Epetut 4:22 - Ala Wone Peenok Peebi Mbanak

²² “Niniki nengge kenok mugurok nogo nogoorak nogo ti, maluk ee'ninaburak kagak mugurok nogo nogoorak kogo,” yinuk, mamunggologogutak me, kinobaabut maan mendek nogo, nggonenogo mbo punuk,

Epetut 4:22 ပူးပေါင်းရင်းမြစ်များ

Ayup 22:23

Kat kiniki tebeppatinuk, komaluk mbo pege logomenggendik, At Omaawi Lombok Menggerak owagam wage, It kame kinom wonogwe nogo maluk eekwi iyo, Mage, yorage,

Kini Wuppiige 11:18

It aap maluk mendek eerit nogwe onggo kologwe ti, lek ariyak mendek kologo menggaarak kwe, It aap awi yumbunit nogo mengga kwak, obeelom mban eerit nogwe onggo ti perak, mondok logorak mendek aret kologo menggaarak.

Yeremiya 17:9

Yi mendek ndi mendek obeelom eerogo puurak ti op aret kwe, Nit niniki ti nen perak, abu maluk lombok logonet, abe eeriyak kagak alik eeriyak yo'nirage menggerak me, Obeelom ariyak, ta nen liippunuk eeriyak mbakop? Meek aret o.

Yeremiya 49:16

Aakumi inaganak waruwak nduk eerogo piige, Iniki wogoppatit nage, eeke nagagerak paga, at aret ambokan lagambatinuk, Yugum eraanu-eraanu me time wonage, puut-puut tiyarogon time unde eeppatinuk wonage, eeke menggerak ti, Towe pen ware kwak at awi tiyarogon wurit wonage kwe, An nen minogo wuppi woraagin o,” yinuk, yegerak me, yokkiragi o.

Obaya 1:3

It inawi puut tiyarogon yugum ambe nggaganak me wuppunuk wonogo logonet, Aap ta nen nit tebenogo nggween paga wuppinani woroorak mbakop? Lek aret o, yinuk, Iniki tiyappakwi paga inambokan laganggologo agaarik o.

Oroma 6:6

Nit maluk ayeloman logonet, niniki maan mendek nen maluk mban eeriyak ee'ninake nogo, ambinom eerit noorak ee'ninake kero, omaawi lek eerogo puwak nduk, Keritut ninom eyo karo-karo paga ninooreegwaarak nineenu me, yokkirogo ogoorik o.

Oroma 7:11

Maluk alom niniki me wonage nogo mi'na'nuk, wone eeriyak mage yugu nogo konembunuk, nambokan lagangge logonet, “Wone yugu nogo taganogo punuk maluk eeriyak nanonggwan agaarak me, eeru o,” yinuk, yo'nege kenok eeke minggirak me, wone yugu nogo nen aret noorogo negen paneegerak agarik o.

2 Korindut 11:3

Waalo oone amburu ndik-ndik kwe Kawa yoge logonet, at ambokan laganeegerak pogom, it aap alik nen inoone amburu ndik-ndik yokkirogwe iinok, “Keritut oone mban konenggo logowok o,” yinuk, abet aret miireegutak nogo mbo punuk, nomonggiren nogwe iyo, nagabiti mbake logonet, yokkirage agarik o.

Nggalatiya 1:13

An it Yakuri inoone mugurok nage logonet, eerit nege nagagirak nogo, kit muk konenggo nogogutak o. Ala apuri kuwak eerit nogo menggaarak nogo, ambi teppiyoorak mbarulik abok aret lek eerogo piyaakit nduk, mondok tigiren-muguren nege nagagirak nogo kineenu o.

Epetut 2:3

It Ala wone taganogo punuk, maluk eeko nogogwaarak paga Ala anini inoba piyoorak wonogogwaarak nogo ndak-ndak, nit kunduk, togop aret niniki maan mendek nen yo'nirage kagak niniki nengge kenok mugurok nogwe, maluk eeriyak ee'ninake kenok eerit nogwe, maluk eeriyak mban koonit nugwi, eeko nogogurak paga Ala anini mondok ninoba pinaniyak aret wonogogurak kwe,

Epetut 4:17

Togop me, noreewi o. “It aakumi Ala wone konenggulik endekem mendek nen we aanom warogo koombunuk, eerit nogo mengga kwak, kit togop eerugup o,” yinuk, ninowe nen yo'nege kenok yokkiragi o.

Epetut 4:25

Togop me noreewi o. Keritut ninom kunik eenggi-iyok kokwak nit aret me, kit-kit aret pilit pugunggo monggotak nogo mbo punuk, kit abok aret wone abet kenok mban yogo logonip o.

Epetut 4:31

Kinoreewi kinom ogoorak wonogwe, neebi-keebi yogwe, nanini-kanini yogwe, wone wakwi, miyuk-meya eerogo piigwi, kinoreewi maluk eeppiigo monggotak nogo mendek abok aret mbo pogo logonip o.

