Lukat 1:78 - Ala Wone Peenok Peebi Mbanak

⁷⁸ Ninogoba Ala nen mbo pinanegeelik liirogon aret ninabuwa nen obeelom eeppinanege me, o kilim nagake menggi kwak, eya agi nen niya wambi wage logonet,

Lukat 1:78 ပူးပေါင်းရင်းမြစ်များ

Ndawi 25:6

Kaliku ALA wae. O aa'nduk lombok nen mondok iya tit aakumi inabuwa mbake, Kiniki kunik eeginabit wundi wage, Eerit nage menggendak nogo abeke logot o.

Yetaya 11:1

Eyo muurik andokon Itayi paga nen agarip ndake, Omanggen paga agarip ndappunuk, anggen yege, Eerigin o.

Yetaya 42:16

It inigen mbuk negen wonogwe nogo tu ineenggo'lek me tu nigiren nage, It tu nogolik nogo paga wogoren nage, Tu apit aago paga nogwe iyo, nambokan wogwe iigak an naa'nduk tu eya eerogo pit nage, Tu tiyak-tebek paga nogwe iyo, an kagaarogo pit nage, Eerigin o. It inake eeriyak nogo ti aret. An mbo piyaagin lek abet aret eerigin o.

Yetaya 63:15

Abeko nogogwaarik, Aliku ALA yogo logonet, “Ai, ninogoba Ala. Kat mbogut paga wone lengganogo yorage menggenom abu tiyanak alik leenak keenok, Wi! kugwi nogome nen kenegen wu'niya mok o. Kat keebabunik logonet, komaawi paga eeppinaniyak mbake nagagindak nogo nonggop aga o? Ninabuwa nen yanggorogon eeppinaniyak nogo eeppinanega'lek aret agandik o!

Yetaya 63:7

At Aliku ALA ninabuwa nen liirogon eeppinanege nogo paganogo yorage, At endage tiyappuwak nduk, eerogo pinanege menggerak nogo yoranet nage, Eeke logogin o. Aliku ALA nen eerogo pinanege, Nit at apuri Iterali paga wiganak obeelom mendek eeppinanege, At ninabuwa nen liirogon obeelom eeppinanege, Eereegerak abok aret nogo ndak-ndak at endage tiyappuwak nduk agan nage logogin o.

Takariya 3:8

Aap Ala unde inowe at Yotuwa inom, it at oreewi inom, kwi'ndak wonogwe ti inom, peebi eeri woroorak wakkagak it aret me, wone yi, liirogon konenggo logowak o. An nayeloman endage, Agarip o, yogo logorak nogo nappi woraagin o.

Takariya 6:12

Yirippege logomenggendik, At Omaawi Lombok Menggerak Aliku ALA nen yegerak nogo yi aret o, yinuk, at yoge logonet, Aap ambi endage, Agarip, toonak nogo at yi aret o. At wonage logowam nen agarip ndarogo wunake, Aliku ALA awi wurogo pege, eeke logogin o.

Maleyaki 4:2

It an nendage tiyappogo logonet, nayuk wuko menggaarak iinok perak, oonegen wundi wage logonet, aakumi inagabolo mbiganogo piige menggi kwak, at obeelom eeppiinet nega nogo, wundi wa'nuk, towe kwak wiga agan it obeelom eeppiinet nage logogin o. Tapi aagaluk anggenogona wonage me, wumbugwi iinok, ale'nggen paga kunu wonet nege menggi kwak, it inale'nggen nen togop aret agan nugu logogun o.

Linggineegwaarak 24:17

At eebe kage kwe, yogondak lek o. Eebe liippege kwe, nda lombok wonage o. Yakup ombowologwe wiganak inenggela'me nen ndowan ambi wundi wage, Iterali inenggela'me nen ineenu agak muun mbanak ambi kin age, Eeke logomenggerik, Aakumi Mowap inoweewi inenggaawak yigirogo piige, Aap Tet ombowologwe abok aret inanobak aan lebenogo piige, Eerit nage logonet,

Yaya 3:16

At Ala nen yi aap ndi aap abok inabuwa nggwok lombok mbareegerak me, at aput ambolom ndarak an aret nappani wogoragagerak. Togop me, it aakumi iniki noba panggombunuk, abet nombakwi iinok, lek eerogo piyaagin lek ineenik mondok-mondok aret logogun o.

Pilipi 1:8

At Keritut Yetut nen kinabuwa mbake logonet, iniki kunik eekkinake menggerak nogo kokwak, an togon kit ninom niniki mondok kunik me, “It iyaakit lak, ao,” kinombake nogo ti, Ala eenu aret o.

Pilipi 2:1

Keritut kinom kunik me, kiniki eyak wappinagage, at kinabuwa mbake logonet kiniki yanggongginake, eeke kagak, Aberiniki kinom kunik wonogwe, kit mban-mban niniki-kiniki kunik eeko logonet, obeelom eeppiinet nugwi, eeko logorak eekkinake kogotak kenok,

Kolote 3:12

Togop me, at Ala nen kinabuwa mbake logonet, at apuri maluk eeka'lek alik leenak logobagip nduk, miikkinabeegerak me, yum yikkologo mengga kwak kinobaabut ngget mendek eekkologo logonet, aakumi inabuwa mbakwi, kiniki yanggonak paga obeelom eeppiigwi, kiniki tebenak logonet nugwi, kinoone omaawi lek yanggorogon yorogwe, inoone kinoba pinagagwi iinok liippunuk yorogwe,

2 Peterut 1:19

Ti yereegerak kenok, o maan it aap Ala nen wone yorage kagak yorogo nogogwaarak nogo a'me lik yi wagak eeke kogo nogogurik, nit niniki abet mbakwi nogo, mondok nu'lek eerogo pinanegak eeke kogogurak o. O weerikit nduk, kilim nagake kagak, ndowan ambiret abinak ndelenak-welenak ari kogo monggoorak nogo, wundi waga'lek kagak, o apit me ndi wuninogo pogootak eya kenok, niniki ale'nggen age menggi kwak, kinikime awo eya eekkinabi waga'lek kagak, wone yo'nirogo nogogwaarak nogo kiniki kunik eekkologo logonet, liippogo logorak ti, op lombok aret o.

1 Yaya 3:17

Aap ambi eenggi warak nen ore aaninggin oba agaarak enegen kage kwe, abuwa mbaka'lek, “Obaalombok o,” yinuk, mbo pege kenok, Ala nen aakumi inabuwa mbake menggerak nogo mendek inikime wonage abu lek aret mbako logowok o.

Wayu 22:16

Kit an napuri yi awi ndi awi kuwak eerit nogo monggotak nogo, peebi eeriyak wone yi, paganogo yokkira woraawak nduk, nayonggo nege menggerak malayikat ambi nappi wagarak nogo ti, an Yetut nen aret o. O weerikit nduk eeke kagak, laaluguragan ambiret kere ari nogo pogom anebunu Ndawut paga wiganak agarip ndarak nogo an aret o,” yinuk, yo'negerak.