2 Korindut 2:14 - Ala Wone Peenok Peebi Mbanak

¹⁴ Yime wagagirak wonage me, Ala nen mbo panulik o. It aap wim nambuppunuk, “Wi!” iraawak nduk, aap waka'ngget awuri inom ndegen-ndegen aago kombogonak wogo mengga kwak, nit ndak-ndak ninowe Keritut eegin tiyak ari kenok ninom ndegen-ndegen aago mondok tiyanak nugwi me, Ala mondok alut eeko logowok o. Obari obeelom wiganinuk nage menggi kwak, Keritut eeke menggerak obeelom wone nit paga nen wiganinuk nage logowak nduk, Ala nen eeppinanege menggerak.

2 Korindut 2:14 ပူးပေါင်းရင်းမြစ်များ

Ndawi 106:47

Kaliku ninogoba Ala wae. Kendage abu abe alik leenak me, “Wa,” yokkugwi, Kendage tiyappogo logonet, ninale'nggen mbakwi, Eeruwok nduk, Kat nen ninagap ndake, Yi aakumi ndi aakumi inenggela'me nen Kuwak eerogo pinani wage, Eeru o.

Ndawi 148:14

Aakumi at apuri ake leenogo piyareegerak iniki kunik Iterali abok aret at endage tiyappugwi nogo, Inarum logowak nduk, pak wurik kwak, Aap ambi endage abu tiyanak lombok mippereegerak me, Aliku ALA endage tiyappogo logowak o. At Aliku ALA tiyappogo logowok o.

Ndawi Iya 1:3

Obari kagabolo paga aago ti, abu aberogon aret o. Kendage ti, obari abe eeka kilirik kwak aret wonage me, Komologwe tawe abok aret iniki kunik eekkako agaarik o.

Yetikiyen 20:41

It yi aakumi ndi aakumi inenggela'me nen wumbiya wage, yi o ndi o mak eerak wonogwe me nen kuwak eerogo piya wage, eeke logonet, obari abu abe kaga kwak nale'nggen nen ineebe togop aret wogoninake, yi aakumi ndi aakumi inigen iigak an abu abe alik leenak minggirak neyaawak nduk eeppiige, eerigin o.

Yaya 16:33

Wone yi yokkiragi nogo ti, an ninom kunik logonet, kiniki ugun tayenak lombok logobagip nduk, yokkiragi o. It aakumi nggween paga yime menggaarak mendek nogo nen piyakkinako logogun kwe, it o nggween paga yime inomaawi menggaarak nogo muk tebenogo piigirak me, kiniki kwippunuk, nu'lek logonip o,” yinuk, yoragagerak.

Oroma 1:8

Aa'nduk yokkiroorak mbakirak nogo yi aret. Kit abok kiniki abet mbakotak nogo, kinabok yi awi ndi awi wiganinuk nage kenok, Yetut Keritut eereegerak paga, “Nogoba Ala wa,” yoge agarik o.

Oroma 15:19

Aberiniki nen omaawi eeppanege kagak, inagabiti warak mendek eeke, eerubok mendek eeke, eerit nage nagagirak nogo, ti mban mbininogo yokkirage agarik o. Ti eerit nege logonet, o Yerutalem enaagan-ambokan time nen o Ilirikum kuli aret Keritut eeke nagagerak obeelom wone nogo abok aret yoranet nege nagagirak o.

Oroma 6:17

Kit aa'nduk maluk ayeloman aret wogogutak kwe, yogondak perak, wone mamunggirogogwaarak nogo kiniki mbere lek ambit paga mondok li'luk eerogo woppunuk, eerit nogwe me, Ala mondok, “Wa,” yinuk, keyage wake agarik o.

Oroma 8:37

Ti abok aret eeppinanit wogwe iigak, Keritut ninom kunik lombok wonogwe ti paga, inawim tebenogo piinok, ineegin tiyak ari ti, iya negen kwe, nit perak, waka'ngget mondok tiyanak aret wonogo ogoorik o.

1 Korindut 12:8

Aberiniki ambit nogo nen aap ambi iniki warak logonet, wone koonogo yorage logowak nduk, unde eeppege, ambi, yi wone ndi wone alom neenu a'nuk, liirogon yorage logowak nduk, unde eeppege,

1 Korindut 15:37

Kit yi mendek ndi mendek awi yako monggotak nogo yako logonet, eebe apit awi yakulik o. Ata, mbato a, yi mendek ndi mendek alik mendek awi a, yako logonet, anggen ambitak menenogo yako monggotak kwe,

1 Korindut 15:57

ineegin tiyak ari menggi kwak, at ninowe Yetut Keritut eereegerak paga nit kambuurak ee'ninake tit kagak ninale'nggen kogo logowok nduk omaawi wo'nirage menggerak me, “Ninogoba Ala wa,” yinuk, at mban alut eeko logowok o.

2 Korindut 1:11

kit kunduk, ninake tamban eeko logonip o. Ninake tamban eerumonggotak ninogoba aruk konembunuk, ninabuwa nen obeelom eeppinanege nogo, it aakumi apit niigo logomenggaarik, Ala wogoppogo logowak nduk, ninake tamban eeko logonip o.

