1 Tetalonika 1:9 - Ala Wone Peenok Peebi Mbanak

⁹ Nit kiya wogo mbareegu, wo'ninabeegutak nogo inom, kugiwak eeko nogogutak nogo mbo punuk, Ala abet aret eenik menggerak nogo mugurok nogo logobagip nduk miikkologogutak nogo inom,

1 Tetalonika 1:9 ပူးပေါင်းရင်းမြစ်များ

Ndawi 42:2

Niyo abu ee'ninake menggi kwak, Kat mondok-mondok keenik menggendak Ala, “Ao,” lombok kombake minggirak me, “Kat wonage me mandenom keya woroorak?” mbake agarik o.

Ndawi 84:2

Kaliku ALA kawoore'nggam logokit lak, “Ao,” mbake, Niniki mondok nenet unggwage, Ineenik aganaka kat Ala aret me, Nimbirak lambunikit nduk, Niniki inom, neebe inom, uugwe lombok mbarit unggwage, Eeke agarik o.

Yetaya 37:17

Kaliku nogoba ALA wae. At yo'nege yi, naruk koneni o, yinuk, karuk konengge, ndi, it eeppiigwi yi, nenegen pegiya o, yinuk, kenegen pe'niige, eeke logonet, at Tanerip nen kat keenik menggendak nogoba Ala meek eerogo pagage yi, abok aret liippege logot o.

Yetaya 37:4

aap endagembogut Atiyut mendek nen at aput aap wim eeka inowe ambi at eenik menggerak Ala nogo, meek eerogo puwak nduk, nappi wagaarak yi wone ndi wone agan nage nogo, Aliku kogoba Ala aruk konembunuk, wone agan nage onggo maluk eeppuurak mbakerak kero, it eegu pugu ineenik wonogwe nogo, inake tamban eeke logowak nduk, yori nanip o, yo'niragaarak kenok, yokkiri wogo o.”

Yeremiya 10:10

Kaliku ALA perak, kalik Ala aret! Kat kanggeelik mondok keenik wonage, Kendagembogut kitok mondok wonage, Eeke menggendak o. Kanini mbake keenok, nggween yi nuk-nuk ari, Kanini yi aakumi ndi aakumi inoba piige keenok, ko wappunuk, wonaga'lek iniki ma'nogwe, Eeko menggaarak.

Yeremiya 16:19

Kaliku ALA wae. Kat komaawi eeppanega, Nobak wurik kwak wonaga, aaninggin noba age kenok, neebe op logokit nduk, kabu'me panega, kat aret o. Yi aakumi ndi aakumi kat kowagam ari wogwe, O nggween irip-irip me nen kat keya wogwe, Eeko logomenggaarik, Kat yokkogo logonet, “Ninombomini ti, abe mendek ambi porogo logolik o. Ata, inambokan lagangga abe eeppiyoorak lek aanom warogo kagak inagugiwak ti mban porogo wonogogwaarak o.

Ndaniyen 6:26

At Ala ti, kanggeelik mondok-mondok eenik wonage, At abu'me piinok menggim lek ageelik mondok wonage, At wone lengganogo yorage menggim kuli pugu lek itok wonage, Eerak aret agaarik o. At nen wondet eerogo piige, inagap ndarogo piige, Mbogut paga inom, nggween paga inom, ineenu agak eeke, Eerubok mendek iya tit eeke, Eeke menggerak o. At Ndaniyen singa inambeme yonggoliyak nduk aago me, agap ndakerak o. Togop me, an wone lengganogo yokkirage yi, kit yi o ndi o an nabu'me pinaganuk minggim wonogwe abok aret nen at Ndaniyen ogoba Ala kinagabiti mbakwi, at mban ayuk wukwi, eeko logomunggup nduk, wone yi liiru mbanogo wumbigi o,” yinuk, liiru mbanogo wumbereegerak.

Oteya 1:10

Togop aret kwe, mbini niyo aa'nggi paga wonage nogo ambik me, aaninggin wakkogwe, ineenggi lingginggwi, eeriyak meek menggi kwak, it Iterali mendek ineebe togop aret arugun o. Ogo mbaremengga, Kit an napuri lek o, yinuk, yoragagim nogome, It an neenik minggirak Ala napuri aret o, yinuk, yoraagin o.

Tepaniya 2:11

At Aliku ALA nen it aakumi o nggween paga yime inagugi lek eerogo piige kenok, Inagabiti nen, “Aliku ALA ti, iya!” yinuk, yi aakumi ndi aakumi nggween paga wonogwe abok aret inalitik-inalitak menggam logonet, Aliku ALA abu'me tebe yinuk, at alut eeko logogun o.

