1 Tetalonika 4:6 - Ala Wone Peenok Peebi Mbanak

^6-7 Nit maluk eerit nugu logowok nduk, at Ala nen mii'ninabulik o. Ata, maluk eeka'lek at ake leenak logowok nduk, mii'ninabeegerak me, nit aa'nduk ninoone omaawi paga yokkirogo nogogurak nogo ndak-ndak, maluk togoti eekwi iinok, Ala nen onggo koonogo eeppinanege menggerak me, kinoreeluk ambi maluk eeppege logonet, at akwe kote wuriyak mage o.

1 Tetalonika 4:6 ပူးပေါင်းရင်းမြစ်များ

Ndawi 140:12

It aap tebenak wonogwe nogo, At Aliku ALA nen inaana'le mbangge, Aap ineenggi lek nogo inawone liirogon mbangge, Eeke menggerak ti, neenu aret o.

Ndawi 94:1

Kaliku ALA wae. Maluk eekwi onggo eeppiiga kat Ala aret o. Maluk eekwi onggo eeppiiga Ala wae. Kin paga ari mok o.

Wundeegwaarak 20:15

Yi mendek ndi mendek yogoot kiraariyak mage o.

Wundeegwaarak 20:17

Aap ambi awi wurik a, akweeluk a, ayeloman kumi-aap a, aanggumi lembu-keledai a, amindik-amendek abok aret kiniki nen uugwe-uugwe mbariyak mage o,” yinuk, wone ti abok aret at Ala nen aret yoragagerak.

Kini Wuppiige 11:1

Aaninggin wakkaga maluk kenok, Aliku ALA eebi lombok mbake menggerak kwe, Aaninggin wakkaga abe kenok perak, inikilom mbake menggerak.

Kini Wuppiige 16:11

Aaninggin abe wakkaga inom, kuli a'me ari naga inom, nogo ti, Aliku ALA unde wonage, Ndi, ndak-ndak age lek kenok, yugum mbuulogwe ambi pegak eekwi yonggolak menggerak abok aret nogo ti, at nen mban ogobakkigirogo pege, Eereegerak.

Kini Wuppiige 20:14

Aap kunggolage nogo nen, “Yi maluk o. Yi abu maluk aret o,” ari nagaatik, Abu kunggo'nok, “Ndogop kunggirak yi kaanip o,” yinuk, wogoppatit ame nage menggerak.

Kini Wuppiige 20:23

Aaninggin wakkogo logonet, yugum wakkaga abe kagak alik paga wakkogwe iinok, Aliku ALA eebi lombok mbake, Ndi, aaninggin wakkagak irip abe ari nage kagak, alik paga pi wogwe iinok, inikilom lek eebi mbake, Eeke menggerak o.

Kini Wuppiige 28:24

Aap ambi nen ogoba ilik, agalo a, inamendek kiraakkolage logomenggerik, “Yi maluk lek o,” ari ti, Aap ambi aakumi inambik iname tu paappunuk inamendek yogoot kumaari unggwage kwak aret wonage menggerak.

Wone Alom Kibingga 5:8

Aap ambi yabu unde wonage nogo owe nen enegen wagangge, ndi, it imbirak inoweewi tiyarogon nen inigen wogonakwi, eeko menggaarak me, kat nen o ambime it aakumi meek mendek tebenogo piinok wonogwe, wone yugu ndak-ndak eeppiiga'lek inawone yiluk-yiluk mbanggwi, eekwi kenegen iige kenok, “Aap yi eekwi iya!” mbariyak mage o.

Yetaya 5:7

At Omaawi Lombok Menggerak Aliku ALA eyabu anggur yarak nogo ti, kit Iterali mendek aret. Ndi, kit aap Yekura mendek ti, anggur awi yarak at inikilom mbake kwak aret me, “Eekaatak a'me nggelok eeppiigwi iyaamun ilik?” yinuk, tokkiige nagagerak kwe, kit mban-mban kinamiya wun-wun yogwe, “Obeelom mban eerit nugwi iyaamun ilik?” yinuk, tokkiige nagagerak kwe, at ambi nen at ambi maluk eeppegak eerit nogo logonet, leenggu maakwi, Eekwi kiige nagaarak o.

Yeremiya 7:6

aap nggiru inenggela'me wonogwe inom, elege moono inom, kumi togwe inom, tebenogo piigo logonet, wi-wi aganaka'lek obeelom mban eeppiigwi, o yime it aap maluk eeka'lek iigak, inamiya wunaka'lek teppiigwi, kugi eerit nugwi paga maluk inoba paka'lek an mban mu'neren wogwe, eekwi iinok,

Yeremiya 9:4

Aliku ALA nen an yo'nege logonet, “Inom ndarak aret kwe, inambokan laganggwi, Iniki kunik aret mbakwi kwe, meek eerogo piinet nugwi, Eeko menggaarak me, Inom kunik mbakwi nogo maluk eeppiyookwak liippiyaawak o. Ndi, inom ndarak nogo nen, Kit ninowe-ninawot aret me, obeelom eeppinagagun o, yorogwe iinok, abet mbarugwaarik o.

