1 Peterut 1:22 - Ala Wone Peenok Peebi Mbanak

^22-25 “Iri'ngga-kale'ngga ero kwit agan lagangge nagaatik, ti'nuk, mbuk age, Ndi, iri'ngga anggen laambu yege kenok, aakumi nen, Wi! egaatak kwe, ne ambit liingge mono-mono wangge, Eeke menggerak nogo ti, Nit aakumi nineebe ti kwak aret kwe, Ala wone ti perak, mondok itok aret menggerak o,” yinuk, yereegerak liiru mbanak ndak-ndak, Ala wone lek ageelik mondok itok menggerak nogo aakumi waganggwi iinok, ineenik eeginake menggerak obeelom wone nogo aret yokkirogogwaarak waganggo mbareegup, mondok kineenik logobagip nduk, kiniki ngget ndakkinabeegerak nogo ti, aakumi inapuri ndaganakaatak kambit nogwe nogo pogom lek o. Ata, at mondok eenik menggerak Ala nen aret ndakkinabeegerak me, kit Ala ari menggerak wone konembunuk, “Ndak-ndak eeko logowok o,” yinuk, eerit nogo logonet, maluk kinikime wonage nogo mbo pereegutak me, yogondak kiniki laakot paga kinoreewi Ala apuri kinom kunik aganako logogup o. Ata, kiniki abe paga aret kinoreewi kinom niniki-kiniki kunik eeko logonip o.

1 Peterut 1:22 ပူးပေါင်းရင်းမြစ်များ

Yaya 15:17

Niniki-kiniki kunik eeko logobagip nduk, wone ambit ti aret yokkiragi o,” yinuk, yoragagerak.

Yaya 15:3

An wone yokkirage nagagirak nogo paga mbeenogo pinagareegirak wonogo ogotik.

Yaya 17:17

Kat koone ari menggendak nogo ti, abet aret me, An Ala ndogop minggirak o, yinuk, paganogo yorage paga, it kapuri yi, leenogo patu o.

Yaya 17:19

Kat nen, An ndogop minggirak o, wone paganogo yorage nogo paga, it kapuri yi abet aret kat kake leenak logowak nduk, an neebe it inake aret leenogo pakirak o.

Nappiigak 15:9

Ala nen, It yi, iya, it ti, meek, ninombakeelik nit ambit aret ninombake menggerak me, it kunduk, iniki abet mbakwi paga inomaluk lek eerogo piigerak o.

Nappiigak 6:7

Ndi, Ala wone nogo nggwok aret wiganinuk nage kagak, o Yerutalem time it at oone woorak nduk ambi nabek unggwagak mban eeko logonet, ambik aret ogwe, ndi, it Ala unde nogo kunduk ambik aret, “Wone waawi o,” yinuk, abet mbakwi, eereegwaarak.

Oroma 1:5

Ninowe Yetut Keritut eereegerak paga, Ala iniki kunik en eeppanege kagak, it yi aakumi ndi aakumi abok aret iniki abet mba'nuk obeelom wone liirogon woppunuk, eeko logowak nduk yoranet nage, Yetut Keritut endage nggwok aruwak nduk, tiyappit nage, eeke logokit nduk, an neyabu nappiigak mendek agago paneegerak.

Oroma 2:8

Ndi, it ando inobaalombok mban eekkoloorak koombunuk eerit nogo logonet, Ala yereegerak nogo mugurok naga'lek, maluk mban eekwi iinok perak, Ala nen, “Aap yi, abu maluk aret o,” yinuk, anini nen maluk eeppiyaagin o.

Oroma 8:13

Kiniki maan mendek nen maluk eeriyak eekkinake nogo mban mugurok nogwe kiinok ti, kambumunggup aret kwe, maluk kinikime lagi wage nogo, Aberiniki nogo paga warogo wuppogo logomonggotak kenok perak, kineenik aret logomunggup o.

