Amot 3:2 - Ala Wone Peenok Peebi Mbanak

² “It aakumi ndarak logok lombok abok aret o nggween paga wonogwe iigak, It Iterali mban an napuri logowak nduk, leenogo piyareegirak me, It yi maluk ndi maluk eekwi paga aaninggin inoba kwippiyaagin o, Aliku ALA nen aret yegerak me, yokkiragi o,” yinuk, yoragagirak.

Amot 3:2 ပူးပေါင်းရင်းမြစ်များ

Wakkagagerak 10:32

Ndi, niyo nen yi mendek ndi mendek tigitogon ndonggoninake mbareegi, at Nu apuri ndegek lombok ndaganabit nogo logonet, inanebunu alitak lombok a'nuk, yi aakumi ndi aakumi inanebunu lombok abok aret o nggween paga yime wiganit nogogwaarak nogo, it yi nen aret o.

Ndawi 147:19

At oone nogo Yakup yoge, At wone lengganak inom, eeko logorak wone inom, Iterali yoge,

Wundeegwaarak 32:34

Ndi, it maluk eekaarak ti perak, maluk onggo eeppiyoorak eyom panggoni wage kenok, inomaluk onggo eeppiyaagin aret me, kat perak, yogondak aret o an yokkereegim nogome noorak nduk, nayonggo malayikat aa'nduk nage kagak, aakumi yi wogoren nak o,” yinuk, yoreegerak.

Yetaya 63:19

O aa'nduk nen nit kat kapuri aret wonogogurak kwe, It yi, Ala apuri aret, yo'niraga'lek logowak nduk eeppinanege, Kat koone konembunuk eekulik negen eerogo pinanege, Eeke agandik o.

Yeremiya 1:15

At Aliku ALA nen ari logonet, “An nen it yi aakumi ndi aakumi o omarip paga pa'nggwe wonogwe inabu'me piinok menggaarak abok aret inayonggo piyaakit nduk, eeke agarik o. Inayonggo piige neenok, wogo logomenggaarik, It wone lengganogo yorogo menggam inalitak lombok o Yerutalem tu unggwogo menggam ogobakkigirogo pit wogwe, O Yerutalem pak wurik eraanu endekem yendok-wandok ogobakkigirogo pugwi, O kota-kota Yekura wonogo menggam abok aret unde eekkolaawok nduk, eekwi, Eerugun o.

Yeremiya 10:25

It yi aakumi ndi aakumi nen Yakup paga wiganak nogo inambeme yonggorinakwi, Ineebe mondok lek eerogo inambeme yonggorinabit nogwe, Inawi alom lek eerogo pugwi, Eereegwaarak me, It yi aakumi ndi aakumi, Ninogoba Ala aret o, yinuk, yogolik nogo inom, It aakumi inanebunu lombok kendage kunogo yogolik nogo inom, kanini inoba piige logot o.

Yeremiya 11:22

at Omaawi Lombok Menggerak Aliku ALA nen ari logonet, “It aap ti, aaninggin inoba kwippiige logonet, inapuri aap tawe ti, wooluwak paga inoorak kanggwi, inapuri wologwe-komologwe mbi abu nen kambit nogwe, eerugun o.

Yeremiya 13:21

“It aakumi ti, ninom a'nuk eerit nogo logowok o,” yinuk, kinom kunggo'net nagagindak nogo nen Kat tebenogo paganuk, karum logorak Aliku ALA nen mippiige kenok, kat nano yumunggun o? Kumi elege enegen paganak yagan wako mengga kwak kat togop aret kiniki andi nen yagan warumunggun lek mbaken?

Yeremiya 14:10

It aakumi yi, eekwi iinok, Aliku ALA nen yegerak nogo yi aret. “It aakumi yi, yagak-ndagak nugu logorak inikilom mbakwi, Iniyok teberogon logorak meek age, Eeko menggaarak me, Naliku ALA nen nale'nggen inombaka'lek logonet, it maluk eerit nugwi nogo abeke, It inomaluk onggo aaninggin inoba piige, Eerigin o,” yinuk, yegerak o.

