2 Endagembogut 17:23 - Ala Wone Peenok Peebi Mbanak

²³ Aliku ALA nen yorage kagak yoraga ayeloman mini nogo yorage kagak, Iterali yorogo nogogwaarak nogo ndak-ndak, “Iterali ambinom pegiyoorak neebio,” yinuk, mbo piige mbareegi, at aap Atiyut inowe endagembogut nen it Iterali wonogogwam nogome nen kugun wogoren, o Atiyut piya nagagerak o yogondak wonogwe aret o.

2 Endagembogut 17:23 ပူးပေါင်းရင်းမြစ်များ

1 Endagembogut 13:2

Nage nagagerik, Aliku ALA yoge kagak oone nggwok paga kani kunggak ogobakkigirik nogo, wone yoge logonet, “Kat kani kunggak yi wae. Kat kani kunggak yi wae. At Aliku ALA nen ari logonet, At Ndawut paga wiganak nen ombooluk wulaga endage Yotiya aret ndarigin o. Ndake kenok, it aap puut-puut alut eeko menggam unde wonogwe nen kat paga warogo kani kunggo menggaarak nogo, at nogo nen ineebe inoorogo kat paga kani kuninake, aakumi kambak inowak nenenak kunduk, kat paga mban kani kungge, eerigin o,” yinuk, yoreegerak.

1 Endagembogut 14:16

At Yerobeyam nen maluk eerit nage paga it aakumi Iterali mendek maluk eerit nogwe me, Aliku ALA nen it Iterali mbo piyaagin o,” yinuk, yoreegerak.

1 Endagembogut 9:7

it aap Iterali inanggween wogoragagim nogome nen kineebe lek eerogo wumbinagage, ndi, an nendage ki logorak nawi wurik leenogo pakirak yi, lek eerogo mbo pege, eerigin o. Ti eeriminggirak paga yi aakumi ndi aakumi abok aret nen it Iterali in wakkagak yogwe, inagi'ndok kanggwi, eeko logogun o.

2 Endagembogut 13:23

aap Abarakam inom, Itak inom, Yakup inom, inom wone nggaruk togon koonogo pereegerak paga Aliku ALA nen it Iterali, “Nonggop wonogwe o,” yinuk, enegen wogonake logonet, inabuwa nggwok mba'nuk, iniki kunik aganake nagagerak me, it Iterali mendek lek eerogo piige, kobak eerogo mbo piige, eeriyak, “Neebi,” mbareegerak nogo, o yogondak togop mbake wonage aret o.

2 Endagembogut 17:13

Anini mbake nagagerik, Ala wone yoraga inom, inabinggaanggo kaga inom, Aliku ALA nen yorage kagak, it nen aakumi Iterali inom, Yekura inom, yorogo logonet, “Kinombomini, E o, yinuk, eeko logowak nduk, wone lengganak liiru mbanak abok aret yorage, ndi, at Aliku ALA nen yorage kagak yoraga ayeloman mini nogo nen yokkiraawak nduk yorage, eereegerak nogo ndak-ndak eerit nogo logonet, aaninggin kinoba arukwak, kit maluk eeko monggotak nogo mbo punuk, Yogop ee'nu, ndogop ee'nu, yokkirage inom, wone lengganogo yokkirage inom, liippunuk, eerit nogo logonip o,” yinuk, yorogo nogogwaarak kwe,

2 Endagembogut 17:18

Mbake nagagerik, anini mondok nggwik togon Iterali inoba piige logonet, “Iterali ambinom pegiige logorak neebi o,” yinuk, mbo piige logonet, it Yekura mendek inalik mban teppiyareegerak kwe,

2 Endagembogut 17:20

Ti eekwi iinok, Aliku ALA nen it inanebunu Iterali mendek wiganak abok aret aaninggin inoba piige logonet, aap inanini ambik aap inooka ineenggime piigak mban eereegi-eereegi peebi inoba abera'lek mbo tek eerogo piyareegerak.

2 Endagembogut 17:22

Manake mbareegi, it Iterali mendek nen at Yerobeyam maluk eerit nage nagagerak nogo, mbo puulik maluk mondok kunik aret eeko nogogwaarak me,

2 Endagembogut 17:6

Aap Koteya endagembogut wonage kagak, tahun 8 eeppunuk, ambi age paga aap endagembogut Atiyut mendek nen o kota Tamariya tebenogo piinok, aakumi Iterali mendek ando wogoren, o Atiyut piya nage nagagerik, o Kala inom, niyo Kabot aa'nggi paga o kota Nggotan inom, it aap Marayi menggam o kota-kota inom, oone omaawi paga, “O yime aret logonip o,” yinuk, yoragagerak.

2 Endagembogut 21:14

It inombomini o Metit wundi wogogwaarak nen nok, o yogondak kuli nenegen neegak maluk mban eerit wundi wogogwaarak paga nanini mbareegirak me, it an niniki kundugu neyate kwak eegu yumbunik wonogwe nogo, waganogo inawim ineenggime piige neenok, iname maluk eerogo piigwi, inamendek inom, ineebe inom, kugun wogoren nogwe, eerugun o,” yinuk, yorage kagak, yorogogwaarak nogo o.

2 Endagembogut 23:27

Kunik aret wonage logonet, Aliku ALA nen, “It aakumi Iterali mendek abera'lek mbo piyareegirak nogo ndak-ndak, it Yekura mendek togop aret abera'lek mbo piyaagin o. Ndi, o kota Yerutalem leenogo pereegim yi inom, Nawi wurik me yime mban nendage ki logowak o, yinuk, yereegim inom, mbo pigin mban o,” yinuk, yereegerak.

