Amot 9:14 - Ala Wone Peenok Peebi Mbanak

¹⁴ An napuri Iterali kugun wogoren mbo piya namenggaarak nogo, iniyokan wogoren piya wage neenok, Inawi kota-kota langgu-langgu aago nogo, obaane'me wurogo patinuk wonogwe, Ineyabume anggur yaremenggaarak paga amburu toologo nunggwi, Eyo anggen yege menggerak mendek yabume yaremenggaarak paga anggen abe mban mbanogo nunggwi, Eeko logogun o.

Amot 9:14 ပူးပေါင်းရင်းမြစ်များ

Ndawi 107:37

Yabume yi mendek ndi mendek awi yumbunggwi, Anggur awi yakwi, Anggen yege kenok, mbanogo nunggwi, Eereegwaarak.

Ndawi 53:6

It Iterali inagap ndariyak nduk, Puut Tiyon paga nen woraawak lak, ao! At Ala nen at apuri aa'nduk obeelom wonogogwa kwak, Obaane'me obeelom eerogo piige kenok, At Yakup paga wiganak nen inale'nggen mbakwi, Ndi, it Iterali mendek nen ndawi lubuk yogwe, Eeko logogun o.

Yetaya 60:4

At aagalogwe wologwe o nda nen wogwe, Aagalogwe komologwe inaagalogwe yarugu-yonggolak aago wogwe, It abok aret at owagam kuwak ari wogwe, Eekwi ti, Enggaawak pila yinuk, enegen yendok-wandok pegiyaawak o.

Yetaya 61:4

O maan togon kota-kota langgu-langgu eerogo pereegwaarak nogo obaane'me wukwi, O maan togon yi oone ndi oone lek wonagagim aa'nduk wonagagi kwak eerogo pugwi, Eerugun me, Kota-kota maluk eerogo pereegwaarak yi oone ndi oone lek kagak inapuri nda'narit wundi wogo nogogwaarak nogo, aa'nduk wonagagi kwak aret arigin o.

Yetaya 65:21

Napuri nen o time inawi wurogo patemenggaarak nogo, aap inambik nen ye mbanggola unggwogwe, Ndi, anggur awi yaremenggaarak nogo, aap inambik nen anggen mbanogo nunggwi, Eeko logogun lek o. Ata, it nen aret inawi wurogo patinuk time aret ye mbambatinuk wonogwe, Ineyabume anggur yarogo patinuk, anggen mbanogo nunggwi, Eeko logogun o. It ineebe ti, eyo ero ki mban kagak tahun ambik eeke menggi kwak an napuri ineenik nggorek togop aret wonogwe, It an leenogo piyareegirak nogo, ineenggi paga yabu eeppunuk, inale'nggen paga nunggo logonet, ineenik obeelom mban wonogwe, Eeko logogun o.

Yeremiya 12:15

Eeke logominggirik, ti'nuk, inabuwa mba'nuk, yate kwak unde eeppatinuk wonogogwam lombok piya wage, inanggween paga lombok iniyokan wogoren piya wage, eerigin o.

Yeremiya 23:8

Ata, It Iterali paga wiganak o omarip paga pa'nggwe nen, yi o ndi o mappiyareegim nogome nen, wogoren wagagerak mondok eenik menggerak Aliku ALA endage paga yogo o, yinuk, yogo logorak eyom panggoni woraagin me, ari wage kenok, it inanggween paga ye mbambatinuk, wonogo logogun,” yegerak o.

Yeremiya 24:6

It ineebe ti, obeelom aret logowak nduk, nenegen wogoren nege logominggirik, ti'nuk, it iniyokan wogoren o yime piya woraagin o. Piya wa'nuk, o minggwi kwak eerogo piyaagin lek nu'lek wurogo piige, ndi, awi yarak kinggulik kwak yarogo piige, eerigin o.

