2 Korindut 4:17 - Ala Wone Peenok Peebi Mbanak

¹⁷ Yogondak piyak-payak eerogo pinanugwi yi, peebi eeppinaniyak ndak-ndak abu lek o. Peebi eeppinaniyak nogo ti, yi mendek ndi mendek tebenak kagak, nit tiyappinanemenggerak nogo mondok-mondok tiyanak logogun me, yogondak eeppinanugwi yi, “We luulu teeluk aret eeppinanugwi,” mbako ogoorik o.

2 Korindut 4:17 ပူးပေါင်းရင်းမြစ်များ

Wakkagagerak 15:1

Ti'nuk, ne ambi paga at Aliku ALA nen abinggaanggo paga Abaram yoge logonet, “Abaram wae. Kat kanggeemu pogom inom, eerit nage onggo wokkiriyak nogo inom, ti an neebe aret me, kagabiti mbarugun o.”

Ndawi 119:67

An aaninggin awo noba kwi'naga'lek kagak, Koone mbo punuk nomoninuk nagagirak kwe, yogondak perak, Koone yugu nogo liirogon aret eerit nage agarik o.

Ndawi 119:71

Koone lengganak an mamunggolaakit nduk, Aaninggin noba paneegindak nogo ti, Op aret mbake agarik o.

Ndawi 30:5

Ne ambit mban at anini ninombake menggerak kwe, Ale'nggen nen obeelom eeppinanege ti perak, Eeppinanegak mban eeke kagak Kambi noorak kuli ari nagin o. Oonikiya le mban yogwe iigak O weerikit nduk eeke menggerak kwe, O weege kenok perak, inale'nggen mbako menggaarak.

Ndawi 31:19

Kat mondok obeelom logonet, It aap kayuk wukwi inake pipuk eerogo piige, Aakumi inigen iigak, Ineebe op logowok nduk kowagam nogwe nogo eeppiige, Eeke menggendak nogo ti, Mondok iya nggwok lombok eeppiige menggendak o.

Ndawi 73:24

Tu abe paga naakit nduk, naruk wake, Eeke logomenggendik, Kat tiyanak menggenom nimbirak logokit nduk, wo'nabumunggun.

Yetaya 26:20

It aakumi nggween paga maluk eeko nogogwaarak onggo eeppiyaakit nduk, Aliku ALA wonage menggim nen wundi wage kenok, It aakumi inamiya nggween paga kilirogo piigo nogogwaarak kiraarak wonage nogo Nggween ti nen, “Yi ket o,” yinuk, titik ege, Ndi, inoorogo piyareegwaarak inamiya nggween taanak wonogwe nogo kin eerogo nippiya wage, Eerigin me, Kit an napuri yi wae. At Aliku ALA anini mbake nogo lek age kagak, Kiname lombok unggwi nogo logomonggotik, kinaru nakkologwe, We luulu kumaarak wonogwe, Eeko logonip o.

Yetaya 54:8

Nanini abu alik negen ee'nake mbareegi, ne ambiriluk nenete kumaarak wonagagirak kwe, Niniki mondok-mondok kunik eeppege logokit nduk, abuwa nen waagin o,” Yinuk, at onggo mbangga Aliku ALA nen aret yegerak o.

Yetaya 64:4

Kat Ala nen eeke keyaawok nduk tokkeegwi me, eeke keego mengga kwak, O aa'nduk nen nok, yogondak kuli it aakumi inogoba alik ambi togop eeke liippugwi, Oone ari inaruk konenggwi, inigen abe nen kogwe, Eeka'lek aret wonogo menggaarak o.

Linggineegwaarak 5:28

Ndi, kwe ti, maluk eekkolaga'lek ogonggelo ake mban porogo wonage kenok perak, niyo ti, namenggerak kwe, maluk eekkolaagin lek aagalogwe kuurik me aret ndaganake logogin o.

Nappiigak 20:23

Ne ambi paga o ambi me yoragak, ne ambi paga o ambi me yoragak, eerit nege me, Keele maakkakwi, aaninggin-paaninggin koba pagagwi, eerugun o, yinuk, Aberiniki nen paganogo yo'nege menggerak neenu aret o.

Oroma 2:7

It aakumi ando nen mbako logonet, “Ala nen tiyappinanege logonet, ninayuk warak agago nabelan-kabelan wo'niraagin o,” yinuk, iniki mondok kwippunuk, puk aga'lek obeelom mban eerit nogwe iinok ti, Ala nen ineenik mondok logorak mendek wogoraagin o.

Oroma 8:18

Yogondak piyak-payak eerogo pinanit nugwi ti, peebi tiyappinaniyak ndak-ndak wakkoorak meek o. Peebi ee'ninaburak ti, abu obeelom aret o.

Oroma 8:34

Ndi, Ala nen, “Kit maluk o,” yinuk, yo'niraga'lek kagak, aap ta nen, “Kit maluk eekotak me, onggo pinip o,” yinuk, yo'niraagin mbakop? Lek aret o. At kangge mbareegi, Ala nen eenik eerogo mippereegerak yogondak Ala eenggi abe paga logonet, ninili ari menggerak ti, Keritut Yetut aret o.

