Epetut 2:3 - Ala Wone Peenok Peebi Mbanak

³ It Ala wone taganogo punuk, maluk eeko nogogwaarak paga Ala anini inoba piyoorak wonogogwaarak nogo ndak-ndak, nit kunduk, togop aret niniki maan mendek nen yo'nirage kagak niniki nengge kenok mugurok nogwe, maluk eeriyak ee'ninake kenok eerit nogwe, maluk eeriyak mban koonit nugwi, eeko nogogurak paga Ala anini mondok ninoba pinaniyak aret wonogogurak kwe,

Epetut 2:3 ပူးပေါင်းရင်းမြစ်များ

Wakkagagerak 5:3

Ti'nuk, at Aram nogo tahun seratus tiga puluh eeke nagagerik, apuluk ambi at enete-obaabut ndak-ndak aret ndareegerak. Ndake nagagerik, endage, Tet, aret tooneegerak.

Wakkagagerak 6:5

Yi aakumi ndi aakumi nggween paga maluk mban eerit nogwe, it inikime nen yi eeriyak ndi eeriyak koonggwi nogo ti, maluk mban aret koonggwi, eekwi nogo at Aliku ALA nen enegen iige nagagerik,

Wakkagagerak 8:21

Nogo warogo kani kuneegerak obari Aliku ALA ogobak me nage mbareegi, iniki ale'nggen age nagagerik, iniki nen mbake logonet, “It aakumi yi, wologwe-mbuulogwe paga nen maluk eeriyak koonggo logogun aret kwe, koonggwi iinok, an nen o nggween paga yime pulunogo piigirak kokwak, peebi togop ambi pulunogo piinok, maluk eeppiige logogin abu lek o. Ndi, yi mendek ndi mendek ogobakkigireegirak ineenik nugu menggaarak mendek yogondak inookirak kokwak peebi togop ambi inoorigin mondok lek o.

Ayup 14:4

Aap kiik aago ambi nen kikak naka'lek eekkoloorak op mbaken? Lek aret o!

Ayup 25:4

At Ala nogo nen, Aap yi, iniki abe koonak aret kagi o, yoge, Ndi, kumi nen ndaganakaatak inaagalogwe nogo Iniki kikak naka'lek ambi wonogwe iige, Eeriyak ti, nonggoti mbaken?

Ndawi 51:5

Nagalo inikime logonnage logonet maluk lenggenak wonage, Maluk alom ninikime kagak aret nda'nage, Eereegirak kagi o.

Yetaya 53:6

Nit abok aret ndomba kobak aago negen wonogo logonet, tu abe kagak alik paga nogwe, Ninalitik-ninalitak niniki koombunuk eerit nogwe, Eeko nogogurak paga Nit abok aret maluk eekwi onggo, “At nen aret mbanuwak o,” yinuk, Aliku ALA nen at oba pereegerak.

Marakut 4:19

nggween paga mendek mban iniki aberit nugwi, inamendek lek ariyak kagak inikilom mbarit nugwi, yi mendek ndi mendek iniki uugwe mbarit nugwi, ti eerit nugwi paga nen, Ala wone waganeegwaarak nogo mbanogo wuppugwi me, anggen yega'lek nogo pogom aret menggaarak o.

Yaya 1:13

It aap nogo aakumi inapuri ndaganakwi kwak ndaganabulik o. Ndi, aakumi nggween paga mendek nen, “An naput ndarikit,” mba'nuk, ndaganakwi kwak ndaganabulik mban. Ata. Ala nen aret ndaganabeegerak o.

Yaya 8:44

Kit yi, kinogoba Ibilit aret me, at eeriyak mbake menggerak nogo mban, Eeruwok, mbako monggotak. At o aa'nduk nen nok, yogondak kuli aakumi inooka aret menggerak o. Ala ndogop menggerak wone nogo at inikime wonage lek me, Ala ari menggerak nogo at mondok eeka'lek aret agaarik o. At pilit pugungge menggerak itok aret me, pilit pugungga iyagalo at aret logonet, at iniki nen wone ugun-ugun koombunuk, pilit-pilit pugunit nege menggerak.