2 Korindut 6:6

niniki mondok abe paga yokkirogwe, nit wone nineenu abok aret kineenu eeppinagagwi, ninaanaganggenggwi lek kwi'ndak logonet yokkirogwe, kinabuwa nen yanggorogon kinaruk wakwi, Aberiniki ninom kunik logonet mamunggirogwe, nineebi mbaka'lek ninom abu kunik logonet yokkirogwe,

Nggalatiya 3:1

Kit Nggalatiya mendek yi wae. Yetut Keritut eyo karo-karo paga kambeegerak wone nogo, kumaarak lek mondok kin paga aret paganogo yokkirage nagagirak konenggo nogogutak kwe, yogondak ta nen kugi pulunogo pinagagerak kenok, kiniki lek kumili negen agan nugu ogotik?

Nggalatiya 5:5

Nit abet mbareegurak nogo paga Aberiniki nen eeppinanege kagak, Ala nen, “Aap yi, iniki abe koonak aret o,” yinuk, obeelom agago pinaniyak nogo, “Mbet-mbet eerogo pinanuwak lak ao,” yinuk, niniki lunik logonet, tokkogo ogoorik o.

Nggalatiya 5:7

Ala abet aret ari menggerak wone nogo, kit aa'nduk, kiniki aganggen paga op aret mugurok nogwe kiige nagagirak kwe, Ala wone mbo pubagip nduk, ta nen kiniki nggagambunuk nomonggiren nage agaarik o?

Epetut 4:3

Aberiniki nen kiniki ambit lambumbinagareegerak nogo kinom ogookkologwe kiyo, liippunuk wonogwe, eeko logonip o.

Pilipi 1:9

Kit yi wone ndi wone alom liirogon kineenu ogwe, ndi, kiniki warak logonet, yi mendek ndi mendek eraambe yelok kogwe, eeko logonet, it kinom kiniki kunik aganakwi nogo, ambinom nggwok arit wundi nage logowak nduk, kinake tamban eeke minggirak o.

1 Tetalonika 3:12

Nit nen kit niniki mondok kunik eekkinakwi nogo kokwak, kit-kit inom, aakumi abok inom, ambinom niniki-kiniki kunik aganako logorak ninowe nen eekkinake,

2 Tetalonika 1:3

Noreewi o. Kit eekwi paga nit puk logorak meek ee'ninake kenok, Ala mondok, “Wa,” yogo monggoorak. Kit abet mbakwi nogo piyok ari lek omaawi arit unggwage, ndi, niniki-kiniki kunik aganakwi ti, nggwok arit nage, eeke me, “Ala wa,” yogo monggoorak nogo ti, op aret eeko monggoorak o.

2 Tetalonika 2:13

Kit noreewi o. Nit ninowe nen iniki kunik eekkinabeegerak nogo kit aret kiinok, “Ala wa,” yoriyak mban ee'ninake menggerak. Kit Ala ari menggerak wone abet mbakwi kiinok, Ala apuri logobagip nduk, Aberiniki nen leenogo pinagage kagak, Ala nen, “Kinagap ndarikit o,” yinuk, kit kinaa'nduk togon miikkinabeegerak me, “Ala wa,” yoriyak mban ee'ninake menggerak.

1 Timotiyut 1:3

An o Makendoniya woraakit nduk, wage logonet, “Kat o Epetut yayi logot o,” yinuk, noone nabek togon yokkereegirak nogo ti, “It aakumi timbayok mbininggwi, ndarak alom mbininggo logonet, puk aga'lek niikkenok nogwe, eekwi iinok, niniki abet mbakwi paga Ala nen ee'ninaburak kooneegerak nogo nineenu ariyak nduk yo'nirogwe lek we wone alom kwaako logonet, noone-koone yogwe me, liippugup o,” yinuk, yorage, ndi, it aakumi ando wone alik agan nugwi nogo, “Mamuniroorak mage o,” yinuk, yorage, eeke logonok nduk, “Yayi logot o,” yinuk, yokkereegirak nogo o.

