1 Peterut 2:11 - Ala Wone Peenok Peebi Mbanak

¹¹ Nowe-nawot o. Kit aap nggiru negen nggween paga yi awi ndi awi mbaganit nogogutak nogo, kit an niniki kunik me wone ambi yokkira o. Kit kiniki nen nengge mugurok noorak kineebi mbakwi kiigak, nikkiren nage nogo, mugurok noorak ti mage o.

1 Peterut 2:11 ပူးပေါင်းရင်းမြစ်များ

Wakkagagerak 21:34

Ti eeke nagagerik, at Abarakam nogo aakumi Pilitin wonogo menggam mban aret wonagagerak.

Wakkagagerak 23:4

“An aap alik mendek nggiru wagarak kinenggela'me ninom wonage neegak, nakwe kanggerak me, an nakwe pege, ndi, an mendek kanggwi iinok piigwi, eeko logorak me, kinanggween ambi onggo mbanikit nduk, yo'ninip o.”

Wakkagagerak 47:9

Yoge mbareegi, at Yakup nen, “An nombomini nugu logonet, ndarak iigak tahun abu iya negen eeko nogogwaarak kwe, an perak, aap nggiru pogom anggon-panggon kagak we yaluk-ndaluk nege minggirak me, ndarak neegak we tahun seratus tiga puluh aret agaarak o.”

1 Mbinineegwaarak 29:15

Nit ninombomini maan wonogogwaarak pogom, nit yi, kenegen keegak, aap alik mendek nggiru negen aret wonogo ogoorik o. Ndi, nit nda'nogogurak eyom ari nage ti, inagalu'mak pogom aret wonage me, nit nen ambi eya mbanugun lek aret o.

Ndawi 119:19

An aap nggiru negen o nggween paga yime luulu wonage me, Koone, “Yogop ee'nu ndogop ee'nu,” yugu nogo, An kage neyo, kumaappunuk logorak ti mage o.

Ndawi 119:54

An ya agak nda agak nogo yit nage logonet, Koone lengganak nogo aret ndawi pit nage minggirak.

Ndawi 39:12

Kaliku ALA wae. An nogo Aap nggiru kwak kat nimbirak luulu wonage, Aap nggiru kwak nombomini nugu nogogwaarak nogo pogom nege, Eeke me, An nale ari nogo Karuk konengga'lek mbo panege ti mage o. Ata, an tamban eeke nogo karuk konengge, Yeenggwa niru o, yinuk, Noone nggwok paga yokkege nogo liippanege, Eeru o.

Ala Unde 15:18

Ndi, kwe ambi aap imbirak nogo yogo logonet, aap oona mendek wangge kenok, kwe aap imbirak ineebe niyo paga ngguu'mo wakkologo logomenggaarik, ineebe maluk aremenggerak nogo wonage kagak, oonegen aret kilu yi nawak o.

Ala Unde 25:23

Yoge nagagerik, “Nggween ti, an Ala nanggween aret o. Ndi, it ti, aap nggiru negen luulu unde logowak nduk, wogoragagirak me, it nen nggween onggo nggerenggolagwaarik o.

Lukat 21:34

Wone ambinom yorage logonet, “Ta'na pugu ne ambit paga pagi aan mbelek togon wake menggi kwak, Ne ti paga ndogop eekkinabigin o, yinuk, wone yokkiragarak nogo, kit aakumi o nggween paga abok aret ne ambit perak togon eekkinabi woraagin me, yi mendek ndi mendek kinaanoguma'le ndenok yogoorak nenet nugwi, amburu kumili eeginake mendek nenet nugwi, Namendek nonggop kolaakit o, yinuk, kiniki koonit nugwi, eeko logonet, kiniki ugun kobak arumonggotak wonogwe kiyo, kiniki tum wakkologo logonip o.

Nappiigak 15:20

We, wam kugi aanggo warak noorak mage o. Mbabi eeriyak mage o. Yi mendek ndi mendek amiya wungga'lek kagak warak kenok, noorak mage o. Amiya noorak mage o, yinuk, liiru mbanogo punuk wogoraawok o.