Yeremiya 29:14

Aliku ALA nen ari logonet, “It an kwaa'nabit nugwi iinok, neyaawak nduk, neebe nigiige logominggirik, keele maarogo piya nogogwam nen iniyokan wogoren wage, it mappiyareegirak yi aakumi ndi aakumi inenggela'me wonogwe me nen kuwak eerogo piinok, kugun wogoren nawak nduk, eeppiyareegim nogome nen iniyokan piya wage, eerigin o,” yinuk, Aliku ALA nen aret yegerak o.

Yeremiya 30:18

At Aliku ALA nen yegerak nogo yi aret. “It Yakup paga wiganak inawi alom paga aa'nduk abe wonogogwa kwak eerogo piige, Inabuwa nen it wonogo menggam inanggween nogo obeelom eerogo pege, Kota ti, yigirik-noonom agagim obaane'me wuruwak nduk, koongge, Ndi, aap inowe endagembogut awi o nggwok abe wurik wonagagim nogome wurik kaawak nduk, eeppiige, Eerigin o.

Yeremiya 30:3

“Napuri Iterali inom, Yekura inom, keele maageren piya nogogwam time me nen iniyokan piya woraagin o, yinuk, Naliku ALA nen aret yagi o. Piya wage logominggirik, it inombomini unde eeppatinuk logowak nduk, inanggween wogoragagim nogome aa'nduk wonogogwa kwak logowak nduk, eerogo piya woroorak eyom abet aret panggoni woraagin o, yinuk, Naliku ALA nen aret yagi o,” yoreegerak.

Yeremiya 31:23

At Omaawi Lombok Menggerak Aliku Iterali inogoba Ala yegerak nogo yi aret. “It an napuri keele maageren piya nogogwam nen iniyokan wogoren piya wage neenok, it aakumi o Yekura wonogwe inom, o Yekura kota-kota menggaarak inom, nen wone aa'nduk yogo nogogwaarak ambinom yogo logorak nogo yi aret. O obeelom eeko menggam yi wae. Puut alik leenak yi wae. Aliku ALA ale'nggen koba pagage logowak o, yinuk, yogo logogun o.

Yeremiya 31:28

Aa'nduk eyo alom kinggwi kwak eerogo piigwi, o minggwi kwak minogo piigwi, pak langgunogo pugwi kwak eerogo piigwi, ineebe lek eerogo piigwi, maluk eeppiigwi, eeruwak nduk, eekwi iigak, nenegen wogoren nege nagagirak ndak-ndak, yogondak o wukwi kwak eekwi, awi yakwi kwak eekwi, eekwi iigak, nenegen wogoren nege logogin o,” yinuk, Aliku ALA nen aret yegerak o.

Yeremiya 31:5

O Tamariya puut-puut teberogon paga time aa'nduk anggur awi yako nogogutak kwak, ambinom yakwi, Kit aap yabu eeka nen awi yappunuk, anggen mbanogo kinale'nggen paga nunggwi, Eeko logomunggup o.

Yeremiya 32:37

Nanini lombok mbake, nanini kani kunik negen wunuk togon wungge, eeke logonet, napuri yi o ndi o mak eerogo nappiyaminggirak logowam time nen, abok aret kuwak eerogo piinok, iniyokan o yime piya wage neenok, it nen o yime iniki ugun tayenak aret logogun o.

Yeremiya 33:11

aakumi inale'nggen nen yogwe, iniki ale'nggen nggelok yi unggwage logonet noone-koone yogwe, kwe aap imbirak lambunggo logonet inoone yogwe, ndi, it aakumi iniki ale'nggen nen, At Aliku ALA abu obeelom aret o. At iniki kunik ee'ninake nogo ti, lek aga'lek mondok-mondok aret ee'ninake menggerak me, At Omaawi Lombok Menggerak Aliku ALA, Wa! yogo logowok o, yinuk, an nake wo'niri wogo logonet yogwe, eekwi nogo ambinom inaruk konenggo logogun, yegerak o. Aliku ALA nen ari logonet, O aa'nduk obeelom lombok wonagagi kwak eerogo pigin o, yinuk, yegerak me nduk yagi o.

