1 Peterut 3:21 - Ala Wone Peenok Peebi Mbanak

²¹ Ndi, it ineebe 8 niyo ndonggoninake kero, niyo nen wogoren laganeegerak paga inagap ndareegerak nogo ndak-ndak, nit yogondak niyome wuppinanugwi paga ninagap ndake ti, we ninagabolo mili kenok, koo'ninabuwak nduk, eekwi lek o. Ata, nit nen Ala yogo logonet, “An pilit lek, abet aret yiluk-maluk mbo pigirak me, kat kabu'me logokit o,” yinuk, Ala enggaanom paganggwi niinok, niyome aret wuppinanugwi, ndi, at Yetut Keritut eenik eerogo mippereegerak paga ninagap ndake menggerak ndak-ndak, niyome nen pilanogo mippinanugwi, eeko menggaarak o.

1 Peterut 3:21 ပူးပေါင်းရင်းမြစ်များ

Takariya 13:1

At Omaawi Lombok Menggerak Aliku ALA nen ari logonet, “Ne ti paga it aap Ndawut paga wiganak inom, it o Yerutalem wonogwe inom, nen maluk eekwi, an mbo paninuk alik mugurok nogwe, eeko nogogwaarak nogo, mili kookwi kwak, lek eerogo pogo logowak nduk, it inake niyo eneeri ambi warak eerogo pigin o.

Matiyut 28:19

kit nen yi aakumi ndi aakumi inanebunu lombok an noone waganggo logowak nduk, eerogo piinet nogo logonet, nogoba Ala endage paga, aput an nendage paga, Aberiniki endage paga, yiime wuppiigwi,

Marakut 16:16

Wone obeelom wone yora namonggotak iniki abet mba'nuk, yiime wanggwi iinok, inagap ndarigin o. Ndi, wone ti, iniki abet mba'nuk wagangga'lek iinok perak, maluk agago aret piyaagin o.

Yaya 13:9

Yoge mbareegi, at Timon Peterut nen, “Ai, ti kenok, nogoba o. Niyok mban lek o. Ata, neenggi-nanobak abok aret koo'nabu o.”

Nappiigak 16:33

Oonikiya ti eyom paga aret at keele maarak inarum waka nen it nogo wogoren nage nagagerik, inagabolo mbannarit nagagerak nogo koorinake mbareegi, at inom, at akwe-apuri inom, yiime wuppiyareegwaarak.

Nappiigak 2:38

Yorogo mbareegwa, at Peterut nogo nen, “Kinomaluk lek eerogo pinagawak nduk, kit kinalitak lombok maluk eeko monggotak nogo kiniki koombunuk mbo pinip o. Mbo pugwi kiinok, Yetut Keritut endage paga yiime wuppinagarak o. Ti eekwi kiinok, Ala nen Aberiniki nogo onggo lek we aret wokkiraagin o.

Nappiigak 22:16

Ndi, yogondak komaluk nogo kogoba kookkabuwak nduk, mbet-mbet yoru o. Yiime wuppagawam, kiniki yungguppegak eerugun o, yinuk, yo'nereegerak o,” yoragagerak.

Nappiigak 8:36

Yorit imbirak tu paga nogo logonet, niyo ambi wage me ari nogo nogogwaarik, aap nogo nen, “Niyo yi ket o. An yiime wuppaniyak meek mbaken a?” (

Nappiigak 8:37

Yoge mbareegi, Piliput nen, “Kat kiniki nggaruk togon Yetut abet mbakendak kenok, yiime wuppagarak op aret o.” Yoge mbareegi, at aap Etiyopiya mendek nogo nen, “Yetut Keritut ti, Ala aput abet aret mbake agaarik o,” yinuk, yoreegerak.)

Oroma 5:14

Eenggi linggingga'lek aret wonagagerak kwe, at Aram wonagagerak kuli nen, nok, Muta wonagagerak kuli paga, it aakumi abok at Aram nen Ala yoreegerak nogo taganogo punuk, maluk eereegerak ndak-ndak, it nen togop eerulik kwe, kagak, it kunduk, kanggwi alom inoba wigak yereegerak me, kambit nogo nogogwaarak. At Aram eereegerak nogo ti, at peebi eeri woroorak ogut wakkagak aret eereegerak kwe,

1 Korindut 12:13

Togop me, nit Yakuri mendek inom, kit endekem mendek inom, kit aakumi inayeloman inom, inayeloman lek we wondet aago wonogwe inom, Aberiniki nogo paga nen nit abok aret nineebe ambit kumbinaneegerak me, niyo eneeri ambit nonggo monggo kwak, at Aberiniki eebe ambiret aret nit abok ninikime mambinaneegerak.

1 Korindut 4:6

Togop me noreewi o. “Wone liiru mbanak kagak, alik eekwi mage o,” yogwe nogo, Apolot nimbirak eeko monggoorak kit mamunggolaabagip nduk, an wone yokkiragi ti, nit nineebe paga wakkagak yokkiragi o. Mamunggologwe kiinok, kit nen, “At ambi iya, at ambi meek,” yogo logonet, wogoppako logomunggup lek o.

2 Korindut 1:12

Nit eerit nogo logonet, liippunuk eerit nogo monggoorak kwe, kit kinenggela'me logonet perak, mondok iya lombok eeko nogogurak nogo, abeko logonet, it aakumi nggween paga mendek iniki koombunuk agan nugwi kwak agan nugwi, kinamendek kolaawok nduk, wone eegu nobat yokkirogwe, ti eeko logolik o. Ata, Ala niniki kunik nen omaawi eeppinanege kagak, mondok abet kenok mban kenom paganogo yokkirogo nogogurak nogo mban abe'nage kenok, “Op eekoorak me, ia!” yinuk, niniki ale'nggen mbako ogoorik o.