Nappiigak 15:29

Kugi aanggo warak nunggwi, amiya nunggwi, yi mendek ndi mendek amiya wungga'lek kagak warak kenok, nunggwi, mbabi eekwi, eekwi nogo, kit eeriyak lek mbo pogo logonip o. Mbo pumonggotak ti paga, wone yugu nogo, Abu aret eeko agaarik o, yinuk, kinombako logogun o. Ninoreewi wa. Abu aret yokkirogo o,” yinuk, liiru mbanogo punuk, nappiyareegwaarak.

Oroma 12:1

Ti kenok, nowe-nawot o. At ninogoba Ala ninabuwa mba'nuk, nggwok togon eeppinanege menggerak me, Ala ake warogo pogo mengga kwak, kit nen, “Nineenik logonet, Ala ake mban eerit nugu logowok nduk, nineebe apit aret Ala ake leenogo pogo o,” yinuk, “Ineebe apit aret Ala wogo'nuk logowak lak, an ao,” mbake logonet, yokkirage agarik o. Ti eerumonggotak paga Ala nen, “It yi abet aret nalut ee'nakwi iigi,” yinuk, ale'nggen kinombake logogin o.

Oroma 7:23

wone yugu alik ambi niniki me wonage nogo nen pilak ari logonet, wone abe yugu niniki me nen eeriyak mbakitak nogo tebenogo pegak eeke me, an keele maarak negen logonet, “Maluk eeriyak,” yo'nege wone yugu ti mban eeke minggirak o, obak!

Oroma 8:13

Kiniki maan mendek nen maluk eeriyak eekkinake nogo mban mugurok nogwe kiinok ti, kambumunggup aret kwe, maluk kinikime lagi wage nogo, Aberiniki nogo paga warogo wuppogo logomonggotak kenok perak, kineenik aret logomunggup o.

2 Korindut 5:20

Togop kenok, nit Keritut obaane'me oone wonok yoranet nugu logowok nduk, mippinaneegerak logonet, Keritut eereegerak ti paga, “Ala kinom ogoorak logorak lek o. Kinom lambuninip o,” yinuk, Ala nen oone nabek togon yokkirobogom nit aret yokkirogo ogoorik o.

2 Korindut 6:1

At Ala nen ari logonet, “An nen kabuwa mbariyak eyom paga kat yo'nege nogo an naruk konengge. Kat kagap ndariyak eyom paga yeenggwa kege, Eereegirak o,” yinuk, yereegerak me, kit ninom Ala eyabu ambit eerit nogwe niigak, at iniki kunik nen obeelom eeppinagage nogo, “We aanom warogo eeppiige kagi,” kinombake kero, niniki, “Ao,” mbako logonet, yokkirogo ogoorik o. Kabuwa mbariyak eyom nogo ti, yogondak aret, ndi, kinagap ndariyak eyom nogo ti, yogondak mban aret me, yokkiragi o.

2 Korindut 7:1

Togop me, noreewi o. Kit an niniki kunik me, Ala nen wone yereegerak ti, nit niinok aret yo'niragagerak me, ninikime nen maluk eeriyak koonggwi, eebe aret eekwi, eeko monggoorak nogo abok aret mbo punuk, Ala ninagabiti mbako logonet, maluk eeka'lek at ake leenak obeelom mban eekwi niyaawak nduk, eeko logowok o.

Nggalatiya 5:24

Nit Keritut Yetut apuri kenok, niniki maan mendek paga nen maluk eeriyak niniki nengge nogo, mondok warogo tebenogo punuk wonogo ogoorik o.

Epetut 2:19

Ti kenok noreewi o. Yogondak kit aap nggiru alik mendek wonogwe lek o. Kit ninom ndak-ndak Ala apuri aret me, mbogut paga ninaworak aret ogoorik o.