2 Korindut 8:16

Nit nen kinoba aberak me, yeenggwaagiroorak mbako monggoorak nogo kokwak, aap Titut togop aret yeenggwaagirage logowak nduk, Ala nen iniki koonggerak me, “Ala wa,” yoge minggirak.

2 Korindut 9:15

Ala ninabuwa nen mondok alik negen wo'niragagerak nogo mbininogo yuurak meek me, at mban, “Wa, wa,” yogo logowok o.

Epetut 5:2

Ala ake warogo kani kunggwi iinok, Ala nen obari obeelom kage menggi kwak, at Keritut ninabuwa nen, “Inake kambikit,” mba'nuk, ninake kambeegerak nogo ndak-ndak, nabuwa-kabuwa mbako logonet, at ambi obeelom eeppegak eeko logonip o.

Epetut 5:20

Warit nogo logonet, yi mendek ndi mendek apit eeppinanege menggerak nogo paga ninowe Yetut Keritut endage kunogo, “Ninogoba Ala wa,” yinuk, keyage wako logonip o.

Pilipi 4:18

Kit nappani wogogutak nogo, abok aret waganeegirak me, lek aga'lek wonage aret o. Ala ake pugu kani kunggwi obari obeelom kenok Ala nen, “Op wo'nega o,” yinuk, iniki ale'nggen mbake menggi kwak, kit an nake pugu aap Epapororitut nen wo'niruwak nduk nappi wogogutak nogo, wonok niri wage mbareegi, wagangge nagagirik, ndiinik-piinik agago pereegirak lek aga'lek wonage aret o.

Kolote 1:23

Keritut ti eereegerak nogo paga, Ala kinom lambumbinagareegerak me, wone obeelom wone kit konenggo nogogutik, abet mbako logonet, “Ala nen togop eeppinanigin kagi,” yinuk, kiniki lunik wonogwe nogo, mbo puurak mage o. Ata, o eyak wurabak kwak Keritut paga kiniki panggombunuk, wone abet mbareegutak nogo, kiniki nu'lek logonet, mugurok nogo logonip o. Ndi, obeelom wone yi awi ndi awi abok aret wiganinuk nage nogo ti, an Pawulut ninom aret yorage logokit nduk, Ala ayeloman agago paneegerak aret o.

Kolote 1:6

Obeelom wone kinaruk konenggwi, Ala abet aret iniki kunik en eeppinagage menggerak wone nogo liippugwi, eeko nogogutik, abet mba'nuk, waganeegutak kuli nen, yogondak awo aret kinenggela'me nen wiganinuk nage me, eyoonggen yi'nage menggi kwak, yi o ndi o abok togop aret wiganinuk nage logonet, anggen abu alik negen yi'nage agaarik o.

Kolote 2:15

Ti eereegerak nogo ti, it wim nambuppunuk, “Nit nineegin tiyak yigi o,” yinuk, “Wi!” iraawak nduk, aakumi ineebe kugun wogoren wogo mengga kwak, at Keritut nen, “An neegin tiyak yegerak neyaawak o,” yinuk, at Tile inom, at awuri yi kugi ndi kugi inom, abok aret inomaawi lek eerogo piinok, inenggali aruwak nduk, ineebe nggwok paga o oolo yayi wogoren nege nagagerak.

1 Tetalonika 1:8

Kit eekwi paga ninowe wone nogo o Makendoniya inom, o Akaya inom, time mban wiganinuk noolik o. Ata, yi awi ndi awi abok aret kit Ala abet mbareegutak nogo wiganinuk nagagerak me, nit wone ambi yorogo logorak lek aret kogo o.

1 Tetalonika 3:9

Kit eerit nogwe paga nit niniki ale'nggen ambik ee'ninake me, “Ala wa,” yinuk, at yogo monggoorak nogo ti, at eenu aret kwe, iya negen ambi ngge mendek yorubok ee'ninake agaarik o.

1 Timotiyut 2:8

Togop me, it aap yi awi ndi awi abok aret inanini mbakwi, wone wakwi, eeka'lek obeelom mban logonet, ineenggi nippunuk, tamban eeko logowak nduk, “Ao!” lombok inombake minggirak.

2 Timotiyut 2:2

Aakumi apit inenggaanom paga an yi wone ndi wone yokkege koneneegindak nogo, it aap abe mamumbunuk aakumi liirogon mamuniroorak op iigendak kenok, unde logowak nduk, mamunirage logot o.

Wayu 7:12

“Amin o! Kat ninogoba Ala aret me, Yi aakumi ndi aakumi abok kabu'me tebe yinuk, Inale'nggen kombakwi, kendage tiyappagagwi, Yi wone ndi wone abok kat keenu o, yinuk, yokkugwi, Wa, yogo logonet kayuk wukwi, kalik komaawi ambik mondok kalilaakwi me, Wi, kugwi, eekwi nogo, Mondok-mondok togop aret eeko logowak o, amin,” yinuk, yogwi iigirak o.