Yorage mbareegi, o ne ti eyom paga tut Tiwan penenak tanggal 23 paga at Morekayi nen aap endagembogut ake liiru mbangga wiiragagerak wogo mbareegwa, liiru mbanuwak nduk, yorage logonet, “Tut 12 Arat penenak tanggal 13 paga it aakumi Yakuri mendek aap endagembogut Akatiwerot abu'me piige menggim yi o ndi o wonogwe abok aret, inawi yi kota ndi kota lombok kuwak eeppiinok wonogwe me, it aakumi inoone alik mendek ineegin warak nen a, aap endagembogut abu'me piige menggim o nenaarogo pereegim ambime ineegin warak nen a, it aap inom, kumi inom, wologwe-komologwe inom, inoori wogwe iinok, it Yakuri mendek nen pilak yinuk, inagap ndakkologo logonet, inoorogo piigwi, inenggaawak mondok lek eerogo piigwi, eeppiinok, inamindik-inamendek abok aret kugun waganggo logorak op aret o. Ndi, ne eeriyak yogoorak yi paga it Yakuri mendek nogo, inawim nen inookwi iinok, onggo inooriyak pipuk aago logowak nduk, Wone eeriyak lengganak yi aret o, yinuk, at endagembogut abu'me piige menggim yi o ndi o mippit nogwe, it aakumi inanebunu lombok ineenu eeppiigwi, eeko logonip o, yinuk, liiru mbaninip o.” Yorage mbareegi, aap Morekayi nen yoragagerak nogo ndak-ndak, aap endagembogut endage paga it aakumi inanebunu lombok yi o ndi o wonogwe nogo it inoone paga lombok liiru mbanggo mengga kwak liiru mbanogo pugwi, it aakumi Yakuri mendek kunduk, it inoone paga lombok liiru mbanggo mengga kwak liiru mbanogo pugwi, eeko mbareegwa, aap Morekayi nen aap endagembogut amberaarenggen paga amburu cap eerogo punuk, it Yakuri mendek inom, aap endagembogut abu'me menggaarak inom, at awuri yi o ndi o unde menggaarak inom, yi aakumi ndi aakumi inoweewi nagawan-nagawan inom, at endagembogut abu'me piige menggim o Indiya nen nok, o Metit kuli, o seratus dua puluh tujuh nenaarogo pereegim wonogwe nogo abok aret it aap endagembogut ake lombok aguda ogowa ambik awi wigangge nagagerak nogo mendek paga kwi'na'nuk, mbe agan iranet nogo logowak nduk, wogoragagerak.
Etet 1:22 - Ala Wone Peenok Peebi Mbanak22 “Aap ambi akwe apuri wonage kenok, inarum logorak at aret me, oone konenggo logowak o,” yinuk, at abu'me piige menggim yi o ndi o inoone alitik-alitak wonogwe me, it inoone paga lombok liiru mbanogo nappit nagagerak. အခန်းကိုကြည့်ပါ။ |
Etet 1:22
11 ပူးပေါင်းရင်းမြစ်များ
Ti'nuk, tut aa'nduk penenak tanggal 13 ari wage paga at Kaman nen it aap endagembogut ake liiru mbangga nogo wiiragagerak wogo mbareegwa, it yorage logonet, “Tut 12 Arat penenak tanggal 13 paga it aakumi Yakuri mendek aap inanggok inom, tawe inom, kumi inom, wologwe-komologwe inom, abok aret ne ambit ti paga ambugwi aret inoorit nogo logonet, inenggaawak mondok lek eerogo piinok, inamindik-inamendek kugun waganggo logonip o. Ndi, ne eeriyak yogoorak ti paga yi aakumi ndi aakumi abok aret eeriyak pipuk aago logowak nduk, wone eeriyak lengganak yi aret o, yinuk, at endagembogut abu'me piige menggim yi o ndi o abok aret mippit nogo logonip o, yinuk, liiru mbaninip o.” Yorage mbareegi, yoragagerak nogo ndak-ndak, it aakumi inanebunu lombok yi o ndi o wonogwe nogo it inoone paga lombok liiru mbanggo mengga kwak, liiru mbanogo pogo nogogwaarik, “Aap endagembogut Akatiwerot nen aret yegerak,” mbaruwak nduk, at amberaarenggen nogo paga amburu cap eerogo punuk, aap endagembogut awuri at abu'me menggaarak inom, at awuri yi o ndi o unde menggaarak inom, yi aakumi ndi aakumi inoweewi nagawan-nagawan inom, aap endagembogut abu'me piige menggim yi o ndi o abok aret nappiinet nawak nduk, mbanogo pereegwaarak.
At Kawa aa'nduk lek o. Aram aa'nduk wakkagagerak me, kumi ti, inoone lek logonet, inoreewi inoone liirogon konenggo logowak o. Ibilit nogo nen aap Aram ambo'me laganulik. Ata, kwe ambo'me lagangge mbareegi, kwe nogo nen maluk eereegerak me, “Kumi nen aap mamunirogwe, ndi, it kumi nen aap inabu'me piinok, Yi eeri nak, ndi eeri nak, yorogwe, eeko logorak ti mage o,” yinuk, ari minggirak.
Ayeloman eereegerak ogoba nogo konengge nagagerik, ayeloman at ambokan laganeegerak kagak kwe, iniki mondok iya lombok kooneegerak mbareegi, Wi! ireegerak. It aakumi inikiigun nggween paga mendek yogondak wonogwe nogo it inom eeko logonet, iniki ngget paga iya negen koonggo menggaarak kwe, it Ala apuri iniki eya aganabeegerak nogo perak, iniki lek logonet, meek negen koonggo menggaarak iigi o.
“Kit yi aakumi ndi aakumi inom, aakumi kinanebunu lombok inom, kinoone alitak yogo monggotak inom, kit o nggween paga wonogwe nogo abok aret, Wa! yokkiragi o. Kit eerit nogwe paga kinale'nggen mban mbarit wundi wogo logomunggup o. An kinowe nendagembogut Nebukanetat nen ineenu agak inom, eerubok mendek iya tit inom, at Tiyanak Lombok Menggerak Ala nen eeke kagagirak nogo nale'nggen nen yokkira o.
It aap Tarerak, Metak, Abe'nego inogoba Ala nen it inagap ndakerak kwak kugi nen ambi togop eeriyak meek me, aap ambiriluk ambi kit yi aakumi ndi aakumi kinenggela'me nen, kinanebunu lombok kinenggela'me nen, kinoone alitak yogo monggotak kinenggela'me nen, it inogoba Ala ti, meek eerogo pugwi iinok, ineebe mondok nibik-nobak eerogo piigwi, inawi wurik minogo nappugwi, eeriyak o, yinuk, an Nebukanetat nogo nen aret wone yi lengganogo wumbigi o,” yinuk, yoragagerak.