1 Korindut 3:19 - Ala Wone Peenok Peebi Mbanak

¹⁹ It aakumi nggween paga mendek nen, “Abok nineenu me, niniki warak aret o,” yinuk, mbakwi nogo, Ala nen, “Yi wi negen aret agan nugwi,” inombake menggerak. Aap ambi ari logonet, “Iniki ngget paga maluk eeriyak koonggwi nogo, Awo koonggwi iigak, Ala nen nggerok togon wagangge menggerak o,” yinuk, ari,

1 Korindut 3:19 ပူးပေါင်းရင်းမြစ်များ

2 Tamuwen 15:31

Laganggwi iigak, aap ambi nen Ndawut yoge logonet, “Abatalom oreewi inom nen kat tebenogo pagarak iniki ambit eeppunuk, koonggwi nogo, aap Akitoben inom aret koonggo agaarik o.” Yogo mbareegwa, at Ndawut nen konembunuk, Aliku ALA yoge, “Kaliku nogoba ALA wae. At Akitoben wone koonogo yorage nogo, Wi negen agan nege agaarik, mbaruwak nduk, eeppu o,” agan puut kirin paga ari laganeegerak.

2 Tamuwen 16:23

At Akitoben nen wone ari kenok, it aakumi abok aret, “Ala nen yoge kagak, yo'nirage kogo o,” yinuk, yogo nogogwaarak me, at Akitoben nen Ndawut yoge kenok, mugurok nage nagagerak pogom, Abatalom yoge kenok, ndak-ndak mugurok nage nagagerak.

2 Tamuwen 17:14

Wone ti yoreegerak nogo at Abatalom inom, it aap Iterali inoweewi abok aret inom, inaruk konenggo nogogwaarik, “At Akitoben wone yegerak nogo ti, op negen kwe, at aap Ariki mendek Kutayi nen wone yegerak ti perak, abu obeelom aret yegerak kogo o,” yinuk, yereegwaarak. Wone ti yoreegerak nogo, at Aliku ALA nen aaninggin Abatalom oba puurak mbake logonet, Akitoben yereegerak meek mbaruwak nduk, eeppereegerak me, yoreegerak.

2 Tamuwen 17:23

Ndi, at Akitoben nen wone koonogo yoragagerak nogo eeka'lek iige nagagerik, keledai amborowak paga kwi'nagak nogo ndoonogo punuk, ti paga kwi'na'nuk, at awi alom paga kota nogome aret nage nagagerik, aaganapuri koonogo piinok, alik nen enggaanok keele yilunggolagagerak kangge mbareegi, at ogoba nggween taanak me nogome aret taambereegwaarak.

Etet 7:10

Yoge mbareegi, at Kaman nen eyo aap Morekayi tugunogo puurak nduk yineegerak nogo paga Kaman aret enggaanok keele yilinogo tugumbi nogo mbareegwa, aap endagembogut anini mbake nogo teyok yereegerak.

Ayup 5:13

Iniki ngget paga maluk eeriyak koonggwi nogo, Awo koonggwi iigak, nggerok togon wagangge, Iniki penenak paga koonggwi nogo, Melak togon lek aruwak nduk eeppiige, Eeke kenok,

Ndawi 141:10

An ugun kuuri'me nage neegak, Aap maluk mendek nen inageele pakam nogome It aret inenggaanok nggerenggolaawak nduk, eeppiyet o.

Wundeegwaarak 18:11

It aakumi Metit mendek iniki wogoppako logonet, aakumi Iterali eeppiigo mbareegwa, at Aliku ALA nen eeppiyareegerak ti paga, yi kugi ndi kugi inomaawi lek tebenak iigak, Aliku ALA alik mban omaawi ambik menggerak neenu agi o.”

Kini Wuppiige 14:8

Aap iniki warak nen iniki penenak logonet eeke ti, at eerit nage nogo liippege menggerak aret kwe, Aap iniki lek wi negen eerit nage ti, aakumi inambokan laganikit nduk, pilit agan nege menggerak.

Kini Wuppiige 21:30

“Aliku ALA tebenogo puwok o,” yinuk, aap iniki warak nogo nen at yogwi, Aap yelok kaga nen, Wone ndogop yogwi niinok, “E o,” yuurak yelok kagarak me yogwi, Aap wone koongga nen iniki liirogon koombunuk yogwi, Eeremenggaarak kwe, meek aret kaagun o.

Yetaya 44:25

Peebi ndogop arigin o, yinuk, Ala nen yo'nirage kagak yokkirogo o, yinuk, Yorogo logonet, ineenu agak mendek eeppiigwi nogo abut laganogo piige, Inobagari negen yorogo menggaarak nogo inagi'ndok kambuwak nduk eerogo piige, It aap iniki warak nen yorogwe nogo abut laganogo, Aap wi nen yogwe, mbaruwak nduk eeppiige,

1 Korindut 2:6

It aap iniki kole kenok perak, wone nit nineenu nogo yorogo monggoorak aret kwe, wone nit nineenu logonet, yorogwe nogo ti, nggween paga wone nogo mendek lek o. Ndi, it aap inayuk warak nggween paga yime menggaarak yogondak lek arit nogwe nogo, wone ineenu logonet, yorogwe nogo mendek lek mban.

1 Korindut 4:6

Togop me noreewi o. “Wone liiru mbanak kagak, alik eekwi mage o,” yogwe nogo, Apolot nimbirak eeko monggoorak kit mamunggolaabagip nduk, an wone yokkiragi ti, nit nineebe paga wakkagak yokkiragi o. Mamunggologwe kiinok, kit nen, “At ambi iya, at ambi meek,” yogo logonet, wogoppako logomunggup lek o.

Epetut 4:14

Togop me, noreewi o. Yi kilaarak-mogonik eeke logonet, yi mendek ndi mendek piyanogo nippege, o wiya nen yi mendek ndi mendek wonok nage, eeke menggi kwak, elege-aabologwe ti, togop aret wonogwe me, kit kunduk togop logonet, it aakumi pilit wone yogo menggaarak nogo nen aakumi inambo'me laganuwok nduk, iniki koombunuk, inoone amburu paga nomoniren nawok nduk, agan nugwi wone ti mendek kit ugun konenggo logorak mage o. Ata, Keritut iniki mondok kole menggi kwak, nit togop aret niniki kole eeppinanit wundi wage kenok, nit elege-aabologwe togop ti ndak-ndak logogun lek o.

Yakobut 3:15

Kit kinoreeluk ambi anini eeppogo logonet, worokot liinik agan nugwi, “An koongge mban eeriyak,” mbako logonet, eerit nugwi, eekwi kiinok, abu naalop-kaalop age logonet, yi maluk ndi maluk abok aret age kogo monggoorak nogo ti, at iniki warak agi menggerak Ala nen koonogo pinagage kagak eekwi lek o. Ata, at Tile nen it aakumi nggween paga mendek iniki koonogo piige kagak, iniki nengge kenok, eeko menggaarak nogo mendek aret eekwi kiigi o.