Lukat 6:25 - Ala Wone Peenok Peebi Mbanak

²⁵ Kit yogondak mbi ndonggoppinagagerak wonogwe yi, peebi abu eekkinabigin me, kinabuwa o. Kit yogondak i'ndok kanggwi yi, peebi kiniki puru ari logonet, le yumunggup me, kinabuwa o.

Lukat 6:25 ပူးပေါင်းရင်းမြစ်များ

Ndawi 49:19

Kanggo logomenggaarik, Inombomini aa'nduk ndak-ndak ndarak nogo Kambunuk nogogwam wonogwe me, inom lambuni nogo logomenggaarik, O eya inigen kaga'lek o apit aago me, time mondok-mondok aret logogun o.

Kini Wuppiige 14:13

Inikime nen andi kogo logonet, inambe paga i'ndok kanggwi, Ndi, inale'nggen mbakwi iigak, irip paga iniki puru ari, Eeko menggaarak.

Kini Wuppiige 30:9

Neenggi warak logonet, mbi abe ndonggok togon naminggirak paga an nen mbo pagage logonet, “Aliku ALA ti, ta o?” ari, Ndi, neenggi lek logonet aakumi inamendek kiraariminggirak paga kat nogoba Ala kendage maluk eerogo pagage, Eerukwak nduk, Yokkege agarik o.

Wone Alom Kibingga 2:2

ndi, i'ndok kambuurak nogo kunduk ti, aap wi yogo mengga kwak aret yuurak me, ambi eekkoloorak lek kagak yogwe kage, eereegirak o.

Wone Alom Kibingga 7:3

Iniki wakkologo nagaatik, iniki obeelom ogo menggaarak me, i'ndok kanggwi ti op negen kwe, Iniki puru ari ti perak, iya o.

Wone Alom Kibingga 7:6

It aap iniki lek wi nen i'ndok kanggwi ti, kuwali paga laruwok nduk, Alok kani kunggaatak tubu-tubu ari menggi kwak yogwe me, Ti kunduk we aanom warogo yogwe kage minggirak.

Yetaya 28:7

Anggur amburu nenok langgok-panggok nugwi, Niyo omaawi mendek nenok nombok-kombok agan nugwi, Eekwi nogo ti, It aap Ala unde inom, Ala nen yorage kagak yoraga inom, nen eekwi nogo ti aret! It nogo ti, niyo omaawi mendek nenok langgok-panggok nugwi, Anggur amburu nenok inoone ugun-ugun agan nugwi, Niyo omaawi mendek nenok, nombok-kombok nugwi, Inabinggaanggo kogo nagaatik, “Ngge kagi?” yinuk, kobak ogwe, Inowak loonggo logonet, “Wone ngge yoroobok?” age, Eeko logonet,

Yetaya 65:13

Togop aret me, Aliku Itok Menggerak ALA nen wone yoragaarak nogo yi aret o. “It an nayeloman mini inambi nonggo logogun kwe, it perak, inambi nengga'lek abu aret wonogwe, Nayeloman mini inagi nonggo logogun kwe, it perak, inagi nengga'lek yi abu mban wonogwe, It an nayeloman mini inale'nggen mban mbako logogun kwe, it perak, inenggali mbakak nugwi,

Yetaya 8:21

It aakumi ti, iniki aaninggin wonogwe, mbi abu wonogwe, eeko logonet, o time yagak-ndagak nugwi, mbi abu kenok inanini nen inowe endagembogut inom, inogoba Ala inom, mbelaappiigwi, ina mbogut paga ni'nogwe,

Yetaya 9:20

Inoreewi ineeben abeenok wonogwe nogo inambi waganogo namenggaarak kwe, abu aret wonogwe, Ineeben abeenok wonogwe nogo inambi namenggaarak kwe, ndonggoppiiga'lek wonogwe, Eekwi kenok, It paga wiganak aret kwe, inamiya nenet nogo logogun o.

