Kolote 4:12 - Ala Wone Peenok Peebi Mbanak

¹² Ndi, at kinoreeluk Epaparat inom keyage wappinagage o. At Keritut Yetut ayeloman aret me, kit abet mbareegutak nogo mondok nu'lek porogo logonet, kiniki kole ogwe, ndi, “Ala nen nit eeriyak ninombareegerak nogo yi aret o,” yinuk, abet mbako logonet, eerit nogwe, eekwi kiyaawak nduk, abuwa warak nggo-nggo logonet kinake tamban eeke menggerak o.

Kolote 4:12 ပူးပေါင်းရင်းမြစ်များ

Matiyut 5:48

Kit kinogoba mbogut paga mendek abu obeelom lombok menggerak nogo ndak-ndak, kit abu obeelom togop aret logonip o,” yinuk, yoragagerak.

Lukat 1:1

Nogoba Teyopilut wae. It aap apit nen yi wone ndi wone nit ninenggela'me arit wagagerak nogo mbininogo liiru mbanuwok nduk eereegwaarak.

Lukat 22:44

Eyak wappege mbareegi, iniki abu puru agan unggwage kagak, abuwa warak nggo-nggo tamban ambinom eereegerak. Eeke kagak, liigak wundeegerak nogo amiya anggen kilirik pogom nggween paga wambit nagagerak.

Yaya 12:26

Aap ambit ambi nen an nake eeriyak mbake kenok, mondok mu'neren aret wage logowak o. An logogin nogome nayeloman kunduk nimbirak time aret logogun o. Ndi, an nake eeke kenok, nogoba nen at tiyappigin o, yinuk, mondok abet aret yokkiragi o,” yoragagerak.

Oroma 15:14

Noreewi o. Kit kiniki mondok obeelom yi mendek ndi mendek abok aret kineenu logonet, kit-kit aret, “At ambi mamunegak eeko logorak op aret,” mba'nuk, yokkirage agarik o.

Oroma 15:30

Noreewi o. Nit abok Keritut abet mbakwi paga, Aberiniki eeppinanege kagak niniki-kiniki kunik wonogwe paga, an eerit noorak mbake nogo wakka'net unggwage me, kit an nake tamban eeko logobagip nduk, an, “Ao,” mbake logonet, yokkirage agarik o.

1 Korindut 14:20

Noreewi o. Kit kiniki koonggwi nogo ti, it wologwe-mbuulogwe iniki koonggo mengga kwak, kiniki togop koonggo logogup o. Ata, it aap iniki warak koonggo menggaarak pogom koonggo logonip o. Maluk eeriyak eekkinake kero, elege awo ngget ndarak maluk ineenggo'lek menggaarak nogo pogom, kit togop aret logonip o.

1 Korindut 2:6

It aap iniki kole kenok perak, wone nit nineenu nogo yorogo monggoorak aret kwe, wone nit nineenu logonet, yorogwe nogo ti, nggween paga wone nogo mendek lek o. Ndi, it aap inayuk warak nggween paga yime menggaarak yogondak lek arit nogwe nogo, wone ineenu logonet, yorogwe nogo mendek lek mban.

2 Korindut 13:11

Ndi, noreewi o. Wone ti abu aret yokkiragi o. Kiniki kole arubagip nduk, eeko logonet, an wone yokkirage yi, inom liippogo logonip o. Kiniki ambit eeppunuk ale'nggen paga lambunik logonip o. At ninabuwa mbake, ndi, niniki ugun tayenak logowok nduk eeppinanege, eeke menggerak Ala nogo nen kinarum aret logogin o.

Nggalatiya 1:10

An yokkirage ti, aakumi inikilom nombaruwak nduk ari ilik, Ala inikilom nombaruwak nduk ari a? Ndi, an aakumi nen tiyappanuwak nduk ari minggirak mbakop? Lek o. An aa'nduk aakumi inikilom mbaruwak nduk ari nagagirak nogo ndak-ndak ari logonetak en, yogondak an Keritut ayeloman logonetak lek o.

Nggalatiya 4:19

Ai, napuri, kit an niniki kunik me, kumi elege enegen paganak yagan wako mengga kwak, kit Ala apuri arubagip nduk, an kinake yagan wake aret wonagagirak kwe, yogondak kit Keritut obaabut ndak-ndak arubagip nduk, ambinom yagan wake agarik o.

Kolote 1:22

Keritut nen wokkiren Ala enggaanom unggwi nage mbaremenggi, Ala nen, “Kit an napuri nake leenak logonet, maluk eeka'lek obeelom aret monggotak me, an noone kinoba pinagagin lek o,” yinuk, yokkiraawak nduk, at eebe aap aret age nagagerik, ninake kambeegerak nogo paga lambunogo pinaneegerak me, yogondak lambunik aret ogoorik o.

Kolote 1:28

Togop me, noreewi o. Kit ninapuri abok aret Keritut kinom kunik logonet, kiniki muk kole agaarak kenok, “Ala owagam wokkiren pinagi nawok,” mba'nuk, Keritut eeke nagagerak wone yokkirogo logonet, kinaruk wakwi, niniki abu kwippunuk, eekkinake mugurok mamunggirogwe, eerit nogo ogoorik o.

