1 Korindut 8:4 - Ala Wone Peenok Peebi Mbanak

⁴ Ti kenok, “Wam kugi aanggo warak noorak ilik, mage a?” yinuk, yogwe ti, at Ala alik ambit aret menggerak me, nggween paga yime kugiwak abe mendek ambi wonage lek ti, nineenu aret o.

1 Korindut 8:4 ပူးပေါင်းရင်းမြစ်များ

Yetaya 37:16

“Komaawi Lombok Menggendak Iterali inogoba Kaliku Ala o. Malayikat kwak kerub aru-ogwe iigak, kat oolo wone lengganogo yorage menggenom wonage, kat Ala kalik aret me, o nggween paga yime yi aakumi ndi aakumi abok aret inabu'me piigo menggam kat mban kabu'me piinok wonage, eeke menggendak o. Mbogut-nggween kunduk, kat nen aret wakkagagindak me,

Yetaya 37:20

Kaliku ninogoba Ala kat perak, yi aakumi ndi aakumi inabu'me piigo menggam o nggween paga wonogwe yi, abok aret Ala kalik aret wonage ineenu aruwak nduk, Kaliku ALA nen aap ti, eenggime nen ninagap ndaru o, nogoba,” yinuk, tamban eereegerak.

Yetaya 41:24

Kit kugi yi, abe lek mendek kagak agan nogo ogotik! Ndi, eerit nogo monggotak ti kunduk, abe ambi eeppiyoorak lek we aanom warogo eerit nugu monggotak me, It kinayuk wuko logowak nduk, miikkinakwi nogo inogole warak aret menggaarak o.

Yetaya 44:24

Kat kagalo inikime nen keenggi-kiyok warak eerogo pagage, Wondet eerogo pagage, eereegerak Aliku ALA nen wone yegerak nogo yi aret. “Yi mendek ndi mendek apit aret wakkage, Mbogut nenaarogo pege, nggween ambe wiganogo pege,

Yetaya 44:6

Iterali inowe endagembogut wondet eerogo pinagareegerak Omaawi Lombok Menggerak Aliku ALA nen wone yegerak nogo yi aret. “Aa'nduk togon wonagagirak peebi irip paga mondok logogin ti, an nalik aret o. An Ala wonage neegak, at alik ambi wonage mondok lek aret o.

Yetaya 45:14

At Aliku ALA nen yegerak nogo yi aret. “It Metit mendek yabu eeka inom, it Kuti mendek yi mendek ndi mendek kungga inom, It aap yerek-nggorek Tiyeba mendek inom, Iterali inowagam ari wogo logomenggaarik, Ninogobamini o, yinuk, It nogwe me, keele maarak negen inambokan nogwe, It inabu'me tebe yi unggwogwe, Eeppunuk yorogo logonet, At Ala ti, alik ambi lek, at alik mban kinom wonage o. At alik ambi imbirak tabonak wonage mondok lek aret kogo o, yinuk, Yorogo logogun o,” yinuk, yegerak me, yagi o.

Yetaya 45:5

Naliku ALA an aret me, an kokwak Ala alik ambi wonage lek aret o. An wonage neegak, Ala alik ambi wonage mondok lek o. Oonegen lagi wage menggim pa'nggwe nen nok, Oonegen kilu yi nage menggim pa'nggwe Naliku ALA nalik aret minggirak it aakumi abok aret ineenu aruwak nduk, Kat an Ala neebe liippanega'lek keegak kwe, keegin-komaale li'luk eerogo pagagin o. Naliku ALA an aret me, an kwak Ala alik ambi wonage lek aret o.

Yeremiya 10:10

Kaliku ALA perak, kalik Ala aret! Kat kanggeelik mondok keenik wonage, Kendagembogut kitok mondok wonage, Eeke menggendak o. Kanini mbake keenok, nggween yi nuk-nuk ari, Kanini yi aakumi ndi aakumi inoba piige keenok, ko wappunuk, wonaga'lek iniki ma'nogwe, Eeko menggaarak.

Yeremiya 10:14

It aakumi abok ti, iniki lek wi negen aret agaarik o. It aap mbuti emas paga eeka nen ogut ogobakkigirogo pugwi ti, Oone lek ogut mban ogobakkigirogo pugwi me, inenggali ogo menggaarak.

Marakut 12:29

Kin wokkage mbareegi, at Yetut nogo nen, “Wone alom ambi iya lombok nogo yi aret,” ari nagagerik, “Kit nowe-nawot aakumi Iterali mendek yi wae, Kinaruk liirogon konenggo logonip o. At Ala nogo ti ambit aret o. Ndi, at nogo ti, ninogoba Ala aret.