Amot 8:10

Inale'nggen nen laago lako logomenggaarak nogo obaane'me inayum maluk nibinik mendek yippunuk, iniki wakkologwe, Ndawi piyanggo logomenggaarak nogo obaane'me leenggu maakwi, Inayum nibinik maluk yippunuk nugwi, Ineeruwak inanobak puluk ko eerogo pakwi, Aap ambi aput ambolom kangge kenok, leenggu maake kwak maakwi, Eeko logowak nduk, Eerogo piyaagin o. Ti eeriminggirak paga ne ti eyom ariyak age yubuni nage kagak, iniki abu alik negen wakko'net unggwogo logogun,” yinuk, at Aliku Itok Menggerak Ala nen yegerak o.

Nakum 1:10

Alok ndele aago menggi kwak, Niyo kumili kunggwi mendek nenok neyak-kweyak agan nogo mengga kwak, at inom wim mbanak ti, togop aret agan nogwe iigak, Wiiringga wiirik kani ne ambit pup eerogo nengge menggi kwak, it togop aret lek eerogo piyaagin o.

Lukat 12:20

Yereegerak kwe, at Ala nen, at aap nogo yoge logonet, Kat aap wi yi, wae! Yogondak oonikiya yi paga aret kat kiniki an wa wage me, kat pipuk eerogo pakendak nogo peebi ta nen unde logogin mbaken o?

Lukat 13:28

endekem wumbinagamenggerak logonet, aap Abarakam kunduk, Itak kunduk, Yakup kunduk, ndi, it aap Ala nen yorage kagak yoraga abok aret Ala abu'me wonogwe iigo logomonggotik, leenggu maakwi, kineyak nggilik maakwi, eeko logomunggup o.

Lukat 6:24

Ndi, kit kineenggi warak wonogwe yi perak, kiniki muk ugun tayenak wonogwe me, kinabuwa o.

Lukat 6:26

It aakumi yi, inombomini nen aap pilit wone yorogwe iigak kwe, tiyappiigo nogogwaarak nogo ndak-ndak, it aap abok nen kinendage tiyappinagagwi iinok, kinabuwa o,” yinuk, yoragagerak.

Lukat 8:53

Yorage mbareegi, it aakumi nen kolaga nogo abu kanggerak ineenu me, at agi'ndok kambeegwaarak.

Epetut 5:4

Kumi inabok mban agan nugwi, elege negen ugun i'ndok kambuurak mban agan nugwi, iniki kumi paga mban lunik logonet, inoonewak agan nugwi, eekwi ti mendek abok aret yuurak lek maluk mendek kagak agan nugwi me, kit Ala apuri kenok togop yuurak mondok mage. Ata, Ala, “Wa!” mban yoge logonip o.

1 Tetalonika 5:3

It aakumi nen, “Wone ambi ninoba aga'lek nit abok obeelom aret me, niniki ale'nggen aret ogoorik o,” yogwe iigak, kwe abila aagaluk nda'nariyak eenggo'lek me, enegen pagak ari nogo pogom, ninowe abera'lek me wage logonet, mondok lek eerogo piya woraagin me, it ambi mbo nagun abu lek aret o.

Yakobut 4:9

Kiniki puru yogo logonet, le yogwe, leenggup maakwi, eeko logonip o. Kit i'ndok kanggwi, kinale'nggen yogwe, eekwi ti mbo punuk, kiniki puru yogo logonet, leenggu maako logonip o.

Wayu 3:17

It nogo nen, Ninigen mbuk ninagap mbelanak nineenggi lek niniki ale'nggen mondok lek aaninggin ndugu aago nugu logonet, agan nugu monggoorak kogo o, yinuk, mbaka'lek logonet, Nit ninamendek ambi lek ti lek, abok aret wonage me, nineenggi warak aret o, yinuk, yogo menggaarak me, it eeko logorak yoraawak nduk, yoriyak wone ambi yokkiri o.

1 Tamuwen 2:5

It aa'nduk mbi ndonggorogon nonggo nogogwaarak nogo, Mbi abu nen yabu kwaakwi, Ndi, it aa'nduk mbi abu wonogogwaarak nogo, Yogondak inambi ndonggorogon nunggwi, Eeko agaarik o. Kwe aa'nduk wubili wonagagerak nogo, Yogondak aagalogwe 7 ndaganake kagak kwe, At aa'nduk aagalogwe apit ndaganake nagagerak nogo, Yogondak elege ndake menggim nggilit agaarak wonage o.