1 Peterut 4:11 - Ala Wone Peenok Peebi Mbanak

¹¹ Yi eekak ndi eekak eeko logonet, ninowe Yetut Keritut eereegerak paga at Ala endage tiyak yuwak nduk, kit ambi nen Ala wone yoroorak mbakwi kenok, Ala ari menggerak wone nogo aret yorogwe, ndi, ambi nen aakumi yeenggwaarogo logorak mbakwi kenok ti, Ala omaawi eeppinagage kagak yeenggwaaranet nogwe, eeko logonip o. At Ala ti, abu tiyanak mondok-mondok ayuk warak logowak o. Amin!

1 Peterut 4:11 ပူးပေါင်းရင်းမြစ်များ

Ndawi 145:13

Kat kabu'me piige menggenom ti, o maan nen lek ageelik mondok aret wonage, Wone lengganogo yorage menggendak ti, lek arigin lek At ambi oba agak eerit wundi wage, Eeke logogin o. Kaliku ALA nen wone koonogo yoraga'ndak Abok aret liirogon eeppiinet nage, Kat eeke menggendak abok aret Aakumi inabuwa mba'nuk eeppiinet nage, Eeke menggendak o.

Yetaya 8:20

wone yugu liiru mbanak inom, abeko logorak wone yugu inom, pekkaanip o. It aakumi ti, Ala wone yugu ndak-ndak yaga'lek kenok, inikime o eya aago wonage lek apit aago wonage mbarumunggup o.

Yeremiya 23:22

Nit eeriyak koonggwi me, it ninom logonetak en, an ari minggirak nogo aret napuri yoranet nugwi, Ndi, an napuri inobaabut nggolawe logonet eekwi inom, maluk eerit nugwi inom, mbo punuk, iniyokan nowagam woraawak nduk, yoranet nugwi, Eeko logonetak o,” yinuk, yegerak.

Ndaniyen 4:3

Ineenu agak abu alik negen eeke, Eerubok mendek mondok iya lombok eerit nage, Eeke kagagirak nogo ti, iya! At abu'me piinok menggim ti, mondok-mondok wonage, Aakumi nda'narit wundi wogwe iigak, aa'nduk nen nok, peebi at wone lengganogo yoranet wundi wage, Eeke logogin o.

Ndaniyen 4:34

Ndi, “Tahun ndogop logorak,” yugu nogo abu aret ari wage mbareegi, an Nebukanetat nena mbogut paga ni'nage neegak, niniki nambokan agagerak nogo nenaame ari wage mbareegi, at Tiyanak Lombok Menggerak nogo alut eeke, at eenik mondok menggerak nogo ayuk wuke, endage tiyappege, eereegirak o. At wone lengganogo yorage menggim omaawi menggerak ti, lek arigin lek mondok omaawi aret wonage, Aakumi nda'narit wundi wogwe iigak, at abu'me piinok menggim nogo mondok wonage, Eerak logogin o.

Ndaniyen 7:14

Pi wogo mbaka, at ayuk warak logonet, wone lengganogo yorage logowak nduk eerogo pege, endage tiyappege, endagembogut logonet unde logowak nduk eeppege, eeke mbaki, yi aakumi ndi aakumi inom, aakumi inanebunu lombok yi o ndi o wonogwe inom, aakumi inoone alitak inom, abok aret at abu'me tebe yinuk, alut eekwi iigirak o. At ayuk warak logonet, wone lengganogo yorage logorak ti, lek arigin lek mondok-mondok yorage, ndi, at abu'me piinok menggim ti, tebenogo pugun lek mondok omaawi wonage, eeke kagarak o.

Matiyut 6:13

Ninabut mbanuwak nduk, pinani nagun o. Ndi, at abu maluk mendek nogo nen maluk ee'ninake kero, ninagap ndaru o. (Kabu'me piinok menggenom arum wonage, Komaawi ambik lombok wonage, Kat mondok tiyanak wonage, Eerak menggendak me, Yogondak inom, peebi inom, lek arigin lek mondok-mondok aret logogin o. Amin.) yinuk, yogo logonip o.

Yaya 13:31

Wundi nage kagak, at Yetut nen it ando nogo yorage logonet, “Wologwe! Yogondak Ala nen an aap aret nda'nagagirak nogo tiyappanigin o. Ndi, an eeke nogo paga Ala kunduk tiyak yigin o.

Nappiigak 7:38

O karume it Iterali kuwak aago inenggela'me wonagagerak inom, it ninombomini o karume time inom nege nagagerak inom, puut Tinayi paga malayikat nen wone yoreegerak nogo inom, ndi, yoge mbareegi, nit yo'nirage logowak nduk Ala wone mondok logorak wone waganeegerak inom, ti, at Muta mban aret o.

Oroma 11:36

At nen aret yi mendek ndi mendek abok aret wakkage, at nen aret yi mendek ndi mendek unde wonage, ndi, at nen aret yi mendek ndi mendek paga at endage tiyak yuwak nduk eeppege, eeke menggerak me, at endage mondok-mondok tiyanak aret logowak o. Amin!