1 Timotiyut 1:5

An wone lengganogo yokkereegirak nogo ti, it iniki abe paga aakumi inabuwa mbakwi, iniki obeelom koonnage kenok mban eekwi, ndi, iniki abu abet aret mbakwi, eeko logowak nduk, “Yorage logot o,” yinuk, yokkereegirak nogo o.

1 Timotiyut 4:12

Kat keebe awo tawe aret me nduk, aakumi nen tebenogo pagarak ti mage o. Ari menggendak inom, eeke menggendak inom, aakumi kiniki kunik aganake menggendak inom, Ala wone abet mbake menggendak inom, maluk eerukwak, kenegen tebenak nege menggendak nogo inom, eeke ti paga it aap abet mbako menggaarak kat in wakkagak logonet, eeke logot o.

1 Timotiyut 5:2

it kumi inanggok ti, kagalomini kokwak, ndi, kumi tawe ti, kat kiriwi kokwak me, it paga kiniki me maluk mondok abeka'lek logonet, yorage logot o.

2 Timotiyut 1:14

Abe mendek unde eeppagareegerak nogo, Aberiniki ninikime menggerak nogo nen omaawi eeppagage kagak, liirogon unde logot o.

Iberani 11:8

Ndi, at Abarakam kunduk, Ala nen, “Eyate kwak nggween ambi kat unde logonok nduk, wokkirigin me, nak o,” yoge mbareegi, o ti, eenggo'lek kwe kagak, “Abet aret wo'nirigin,” mba'nuk, nagagerak.

Iberani 13:1

Kit Ala apuri aret wonogwe me, niniki-kiniki kunik eekwi nogo, lek age kero, liirogon aret eeko logonip o.

Iberani 5:9

Teppege mbareegi, nit ee'ninake menggerak nogo, at abu li'luk eerogo mamunggolage nagagerik, nit at oone woppunuk, eerit nogwe nogo, abok aret nineenik mondok-mondok logowok nduk, ninagap ndake logorak alom at aret agagerak me,

Iberani 6:10

Kit kinogoba Ala a'me nggelok eeke menggerak me, at eyabu eerit nogo logonet, at endage tiyappuwak nduk, “Ao,” mba'nuk, kinoreewi Ala apuri yeenggwaarogo nogogutak inom, yogondak awo yeenggwaarogwe wonogwe inom, at mari eerogo pigin lek o.

Iberani 9:14

Keritut amiya ti perak, iya lombok me, ninomaluk koo'ninaburak meek mbakop? Lek o. At mondok itok menggerak Aberiniki nen eeppege kagak, ndomba awinde-obande aago lek obeelom nogo pogom iniki nen at eebe aret nit ninake Ala wogoreegerak me, yogondak nit Ala mondok eenik itok menggerak nogo, ake eeko logowok nduk, wone aa'nduk aanom warogo mugurok nogwe niigak, ninomaluk lek aga'lek abe'nagak mban eeke kagak kambit nogo nogogurak nogo, at amiya paga lek eerogo punuk, mondok obeelom eerogo pinaniyak op aret mbako logowok o.

Yakobut 1:21

Eeriyak lek mendek peyak wurik pogom kagak ugun eekwi, ndi, yi maluk ndi maluk eekwi, eeko monggotak nogo abok aret mbo punuk, kiniki yanggonak logonet, wone ninagap ndariyak wone Ala nen ninikime awi yappinanege menggerak wone nogo mban liirogon waganggo logonip o.

Yakobut 4:8

Kit Ala owagam nogwe kiinok, at kunduk, kit kinowagam ari wage logogin o. Kit maluk eeko monggotak yi, kineenggi kookwi, ndi, kiniki mbere yi, ambit eeppunuk kinomaluk mbo pugwi, eeko logonip o.

