Epetut 5:2 - Ala Wone Peenok Peebi Mbanak

² Ala ake warogo kani kunggwi iinok, Ala nen obari obeelom kage menggi kwak, at Keritut ninabuwa nen, “Inake kambikit,” mba'nuk, ninake kambeegerak nogo ndak-ndak, nabuwa-kabuwa mbako logonet, at ambi obeelom eeppegak eeko logonip o.

Epetut 5:2 ပူးပေါင်းရင်းမြစ်များ

Wakkagagerak 8:21

Nogo warogo kani kuneegerak obari Aliku ALA ogobak me nage mbareegi, iniki ale'nggen age nagagerik, iniki nen mbake logonet, “It aakumi yi, wologwe-mbuulogwe paga nen maluk eeriyak koonggo logogun aret kwe, koonggwi iinok, an nen o nggween paga yime pulunogo piigirak kokwak, peebi togop ambi pulunogo piinok, maluk eeppiige logogin abu lek o. Ndi, yi mendek ndi mendek ogobakkigireegirak ineenik nugu menggaarak mendek yogondak inookirak kokwak peebi togop ambi inoorigin mondok lek o.

Wundeegwaarak 29:18

eebe nogo abok aret kani kunggo logowam nogome kani kunumunggun o. Ti eeriyak nogo ti, Naliku ALA nake warogo kani kunggwi iinok, obari obeelom kage logonet, niniki ale'nggen kaakit nduk, eeriyak nogo ti aret.

Wundeegwaarak 29:25

Ti eekwi iinok, Naliku an ALA obari abe kage logonet, niniki ale'nggen mbarikit nduk, ineenggime nen waganogo Naliku ALA nake warogo kani kunemenggendak nogo inom kani kunumunggun o.

Ala Unde 1:13

Ndi, it inaanggo unde nen aanagale inom, aawi inom, niyo paga koorogo pugwi iinok, aap an neebe unde nen mbanak nogo abok aret waganogo kani nengge me nogome nippogo logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake warogo kani kunggo logorak nogo ti aret.

Ala Unde 1:17

ndi, towe a'naabit kundugu kagak amik mban meyanogo enaani aret kani kunggo menggam kani wunuk ari me time aret kumbege, eeko logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake warogo kani kunggo logorak nogo ti aret, yegerak, yoret o,” yinuk, yoreegerak.

Ala Unde 1:9

it inaanggo unde nen aanagale inom, aawi inom, niyo paga kookwi iinok, it an neebe unde nogo nen yeregerak-peregerak abok aret waganogo kani nengge me nogome nippogo logowak o. Ti eeko logorak nogo ti, Naliku ALA nake kani kunemenggaarak obari abe kage logonet, nale'nggen kaakit nduk, nake warogo kani kunggo logorak nogo ti aret.

Ala Unde 3:16

amok abok aret ti, Naliku ALA namendek aret me, mbi nake pogo mengga kwak, nake kani kunemenggaarak obari abe kage logonet, nale'nggen kaakit nduk, kani kunggo logowak o.

Amot 5:21

“Nalut eeko logonet, inale'nggen nen laago lakwi ti, abu neebi lombok mbake, ogole warak lombok mbake, Eeke minggirak o. Nalut eeruwok nduk, kuwak eekwi ti kunduk, nale'nggen mbake mondok lek aret!

Yaya 13:34

Wone yogop ee'nu, ndogop ee'nu, ngget mendek yokkirage nogo ti, niniki-kiniki kunik eeko logorak ti aret o. An nen kit niniki kunik eekkinake minggi kwak, kit nen niniki-kiniki kunik eeko logonip o.

Yaya 6:51

Mbi kineenik eekkinake minggirak mbogut paga nen wambi wagagirak an aret. Kit mbi yi nogo, nunggwi kiinok, mondok-mondok kineenik aret logomunggup o. Kit aakumi nggween paga monggotak kineenik eekkinabuwak nduk, mbi kinake pigin nogo ti, an neebe aret o,” yinuk, yoragagerak.

Oroma 4:25

At Yetut nogo ti, nit Ala oone taganogo punuk, yiluk-maluk eekwi niinok, waruwak nduk punogo pege, ndi, “Kit aap yi, kinoba lek obeelom aret kiigi o,” yinuk, yuwak nduk, eenik eerogo mippege, eereegerak o.

