Lukat 20:20 - Ala Wone Peenok Peebi Mbanak

²⁰ It Ala wone liiru mbanak unde inom, it aap Ala unde inoweewi inom, nogo nen Yetut inigen wonok nugu logowak nduk, inawuri nappiyareegwaarak. Inawuri nappiyareegwaarak nogo nen, “Yetut oone ninggin yemenggerak paga yilumbunuk, eebe pigogo aakumi inarum menggerak gubernur nogo nen awone mbaniyak at obaalombok aret me, awone mbanuwak nduk, pi nawok o,” yinuk, “Nit aap abet ninombaruwak,” mba'nuk, inoone abet ndom-ndom agan nugu nogogwaarak.

Lukat 20:20 ပူးပေါင်းရင်းမြစ်များ

2 Tamuwen 14:2

kwe ambi iniki ngget o Tekowa time wonage me wa nawak nduk, aap ambi nappereegerak kwe nogo wonok wage mbareegi, Yowap nen kwe nogo yoge logonet, “Kwe yi wae! Aakumi inayum abe mendek yikkologwe, ngguu'mo wappunuk amburu inagabolo paga mbenanggologwe, eeka'lek aap kanggwi iinok, inerabun ndoombunuk, netik-netak inale yogo mengga kwak, kat pilit togop aret eeppunuk,

Ndawi 38:12

It nenggaawak lek eerogo paniyak mbakwi nen Keele pogo mengga kwak ee'nakwi, It maluk eeppaniyak mbakwi nogo nen, “Nonggop eerogo lek eeppuwok o,” yinuk, yogwe, O kubondendok nen nok oonikiya ari wage kagak, Nambokan laganuwok nduk, kote wone koonogo pugwi, Eeko agaarik o.

Ndawi 66:3

Kinogoba Ala yogo logonet, “Kat iya tit eerit nage paga ninamineeri ne agan nage, Komaawi ambik lombok menggendak paga Kawim inagabiti nen yipik agan kabu'me ari wogwe,

Ndawi 81:15

It aakumi Naliku ALA ineebi nombakwi nogo Yipik agan nabu'me kwi'nari wogo logonetak me, Aaninggin inoba piyaminggirak mondok-mondok inoba wonage kagak,

Yeremiya 18:18

Yorage mbareegi, it aap ineebi nombakwi nen yogo logonet, “It aap Ala unde nen eeko logorak wone mamunnirogwe nogo lek age, it aap iniki warak nen ninaruk wakwi nogo lek age, ndi, Ala nen yorage kagak yoraga nen nit yo'nirogwe nogo lek age, eerigin lek me, aap Yeremiya ari menggerak ti, lek eerogo puurak koonuwok nduk, woraanip o. At wone yo'nirage nogo aret abut laganogo at yogwi, ndi, at, Yogop eeriyak, ndogop eeriyak, yo'nirage liippega'lek mbo pugwi, eekwi paga oone lek arigin me, eeruwok aret o,” yinuk, yereegwaarak me,

Yeremiya 20:10

It aakumi apit aret nen, Inamineeri ne agan noorak mendek yi o ndi o ndak warit nege o. At eekerak yora nawi, yora nawi, yinuk, Inoone mumun paga yogwe naruk konengge agarik o. Noreewi kunduk nen an ambi eeriminggirak paga yilunnabuwok nduk, to'neego logonet, Ambokan laganemenggaarak paga yigeebu wangge kagak Nit tebenogo punuk, oone omaawi paga yo'nirage nagaarak nogo onggo eeppuwok o, yinuk, yogo agaarik o.

Ndaniyen 6:4

At Ndaniyen oreewi mbere inawuri inarum waka nogo inom, aap endagembogut awuri yi o ndi nappiyareegerak inom, nogo nen at Ndaniyen endage tiyak ari kenok, aap endagembogut nen yabu eeriyak yoge nogo, eeke logonet maluk ambi eekerak wonage kero, oba lenggeniyak nduk, kwaareegwaarak mendek, lek aret kogogwaarak. At aap endagembogut amendek ambi wagangge lek li'lak mban eeke, Eeriyak, yoge nogo taganogo mbo pege lek ndak-ndak aret eeke, eeke nagagerak me, at maluk eeke ambi kwaakkaga'lek aret wonogogwaarak.

Matiyut 27:2

eebe keele maarogo at o unde gubernur endage Pilatut nogo wonok iri nogogwaarak.

Marakut 3:2

Kage kagak, it aakumi nogome nen, “Tamban eekwi paga aap yi obeelom eeke kaamun a, lek a?” yinuk, inoone at oba puwok nduk, inigen pippak ugo nogogwaarak.

Lukat 20:21

Agan Yetut owagam nogo nogogwaarik, kin wokkogo logonet, “Ngguru wae! Kat wone ari menggendak inom, mamunirage menggendak inom, ti abet mban ari logonet, aap ambi iya, ndi, ambi meek, ti mbaka'lek nit eekwi paga Ala ari menggerak wone pagak togon mamunnirage menggendak nineenu me,

Lukat 20:26

At wone yoragagerak nogo paga aakumi inenggaanom wone ambi yilinogo oba puurak meek kenok, we, “Wi!” yinuk, puk ogogwaarak.

2 Peterut 2:3

It aap mamuniraga ti nen ambi kolaawok nduk, kinambokan laganggo logonet, inoone ugun pilit pugunogo yokkirogo logogun o. Togop yokkirogo logomenggaarak kwe, it eekwi paga at inowak loombunuk maluk inoba piyoorak maan koonogo pereegerak Ala nogo ti, we ugun maanggo yugu logonet nogo lumok ari wonage lek o. Ata, ineebe lek eerogo piyoorak nduk abu li'luk eerak aret wonage agaarik o.