Oroma 12:3

Ala nen, “At yi, an noone yoranet nege logowak o,” yinuk, iniki kunik en onggo lek we aret unde eeppaneegerak nogo paga kit abok aret wone ambi yokkira o. Kit obeelom wone abet mbako mbareegup, Ala eyabu eeko logobagip nduk, kinalitak lombok unde eeppinagareegerak nogo, liippunuk, “An yi aret unde eeppanegerak kagi,” yinuk, ndak-ndak eerit nogo logonet, kat mbuuluk unde eeppagareegerak kagak, “An iya lombok unde eeppanegerak kagi,” yinuk, wogoppako logogup o. Ata, “An yi aret wo'negerak me,” yinuk, kiniki tebenak logonet, eerit nogo logonip o.

Oroma 16:27

At Yetut Keritut eereegerak paga at alik iniki warak lombok menggerak Ala nogo endage mondok-mondok tiyanak aret logowak o. Amin.

Oroma 3:2

Lek o. It eeko logowak nduk leenogo piyareegerak nogo ti, wone ambik wonage me, yokkira o. Ambi ti, at Ala nen, “An noone it porogo logowak,” mba'nuk, unde eeppiyareegerak.

1 Korindut 10:31

Kinambi nunggwi, kinagi nunggwi, yi eekak ndi eekak abok aret eeko logonet, Ala endage tiyappuurak nduk mban eeko logonip o.

1 Korindut 12:4

Aberiniki nen ninalitak lombok unde eeppinanege menggerak nogo ti, ambik wonage kwe, at eebe perak, ambit nen aret tumbu'nirage menggerak.

1 Korindut 3:10

Ndi, an eerit nage logokit nduk, Ala iniki kunik nen unde eeppaneegerak nogo ndak-ndak eerit nage logonet, aap eenggi paalo aago o wuke menggi kwak, an o eyak liirogon wuppit nagagirak nogo paga, it aap alik nen eebe aret wukwi me, it inalitak eebe wukwi nogo nen ugun-ugun wukwi iyo, an eyak wuppereegirak nogo paga mban iniki liippunuk, eebe aret wuko logowak o.

2 Korindut 2:17

It ando nen Ala wone yorogwe paga, “Ambi kolaawok o,” yinuk, yokkirogo menggaarak kwe, nit perak, togop lek o. Yokkiraawok nduk, Ala nen nappinani wagagerak me, at enegen kagak Keritut ayeloman logonet, we ale'nggen paga aret yokkirogo monggoorak.

2 Korindut 9:13

Kit Keritut eeke nagagerak obeelom wone abet mba'nuk waganggwi kiigaarak nogo ndak-ndak eerit nugwi, ndi, kiniki lek ndoobu logonet, kinamendek it aakumi abok o Yureya mendek inom yeenggwaarogwe, eekwi paga, kinabut mbambunuk, “Ala apuri abet aret iigo,” yinuk, Ala endage tiyappogo logogun o.

Epetut 1:19

Nit abet mbakwi niinok, at omaawi mondok iya lombok nogo paga eeppinanege nogo ti, Keritut kambunuk, nogo menggam nen eenik agago mippege nagagerik, kugi nggween abu'na mendek inom, eyonggaame mendek inom, mbogut abu'na o oolo yayi mendek inom, yi kugi ndi kugi inayuk wuko menggaarak o yogondak wonogwe inom, peebi logorak inom, it abok aret tebenak iigak, at Keritut alik mban Ala eenggi abe'nggan tiyanak logowak nduk, mbogut paga mippereegerak nogo ndak-ndak, nit yogondak at omaawi ti paga togop aret eeppinanege agaarik o.

Epetut 4:29

Wone maluk mendek kinambe paga nen wumbi woroorak ti mage o. Ata, it konenggwi nogo nen, “Ninabuwa nen yo'nirogwe iigo o,” yuwak nduk, aaninggin ambi inoba age kenok, iniki kole eeppiyoorak wone mban yogo logonip o.

Epetut 5:20

Warit nogo logonet, yi mendek ndi mendek apit eeppinanege menggerak nogo paga ninowe Yetut Keritut endage kunogo, “Ninogoba Ala wa,” yinuk, keyage wako logonip o.

Epetut 6:10

Wone abu aret yokkiragarak me, age yobok ambi yi yokkira o. Kinowe omaawi ambik nogo paga kiniyok panggombunuk, kinogogumbuk logonip o.

Pilipi 2:11

Ndi, aakumi inanebunu lombok abok aret ninogoba Ala endage tiyak yuwak nduk, “Yetut Keritut ti, ninowe aret o,” yinuk, nggwok paga paganggwi, Eeruwak nduk, Tiyappereegerak o.

Kolote 4:6

Yi aakumi ndi aakumi inoone yokkira wogwe iinok, onggo yorogo logonet, mbiingga ombat abe kaawak nduk, mayu eeko mengga kwak, kit togop aret kinoone ale lek inabuwa mbako logonet, yanggorogon yorogo logonip o.