Oroma 8:3

Wone Muta yoreegerak nogo eeriyak op mbakwi kwe, niniki maan mendek nen, “Eeriyak lek o,” yo'nirage paga eeriyak meek kenok, at Ala nen kooneegerak nogo ti, nit maluk eekwi nogo lek eerogo puwak nduk, at aput lombok aap pogom logonet, maluk eeriyak kagak kwe, eeka'lek wonagagerak paga ninomaluk lek eerogo pereegerak o.

Oroma 8:37

Ti abok aret eeppinanit wogwe iigak, Keritut ninom kunik lombok wonogwe ti paga, inawim tebenogo piinok, ineegin tiyak ari ti, iya negen kwe, nit perak, waka'ngget mondok tiyanak aret wonogo ogoorik o.

1 Korindut 16:14

Kit eekwi ti, abok aret aakumi inabuwa mbako logonet, kinom kunik a'nuk eerit nogo logonip o.

1 Korindut 5:7

Kit time apit eeka'lek neenu aret kwe, roti piiruwak nduk enggela'me pega'lek kwak logobagip nduk, roti piike menggerak mendek kinengge-la'me wonage ti, mbo pinip o. Laago Obaga Nagagerak ndomba ninake wariyak Keritut nogo ti, muk wareegwaarak me, nit laago noorak abu pipuk eerak wonage o.

2 Korindut 2:14

Yime wagagirak wonage me, Ala nen mbo panulik o. It aap wim nambuppunuk, “Wi!” iraawak nduk, aap waka'ngget awuri inom ndegen-ndegen aago kombogonak wogo mengga kwak, nit ndak-ndak ninowe Keritut eegin tiyak ari kenok ninom ndegen-ndegen aago mondok tiyanak nugwi me, Ala mondok alut eeko logowok o. Obari obeelom wiganinuk nage menggi kwak, Keritut eeke menggerak obeelom wone nit paga nen wiganinuk nage logowak nduk, Ala nen eeppinanege menggerak.

2 Korindut 2:15

It aakumi inagap ndarak inom, inagap ndarak lek mendek lek eerogo piige inom, inenggela'me logonet, obari abe Keritut nen Ala ake kungge menggerak nogo pogom nit aret o.

2 Korindut 8:9

Ninowe Yetut Keritut nen kinabuwa mbake logonet, eeppinagareegerak nogo kineenu aret o. At nen, “An aap nggwok mondok tiyanak aret minggirak kwe, it ninom ndak-ndak tiyanak logowok nduk, an tebeppati wambi o,” yinuk, at nggween paga tebekkola wambi wagagerak nogo o.

Nggalatiya 1:4

O yogondak yi paga, it aakumi nggween paga mendek nen maluk mban eerit nogo menggaarak nogo, ninom eekwi niyo, ndinogo wo'ninabikit nduk, at ninogoba Ala mbareegerak nogo ndak-ndak, nit maluk eekwi niinok, ninowe Yetut Keritut nen, “Inake kambikit o,” yinuk, ninake kambeegerak.

Nggalatiya 2:20

An Keritut nimbirak eyo karo-karo paga nabenogo paneegwaarak me, kambeegirak. Ndi, yogondak eerit nage minggirak nogo ti, an nomaawi paga lek o. Ata, Keritut omaawi eeppanege kagak eerit nage minggirak me, an nggween paga yime neegak, at Ala aput nabuwa mba'nuk, nake kambeegerak me, at abet mbake logonet, niniki at oba panggombunuk, eerit nage agarik o.

Epetut 1:4

At Ala nen, “Peebi Keritut nen eeppiyamenggerak paga an napuri maluk inoba lenggenna'lek nenggaanom paga mondok alik leenak logowak o,” yinuk, o nggween yi, awo wakkaga'lek kagak mii'ninabeegerak.

Epetut 3:17

Kit abet mbakwi kiinok Keritut kinikime ye mbanggola unggwage, ndi, eyo omanggen nggween kole paga wuraketak nu'lek menggi kwak, kit togop aret kiniki nu'lek logonet, aakumi kinom kiniki kunik aganakwi, eeko logobagip nduk, kinake tamban eeke minggirak.