1 Peterut 1:2

At Yetut Keritut yereegerak wone nogo woppunuk ndak-ndak eekwi kiinok, at amiya paga kookkinake logowak nduk, at ninogoba Ala nen peebi eeko logorak abok aret koonogo pege menggerak me, maan kooneegerak nogo ndak-ndak, Aberiniki nen eeppinagage kagak kit at apuri kikak naka'lek ake leenak logobagip nduk, miikkinabeegerak me, at Ala iniki kunik nen wokkirage, kiniki ugun tayenak ale'nggen logobagip nduk eeppinagage, eeke nogo, ambinom eeppinagagak mban eeke logowak o.

1 Peterut 2:17

It abet mbakwi kenok kiniki kunik aganakwi, it weelek mendek abok aret inabuwa mbakwi, kinoweewi inendagembogut inayuk wukwi, ndi, Ala kinagabiti mbakwi, eeko logonip o.

1 Peterut 3:1

“Kit aakumi inayeloman nen kinogobamini inoone liirogon konenggo logonip o,” yinuk, yokkiragarak nogo ndak-ndak, kit kumi kunduk kinogonggelomini inabu'me logonet, inoone liirogon konenggo logonip o. Kit Ala kinagabiti eeppunuk, kinobaabut obeelom logonet, kinogonggelomini inabuwa nen kinigen tebenak nugwi kiigo logomenggaarik, it kinogonggelomini ando iniki awo abet mbaka'lek nogo nen, “An ninom Yetut mugurok naakit,” mbaruwak nduk, inoone yokkirogwe iinok, kit nen wone onggo ambi yoraga'lek, we, “E o,” yinuk, liirogon eeko logonip o.

1 Peterut 3:20

Obeelom wone yora nagagerak nogo ti, aap Nu nen maan aa'nduk it aakumi Ala wone yorage kagak, taganogo mbo pogo mbareegwa, Ala nen, “Mbet-mbet inoorikit,” mbareegerak kwe, aap Nu nogo o awo wuke kenok, iniki yanggo yinuk, tokkage kagak, o nogo wuke mbareegi, aap Nu apuri inom ineebe 8 mban unggwogogwaarak nogo, niyo nen wogoren laganeegerak paga inagap ndake logonet, it ando apit niyo ndonggoninabeegerak inogoma keele maarak o apit me wonogwe me, wone obeelom wone yora nagagerak nogo it aret o.

1 Peterut 3:8

At Ala nen ari logonet, “Kit kineenik logorak kinikilom mbakwi, Nit obeelom aret wonogwe me, li a'nuk, kambuurak op aret, mbakwi, Eekwi ti, Taamini nen togop mbako ogotik? Togop aret mbakwi kiinok, Kinoone maluk mendek kinambe paga wunabi wogwe, Wone pilit kinamili irip paga wonok nugwi, Eekwi kiyo, Tum liirogon wakkologwe, Maluk mendek mbo punuk, obeelom mendek kenok mban eerit nugwi, Nonggop agago niniki ambit lambunik logorak koonggwi, Abu koombunuk, ti aret kinomaawirogon mugurok nogwe, Eeko logonip o. Aap iniki koonak menggaarak nogo, Ala enegen wogoren nege, Tamban eekwi iinok, at aruk liirogon konengge, Eeke menggerak kwe, Aap maluk eeko menggaarak perak, Ala enggaawak omaawi paga lek eerogo piige menggerak o,” yinuk, yereegerak liiru mbanak ndak-ndak, kit togon Ala ale'nggen kinoba pinagakit nduk, kinayonggo pinagareegerak me, kit nen maluk onggo-onggo eekwi, ambi nen ambi meek eeppegak eekwi, eeko logogup o. Ata, it maluk eeppinagagwi nogo obeelom eeppiigo logonet, kinom kiniki ambit eeppunuk wone mbanggwi, kiniki eyak wat-wat eekkologwe, nore-kore yogwe, nabuwa-kabuwa mbakwi, kiniki tebenak nugwi, eeko logonip o, yinuk, eeko logorak irip paga ambi yokkiraakit mbakirak nogo ti aret yokkiragi o.

