2 Korindut 13:4 - Ala Wone Peenok Peebi Mbanak

⁴ At aap nit kokwak eebe lebenak me nduk, abet aret eyo karo-karo paga warogo pereegwaarak kwe, Ala omaawi paga mippege mbareegi, eerit nege menggerak nogo kwak, nit togon, nineebe lebenak aret kwe, Keritut ninom abet aret kunik me, kinenggela'me logonet, Ala omaawi paga eerit nugwi niyaamunggup o.

2 Korindut 13:4 ပူးပေါင်းရင်းမြစ်များ

Yaya 10:18

It aakumi nen an noorogo paniyak meek o. An niniki mba'nuk nen aret kambigin o. An kambikit mbake kenok ti, kangge, ndi, neenik arikit mbake kenok ti, neenik age, eeke logokit nduk, nogoba nen unde eeppaneegerak o, yinuk, mondok abet aret yokkiragi o,” yoragagerak.

Nappiigak 2:36

Ndawut nen togop yereegerak me, at eyo karo-karo aago paga nabenogo wakotak Yetut nogo ti, Ala nen kit kinogoba logowak nduk, eerogo pege, ndi, an leenogo pereegirak Keritut yi aret o, yinuk, yokkirage, eereegerak nogo, kit Iterali mendek abok nen, Yi abet aret, mba'nuk, liippubagip nduk yokkirage agarik o,” yinuk, yoragagerak.

Nappiigak 3:16

Yetut nen eeriyak op o, yinuk, niniki at oba panggombunuk abet mbakoorak nogo paga aap kit kineenu kinigen kogo monggotak yi nogo, obeelom agago omaawi eeppegerak wonage o. Yetut nen eeriyak op o, yinuk, abet mbakoorak paga aret kit kinenggaanom at abu obeelom agaarak kinom wonage yi aret o.

Oroma 1:4

Ala nen kambunuk nogo menggam nen eenik agago mippereegerak paga, at maluk eeka'lek iniki mondok abe alik leenak Ala aput ayuk warak aret menggerak nogo kin agagerak.

Oroma 14:9

It kambeegwaarak inom, nineenik wonogwe inom, ninowe aret a'nuk abu'me pinanikit nduk, at Keritut kangge nagagerik, eenik mi'nagagerak me, nineenik logorak inom, kambuurak inom, at ake mban aret ogoorik o.

Oroma 6:4

Keritut kangge mbareegi, ndoome pi nogogwaarak nogo ti, at ninom ambit kunik me, niyome wambeegurak nogo paga ninom kanggo mbareegu, ndoome pinani nogogwaarak. Ndi, nineenik ngget mendek a'nuk nogo logowok nduk, at ogoba Ala omaawi ambik menggerak nogo paga kanggo menggam nen at eenik agago mippege logonet, at ninom kunik me, ninom aret mippinaneegerak.

1 Korindut 1:25

Aakumi nen wone aaninggin ambik me, iniki mondok kwippunuk togon kooniyak mbakwi nogo ti, Ala nen kooniyak teeluk aret kage, ndi, aakumi nen, “Aaninggin ambik me, nit apit ninomaawi paga eeriyak op,” mbakwi nogo ti, at Ala nen eeriyak teeluk aret mbake, eeke menggerak.

1 Korindut 15:43

ninagabolo maan maluk mendek nogo, nggonenogo mbo punuk, obaane'me ngget amuni mbanak mendek yirippinanege, ndeyak nogo mendek mbo punuk, obaane'me omaawi mondok logorak mendek wo'nirage.

1 Korindut 2:3

An neebe lebenak aret me, nagabiti nen naganak wake kagak ninom wonagagirak.

1 Korindut 6:14

Ala nen ninowe eenik agago mippereegerak me, nit kunduk, at omaawi paga nineenik agago mippinanigin o.

2 Korindut 12:10

Togop me, an meek ee'nake kenok, Ala omaawi eeppanege kagak, nomaawi ambik logonet eerit nage minggirak me, Keritut eeke nagagerak wone wigak yuwak nduk eeke neegak, an eeriyak meek ee'nake, miyuk-meya eerogo panugwi, ambi yo'negak mban eekwi paga niniki taganogo pugwi, piyak-payak eerogo panugwi, aaninggin-paaninggin noba panugwi, eekwi iigak, “Op mban aret ee'nakwi o,” yinuk, niniki tayenak ale'nggen aret minggirak o.

2 Korindut 13:9

Kit kiniki abu kole eekkinabuwak nduk, tamban eeko monggoorak me, nit ninoone omaawi yokkiraga'lek niigak, kit-kit mban koombunuk, eerit nugwi kiinok, ale'nggen mban aret mbarugun o.

Pilipi 3:10

At Keritut eebe inom, ndi, Keritut ninake kangge mbareegi, Ala omaawi paga eenik agago mippereegerak nogo inom, “Liippatikit lak ao,” mbake logonet, an kambunuk nogo menggam nen neenik agago mippanuwak nduk, at Keritut iniki yanggonak kagak, aaninggin-paaninggin oba punuk, wako mbareegwa, kambunuk, eenik agagerak nogo kwak, an ndak-ndak neegak, eeppaniyak op aret mbake agarik o.

Iberani 5:7

Maan at Yetut aakumi kwak nggween paga yime nege logonet, kambuurak agabiti nen leenggu maake logonet, oone nggwok paga tamban eeke, “Nagap ndaru o,” yinuk, Ala nggino yoge, eereegerak nogo, ogoba nen yoge kenok aruk konok mban eeke nagagerak me, aput nen tamban eereegerak nogo Ala aruk koneneegerak kwe,

1 Peterut 3:18

Nit maluk eekwi nogo abok aret lek eerogo pikit nduk, at Keritut ne ambit paga aret kambeegerak. At maluk eekeelik obeelom mban eeke menggerak nogo nen, nit obeelom eekwi lek maluk mban eekwi nogo, Ala abu'me pinanikit nduk at eebe aap aret age mbareegi, warogo pereegwaarak nit ninake aret kambeegerak kwe, Aberiniki nen eenik agago mippereegerak.

1 Peterut 3:22

At Yetut Keritut nogo ogoba Ala nen eenik eerogo mippege mbareegi, it malayikat inom, it o oolo ya'i menggaarak Tile inom, yi kugi ndi kugi inom, abok aret at abu'me logowak nduk, tebenogo piige nagagerik, yogondak mbogut paga ogoba Ala eenggi abe'nggan paga kwi'nari laganeegerak wonage agaarik o.