganapuri inom abok aret Ala inagabiti warak logonet, Ala wone liippunuk eeko nogogwaarak. At aap koowarak aret me, it Yakuri inamendek lek kenok, yeenggwaarage, tamban mban eeke, eeke nagagerak me,

Nappiigak 2:1

Ne Pendakota eeriyak eyom age mbareegi, it abet mbareegwaarak mendek nogo abok aret ambit me kuwak eeppunuk,

Nappiigak 9:31

Nappogo nogogwaarik, nogome logonet, it Ala apuri o Yureya kuwak eerit nogwe inom, o Nggalileya kuwak eerit nogwe inom, o Tamariya kuwak eerit nogwe inom, ale-pale eeginabit naga'lek iinok, inikiigun logonet, iniki kole ogwe, Aberiniki nen yeenggwaarage kagak inogoba Ala inagabiti mbako logonet, ineebe ambik wigannogwe, eereegwaarak.

Epetut 5:19

Ndi, kit-kit aret kiniki mondok ale'nggen paga ninogoba endage alut eeko logonet, Ndawut ndawi pereegerak nogo inom, ki wone ndawi inom, Ala eeke menggerak ndawi inom, abok aret warit nogo logonip o.

1 Tetalonika 5:11

Togop aret me, kit kiniki eyak wat-wat eekwi, ndi, at ambi nen at ambi iniki kole eekak eekwi, eerit nugwi nogo yogondak ndak-ndak aret eerit nogo logonip o.

1 Tetalonika 5:14

Ndi, noreewi o. It aap iniki nen alik eerit nugwi iinok, inaruk wakwi, aaninggin inoba age kero, inagabiti mbakak nugwi iinok, iniki kwippiigwi, iniki awo kole aga'lek kenok, eyak wappiigwi, ndi, aakumi abok kinoone yanggorogon yorogwe, eeko logonip o.

Iberani 10:24

Ndi, niniki-kiniki kunik eekwi, at ambi nen at ambi obeelom eeppegak eekwi, eeko logonet, at ambi nen at ambi kini wuppegak eeko logowok nduk, liippogo logowok o.

Iberani 12:15

Ala iniki kunik en obeelom eeppinaneegerak nogo mbo pugwi kiyo, liippogo logonip o. Iri'ngga ale warak mendek ambi mbiingga larak paga pegaatak me, mbiingga apit ale age menggi kwak, aap ambi kinenggela'me oone togop agan nege kenok, kit aakumi apit at oone konembunuk, maluk eeriyak koonggwi kiyo, liippogo logonip o.

Iberani 3:13

“Ala nen ninooka'lek kagak,” mba'nuk, maluk eerit nogo logonet, kiniki omaawi eekkinake kero, wone, “Yogondak o,” yereegerak nogo ti, lek aga'lek awo aret wonage me, Ala nen yokkirage nogo, konenggo logonet, kiniki eyak wat-wat yogo logonip o.

Wayu 15:4

Ninogoba o. It taani nen kayuk wukwi, kendage tiyappagagwi, eeka'lek logogun mbaken? Lek aret o. Kat maluk eekeelik kalik leenak obeelom mban menggendak o. Kat mondok a'me nggelok mban inowak loongge menggendak ineenu me, It aakumi inanebunu lombok abok aret kowagam tebe yi wogo logomenggaarik, kalut eeko logogun o,” yinuk, ndawi wakwi iigirak.

Wayu 20:12

Lek age mbaki, it aap inendage lek inendage warak kambeegwaarak inom, it niyo nen ndonggoninabeegerak niyo yenggenak laut inikime wonogwe inom, kambit nogogwaarak kambunuk nogo menggam wonogwe nogo inom, abok aret, wone lengganogo yorage menggim eyo nggwok ogobakkigirik yanggwi lombok lan ari nogo paga aap ambi kwi'ndak wonage nogo, owagam mi'nari wogo mbaka, at eyo ndoonak paga kwi'ndak wonage nogo nen it inalitik-inalitak eeko nogogwaarak inom, aakumi mondok-mondok ineenik aganaburak inendage inom, mbuku alitak paga mbanak wonage me, imbirak waganogo piingge nagaarik, it kangga'lek ineenik logonet eeko nogogwaarak liiru mbanak nogo pekkagak inowak loonogo onggo ndak-ndak eeppiige kagarak.