2 Korindut 7:1

Togop me, noreewi o. Kit an niniki kunik me, Ala nen wone yereegerak ti, nit niinok aret yo'niragagerak me, ninikime nen maluk eeriyak koonggwi, eebe aret eekwi, eeko monggoorak nogo abok aret mbo punuk, Ala ninagabiti mbako logonet, maluk eeka'lek at ake leenak obeelom mban eekwi niyaawak nduk, eeko logowok o.

Nggalatiya 3:27

Keritut kinom kumbinagage mbareegi, yiime wambeegutak me, Keritut obaabut ndak-ndak aret ogogutak o.

Epetut 5:26

Nit Ala apuri yi awi ndi awi monggoorak ninake kambeegerak nogo ti, “An napuri inoba mili lenggenak yinik-pinik aago ineebe yinuk-punuk eerak iigak koloorak neebi o. Ata, ineebe kikak naka'lek mondok alik leenak abe kigirikwe lombok iinok kolaakit o,” yinuk, ngguu'mo wappiigo mengga kwak, at oone waganggwi paga ninomaluk lek eerogo pinanege logomenggerik, Ala ake leenak logowok nduk, ninabuwa mbake logonet, ninake kambeegerak o.

Kolote 2:12

Keritut kinom kunik logonet, kambunuk ndoome mambiigo menggam nen kinom kineenik agago mippinagareegerak nogo kwak, yiime wanggo nogogutik, lagi wogogutak nogo o. Kit kambunuk ndoome mambiigo menggam negen wonogwe me, Ala nen Keritut kambunuk nogo menggam nen at omaawi paga eenik agago mippereegerak me, “At omaawi ti paga at ninom nineenik agago mippinanigin kogo o,” yinuk, abet mbareegutak paga kineenik agago mippinagareegerak wonogo ogotik o.

1 Timotiyut 1:5

An wone lengganogo yokkereegirak nogo ti, it iniki abe paga aakumi inabuwa mbakwi, iniki obeelom koonnage kenok mban eekwi, ndi, iniki abu abet aret mbakwi, eeko logowak nduk, “Yorage logot o,” yinuk, yokkereegirak nogo o.

1 Timotiyut 6:12

Nit abet mba'nuk mugurok nogwe nogo, kat kunduk mugurok nage logonok nduk, mondok wakkagak eeke logot o. Ndi, keenik mondok logonok nduk, kayonggo pege mbareegi, kat abet mbareegindak aakumi ambik inenggaanom paga paganeegindak nogo, nggirik-nggerok agago porogo logot o.

Iberani 10:22

niyo abe mili-mili paga ninabin koorogo pinanege, ndi, maluk eeko nogogurak ninikime aberak logokwak, lek eerogo pinanikit nduk, at amiya paga werenogo pinanege, eereegerak me, “Abet aret panggo yi ungguurak, yegerak,” mba'nuk, niniki mondok abe paga at owagam panggo yi ungguwok o.

Iberani 13:18

Ninake tamban mban eeko logonip o. Nit obeelom eerit nogo logorak mban, “Ao,” mbako monggoorak me, yi eekak ndi eekak eeko logonet, maluk eekoorak ambi ninikime abe'naga'lek kenok, “Obeelom aret eerit nogo monggoorak kogo,” yinuk, mbako ogoorik o.

Iberani 9:14

Keritut amiya ti perak, iya lombok me, ninomaluk koo'ninaburak meek mbakop? Lek o. At mondok itok menggerak Aberiniki nen eeppege kagak, ndomba awinde-obande aago lek obeelom nogo pogom iniki nen at eebe aret nit ninake Ala wogoreegerak me, yogondak nit Ala mondok eenik itok menggerak nogo, ake eeko logowok nduk, wone aa'nduk aanom warogo mugurok nogwe niigak, ninomaluk lek aga'lek abe'nagak mban eeke kagak kambit nogo nogogurak nogo, at amiya paga lek eerogo punuk, mondok obeelom eerogo pinaniyak op aret mbako logowok o.

Iberani 9:24

Togop me, Keritut nogo ti, o abe wurik kagak ogut wakkagak Mage Menggim aakumi nen wureegwam nogome unggulik o. Ata, at mbogut paga lombok unggwi nage nagagerik, Ala enggaanom paga ko'lu-kii'me ninake eeke agaarik o.

1 Peterut 1:3

At ninowe Yetut Keritut ogoba Ala nen ninabuwa nggwok lombok mbake nagagerik, obeelom eeppinanege logonet, at Yetut Keritut kambunuk nogo menggam nen eenik agago mippereegerak nogo paga ninake punik nineyate kokwak pili age, yi'mbaani kungge, lek age, eekeelik mondok mbogut paga pinanogo wonage niniki lunik wonogwe nogo, kola nawok nduk, niniki ngget nda'ninabeegerak me, “Ninogoba Ala wa,” yinuk, endage tiyappogo ogoorik o.

1 Peterut 3:16

Kit Keritut kinom kunik logonet, obeelom eerit nogwe kiigak, it miyuk-meya eerogo pinagagwi nogo nen, kit obeelom mban eerit nogwe paga, “Ia!” yinuk, inagabiti mbarugun me, kiniki maluk ambi abe'naga'lek kiniki obeelom paga kinoone yanggorogon yorogo logonip o.