1 Tetalonika 2:4

Ala nen ninabut mbambunuk, obeelom wone unde eeppinaneegerak nogo ndak-ndak aret yokkirogo monggoorak. Kit kinikilom mbarubagip nduk yokkirogwe lek o. Ata, at niniki lombonninake menggerak Ala nogo inikilom mbaruwak nduk, yokkirogo monggoorak.

1 Timotiyut 1:17

Ndi, yogondak, naput o. Yi o ndi o aakumi aa'nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik mondok itok eenik menggerak ninigen kogolik alik menggerak Ala nogo endage mondok-mondok tiyanak ayuk warak logogin o. Amin!

1 Timotiyut 6:16

At kanggeelik mondok-mondok eenik menggerak aret o. At wonage me time eya ambik me aakumi at owagam wok yi noorak meek o. Aakumi nen aa'nduk at eebe inigen koolik me, yogondak kunduk inigen kogwe lek mban aret. “At endage mondok tiyanak yi aakumi ndi aakumi abok at abu'me tebe yinuk, at oone mban konenggo logowak o,” yinuk, amin.

Titut 2:1

Kat perak, wone mamunirage menggendak nogo wone kole wone kenok mban mamunirage logot o.

Titut 2:15

Wone yi yorage, “Yogop eeriyak ndogop eeriyak,” wone lengganinake, koone omaawi paga inaruk wake, eeke logot o. Ndi, aap ambi nen kat meek eerogo pagarak lek o.

Iberani 13:7

It aa'nduk togon Ala wone yokkirogo nogogwaarak kinogobamini nogo, inoba abeko logonet, it abet mba'nuk obeelom eerit nugu nogogwaarik, kambit nogogwaarak nogo, liippunuk, kit togop ndak-ndak abet mba'nuk eerit nogo logonip o.

Iberani 5:12

Kit o maan togon Ala wone konenggo nogogutak me, muk mamuniragak mendek logorak kwe, omaawi mendek noorak meek kenok, yilak amburu negen mban nonggo logorak kinobaabut kiigirak me, alom wone aa'nduk konenggo nogogutak nogo mendek mban ambinom mamunggiroorak ogotak kiigo o.

Yakobut 1:19

Nowe-nawot o. Kit an niniki kunik me, wone yi, liirogon waganggo logonip o. Nit abe koonak mban eerit nogo logorak Ala nen ninombareegerak nogo ti, ninanini paga eerit nogo logorak lek me, kit abok aret wone mbet-mbet konenggo logorak op aret kwe, yuurak kenok perak, liippunuk yogwe, kinanini mbet-mbet wungga'lek logonet eekwi, eeko logonip o.

Yakobut 1:26

Kit ambi nen, “An Ala wone liippunuk eeke agarik o,” yinuk, yogo monggotak kwe, kinambe liirogon arum wonaga'lek kinamili irip paga ugun agan nugwi kiinok, kit aret kinambokan laganggologwe, ndi, “An Ala wone liippunuk eeke agarik o,” yogo monggotak nogo ti, aanom warogo aret yogwe, eeko monggotak kiigi o.

1 Peterut 2:12

It aap endekem iniki abet mbaka'lek mendek nogo nen, “It maluk eerit nugwi o,” yinuk, kinabok mbaniyak nduk eeremenggaarak kwe, obeelom mban eerit nogwe liippinagago logomenggaarik, Yetut wage eyom paga Ala wogoppuwak nduk, inenggela'me logonet, kiniki mondok liippunuk eeko logonip o.

1 Peterut 2:5

Ala nen ari logonet, “An nen yugum onggo nggwok omaawi yangguk yuurak lek mendek o Tiyon paga ndoonogo piminggirak me, Aap ambi yugum ti paga iniki oba panggombege kenok, enggali arigin lek o,” yinuk, yereegerak liiru mbanak wonage me, it aap Ala unde nen Ala awi wurik me Ala ake warogo pogo mengga kwak, kit togop aret Ala unde at ake leenak logonet, Yetut Keritut eereegerak paga Ala inikilom mbake menggerak mendek aakumi inake eeko logobagip nduk, yugum obaga lu'luk eerogo o wuko mengga kwak, Ala nen kit kineebe paga at awi wukkolage agaarik o.

1 Peterut 4:10

At Ala nen eeko logorak ninalitak lombok unde eeppinaneegerak nogo, “Ala iniki kunik nen unde eeppaneegerak me, niniki kwippunuk aakumi inake eerit nage logokit o,” yinuk, kit mban-mban at ambi nen at ambi obeelom eeppegak eeko logonip o.

1 Peterut 4:16

Ata, “Kit Ala apuri mendek aret o,” yinuk, aaninggin kinoba pinagagwi iinok perak, kinagabiti lek logonet, “Keritut endage paga eeppinanugwi me, op aret,” mba'nuk, Ala, “Wa,” yinuk, alut eeko logonip o.

1 Peterut 5:11

At Ala ti, mondok-mondok ayuk warak logowak o, yinuk, abet aret yokkiragi o. Amin!