Oroma 8:37

Ti abok aret eeppinanit wogwe iigak, Keritut ninom kunik lombok wonogwe ti paga, inawim tebenogo piinok, ineegin tiyak ari ti, iya negen kwe, nit perak, waka'ngget mondok tiyanak aret wonogo ogoorik o.

1 Korindut 2:9

At ambi nen ari logonet, “Inigen abe nen kogwe, oone ari inaruk konenggwi, Inikime nen, Yogop eeriyak, abe lombok koonggwi, eekulik nogo mendek aret o. At Ala nen it aap at inom iniki kunik mbako menggaarak nogo, inake pipuk-papuk agago piyareegerak wonage agaarik o,” yinuk, yereegerak liiru mbanak nogo ndak-ndak

2 Korindut 3:18

Togop me, nit ninetenggen nobarak togop ti wonogwe lek o. Ninowe mondok tiyanak aakumi inigen kogo logonet, “Wi,” yuwak nduk, Ala awukagi negen nit aret ogoorik o. At ninowe mondok tiyanak kenok aakumi nen, “Wi!” ugwi nogo, nit togon liippugwi niigak, at etenggen ndak-ndak logowok nduk, Aberiniki nen ninobaabut koonogo pinanit namenggi-namenggi irip paga at etenggen ndak-ndak eerogo pinanigin o.

Pilipi 1:19

Kit nen nake tamban eekwi, ndi, Yetut Keritut Aberiniki nen niniki eyak wappanege, eekwi ti paga keele piinogo wumbanugun an neenu me, niniki ale'nggen mban mbake agarik o.

2 Tetalonika 1:4

Togop me, kit piyak-payak eerogo pinagagwi, aaninggin kinoba pinagagwi, eekwi kwe kagak, kinogogumbuk logonet waganggwi me, kiniki mondok nu'lek logonet abet mbakwi nogo, Ala apuri yi awi ndi awi kuwak eerit nogo menggaarak nit yoranet nogo logonet, tiyappinagit nogo monggoorak.

2 Tetalonika 1:6

At Ala iniki koonak a'me nggelok eeke menggerak me, it nen aaninggin kit kinoba pinagagwi nogo, onggo at nen it aaninggin inoba piyaagin o.

2 Timotiyut 2:10

Togop me, it aakumi Ala miirinabeegerak iniki Keritut Yetut oba panggombunuk, abet mbakwi iinok, inagap ndappunuk mondok-mondok inom tiyanak logowak nduk, maluk eeppanugwi iigak, it inake nogogumbuk logonet wagangge minggirak o.

Yakobut 1:12

It aakumi inabut mbangge kagak nu'lek wonogwe kenok, inale'nggen aret mbako logowak o. It aakumi inabut mbangge kagak nu'lek wonogwe nogo, op eekwi iinok, nggare-nggare mendaarak yippiigo mengga kwak, “Kineenik mondok logorak mendek wokkiraagin o,” yinuk, abok yoragagerak ti, it aakumi Ala iniki kunik eekwi nogo, aret wogoraagin o.

1 Peterut 4:7

O age yobok paga eeriyak abu koorok panggo yi wagaarak me, tamban eeko logobagip nduk, kiniki kwi'ndak nu'lek logonet, kinagaket paga logonip o.

1 Peterut 5:10

At iniki kunik nen wo'nirage menggerak alom unde ninogoba Ala nogo nen Keritut ninom kunik wonogwe paga at tiyanak menggim nogome ninom ndak-ndak mondok-mondok tiyanak logowok nduk ninayonggo pereegerak me, ne ambiriluk ambi andi-pandi eerogo pinagagwi iinok, ninogoba Ala nen kinobaabut koonogo pinagage, kiniki nu'lek eerogo pinagage, kinomaawi agago pinagage, kinogogumbuk nu'lek logobagip nduk eerogo pinagage, eeke logogin me, kiniki kwi'ndak logonet, waganggo logonip o.

1 Yaya 3:2

Noreewi o. Kit an niniki kunik me, wone ambi yokkira o. Nit yogondak aret Ala apuri ogoorik o. Ndi, peebi nonggop eeppinanege kenok wonogo logorak nogo, nit awo kin kaga'lek kwe, at wage kenok, “Etenggen yi kwak eeppinaniyak nduk, wonogoorak kagi,” yinuk, mbakwi niigak, “At etenggen kokwak eeppinanigin, nineenu aret ogoorik o.”

Yurat 1:24

Ninowe Yetut Keritut eereegerak paga ninagap ndareegerak at Ala nogo nen nit abet mbareegurak nogo mbo punuk, alik eerit nogwe niyo, ninarum liirogon logomenggerik, “Kit wone ambi kinoba wonage lek abu obeelom aret me, nowagam mi'nari woraanip o,” yinuk, yo'nirage mbaremenggi, nit niniki ale'nggen mbakak at mondok tiyanak menggerak enggaanom mi'nari nawok nduk, wo'niren pinani nagin aret me, yi aakumi ndi aakumi aa'nduk nda'nogogwaarak inom, yogondak ndarak inom, peebi nda'nariyak inom, nit abok ninogoba ambit ninagap ndaka kat aret me, kat aap nggwok kendagembogut komaawi ambik yi aakumi ndi aakumi abok kabu'me logonet, kat koone mban konenggwi, kat kendage mban tiyappagagwi, eeko logowak o. Amin.