Kolote 1:29

Kiniki mondok kole ogwe kiyaakit nduk, Keritut omaawi mondok alik negen eeppanege kagak, an puk aga'lek kit kinake mondok nggwiirit-nggwaarit eeke agarik o.

Kolote 1:7

Wone obeelom wone ti nogo, at ninom niniki kunik Ala ayeloman logonet, ndak-ndak eeko monggoorak Epaparat nogo nen aret mamunggiragagerak o. At Keritut ayeloman logonet, nit kinake eeriyak meek kenok ninobaane'me at aret kulinik-kalinik eeke menggerak me,

Kolote 1:9

Kit togop eerit nogwe ninaruk koneneegurak kuli nen puk aga'lek kulinik-kalinik kinake tamban eeko logonet, Ala nen eeriyak mbake menggerak abok aret Aberiniki nen kineenu eeppinagage logonet, yi wone ndi wone alom abok aret yelok kogwe, ndi, kiniki warak eeppinagage, eeke logowak nduk, Ala yogo monggoorak.

Kolote 4:9

Kinawot Onetimut kunduk ninom niniki kunik me, ninowe Keritut wone mondok liirogon mugurok nage menggerak nogo, imbirak nappiya woraagin me, wogo logomenggaarik, nit yime niigak eeppinanugwi nogo, abok aret yokkira wogwe iyaamunggup o.

1 Tetalonika 5:23

Ndi, yogondak niniki ugun tayenak ale'nggen logowok nduk, eeppinanege menggerak Ala nogo nen, kit kineebe at ake leenogo pake logonet, kinomaluk abu lek eerogo pinagage, ndi, ninowe Yetut Keritut woroorak eyom paga maluk kinoba pinagage kero, kiniki-kineebe abok aret enaani nggelorogon pinagago wonage, eeke logowak o.

Pilemon 1:23

Aap Epaparat Keritut Yetut wone yorage nagagerak nogo paga keele maarogo pereegwaarak yime nimbirak logonet, keyage wakkako o.

Iberani 5:14

omaawi mendek nunggwi iinok perak, aap kole iniki warak pogom, Ala wone mondok liippunuk eekwi me, maluk eeriyak obeelom eeriyak eraambe yelok aret kogo menggaarak.

Iberani 5:7

Maan at Yetut aakumi kwak nggween paga yime nege logonet, kambuurak agabiti nen leenggu maake logonet, oone nggwok paga tamban eeke, “Nagap ndaru o,” yinuk, Ala nggino yoge, eereegerak nogo, ogoba nen yoge kenok aruk konok mban eeke nagagerak me, aput nen tamban eereegerak nogo Ala aruk koneneegerak kwe,

Yakobut 1:1

Kit Yakuri kinanebunu 12 mendek yi o ndi o mbaganit nogogutak nogo, an Yakobut nen ninogoba Ala ninowe Yetut Keritut imbirak inayeloman logonet, keyage wappinagagi o.

Yakobut 1:4

Kit kiniki mondok kole eekkinake, ndi, abu obeelom eekkinake, eeke nogo ambi yobok yigin lek abok ndak-ndak eekkinabuwak nduk aaninggin-paaninggin kinoba age me, kiniki kwi'ndak logonet, waganggo logonip o.

Yakobut 5:16

Togop kenok, kit maluk eeko monggotak nogo, at ambi enggaanom paga paganggwi, at ambi nen at ambi ake tamban eekwi, eeko logomonggotak paga kugi andi eekkinake kenok, obeelom eekkinake logogin o. Aap ambi maluk inikime lek logonet iniki abe koonak paga oone mondok nabek togon tamban eeke kenok, Ala nen mbo pigin lek o. Aruk konenigin aret o.

2 Peterut 1:1

At ninagap ndaka Yetut Keritut ninogoba Ala nogo nen nit obeelom eerogo pinanikit nduk, eereegerak paga wone abet mba'nuk, waganeegurak niniki kunik porogo wonogwe nogo, kit ninom ndak-ndak waganeegurak me, an Timon Peterut Yetut Keritut ayeloman ayonggo nappiigak mendek agago paneegerak nogo nen, kit abok aret wone ambi yokkira o.

Yurat 1:24

Ninowe Yetut Keritut eereegerak paga ninagap ndareegerak at Ala nogo nen nit abet mbareegurak nogo mbo punuk, alik eerit nogwe niyo, ninarum liirogon logomenggerik, “Kit wone ambi kinoba wonage lek abu obeelom aret me, nowagam mi'nari woraanip o,” yinuk, yo'nirage mbaremenggi, nit niniki ale'nggen mbakak at mondok tiyanak menggerak enggaanom mi'nari nawok nduk, wo'niren pinani nagin aret me, yi aakumi ndi aakumi aa'nduk nda'nogogwaarak inom, yogondak ndarak inom, peebi nda'nariyak inom, nit abok ninogoba ambit ninagap ndaka kat aret me, kat aap nggwok kendagembogut komaawi ambik yi aakumi ndi aakumi abok kabu'me logonet, kat koone mban konenggwi, kat kendage mban tiyappagagwi, eeko logowak o. Amin.