Kolote 2:11

Ndi, at kinom kunik logonet, kinagabolo mbanogo pinagareegerak negen aret ogotik o. Ti eereegerak nogo ti, it aakumi nen eekkinabulik o. Ata, aakumi inagabolo mbanogo piigo mengga kwak, kit maluk eeriyak mban eekkinake menggerak alom nogo, at Keritut nen muk omaawi lek eerogo tebembereegerak me nduk, yokkiragi o.

Titut 3:3

Nit kunduk, maan togop aret nineenggo'lek wi negen wonogwe, wone yo'niragaatak konengga'lek wonogwe, tu alik me nomo agan nogwe, aap ambi ayeloman yoge kenok, “E o,” yinuk, eeke menggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, nanini-kanini yogwe, ti mendek mban eeko nogogurak kwe,

Iberani 12:1

It aap abet mba'nuk, eeko nogogwaarak yogoorak nogo nen, “Nit eeko nogogurak nogo ndak-ndak eekwi iyaamun ilik, lek a?” yinuk, ineebe apit aago wanggerak inigen wo'ninakwi negen wonogwe me, tu mbe agan nogo logonet, ninogowa lek age kero, yi mendek ndi mendek ninoba luurik wonage nogo inom, maluk mendek kagak, nit eeriyak ninikilom mbako logonet, yilinogo pinanege menggerak nogo mendek inom, abok aret nggonenogo mbo punuk, “Mbe agan ti kuli aret mi'nari nanip o,” yinuk, yo'niragagerak nogo, mondok ninogogumbuk a'nuk, mbe agan mi'nari nogo logowok o.

Iberani 3:13

“Ala nen ninooka'lek kagak,” mba'nuk, maluk eerit nogo logonet, kiniki omaawi eekkinake kero, wone, “Yogondak o,” yereegerak nogo ti, lek aga'lek awo aret wonage me, Ala nen yokkirage nogo, konenggo logonet, kiniki eyak wat-wat yogo logonip o.

Yakobut 1:21

Eeriyak lek mendek peyak wurik pogom kagak ugun eekwi, ndi, yi maluk ndi maluk eekwi, eeko monggotak nogo abok aret mbo punuk, kiniki yanggonak logonet, wone ninagap ndariyak wone Ala nen ninikime awi yappinanege menggerak wone nogo mban liirogon waganggo logonip o.

Yakobut 1:26

Kit ambi nen, “An Ala wone liippunuk eeke agarik o,” yinuk, yogo monggotak kwe, kinambe liirogon arum wonaga'lek kinamili irip paga ugun agan nugwi kiinok, kit aret kinambokan laganggologwe, ndi, “An Ala wone liippunuk eeke agarik o,” yogo monggotak nogo ti, aanom warogo aret yogwe, eeko monggotak kiigi o.

1 Peterut 1:18

Kit kinombomini maan mbogut paga unggwi noorak lek kagak we aanom warogo eerit nogo nogogwaarak nogo ndak-ndak, kit togop eekwi kiyo, wu mbuti perak inom, emas inom, yi mendek ndi mendek lek ariyak mendek ti paga kinonggo mbanulik o. Ata, ndomba aagaluk awinde-obande aago lek mondok abe kwak Keritut amiya mondok iya lombok nogo paga kinonggo mbaneegerak nogo kineenu aret o.

1 Peterut 4:3

Kit aa'nduk kinobaabut it aakumi Ala wone konengga'lek nen eeriyak inikilom mba'nuk, eerit nogo mengga kwak, eerit nogo logonet, we ugun uugwe-uugwe mba'nuk eekwi, kiniki nen nengge kenok mugurok nugwi, amburu kumili aganake menggerak mendek ndonggorogon nenet nugwi, ndem unggwogo logonet kwaanggen wakwi, amburu ndonggok togon nenok kumili-kumili agan nogo logonet maluk eekwi, ogole warak kagak kugi eekwi, eeko nogogutak nogo, yogondak ambinom eeka'lek kiinok,

2 Peterut 2:7

Ndi, at aap Lot iniki obeelom aret wonagagerak kwe, it aakumi ti, inenggela'me logonet, Ala wone taganogo punuk, iniki nen nengge kenok ugun-ugun eerit nogwe nogo enegen iige, inoone ugun agan nogwe nogo aruk konengge, eeke logonet, at iniki mondok abe koonak me, “Yi eekwi yi, ao,” yinuk, ko'lu-kii'me iniki mondok wakko'net unggwage Ala nen kage nagagerik, it aakumi ti, pup eerogo piige logonet, at aap obeelom aret me, agap ndareegerak nogo lek a?

1 Tamuwen 1:14

mbake nagagerik, yoge logonet, “Kat amburu kumili aganake nogo mendek nengge nagandik, kumili negen ari nogo ti, ne mande paga nengge logomunggun? Anggur amburu ti, ambinom nagun o.”