Nappiigak 14:16

O maan nen, yogondak kuli yi paga yi aakumi ndi aakumi iniki mba'nuk eerit nogwe iigak, Ala nen teppiige menggerak kwe,

Oroma 1:24

Togop eeko nogogwaarak paga, iniki nen uugwe mba'nuk, abu maluk eekulik mendek kagak eerit nugu logonet, it-it aret maluk eekko'net nogo logowak nduk, Ala nen mbo piyareegerak.

Oroma 11:30

Kit endekem konenggulik mendek aa'nduk Ala wone yugu kagak alik eeko nogogutak kwe, it aakumi Yakuri mendek Ala wone taganogo mbo pereegwaarak paga Ala nen kit kinabuwa mba'nuk, teppinagareegerak ti kokwak,

Oroma 13:14

Kiniki maan mendek nen maluk eeriyak eekkinake kenok, “Niniki nengge yi, noba tayok yuwak nduk, nonggop eeri?” yinuk, koonit nugu logogup o. Ata, kineegin-kinarege li'luk aago monggotak kwak, kinowe Yetut Keritut kiniki me liinik logonet, eerit nogo logonip o.

Oroma 2:14

It aakumi endekem konenggulik mendek nogo nen at Muta, “Yogop ee'nu, ndogop ee'nu,” yoreegerak wone nogo kobak logonet kwe, it iniki nen, “Yogop ee'nu, ndogop ee'nu,” yoreegerak wone nogo ndak-ndak aret eekwi kenok ti, kobak logonet kwe, at Muta yoreegerak nogo aret eekwi me,

Oroma 5:10

Nit Ala ninom ogoorak wonogwe niigak, at aput ninake kambeegerak paga nen Ala ninom lambunogo pinaneegerak me, yogondak ninom kunik wonogwe nogo, Keritut eebe eenik agagerak paga ninagap ndarigin lek me nduk, yogo ogotik? Mondok lek o. Ninom kunik wonogwe me, ninagap ndarigin aret mbako logowok o.

Oroma 5:9

Ndi, yogondak at amiya paga Ala nen, “Aap yi, oba lek o,” yinuk, obeelom agago pinaneegerak me, “Peebi Ala nen ninagap ndarigin lek, anini eeppinanigin o,” yinuk, yogo ogotik? Mondok lek o. Ninagap ndarigin aret mbako logowok o.

Oroma 6:12

Togop me, kinagabolo kanggo monggotak mendek kagak kiniki nen nengge nogo mugurok nogo logonet, maluk eeriyak mban eekkinake kero, tebenogo pegak eeko logonip o.

Oroma 7:18

An obeelom eerikit mbakitak kwe, eeriyak meek tit aga o. An aakumi aret me, ninikime obeelom ambi eeriyak ee'naka'lek aret neenu agarik o.

Oroma 9:22

Iniki mba'nuk aret eeke menggerak ti kokwak, Ala ti ndak-ndak aret eeke menggerak me, at nen ari logonet, “Nanini eeppiige, ndi, nomaawi paga eerit nage, eeke neyaawak o,” yinuk, it at anini eeppiige logonet, ineebe pup eerogo piyaakit mbaketak mendek iniki kwippunuk mondok liirogon eeppiige logorak koongge kenok ti, nonggop mbarumunggup?

1 Korindut 4:7

Nit aakumi tiyak-tebek logowok nduk, ta nen koonogo pinanege menggerak mbakop? At nen wokkiraga'lek kit nen mban kologogutak ambi ngge porogo ogotik? Ndi, at nen mban wokkiragagerak kagak, nonggop nduk, kinalik nen kologogutak negen eekko'nok iya-piya eekkologo ogotik?

2 Korindut 7:1

Togop me, noreewi o. Kit an niniki kunik me, Ala nen wone yereegerak ti, nit niinok aret yo'niragagerak me, ninikime nen maluk eeriyak koonggwi, eebe aret eekwi, eeko monggoorak nogo abok aret mbo punuk, Ala ninagabiti mbako logonet, maluk eeka'lek at ake leenak obeelom mban eekwi niyaawak nduk, eeko logowok o.

Nggalatiya 3:22

lek me, Ala nen eeppinaniyak yoreegerak nogo, nit niniki Yetut Keritut abet mbakwi paga eeppinanuwak nduk, tokkogo logonet, “It yi aakumi ndi aakumi abok aret maluk eeko menggaarak paga wam anggenogona narak negen wonogwe,” mbaruwak nduk, Ala nen yereegerak liiru mbanak wonage.

