2 Endagembogut 7:6 - Ala Wone Peenok Peebi Mbanak

⁶ Aap Aram ineegin warak nogo, kuda iniyogobit oone inom, nggweendo wim eeka iniyogobit oone inom, ndi, it aap wim eeka ineebe apit aago iniyok oone inom, agan wogwe inaruk konenuwak nduk, at Aliku ALA nen eeppiyareegerak paga konenggo nogogwaarik, ambi yogak eeko logonet, “It aap Iterali inowe endagembogut nen ninooriyak onggo it Ket mendek inowe endagembogut inom, Metit mendek inowe endagembogut inom, wogoroorak koonggerak nogo, ninoori wogwe yi aret o,” yinuk,

2 Endagembogut 7:6 ပူးပေါင်းရင်းမြစ်များ

2 Tamuwen 10:6

Ndi, it aap Amon mendek nen mbako logonet, “Nit eekoorak paga at Ndawut nen obari maluk kogo mengga kwak ninombake kogo o.” Yogo nogogwaarik, wim eekwi iinok, onggo wogoraawok nduk, aap wim eeko logonet, iniyok paga nugu menggaarak Aram mendek o Mbet-Erekop wonogwe nogo inom, o Toba wonogwe inom, ineebe apit lambunik dua puluh ribu wogonakwi, it aap o Maaka mendek inowe endagembogut awuri wim eeka ineebe seribu wogonakwi, ndi, it aap wim eeka o Top mendek ineebe dua belas ribu wogonakwi, eereegwaarak.

2 Tamuwen 5:24

eyo tin era'nggup me, aakumi iniyok oone negen yogwe karuk konengge logomenggendik, At Aliku ALA aa'nduk a'nuk, ninawim Pilitin mendek ineegin warak muk inoori nage kagi, mba'nuk, kawuri kinom pilak yogo logonet, mbet-mbet aret inoba kwi'nari wundi woraamunggup o.”

1 Endagembogut 10:29

Nggweendo wim eeka ogobakkigirik o Metit nen wogori wogogwaarak nogo ambiret onggo ti, mbuti perak aaninggin 7 pugwi, ndi, kuda ambiret onggo ti, mbuti perak aaninggin mbere negen pugwi, eeko nogogwaarak. It Iterali mendek nen nggweendo wim eeka ogobakkigirik inom, kuda inom, aap alik inoona kuninuk wonok wogwe iinok, it aakumi Ket mendek inoweewi inendagembogut inom, aakumi Aram mendek inoweewi inendagembogut inom, nogo nen Iterali inoba kuni wogo nogogwaarak.

1 Endagembogut 20:20

inom wim mbanak inawuri inalitak lombok inowagam wogogwaarak nogo inooko mbareegwa, aap Aram mendek kole mbaganit nogwe me, Iterali mendek nen muguren nagak inookwi iigak, aap Aram inowe endagembogut Mben-Karat awuri nogo inaguda paga kwi'na'nuk mbaganit nogwe me, at nogo aguda paga kwi'na'nuk, inom mbaganeegerak.

2 Endagembogut 19:7

An ari yi, liirogon konengge logowak o. Aap Atiyut mendek endagembogut ti, wone ambi konembunuk, ame nawak nduk, inikime mambege neenok, yoremenggerak agabiti nen iyokan ame lombok nage kenok, aap ambi nen waruwak nduk eeppigin o,” yinuk, eerogo nappiya wagagerak.

2 Endagembogut 7:5

Togop aret yogo nogogwaarik, o kiip arikit nduk ambe ndonggo agan nage kagak, it aap Aram mendek inawooliya wuppunuk wonogwe me, nogogwaarak. Nogo nogogwaarik, time ineebe ambi wonogwe lek aret iyareegwaarak.

Ayup 15:21

Agabiti mbariyak wone nogo mban aruk konenggak eeke, Niniki ugun obeelom wonage, Mbake kagak, It aap maluk eeppiiga nogo nen at oba kwi'nari unggwogwe,

Ndawi 14:5

Aap iniki abe koonak Ala inenggela'me menggerak kwe, It aap maluk eeko menggaarak time wonogwe nogo, “At nen eeppinanege kero,” yinuk, Iniki mak aago wonogo agaarik o.

Yetaya 31:1

It aakumi iniki at Kikak Nakeelik Alik Leenak Iterali inogoba nogo oba panggombugwi, “Aliku ALA yeenggwa niraawak o,” yinuk, nggino yogwi, Eeka'lek, “It Metit mendek nen yeenggwa niraawak o,” yinuk, o Metit nogwe, “It inaguda paga iniki panggombugwi, Inanggweendo ambik wonage paga panggombugwi, Kuda paga kwi'na'nuk wim eeka inomaawi ambik o,” yinuk, inoba panggombiigwi, Eekwi nogo, inabuwa o.

Yetaya 36:9

It Metit mendek nggweendo wim eeka inom, kuda paga nen wim eeka inom, yeenggwa niraagun o, yinuk, iniki it paga panggombunuk, wonage kwe, an nogoba inom eeko menggaarak inowe ambit-ambi eebe abu meek aret kwe, imbirak wakkamenggerak kenok, at tebenogo puurak meek aret o.

Yeremiya 46:21

Wage kenok, it Metit mendek inawuri aap ineegin warak onggo kolaga inom wonogwe ti, lembu aagalogwe inamok ambik mengga kwak wonogwe me, It onggo eeppiyoorak eyom panggoni wage, Aaninggin inoba piyoorak ne nogo ari wage, eerigin me, It ko wappunuk puk arugun lek ambugwi aret kole mbaganit nagun o.

Yetikiyen 1:24

It nogwe iinok, ina'naabit oone ti, niyo taakut oone, “Wo,” wangge menggi kwak, at Omaawi Lombok Menggerak oone ari menggi kwak, ndi, aap ineegin warak ineebe apit aago wim eeriyak nogo logonet, iniyogobit oone agan nogo mengga kwak, togop aret agan nogwe iyareegirak kwe, puk ogo logonet perak, ina'naabit lingginggologwe iyareegirak o.

Yetikiyen 10:5

eeke mbareegi, at Omaawi Lombok Menggerak Ala oone ari kenok konenggo mengga kwak, it kerub ina'naabit oone ari nogo oore'nggam endekem time konenggwi iyareegirak o.

Owak Loongga 7:21

Keekok yinuk, it wim mendek inawooliya wurik yendok-wandok mi'ndak iinok, it aakumi Miriyan mendek iniki abu ma'nogo nogogwaarik, inoone ya-kwa agan inalitak mbaganit nogogwaarak.

1 Tamuwen 14:15

Ti inooreegwaarak paga it aakumi Pilitin mendek nogo kogo nogogwaarik, inawooliyana wonogwe inom, ineyabume wonogwe inom, it tum wakwi wonogwe inom, it aakumi inamendek ndingga nogo inom, abok aret inaganak warit nage, nggween inom nuk-nuk eeke, eereegerak. Ti eereegerak nogo ti, Ala nen aret eereegerak.

1 Tamuwen 26:6

Iige nagagerik, at Ndawut nen aap o Ket mendek endage Akimelek inom, kwe Teruya aagaluk aap Yowap oreeluk Abitayi inom, yorage logonet, “At Tawun awooliya wurik me ta nimbirak wambi noorak?” Yorage mbareegi, at Abitayi nen, “An nimbirak aret wambi nawok o.”