Epetut 4:1

Ti kenok, noreewi o. Kit eeko logorak yonggo pinagareegerak Ala nen kit ndak-ndak aret eerit nogwe kiyaawak nduk, an ninowe oone wonok yoranet nege paga keele maa'nabeegwaarak nogo nen, “Ao,” mbake logonet, yokkiragi o.

2 Timotiyut 2:22

Wologwe tawe iniki nengge nogo kokwak, kat togop eekkake kero, mbo punuk mbagangge logot o. Abe kenok mban eekwi inom, iniki abet mbakwi inom, aakumi iniki kunik aganakwi inom, iniki ambit lambunik wonogwe inom, it aakumi iniki abe paga, “Ninogoba Ala aret o,” yinuk, yogwe nogo, kinom a'nuk it eekwi ti mendek mban mugurok nage logot o.

Iberani 11:13

It aap ti abok aret, “Wokkiraagin o,” yoragagerak wone nogo, agalu'mok negen o nda taati wage inigen nakkogo nogogwaarik, “Nogo yi aret ee'ninabi wage kogo o,” yinuk, iniki ale'nggen mbako logonet, “Nit aap o nggween paga yime ninaworak wonogwe lek o. Aap nggiru negen aret ogoorik o,” yinuk, wone yugu eebe liirogon woolik kwe, “Abet aret wo'niraagin o,” yinuk, iniki abet mbareegwaarak ti paga, eebe waganeegwaarak negen aret logonet, kambit nogo nogogwaarak.

Iberani 6:9

Noreewi o. Kit nit niniki kunik me, wone ti eeriyak yokkirogoorak kwe, Ala nen togop eekkinaburak nit mbaka'lek ogoorik o. Kit muk kinagap ndareegerak me, Ala nen aakumi inagap ndake logonet, obeelom eeppiige logorak mbareegerak nogo aret obeelom mban eekkinake logogin mbako ogoorik o.

Yakobut 4:1

Kit ndugwi pugwi, wone wakwi, eeko monggotak alom ti, ngge paga o? Kiniki nengge alom abok aret ti, “An nduk eeriyak, kat nduk eeriyak,” yinuk, kinikime nen nili-kili yogo logonet, eeko monggotak nogo lek a?

1 Peterut 1:1

Kit Ala iniki mba'nuk miikkinabeegerak o Pondut inom, Nggalatiya inom, Kaparokiya inom, Atiya inom, Mbitiniya inom, o time yi awi ndi awi mbaganit nogogutak aap nggiru negen wonogwe nogo, at Yetut Keritut ayonggo nappiigak mendek eerogo paneegerak an Peterut nogo nen wone ambi yokkira o.

1 Peterut 1:17

“Ninogoba Ala o,” yinuk, tamban eeko monggotak me, at Ala nen nit yi aap ndi aap ninalitak lombok eeko logomonggoorak nogo abok ninawone ndak-ndak mbanigin me, yogondak mbogut paga unggwi naga'lek nggween paga yime luulu logonet, Ala mban kinagabiti eeppunuk, eerit nogo logonip o.

1 Peterut 4:12

Nowe-nawot o. Kit an niniki kunik me, wone ambi yokkira o. Kit kinabut mbaniyak nduk, aaninggin-paaninggin mondok alik negen kinoba pinagagwi ti, it aap nen eeppiigo menggaarak nogo mendek aret eeppinagagwi me, “Yi nonggop eeppinanugwi? Ia!” yinuk, yugup o.

1 Peterut 4:2

Kit togop aret eerogo patinuk wonogwe kiinok, o yogondak kuli nen nggween paga yayi wonogo logonet, kiniki nen nengge nogo mban mugurok nogo logorak lek o. Ata, Ala iniki mbake nogo mban ndak-ndak eerit nogo logonip o.

2 Peterut 3:1

Nowe-nawot o. Kit an niniki kunik me, liiru ambi aa'nduk mbanggiragagirak nogo ndak-ndak, yogondak ambi yi inom aret mbanggiragi o. Liiru mbanggirage yi nogo ti, kiniki abe mban koonggo logorak abeko logobagip nduk, mbanggiragagirak me, ambi yi inom aret mbanggiragi o.