Yetikiyen 22:13

Aakumi wi-wi eerogo piige logonet, inamendek wagangge, at enggela'me time aakumi inoorogo piinet nage, eeke ti paga an abet aret at eraaket nen neenggi aan lebenogo patigin o.

Ala Unde 19:11

It Iterali nen yogoot ambi waganggwi, aakumi inambokan laganggwi, inoone pilit yogwe, eekak yuurak mage o.

Ala Unde 19:13

It inom menggaarak nogo wi-wi aganakwi, inamendek yogoot waganggwi, eeriyak mage o. Ndi, onggo wogoroorak nduk, ineyabu eeppiyamenggaarak nogo, wogoraga'lek iigak nogo ambi yuurak mage o.

Ala Unde 25:14

Aap ambi nen ore ambi anggween kunggola nage ilik, at ore nen at anggween kunggola wage a, eeko logonet, at ambi nen at ambi wi-wi eekak eeko logorak mage o.

Ala Unde 25:17

An inogoba Ala nayuk wuko logonet, at ambi nen at ambi wi-wi eekak eeko logorak mage o. Naliku inogoba Ala an nen aret yagi o, yinuk, yegerak, yoret o,” yoreegerak.

Mika 2:2

It nen aakumi ineyabu eerak uugwe mba'nuk kologwe, Inawi wurik uugwe mba'nuk tebenggologwe, Inawi wurik inom, inoreewi ineyate pugu inom, ndinggologwe, Eeko menggaarak.

Tepaniya 3:1

Aakumi tebenogo piigwi, Ala nen yorage nogo eeriyak ineebi mbakwi, O kota enete maluk eerogo pugwi, Eeko menggam o kota Yerutalem ti, abuwa o!

Tepaniya 3:5

Aliku ALA at enggela'me wonage logonet, maluk ambi eeppiigeelik obeelom mban eeppiige, At puk aga'lek ko'lu-kii'me o kubondendok nen inawone amburu mbanogo punuk, a'me nggelok mban eeppiige, Eeke menggerak kwe, It aap maluk eeka iniki nggolawe nogo, inenggali mbaka'lek maluk mban eerit nugu menggaarak o.

Maleyaki 3:5

“An nen inowak loonogo maluk onggo eeppiyaakit nduk woraagin o. Wage logominggirik, it aap tili pagangga inom, aap kumi ugun-ugun eeginaka inom, pilit pugunogo, Ndogop eeke kagarak, yaga inom, onggo koloorak eyabu eekwi wi-wi eeginaka inom, it aap kumi togwe kunduk, elege moono kunduk, tebenogo piiga inom, it aap nggiru inawone yaga-taga eerogo piiga inom, it an inagabiti nombakulik nogo mendek abok aret, Ndogop eekwi kiigirak o, yinuk, yorage logokit nduk, woraagin o,” yinuk, at Omaawi Lombok Menggerak Aliku ALA nen aret yegerak me, yokkiragi o.

Marakut 10:19

Yoge nagagerik, “Yogop ee'nu, ndogop ee'nu, yereegerak wone yugu nogo ti, Aap wariyak mage o. Kumi ugun wurinaburak mage o. Yi mendek ndi mendek yogoot kiraariyak mage o. Pilit wone aakumi inoba piyoorak mage o. Aap wi-wi eeginaburak mage o. Kinagalo-kinogoba inayuk wuko logonet, inoone liirogon konenggo logonip o, yereegerak wone nogo kat keenu aret o.”

Lukat 12:5

Kit kinagabiti mbarumunggup nduk, an kurumbi yokkira o. At kinagabolo mondok kinooppunuk, kani omoonuk wunuk mban ari menggim nappinagarak unde menggerak ti perak, kinagabiti mbako logonip o. At mondok kinagabiti mbako logonip o, yinuk, yokkirage agarik o.

Lukat 16:28

An nowe-nawot ineebe 5 name wonogwe me, yagan wako menggam yime wogwe iyo, an nogobamini iname kurumbi yora nawak nduk, aap Latarut ti, nappenok nduk, yokkege agarik o, obak!

Oroma 1:18

It aakumi maluk eeka nen Ala wone ineebi mba'nuk, maluk mban eerit nogo logonet, Ala ndogop menggerak wone aakumi waganggwi iyo nduk, non mbambiigo menggaarak me, Ala agi mbogut paga nen anini wuppi wagaatak kin age paga nineenu age menggerak.

Oroma 12:19

Noreewi o. Nit ninogoba nen ari logonet, “Aap inane'me wakwi inom, maluk onggo eeppiigwi inom, an nen aret eeppiyaagin o,” yinuk, yereegerak liiru mbanak wonage me, maluk eeppinagagwi onggo eeppiigo logogup o. Ata, Ala anini nen it onggo eeppiyaagin me, mbo piigo logonip o.

