Lukat 1:33 - Ala Wone Peenok Peebi Mbanak

³³ At Yakup ombowologwe wiganak inowe endagembogut logonet wone mondok-mondok lengganinake logogin o. Ndi, at abu'me piige menggim nogo, lek arigin lek mondok-mondok aret logogin o.”

Lukat 1:33 ပူးပေါင်းရင်းမြစ်များ

2 Tamuwen 7:13

Ndi, nendage ki logowak nduk, nawi wurogo paniyak yegerak nogo ti, apuluk ti'nen aret wurigin o. Wuke kenok, at paga wigannarigin nogo nen mban abu'me piige logowam time mondok-mondok wone lengganogo yorage logowak nduk, eeppege logogin o.

2 Tamuwen 7:16

Obeelom eeppege logonet, apuri-ombowologwe ndaganabit nage, abu'me piige, eeke nogo ti, lek arigin lek mondok-mondok aret logogin me, at ndaremenggerak paga nen abu'me piige logowam mondok unde logowak nduk, eeppege logogin o, yinuk, at Aliku ALA nen yegerak, yori nanu o,” yinuk, yoreegerak.

Ndawi 45:6

Nogoba Ala wae. Koone lengganogo yorage menggenom ti, Mondok-mondok aret logogin o. It kabu'me menggaarak inawone mondok koonak mban mbangge menggendak ti, Mbim obate mbanak ti kwak aret me, Kat in wakkagak agan nogo logogun o.

Yetaya 16:5

At Ndawut paga wiganak ambi kin ari wage logomenggerik, At wone lengganogo yorage menggim logonet, Aakumi inabuwa mbake, Liirogon aret wone lengganogo yorage, Eeke paga At abu'me piige logowam mondok omaawi aret arigin o. At aakumi inowak loongge logonet, a'me nggelok inowak loongge paga aakumi obeelom eekwi nogo Mbet-mbet aret wiganinuk nage logogin o.

Yetaya 9:7

At wone lengganogo yorage logowam nggwok wiganinuk nage, Aakumi inom lambunik iniki ugun tayenak wonogwe nogo lek aga'lek kundugu wonage, Eeke logogin o. At Ndawut paga wiganak aret me, At wone lengganogo yorage menggim mi'na'nuk, At abu'me piige menggim wone lengganogo yorage logogin o. At obeelom mban eeppiinet nage, a'me nggelok mban inawone mbangge, Eeke logomenggerak paga At abu'me piige menggim akom kwippiige, Omaawi nu'lek eerogo pege, Eerogo pege kenok, Mondok-mondok aret logogin o. At Omaawi Lombok Menggerak Aliku ALA nen, “Mondok eerikit aret,” mbarit unggwage me, aret eeke logogin o.

Yeremiya 23:5

Aliku ALA nen ari logonet, “Agarip kwak Ndawut paga iniki abe koonak nda'naruwak nduk, kin eeppuurak eyom panggoni wage agaarik o. Wage logomenggerik, at endagembogut a'nuk, iniki warak logonet, wone lengganogo yorage, O yime obeelom mban eeppiinet nage, A'me nggelok liirogon mban eeppiige, Eeke logogin o.

Ndaniyen 2:44

It aap inendagembogut a'nuk wone lengganogo yorogwe ti eyom paga at mbogut unde menggerak Ala nen aap ambi aakumi abu'me piinok logowak nduk mondok-mondok omaawi lombok eerogo pigin me, aakumi nen lek eerogo pugwi, aakumi inambik nen unde eekkologwe, eerugun lek o. At abu'me piinok logowam mippemenggerak nogo nen it aakumi eegu inabu'me piinok menggam abok aret tebenogo piige, lek eerogo piige, eerigin kwe, at abu'me piinok logowam mippemenggerak ti perak, mondok aret logogin o.

Ndaniyen 4:34

Ndi, “Tahun ndogop logorak,” yugu nogo abu aret ari wage mbareegi, an Nebukanetat nena mbogut paga ni'nage neegak, niniki nambokan agagerak nogo nenaame ari wage mbareegi, at Tiyanak Lombok Menggerak nogo alut eeke, at eenik mondok menggerak nogo ayuk wuke, endage tiyappege, eereegirak o. At wone lengganogo yorage menggim omaawi menggerak ti, lek arigin lek mondok omaawi aret wonage, Aakumi nda'narit wundi wogwe iigak, at abu'me piinok menggim nogo mondok wonage, Eerak logogin o.

Ndaniyen 6:26

At Ala ti, kanggeelik mondok-mondok eenik wonage, At abu'me piinok menggim lek ageelik mondok wonage, At wone lengganogo yorage menggim kuli pugu lek itok wonage, Eerak aret agaarik o. At nen wondet eerogo piige, inagap ndarogo piige, Mbogut paga inom, nggween paga inom, ineenu agak eeke, Eerubok mendek iya tit eeke, Eeke menggerak o. At Ndaniyen singa inambeme yonggoliyak nduk aago me, agap ndakerak o. Togop me, an wone lengganogo yokkirage yi, kit yi o ndi o an nabu'me pinaganuk minggim wonogwe abok aret nen at Ndaniyen ogoba Ala kinagabiti mbakwi, at mban ayuk wukwi, eeko logomunggup nduk, wone yi liiru mbanogo wumbigi o,” yinuk, liiru mbanogo wumbereegerak.