Yeremiya 9:25

At Aliku ALA nen ari logonet, “It aap inagabolo mban mbanak aakumi Metit mendek inom, Yekura mendek inom, Erom mendek inom, Amon mendek inom, Mowap mendek inom, it aakumi inawi karume menggaarak ineeruwak kirinom kagak owa'nggan-owa'nggan mban mbanak nogo inom, it abok aret maluk onggo eeppiyoorak eyom panggoni woraagin o. It yi aakumi ndi aakumi ti, inagabolo mbanak kwe, inagabolo mbanak kenok wone yugu eeko menggaarak nogo eeka'lek wonogwe, ndi, it Iterali paga wiganak abok aret kunduk, inagabolo mbanak kwe, inagabolo mbanak lek negen iniki omaawi mban wonogwe, eekwi me, it abok aret aaninggin mondok inoba kwippiyaagin,” yegerak o.

Yetikiyen 5:9

At ogole warak mendek alut eerit nage nogo, an neebi lombok mbake me, an nen eeppegeelik mendek at eeppege, ndi, peebi at eeppuurak lek mendek eeppege, eerigin me,

Ndaniyen 9:12

Maluk eekwi iinok, ndogop eeppiyaagin o, yinuk, yereegindak nogo, a'me lik togon nit inom, ninoweewi inendagembogut inom, aaninggin mondok alik negen ninoba kwippinanggendak o. Nit o Yerutalem wonogwe me, aaninggin ninoba kwippinanggendak nogo ti, o mbogut abu'me nggween paga yime togop ambi eeppiige kogoolik nogo mendek ninoba kwippinanggendak o.

Oteya 2:13

At nen obari abe kaga it kugi Mba'an inake kani kungge, Obaanggi-obaangge eeke logonet, iinggen enggaanok me yikkolage, aruk ayo eekkolage, Eeke nagaatik, It at iniki kunik eeko menggaarak nogo muguren nage logonet, ami eerogo mbo paneegerak me, An nen aaninggin at oba kwippigin o,” yinuk, at Aliku ALA nen aret yereegerak o.

Oteya 5:3

It Eparayim mendek an abu liippiige, ndi, it Iterali mendek kumaarak lek kin paga iige, eeke agarik o. It Eparayim ti, kwe ya wukak kwak eerit nugwi, Ndi, it Iterali ti, inalik nen aret maluk eerogo pakwi, Eekaarak wonogo agaarik o, yinuk, yegerak me, yokkiragi o,” yoragagirak.

Oteya 8:13

An nake pugu nogo, it nen warogo wo'nugwi, Nake warak nogo enggaanggum it nunggwi, Eeko menggaarak kwe, Naliku ALA nen ninikilom mbakeelik aret agarik o. It maluk eekwi ti, an niniki aberak logonet, onggo aaninggin inoba kwippiyoorak nogo ti, Iniyokan o Metit nappiyaagin ti aret!

Oteya 9:9

O Nggibeya mendek maluk abu iya lombok eeko nogogwa kwak kit maluk iya lombok eekko'net unggwogwe me, Kit maluk eerit nugwi nogo at Ala abeke, Ndi, kinomaluk onggo eeppinagage, Eeke logogin o.

Amot 2:4

Aliku ALA nen ari logonet, “It aakumi o Yekura menggaarak nogo ti, ne kenagan mban maluk eerulik ne ambi inom eekak mban eeko nogogwaarak me, An nanini eeppiyoorak koonak wonage nogo, teppiyaagin lek eeppiyaagin aret o. It Yekura mendek nogo Naliku an ALA nen eeko logorak wone yorage nagagirak nogo, taganogo mbo pugwi, An wone lengganogo yorage nagagirak nogo, pipporogo wonaga'lek tayoppugwi, Eeko logonet, It inombomini inagugi abe mendek lek, pilit kagak ayuk wuko nogogwaarak nogo aret mugurok nogo logonet, Nomo agan nogo nogogwaarak me,

Amot 3:3

It aap ineebe mbere nen, “Nit nimbirak ndime nawok o,” yinuk, Wone koonogo puulik kagak it imbirak noorak op mbakop?

Amot 6:1

It aakumi Iterali mendek nen, “Yeenggwa niraawak o,” yinuk, Aakumi ando tebenak iigak, it ambi abu tiyanak menggaarak inenggela'me nen kit kinengga warak kiya wogo menggaarak abok aret O Tiyon paga, “Niniki ugun obeelom wonogwe,” mbakwi inom, Puut Tamariya paga, “Niniki ugun tayenak nu'lek aret wonogwe,” mbakwi inom, kinabuwa o!

Mika 2:3

Togop aret eeko menggaarak me, Aliku ALA nen ari logonet, “An nen it aakumi yi, maluk eerogo piyoorak koonogo pege me, inoba kwippiige neegak, kole mbaganggwi, Ne ti, maluk eerogo piyoorak eyom aret me, An iya! mbakak mbaganggwi, Eeriyak meek aret kaagun o.