Epetut 4:22

“Niniki nengge kenok mugurok nogo nogoorak nogo ti, maluk ee'ninaburak kagak mugurok nogo nogoorak kogo,” yinuk, mamunggologogutak me, kinobaabut maan mendek nogo, nggonenogo mbo punuk,

Kolote 1:21

Kit aa'nduk maluk eeriyak mban kiniki koombunuk, eerit nogo logonet, Ala kinom ogoorak nda negen aret wonogogutak kwe,

1 Tetalonika 4:13

Noreewi o. It aakumi kambunuk nonggop ogo menggaarak wone nogo, kineenggo'lek logorak ti, nineebi o. Aakumi ando iniki lunik ambi lek me, inore ambi kangge kenok iniki wakkologo mengga kwak, kit kiniki togop aret wakkologo logokwak, mbininogo yokkiraawi o.

1 Tetalonika 5:6

it aakumi ando nogo yugu menggaarak nogo pogom nit togop nogo yugu logorak lek o. Nit nogolumok yaga'lek tum wako logowok o.

1 Timotiyut 6:9

It aap, “Nineenggi warak eekkolaawok,” mbakwi iinok, Tile nen, “Nanonggwan aga o,” yinuk, iniki nggagangge kagak, pagi keele pugu paga enggaanok nggerok togon wake menggi kwak, it aap ti togop aret perak togon maluk eekwi, ndi, “Yi an neebe paga maluk eekkolage,” mbaka'lek iniki ugun nenet nugwi, eerit nugwi paga yobok togon yigeebu wanggo logonet, ineebe mondok wakkolaagun aret o.

Titut 3:3

Nit kunduk, maan togop aret nineenggo'lek wi negen wonogwe, wone yo'niragaatak konengga'lek wonogwe, tu alik me nomo agan nogwe, aap ambi ayeloman yoge kenok, “E o,” yinuk, eeke menggi kwak, nit niniki nengge kenok eeriyak ninikilom mbakwi nogo mban eekwi, eeko nogogurak. Yi mendek ndi mendek eerit nogo logonet, maluk mban eekwi, neebi-keebi yogwe, nanini-kanini yogwe, ti mendek mban eeko nogogurak kwe,

1 Peterut 1:14

Kit aa'nduk Ala kineenggo'lek logonet, kiniki nen nengge kenok ugun-ugun eerit nogo nogogutak nogo, mbo punuk, ogoba ari kenok, aput konembunuk ndak-ndak eeke menggi kwak, kinogoba Ala nen ari kenok mban eerit nogo logonip o.

2 Peterut 2:14

Ti eeko logonet, it inigen alik ambi paga pugwi lek o. Ata, kumi we ugun ya wurinakak nogo mban inigen wogoren nogo logonet, ugun-ugun eeginabit nogo nagaatik, “A! Yi abu eekirak me, ndonggoppanigi,” yinuk, yogolik, nabenak mban eerit nogo logonet, it aap iniki awo kole aga'lek nogo, inenggaanok nggerok yuwak nduk, nomoniren keele pugume piya nogo menggaarak. It yi mendek ndi mendek koloorak uugwe mbako menggaarak me, ti kolaawok nduk, “Wone ngge yoraawok o,” yinuk, iniki koombunuk agan nugwi nogo paga, Ala nen mondok pulunogo piyareegerak wonogo agaarik o.

1 Yaya 2:16

It aap nggween paga mendek nen iniki nengge kenok mugurok nogwe nogo inom, inigen pekkenok, uugwe mbakwi nogo inom, “An koongge mban iya o,” yinuk, wogoppatit nugwi nogo inom, ti eeko menggaarak abok aret eerit nugu logowak nduk ninogoba nen koonggeelik o. Ata, it aap nggween paga mendek nen aret iniki koombunuk, eeko menggaarak o.

1 Yaya 2:8

o apit lek age kagak o eya abe lombok unggwi wage logonet, wone maan yugu nogo aret Keritut nen eerit nage, ndi, kit nen niniki-kiniki kunik eekko'net nugwi, eekwi paga kin age me, wone ngget yugu negen aret kenok, liiru mbanggiragi o.