1 Peterut 4:17

At Ala nen ari logonet, “It aakumi iniki abe koonak nogo aaninggin eeppiinet unggwogwe iigak inagap ndarigin me, It an noone konengga'lek maluk mban eerit nogwe nogo perak, nonggop togon eeppiyaagin mbakop?” yinuk, yereegerak ndak-ndak, at Ala nen nit yi aap ndi aap abok aret ninawone mbanogo ninowak loonninaburak eyom abu panggo yi wagaarak me, nit Ala apuri aa'nduk ninawone mbambunuk, at oone yugu ndak-ndak eeka'lek logomonggoorak kenok, onggo eeppinanigin me, it Ala wone obeelom wone nogo mondok wagangga'lek iinok ti, inawone mbangga'lek teppiyaagin mbakop? Lek o. Inawone abu mbanogo punuk, mondok alik negen eeppiyaagin o.

1 Peterut 4:8

Aap ambi ore imbirak iniki kunik logomenggerak nogo nen ore maluk ambik eerogo pit nage logomenggerak kwe, imbirak iniki kunik me, “Op aret o,” ari menggi kwak, kit togop aret, “Niniki-kiniki kunik eeko logonip o,” yinuk, wone ambit ti aret yokkiragi o.

2 Peterut 1:7

Ala ari menggerak ndak-ndak eerit nogwe paga kinoreewi inabuwa mbako logorak mamunggologwe, ndi, inabuwa mbakwi nogo paga irip paga aakumi abok aret kinom kiniki kunik eekkologo logorak mamunggologwe, eerit nogo logonip o.

1 Yaya 3:11

O maan aa'nduk nen wone konenggo nogogutak nogo ti, “Niniki-kiniki kunik eeko logonip o,” yinuk, yo'niragagerak ti aret.

1 Yaya 3:23

“Kit kiniki an naput Yetut Keritut oba panggombunuk abet mbakwi, ndi, an nen yokkiragagirak nogo ndak-ndak kinoreewi kiniki kunik aganakwi, eeko logonip o,” yinuk, wone lengganogo yo'nirage nogo ti aret.

1 Yaya 4:12

Nit abok aret Ala eebe ninigen kaga'lek aret wonogwe kwe, niniki-kiniki kunik eekwi niinok perak, Ala ninom kunik logonet, aakumi ando eebi mbake, ando inikilom mbake, eekeelik abok aret inabuwa mbake menggi kwak, nit togop aret aakumi abok niniki kunik aganako logowok nduk, ee'ninake menggerak o.

1 Yaya 4:20

Aap ambi at awot enegen kage logonet kwe, iniki kunik eekeelik kenok, at Ala enegen kaga'lek me nonggop togon iniki kunik eeriyak mbakop? Meek me, awot eebi ombake logonet, “An Ala niniki kunik eeke o,” ari kenok, aap ti pilit pugungga aret o.

1 Yaya 4:7

Noreewi niniki kunik yi, wae. Aakumi niniki kunik aganako logowok nduk, Ala nen aret eeppinanege menggerak me, niniki-kiniki kunik eeko logowok o. Ninoreewi niniki kunik aganakwi niinok, “It yi ti, Ala nen aret ndaganabeegerak me, inogoba Ala ineenu aret iigo o,” yinuk, yogo logogun o.

Wayu 2:4

Neenu aret kwe, mbuuluk ambi eekwi iigirak nogo perak, apuri yoraawak nduk, yoriyak yokkiri o. Aa'nduk it iniki kunik lombok ee'nako nogogwaarak kwe, yogondak perak, ninom kunik lek mbo panugwi iige nagarik, yagi o.