Epetut 4:15

Ata, nit aakumi niniki kunik en Ala ari menggerak wone nogo mban yorogo logonet, ninanobak kwak Keritut iniki abu koleewak menggi kwak, nit togop aret niniki kole ee'ninabuwak nduk, eerit nogo logowok o.

Epetut 4:2

Eerit nogo logonet, kiniki tebe yinuk yanggorogon eeppiigwi, kiniki aanaganggenggwi lek nabuwa-kabuwa mbako logonet, yeenggwa-yeenggwa eekwi,

Epetut 5:15

Togop me, kit eerit nogo monggotak nogo, mondok liippunuk eerit nogo logonip o. O yi eyom paga aakumi nen maluk mondok alik negen eerit nogo logorak koonggwi me, kiniki lek we ugun eerit nogo logorak ti mage o. Ata, kiniki mondok warak logonet, “O yogondak obeelom eeriyak ambi yi, nanonggwan agaarak me, eerikit o,” mba'nuk, eerit nogo logonip o.

Epetut 5:25

Ndi, kit aap yi wae. Kit kinakuwi warak kenok, Keritut nen nit Ala apuri yi awi ndi awi monggoorak nogo, ninabuwa mbake logonet, “Inake kambikit o,” yinuk, ninake kambeegerak nogo kwak, kit kinakuwi togop aret inabuwa inombako logonet, obeelom eeppiigo logonip o.

Pelaareegerak 27:6

Ata, yugum itok tumbu paga mban at Aliku kinogoba Ala ake warogo kani kunggak ogobakkigirogo punuk, at Aliku kinogoba Ala ake warogo wogoriyak mendek inom,

Pilipi 4:18

Kit nappani wogogutak nogo, abok aret waganeegirak me, lek aga'lek wonage aret o. Ala ake pugu kani kunggwi obari obeelom kenok Ala nen, “Op wo'nega o,” yinuk, iniki ale'nggen mbake menggi kwak, kit an nake pugu aap Epapororitut nen wo'niruwak nduk nappi wogogutak nogo, wonok niri wage mbareegi, wagangge nagagirik, ndiinik-piinik agago pereegirak lek aga'lek wonage aret o.

Kolote 3:14

Yokkiragarak ti abok aret eerit nogo logonet, kit kiniki ambit lambunik ale'nggen nggwok logorak alom nogo ti, yum yippunuk inobate keele nggerenggologo mengga kwak niniki-kiniki kunik aganakwi nogo aret me, ti inom aret eerit nogo logonip o.

1 Tetalonika 4:9

Kinoreewi kinom kiniki kunik aganabit nugwi nogo ti, Ala nen muk mamunggiragagerak me, wone ti mendek ambi liiru mbanggiroorak lek aret kagi o.

1 Timotiyut 2:6

Yi aakumi ndi aakumi abok aret at eebe paga inonggo mbambunuk, wondet agago piyareegerak. Ti eereegerak nogo ti, Ala nen yi aap ndi aap abok eeppiyoorak kooneegerak pagak yuurak eyom panggoni wagagerak me, aret pagak yereegerak.

1 Timotiyut 4:12

Kat keebe awo tawe aret me nduk, aakumi nen tebenogo pagarak ti mage o. Ari menggendak inom, eeke menggendak inom, aakumi kiniki kunik aganake menggendak inom, Ala wone abet mbake menggendak inom, maluk eerukwak, kenegen tebenak nege menggendak nogo inom, eeke ti paga it aap abet mbako menggaarak kat in wakkagak logonet, eeke logot o.

Titut 2:14

Nit yi maluk ndi maluk eeko monggoorak nogo eeko logokwak ninonggo mbanogo piinogo pinanege, ndi, “An napuri nake leenak logonet, obeelom eeriyak iniki aganggen paga eerit nugu logowak,” mba'nuk, ninomaluk koorogo pinanege, eerikit nduk, nit ninake niya wagagerak.

Iberani 8:3

At Ala unde inowe nggwok nogo ti, yi mendek ndi mendek Ala ake pege, at ake warogo wogoge, eeke logowak nduk, leenogo mippogo menggaarak nogo ndak-ndak, Ala unde nit ninowe nggwok yi nogo kunduk, ninake eeke logonet, at we eeke logorak meek o. At togon amendek ambi Ala ake puurak aret o.