Maleyaki 1:11

“Oonegen lagi wage menggim nen nok, kilu yi nage menggim kuli, yi aakumi ndi aakumi inenggela'me abok aret an nendage mondok tiyanak logogin o. Aakumi inanebunu lombok inenggela'me nendage abu tiyanak logogin me, an nendage kumbunuk, yi o ndi o abok aret nake obari abe mendek kani kunggwi, an nake abe pugwi iinok, nale'nggen nen wagangge nogo mendek wo'nugwi, eeko logogun o,” yinuk, at Omaawi Lombok Menggerak Aliku ALA nen aret yegerak o.

Matiyut 16:16

Yorage mbareegi, at Timon Peterut nen, “At eenik menggerak Ala aput Mesias nogo kat aret o.”

Nappiigak 14:15

“Wologo wae. Nit kit kokwak abe aakumi aret me, kit nonggop nduk yogop eeko ogotik? Kit yi eekak ndi eekak aanom warogo eeko monggotak yi, mbo punuk, at mbogut inom, nggween inom, yi nggwok yenggenak laut inom, yi mendek ndi mendek abok wakkagagerak Ala eenik menggerak nogo wone waabagip nduk, obeelom wone wonok yokkira wogoorak kagak kwe, eeko ogotik o.

Oroma 9:26

Ndi, ambi ari logonet, “Kit an napuri lek o, yinuk, yoragagim nogome, It an neenik minggirak Ala napuri aret o, yinuk, yoraagin o,” yinuk, liiru mbaneegerak nogo ndak-ndak, it endekem konenggulik mendek ninom aret leenogo pinaneegerak me nduk, yereegerak kogo ogoorik o.

1 Korindut 12:2

Kit aa'nduk, Ala wone konengga'lek wonogo logonet, kugiwak nebet-ndalok ariilik mendek kagak, “Ndogop yo'nirage kogo,” yinuk, mugurok nogo nogogutak nogo, kineenu aret o.

Pelaareegerak 5:26

At eenik menggerak Ala nogo kani wunuk ari enggela'me nen oone ari nit konenggwi kwe, kangga'lek nineenik wonogwe yi kwak, aap kanggo menggaarak mendek ambi ta nen togop konembunuk, kangga'lek wonage mbakop?

1 Tetalonika 2:1

Noreewi o. Nit we aanom warogo kiya woroolik nogo ti, kit kineenu aret o.

1 Tetalonika 2:13

Togop me, Ala wone yokkirogogurak konenggo logonet, “Yi we aakumi inoone lek o. Yi Ala wone nit abet mbakwi ninikime koonninake menggerak wone abet aret o,” yinuk, waganeegutak me, nit puk aga'lek kulinik-kalinik, “Ala wa,” yogo monggoorak.

1 Timotiyut 4:10

Yi aakumi ndi aakumi abok inagap ndarikit mbake menggerak kwe, nit niniki at oba panggombunuk abet mbakwi ninagap ndaka mondok itok eenik menggerak Ala nen, “Nit yorogwe niigak eeppiyaagin,” mba'nuk, niniki lunik mondok nu'lek monggoorak me, nit lin wako logonet, nabenik-nabenak mban eerit nogo monggoorak.

Iberani 12:22

Kit yogondak puut alik Tiyon abu'me at eenik menggerak Ala nogo agota Yerutalem mbogut paga nogome aret ka nogogutak negen aret wonogwe o. It yi malayikat ndi malayikat nineenggi lingginiyak meek mondok iya lombok kuwak eerak logonet, inale'nggen paga eekwi ineebe inom,

Yotuwa 3:10

Yorage nagagerik, panggo yi wogo mbareegwa, it yorage logonet, “At eenik menggerak Ala nogo kinenggela'me wonage logonet, it aakumi Kanan mendek inom, Ket mendek inom, Kewi mendek inom, Perit mendek inom, Nggiragati mendek inom, Amori mendek inom, Yebut mendek inom, it apit aret at Aliku ALA aa'nduk a'nuk, mugogo wumbiyaagin abet aret kineenu arumunggup nduk, ambi yokkira o.

1 Yaya 5:21

Napuri niniki kunik yi wa! At Ala alik lombok menggerak nogo mbo punuk, obaane'me alik ambi mippunuk, alut eekwi kiyo, liippogo logonip o. Abu aret yokkiragi o. Napuri wa!

1 Tamuwen 17:26

Yogo mbareegwa, at Ndawut nen it aap time inom mi'ndak wonogwe nogo yorage, “Aap agabolo mbana'lek Pilitin mendek ti, At ta me, nduk, agabiti mbaka'lek at Ala eenik menggerak awuri ineegin warak miyuk-meya eerogo piige mbakop? Nit Iterali ninenggali wappinanege yi, lek aruwak nduk, aap ambit-ambi nen aap Pilitin mendek ti, warogo pege kenok, aap ti nonggop eeppuurak?”

1 Tamuwen 17:36

Kayeloman an nen singa inom, beruang inom, imbirak inookirak ti ndak-ndak, aap agabolo mbana'lek Pilitin mendek yi, at eenik menggerak Ala awuri ineegin warak miyuk-meya eerogo piige me, an togop aret warigin o.