2 Endagembogut 24:3

Ti eereegerak nogo ti, at aap Manate nen aakumi maluk eerulik ugun iigak, inoorit nagagerak inamiya o Yerutalem ilin-unggut abok endak wareegerak paga Aliku ALA nen omaluk mari eerogo mbo puurak eebi mbareegerak me, at Manate ti eereegerak paga inom, maluk ando alik ambik eerit nage nagagerak paga inom, at Aliku ALA nen it Yekura mari eerogo mbo piyaakit nduk, “Ndogop eeppiya woraanip o,” yoragagerak nogo ndak-ndak, it nen Yekura mendek eeppiya wogo nogogwaarak.

2 Endagembogut 25:21

Piya nage mbareegi, o Kamat kota Iribala time at endagembogut nogo nen inooruwak nduk, awuri yorage mbareegi, inoorogo piyareegwaarak. It aakumi Yekura mendek inanggween paga nen keele maageren mbo piya nogogwaarak nogo ti aret o.

2 Endagembogut 3:3

at Nebat aput Yerobeyam nen maluk eerit nage nagagerak paga Iterali maluk eeko nogogwaarak nogo, at mbo puulik inom aret eerit nage nagagerak.

Nekemiya 9:32

Togop aret me, Ala ninogoba o. Kat komaawi ambik kendage abu tiyanak nit aakumi nen, Iya! yinuk, ninagabiti kombakwi nogo, kiniki kunik ee'ninake logonet, eeppinaniyak koonogo pereegindak nogo nggirik-nggerok porogo menggendak me, aa'nduk aap o Atiyut mendek inoweewi inendagembogut nen aaninggin ninoba pinanit wogogwaarak nok, yogondak kuli ninoweewi inendagembogut inom, ninarum menggaarak ninoweewi inom, kat keebe unde ninogobamini inom, kat koone yo'niraga inom, ninombomini inom, kapuri miirinabeegindak inom, abok aret aaninggin ninoba pinaneegwaarak nogo ti, kat nen, Meek aret eeppiyareegwaarak o, yinuk, ninombariyak ti, mage o.

Ndawi 51:13

Ti eeke keenok, kat eeriyak mbake nogo It kat koone taganggwi mamunirage neenok, It maluk eeko menggaarak nogo mbo punuk, yungguninuk kowagam woraagun o.

Yeremiya 52:3

It aakumi o Yerutalem mendek inom, Yekura mendek inom, aaninggin inoba kwi'nagagerak nogo ti, at Aliku ALA anini inombareegerak paga eerogo piinok, “It inoba aberak logorak neebi o,” yinuk, mbo piyareegerak ti aret. Ti'nuk, aap Terekiya nen, “Aap Mbaben inowe endagembogut wone lengganogo yo'nirage logorak neebi o,” yinuk, mbo pereegerak.

Yeremiya 7:15

It inowe-inawot aakumi Eparayim mendek aa'nduk maluk eeko mbareegwa, an wonage me nen wumbiyareegirak nogo pogom, it togop aret an wonage me nen wumbiyaagin,” yegerak me, yokkiragi o.

Oteya 12:3

At Yakup nogo agalo inikime nen nda'nage logonet, oreeluk iyok unggut eenggi pugu aret nda'nage, At eebe nggwok age nagagerik, Ala imbirak wuk eekkolage, Eereegerak nogo o.

Amot 5:27

An nen wogoren o Ndamitik kagak nda time mbo piya nagin o,” yinuk, at Omaawi Lombok Menggerak endage Aliku ALA nen aret yegerak me, yokkiragi o.

Mika 1:5

Ti apit eeke nogo ti, at Yakup nen Ala wone taganogo pereegerak paga, Iterali paga wiganak inomaluk paga, aret eeke agaarik o. At Yakup nen Ala wone taganogo pege menggim nogo ngge o? Lek o. O Tamariya aret nogo lek a? Ndi, it Yekura mendek inomaluk eeko menggam tiyarogon nogo ngge o? Lek o. O kota Yerutalem aret nogo lek a?

Mika 1:6

“Togop aret me, an nen o Tamariya yigirik-noonom eerogo pege, Eyo anggur yariyak negen eerogo pege, It inayugum langgunogo o kobappaga yagabit eerogo mbo wuppege, At anggween alom wurabak nogo, kin eerogo pit nage, Eerigin o.

Mika 2:5

Togop me, kit Aliku ALA apuri kinenggela'me it ambi nen yugum paga wakkanuk, nggween kuli mbanogo wokkiroorak lek aret kaamunggup o.

Pelaareegerak 32:20

ari logonet, It aakumi nda'nogogwaarak ti, Li'lak eekulik ineraambe nggolo menggaarak me, Eerit age yubuni nogwe nenegen iyaakit nduk, nambot iinok, logokit o.

Yotuwa 23:13

at Aliku kinogoba Ala nen aa'nduk a'nuk yi aakumi ndi aakumi ti, mugogo wumbiyaagin lek o. Ata, it aakumi ti nen kit kinenggaanok nggerenggoorak nduk, keele pugu pogom, ta'na pugu pogom, kinambokan paga ya'mbiran nggora eerogo kinooriyak pogom, kinigen paga poondo alok ngguurik pogom, eerogo pinagagwi iigak, at Aliku kinogoba Ala kinanggween obeelom wokkiragagerak yi paga nen kit kineebe lek ogo logomunggup o.

Owak Loongga 18:30

O nogo abu aret wurogo pogo nogogwaarik, aap Mika nen Ala obaane'me ogut eerogo pereegerak nogo o time pako nogogwaarik, aap Muta ombooluk Nggeroton aput Yonatan inom, apuri inom, Ala unde logonet, inanebunu Ndan mendek inake eeko logowak nduk, mippiinok, eekwi iigak, aakumi inanebunu alik mendek nen keele maageren noorak kuli aret ari nagagerak.