Nakum 3:4

Kwe ya wukak nen, “Ugun ee'nabuwak,” mba'nuk, eerit nage menggi kwak, Aap iniki nawak nduk, enete amuni mbangge menggi kwak, Tili pagangga iyagalo kwak, At kota Niniwe togop aret me, terak wuka kwak eerit nage logonet, yi aakumi ndi aakumi keele maarogo negen piige, Yogwi inooke paga aakumi inanebunu lombok apit aret ayeloman mini eerogo piige, Eereegerak paga At togop eeppege kagarak o.

Nappiigak 17:26

At yi awi ndi awi abok o nenaarit nogo logowak nduk, kuli ogoorogo piinet nage, ti'nuk, nineyom-naneyom eerit nogo logowak nduk, koonogo pege, eeke nagagerik, yi aap ndi aap inanebunu lombok yi awi ndi awi wiganuwak nduk, alom aap ambit aret wakkagagerak.

Oroma 2:9

It yi aap ndi aap maluk eeko menggaarak abok aret andi-pandi aganake, aaninggin-paaninggin agago piige, eerigin nogo ti, it Yakuri mendek eeppiige logonet, aakumi endekem konenggulik mendek inom ndak-ndak eeppiyaagin kwe,

1 Korindut 8:3

Ndi, aap ambi Ala imbirak iniki kunik wonage nogo Ala nen aap ti, eenu aret menggaarak o.

Pelaareegerak 10:15

Togop aret kwe, at Aliku ALA nen kit kinombomini nogo inabuwa nggwok lombok mba'nuk iniki kunik aganake nagagerik, aakumi inanebunu andorogon wonogwe iigak, inombowologwe kit mban miirogo pinagareegerak yogondak wonogwe kit yi aret o.

Pelaareegerak 4:32

Yorage nagagerik, ambinom yorage logonet, “Wone iya lombok yogop awo paga agagerak ambi kineenu mbakop? Wone iya lombok togoti awo paga agagerak ambi koneneegutak mbakop? Kit nen kani omoonuk wunuk ari enggela'me Ala oone ari kinaruk koneneegutak nogo kokwak, it inanebunu alik ambi nen Ala oone ari inaruk konembunuk, ineenik ambi wonogwe kineenu a? Kit kinigen kiigak, kinake at Aliku kinogoba Ala nen aakumi Metit mendek iniki wakkaawak nduk eeke, inoba tam warak mendek agago piige, inagabiti aruwak nduk agago piige, inom wim eeke, eenggi omaawi paga eeppiige, eenggi titik eeke kenok eeppiige, Ia, yinuk, inaganak waruwak nduk eeppiige, eerit wagagerak nogo kokwak, it kugi nen togop aret it aakumi alik mendek ambi wonogwe me, inenggela'me nen it aakumi alik mendek ambi nggiginogo inagap ndareegerak kineenu a? Lek aret me, kit kineebe nda'naga'lek kiigak, maan at Ala nen o nggween paga yime aakumi lek me ogobakkigirinabeegerak kuli nen nok, nda'narit wundi wogogwaarak ineebe abok aret ineegwa'me waganggwi, mbogut alom me nen irip me wonage nogo iniki kwaakwi, eeko logonip o.

Pelaareegerak 7:6

Aakumi inanebunu lombok o nggween paga yime menggaarak abok aret wonogwe iigak, at Aliku kinogoba Ala nen kinalik aret iniki kundugu logobagip nduk, miirogo pinagareegerak me, kit at Aliku kinogoba Ala apuri ake leenak aret ogotik o.

1 Peterut 4:17

At Ala nen ari logonet, “It aakumi iniki abe koonak nogo aaninggin eeppiinet unggwogwe iigak inagap ndarigin me, It an noone konengga'lek maluk mban eerit nogwe nogo perak, nonggop togon eeppiyaagin mbakop?” yinuk, yereegerak ndak-ndak, at Ala nen nit yi aap ndi aap abok aret ninawone mbanogo ninowak loonninaburak eyom abu panggo yi wagaarak me, nit Ala apuri aa'nduk ninawone mbambunuk, at oone yugu ndak-ndak eeka'lek logomonggoorak kenok, onggo eeppinanigin me, it Ala wone obeelom wone nogo mondok wagangga'lek iinok ti, inawone mbangga'lek teppiyaagin mbakop? Lek o. Inawone abu mbanogo punuk, mondok alik negen eeppiyaagin o.