Ndaniyen 7:18

Mi'narugun kwe, it aap at Tiyanak Lombok Menggerak apuri alik leenak mendek nen at abu'me piige menggim wone lengganogo yorogo logowak nduk, unde eeppiyaagin me, unde logonet, mondok aret wone lengganogo yorogo logogun o. Yorogwe iigak, lek arigin lek mondok-mondok aret logogin o, yinuk, yo'negerak.

Ndaniyen 7:27

Lek eerogo punuk, it aakumi inabu'me piinok logonet, it inalik iniki koombunuk wone lengganogo yoranet nugwi, inayuk warak logonet, inoone omaawi paga yoranet nugwi, inendage tiyanak logonet agan nugwi, eeko logowam o mbogut abu'me yime abok aret at Tiyanak Lombok Menggerak apuri alik leenak nogo unde eeppiyaagin o. Eeppiyamenggerak unde wonogwe iigak, at abu'me piinok logowam ti, lek arigin lek mondok aret logogin me, it unde eeppiyamenggerak nogo abok aret at abu'me tebe yinuk, ayuk wukwi, at oone ari kenok konenggwi, eeko logogun o, yinuk, yo'negerak o.

Obaya 1:21

It Etawu mendek menggam puut nggelok-nggobok me wonogwe nogo, Inabu'me piinok wone lengganogo yorogo logowok nduk, Inagap ndaka puut Tiyon paga lagi nagun o. Ndi, lagi nanuk, it wone lengganogo yorogwe iigak, inarum logonet, Inowe endagembogut ti, Aliku ALA aret logogin o.

Mika 4:7

It inendop yilugu negen eegu yumbunik wonogwe nogo, inendop abe awi wiganggo logowak nduk, eerogo piige, Ndi, it aakumi wumbiyareegwaarak nogo, inanebunu wakaa'ngget lombok logowak nduk, eerogo piige, Eeke logominggirik, Naliku an ALA nen aret puut Tiyon paga logonet, inowe nendagembogut a'nuk, Ne ti paga nen nok, mondok-mondok wone lengganogo yorage logogin o.

Matiyut 1:1

At Ndawut Abarakam imbirak inombooluk Yetut Keritut ombomini nda'narit wundi wogogwaarak inendage liiru mbanak yi o.

Matiyut 28:18

Yetut nogo inowagam panggo yi wage nagagerik, yorage logonet, “Ala nen mbogut paga inom, nggween paga inom, an unde logokit nduk, awone abok aret kili'nereegerak me,

Lukat 1:34

Yoge mbareegi, at Mariya nen malayikat nogo yoge logonet, “An aap awo nagap mbaangga'lek me, yo'negendak nogo ti, nonggop eerogo nabila arigin o?”

Oroma 9:6

It aakumi Iterali mendek nda'nogogwaarak nogo abok aret Iterali mendek lek o. “Iterali mendek lek,” yokkirage ti, “Ala nen Abarakam abok yoreegerak nogo, mbeyok yereegerak o,” yinuk, an yokkirage lek o.

Nggalatiya 3:29

Ndi, nit Keritut apuri abet aret wonogwe kenok, Abarakam ombowologwe aret me, wone abok yoreegerak nogo, nit aret woorak nduk ogoorik o.

Nggalatiya 6:16

It wone ti paga panggombunuk, eerit nugwi nogo inom, ndi, Iterali mendek kwe, it abet mbakwi paga Ala apuri ogwe nogo inom, yi aakumi ndi aakumi abok aret Ala nen inabuwa mbake logonet, inomaluk mbo nappunuk iniki ugun tayenak ale'nggen logowak nduk, eeppiige logogin o.

Pilipi 3:3

“Neebe ndogop eeppaneegwaarak o,” yinuk, niniki ti paga panggombunuk, tiyappugwi lek o. Ala Aberiniki nen ninikime yo'nirage kagak, Ala alut eekwi, Keritut Yetut ee'ninabeegerak nogo tiyappugwi, eeko monggoorak nogo ti, ninagabolo abe mbanak nit aret o.

Iberani 1:8

at aput eeke logorak awone ari logonet perak, “Nogoba Ala wae. Koone lengganogo yorage menggenom ti, mondok-mondok aret logogin o. It kabu'me menggaarak inawone mondok koonak mban mbangge menggendak ti, Mbim obate mbanak ti kwak aret me, kat in wakkagak agan nogo logogun o.

Wayu 11:15

Yo'nege mbaki, nenegen wonage me, malayikat 6 inarompet oone eeko mbaka, ambi nogo nen arompet nogo oone eeke mbaki, it mbogut paga time nen inoone nggwok yogo logonet, “O nggween paga time aakumi inabu'me piinok menggam abok aret, at ninogoba inom, at leenogo mippereegerak Keritut inom, imbirak inoone konenggo logowok nduk, inabu'me ari waga o. Ari wogwe iinok, Keritut nogo nen inowe endagembogut logonet, mondok-mondok wone lengganogo yorage logogin o,” yinuk, yogwe iigirak.