2 Korindut 7:11

Kit kiniki wakkologo mbareegup, Ala nen eeppinagareegerak nogo liippogo logonip o. Kit eereegutak nogo ti, kiniki wakkologo logonet, maluk kinenggela'me wonage nogo mbet-mbet koonggwi, “Maluk nabenggolagaarak,” kinombarukwak, mbet-mbet kinaana'le mbanggologwe, “Ala nen ninoorukwak ninagabiti,” mbako logonet, at maluk eereegerak nogo mondok kineebi mbakwi, “Wone yi agaarak nogo ninogoba Pawulut ninom koonuwok lak ao,” mbakwi, maluk eerak mbet-mbet aganggen kerek togon owak loonggwi, eereegutak nogo mbininggo logonet, kit maluk ambi eerulik obeelom aret owak loonggotak kiigo o.

Nggalatiya 5:21

neebi-keebi yogwe, amburu nenok kumili-kumili agan nugwi, kwaanggen wappunuk inoone amburu paga kumi ugun-ugun eeginabit nugwi, ti mendek abok aret it eerit nugwi iinok, at Ala abu'me piige menggim nogome unggwi nagun mondok lek aret o, yinuk, aa'nduk yokkiragagirak nogo aret yokkiragi o, noreewi.

Epetut 4:17

Togop me, noreewi o. “It aakumi Ala wone konenggulik endekem mendek nen we aanom warogo koombunuk, eerit nogo mengga kwak, kit togop eerugup o,” yinuk, ninowe nen yo'nege kenok yokkiragi o.

Epetut 4:28

Kit yogoot waganggo monggotak nogo, ambinom yogoot waagup o. Ata, kineenggi paga nen mban eerogo nunggwi, it aakumi inamendek lek iinok yeenggwaarogwe, eeko logobagip nduk, yabu ambi eeriyak miippunuk, kineenggi omaawi paga eekko'net nogo logonip o.

Epetut 5:6

It Ala wone tagambunuk, maluk ti mendek eerit nogwe iinok, Ala anini inoba piige menggerak me, it ugun kobak menggaarak nogo nen inoone amburu ndik-ndik agan wogo logonet, kinambokan laganggwi iyo, liippogo logonip o.

Pelaareegerak 24:7

Aap Iterali mendek ambi nen at oreeluk kagak kumaappunuk, ayeloman eekkolage, onggo nggerenggolage, eeke kenok, aap ti mondok warogo pogo logowak o. It aap maluk ti mendek eekwi iinok, kinenggela'me inenggaawak lek eerogo piigo logomunggup o.

1 Tetalonika 2:11

Ala mondok tiyanak logonet, “Kit tiyappinagakit nduk, nabu'me woraanip o,” yinuk, ayonggo pinagareegerak nogo, iniki mbake ndak-ndak eerit nogo logobagip nduk, aap ambi apuri kenok yorage nogo kokwak, nit togop aret niniki aganggen kerek togon kit kinalitak lombok kinaruk wakwi, kiniki eyak wappinagagwi, kini wuppinagagwi, eeko nogogurak nogo kineenu aret o.

2 Tetalonika 1:8

it aakumi Ala ineenggo'lek obeelom wone ninowe Yetut eeke nagagerak wone nogo wagangga'lek iinok, maluk onggo wogora woraagin eyom nogo paga niniki tayenogo pinanigin o.

Iberani 13:4

It aap kumi kundugume wurinabit nugwi, komologwe tawe ugun wurinabit nugwi, eekwi iinok, Ala nen inowak loonogo maluk onggo wogoraagin me, aap ambi akwe koloorak nduk, lambumbiigwi nogo ti, abu obeelom aret me, tiyappuurak aret o. Ndi, kolage logomenggerik, imbirak nogo yuurak ti kunduk, abu obeelom mban aret me, nogo yugu menggam maluk age kero, arum liirogon logowak o.

Iberani 2:6

Ata, aap ambi Ala wone liiru mbanak paga nen ari logonet, “Nit aakumi yi, taani me nduk, abe'ninake, Ndi, aap inapuri nit yi, taani me nduk, liippinanege, Eeke menggendak o?

Yakobut 2:6

It aap ineenggi lek nogo, Ala nen aret miirinabeegerak kagak, kit nen meek eerogo piigwi kiigi o. Piyak-payak eekkinako logonet, niikkiren wone owak loonggo menggam pinagi nogwe nogo ti, it aap ineenggi warak nen eerogo pinagagwi nogo lek a?

Yakobut 5:4

It kineyabu eeppinagagaarak nogo, onggo ndak-ndak wogoroorak kagak eeko nogogutak me, it inoone mumun kokop yokkirogwe yi, iyaanip o. It ando anggen yugu wonok kira wogwe nogo kunduk, inoone yogwe at Omaawi Lombok Menggerak ninogoba nogo, muk aruk konengge agaarik o.