Iberani 9:14

Keritut amiya ti perak, iya lombok me, ninomaluk koo'ninaburak meek mbakop? Lek o. At mondok itok menggerak Aberiniki nen eeppege kagak, ndomba awinde-obande aago lek obeelom nogo pogom iniki nen at eebe aret nit ninake Ala wogoreegerak me, yogondak nit Ala mondok eenik itok menggerak nogo, ake eeko logowok nduk, wone aa'nduk aanom warogo mugurok nogwe niigak, ninomaluk lek aga'lek abe'nagak mban eeke kagak kambit nogo nogogurak nogo, at amiya paga lek eerogo punuk, mondok obeelom eerogo pinaniyak op aret mbako logowok o.

Iberani 9:23

Togop me, mbogut paga eeko logorak ogut wakkagak eeko nogogwaarak yi nogo ti, obeelom aruwak nduk amiya paga togop aret kooppunuk eeko nogogwaarak kwe, mbogut paga nen eeko logorak yi mendek ndi mendek ti perak, iya me, obeelom aruwak nduk, tapi-ndomba amiya paga kooriyak meek o. Ata, amiya omaawi alik mendek paga kooriyak perak op o.

Iberani 9:26

At Ala unde inowe nggwok nogo nen tapi-ndomba amiya wonok tahun ambi eeke kenok, unggwagak eeke nagagi kwak, Keritut nen at amiya paga togop eeke logonetak en, at o wakkagagerak kuli nen nok, yogondak kuli yagan wakak mban eeke logonetak kwe, at amiya lombok paga yi maluk ndi maluk abok aret lek eerogo pikit nduk, o age yobok yogondak panggoni wage yi paga, “Inake kambikit o,” yinuk, wambi wage nagagerik, ne ambit paga ninake yagan warogo kambeegerak.

1 Peterut 4:8

Aap ambi ore imbirak iniki kunik logomenggerak nogo nen ore maluk ambik eerogo pit nage logomenggerak kwe, imbirak iniki kunik me, “Op aret o,” ari menggi kwak, kit togop aret, “Niniki-kiniki kunik eeko logonip o,” yinuk, wone ambit ti aret yokkiragi o.

1 Yaya 3:16

Nano eekwi paga ninoreewi niniki kunik eeginakwi nogo nineenu ariyak mbakop? Lek o. At Yetut iniki nen, “An aakumi inake nooruwak aret o,” mba'nuk, ninake kambeegerak ti kokwak, nit togon, ninoreewi inabuwa nen inake kambuurak op aret mbakwi kenok, aakumi iniki kunik eeginakwi nogo ti aret.

1 Yaya 3:23

“Kit kiniki an naput Yetut Keritut oba panggombunuk abet mbakwi, ndi, an nen yokkiragagirak nogo ndak-ndak kinoreewi kiniki kunik aganakwi, eeko logonip o,” yinuk, wone lengganogo yo'nirage nogo ti aret.

Wayu 5:9

ndawi ngget mendek wako logonet, “It aakumi inanebunu alitak lombok inom, inoone alitak lombok inom, inagabolo alitak lombok inom, yi aakumi ndi aakumi abok aret wonogwe kwe, Inenggela'me nen ambitak nggiginogo Ala apuri aruwak nduk, kat kooko mbareegwa, kamiya paga inonggo mbaneegindak ti paga mbuku pirik-perek aago keele 7 maarak nogo, kat nen waganogo piiniyak op aret o. It kat kamiya paga inonggo mbaneegindak nogo, ninogoba Ala abu'me piinok, Ala unde logonet, ake eeko logowak nduk leenogo mippiyareegindak me, Inendagembogut logonet, aakumi nggween paga ogu time wonogwe nogo wone lengganogo yorogo logogun o,” yinuk, at yogwi naruk konenggirak. Konengge nagarik, it inoweewi ineebe 24 nogo nen nggitat inom, togolowak mbuti emas paga ogobakkigirik obari abe kaga toolak nogo inom, inalitak lombok porogo logonet, ndawi paga yogwi iigirak o. Obari abe kaga togolowak mbuti emas paga toolak nogo ti, it Ala apuri ake leenak tamban eeko nogogwaarak inoone toolak negen aret kagarak.