Nappiigak 14:15

“Wologo wae. Nit kit kokwak abe aakumi aret me, kit nonggop nduk yogop eeko ogotik? Kit yi eekak ndi eekak aanom warogo eeko monggotak yi, mbo punuk, at mbogut inom, nggween inom, yi nggwok yenggenak laut inom, yi mendek ndi mendek abok wakkagagerak Ala eenik menggerak nogo wone waabagip nduk, obeelom wone wonok yokkira wogoorak kagak kwe, eeko ogotik o.

Nappiigak 15:20

We, wam kugi aanggo warak noorak mage o. Mbabi eeriyak mage o. Yi mendek ndi mendek amiya wungga'lek kagak warak kenok, noorak mage o. Amiya noorak mage o, yinuk, liiru mbanogo punuk wogoraawok o.

Nappiigak 19:26

aap endage Pawulut nogo nen, Kugiwak aakumi nen ogobakkigikwi ti, abe mendek lek o, yinuk, o Epetut yime nen mban lek o. Ata, o Atiya yi awi ndi awi time abok aret aakumi apit inikime manabit nege logonet, nomoninabit nage kinigen kogwe, kinaruk konenggwi, eeko ogotik o.

1 Korindut 8:1

“Wam kugi aanggo warak noorak ilik, mage a?” yinuk, wone ambi yokkira o. “Nit abok nineenu o,” yogwe ti, abet aret yogwe kwe, it aap nen “Abok nineenu,” mbakwi ti, wogoppako menggaarak. Ndi, aakumi inabuwa mbako logonet, obeelom eeppiigwi kenok perak, iniki kole eerogo piigo menggaarak o.

1 Korindut 8:10

It kinoreewi ando iniki awo kole aga'lek mendek nogo nen, kugi aanggo warak kit ugun noorak kineenu me, ugun nunggwi kiinok, “It kugi aanggo warak kagak nunggwi me, nit togon nawi aret o,” yinuk, iniki maan mendek abeko logonet, nagun lek mbakop? Nunggwi aret iyoorak me,

1 Korindut 8:11

it kinoreewi nogo abok inake Keritut kambeegerak kwe, kit alom abu kineenu logonet, kugi aanggo warak ugun namonggotak paga nen kinoreewi iniki awo kole aga'lek nogo maluk eeppiigwi kiyoorak me, liippunuk eeko logonip o.

Nggalatiya 4:8

Kit aa'nduk Ala kineenggo'lek logonet, kugi ti, abe mendek lek kagak, inayeloman a'nuk inoone konenggo logonet, kugiwak ogobakkigippunuk alut eeko nogogutak kwe,

Epetut 4:6

Nit aakumi abok ninogoba ti, Ala ambit aret logonet, oome-endekem at eebe mondok endak warak menggerak. Yi mendek ndi mendek abok aret at abu'me menggerak me, yi eekwi ndi eekwi abok aret at nen mban koonogo yo'nirage kagak eeko monggoorak.

Pelaareegerak 3:24

Kaliku Kitok Menggendak nogoba ALA ao. Kat abu tiyanak keenggi omaawi ambik lombok menggendak nogo, o yogondak iluk aret an kayeloman nenegen keyaakit nduk, ni'neege menggendak pogom kugi mbogut paga wonogwe inom, nggween paga wonogwe inom, nogo nen kat iya tit eeke menggendak nogo ndak-ndak it togop ambi ngge wonogwe? Lek aret o.

Pelaareegerak 32:39

Ala lombok ambit an aret kinigen pe'neyaanip o. Ala alik ambi wonage lek, nalik aret logonet, Aakumi inoorogo piige, ineenik agago piige, Inawinde-inobaande agago piige, lek eerogo piige, Eeke minggirak an aret me, Aap ambi nen, Eeppiyoorak mage, yo'niriyak meek o.

Pelaareegerak 4:35

Ala nen eerit wagagerak abok aret kinigen kogotak ti, at kokwak ambi wonage lek o. At Aliku ti, Ala alik aret mbarumunggup nduk, eereegerak o.

Pelaareegerak 4:39

Togop aret me, agi mbogut paga inom, nggween paga yime inom, at Ala pogom alik ambi wonage lek aret o. At Aliku ti, Ala alik aret, mba'nuk, kiniki liippunuk, kineenu a'nip o.

Pelaareegerak 6:4

Kit nowe-nawot aakumi Iterali mendek yi wae! Kinaruk liirogon konenggo logonip o. At Aliku ti, ambit aret o. Ndi, at Aliku nogo ti, ninogoba Ala aret.

1 Timotiyut 1:17

Ndi, yogondak, naput o. Yi o ndi o aakumi aa'nduk wonogogwaarak inom, yogondak wonogwe inom, peebi logorak inom, ninogoba endagembogut kanggeelik mondok itok eenik menggerak ninigen kogolik alik menggerak Ala nogo endage mondok-mondok tiyanak ayuk warak logogin o. Amin!

1 Timotiyut 2:5

At Ala ambit aret menggerak. Ndi, aakumi inom, Ala inom, terak inake yonggo nappegak aap ambit Keritut Yetut aret o.