Yeremiya 33:7

It Yekura inom, Iterali inom, keele maageren nogogwam nen wogoren piya wa'nuk, aa'nduk wonogogwa kwak eerogo piyaagin o.

Yetikiyen 16:53

“Togop aret kwe, It op negen wonogwe iigo o, yinuk, yuwak nduk, inoreeluk Yerutalem eerit nage nagagerak paga endage maluk age, enggali age, eereegerak nogo, Op aret o, yinuk, wagangge logowak nduk, o Torom aagalogwe komologwe inom, o Tamariya aagalogwe komologwe inom, aa'nduk wonogogwa kwak, obeelom eerogo piige logonet, at togon aa'nduk wonagagi kwak obeelom eerogo pigin o.

Yetikiyen 28:26

It time ye mbambatinuk iniki ugun obeelom aret wonogo logonet, inawi wukkologwe, anggur awi yariyak yabu waganogo pugwi, eerugun o. Ndi, it inaagan-ambokan wonogwe abok aret nen maluk eeppiigo nogogwaarak onggo an nen inoba kwippiige logonet, it ambi eeppiiga'lek iniki ugun obeelom mban wonogwe ti paga Naliku inogoba Ala an aret ineenu arugun o,” yinuk, yegerak me, kat o Tiyon yokkigi o, yoreegirak.

Yetikiyen 37:21

Aliku Itok Menggerak ALA nen yegerak nogo yi aret. An nen it Iterali mendek yi aakumi ndi aakumi inenggela'me ma'nogogwaarak wonogwe me nen kuwak eerogo wogonake, yi o ndi o wonogwe me nen kuwak eerogo piya wage, eeke logominggirik, wogoren it inanggween paga piya nagin o.

Yetikiyen 39:25

Togop me, Naliku Nitok Minggirak an ALA nen yagarak nogo yi aret. An nen o yogondak Yakup paga wiganak aa'nduk wonogogwa kwak obeelom eerogo piige, it Iterali mendek abok aret inabuwa mbake, ndi, an nendage kikak nakeelik alik leenak logowak nduk, niniki aganggen kerok togon eerit nage, eeke logogin o.

Amot 5:11

It aap ambi eekkoloorak meek mendek nogo wi-wi aganako logonet, inambi gandum anggen mbanak nogo ndinogo waganggwi, Eeko monggotak o. Togop me, kinawi nggwok yugum abe amuni mbanak paga wurumonggotak kwe, o time ye mbanggola unggwogwe, Anggur awi yarumonggotak abe mili kwit agan laganemenggerak kwe, amburu toologo nunggwi, Eeko logomunggup lek o.

Tepaniya 1:13

Inamindik-inamendek ambik wonage nogo abok aret kabologo waganggwi, Inawi wurik nogo yinik-minik eerogo pugwi, Eerugun o. Inawi logorak wukkolamenggaarak kwe, time wonaga'lek wum aret age, Anggur awi ineyabume yaremenggaarak kwe, anggen amburu mbiranogo nengga'lek mbo pugwi, Eerugun o,” yinuk, yegerak me, yokkiragi o.

Tepaniya 2:7

Kit monggo'nom time aap Yekura paga wiganak eegu yumbunik nogo, unde eeppatinuk wonogo logonet, Inaanggumi kambin-ndomba inagari'ngga mbanogo nonggo logowak nduk, time piigwi, Ndi, oonikiya paga it Atekelon mendek inawi wurik me time inanogo yikkologwe, Eekwi iigak, At Aliku inogoba Ala nen ineebe liirogon aret ndegeninake, Aa'nduk wonogogwa kwak eerogo piige, Eerigin o.