1 Korindut 12:8 - Ala Wone Peenok Peebi Mbanak

⁸ Aberiniki ambit nogo nen aap ambi iniki warak logonet, wone koonogo yorage logowak nduk, unde eeppege, ambi, yi wone ndi wone alom neenu a'nuk, liirogon yorage logowak nduk, unde eeppege,

1 Korindut 12:8 ပူးပေါင်းရင်းမြစ်များ

Nekemiya 9:20

Mamunirage logowak nduk, Kaberiniki wogoraga'lek teppege, inambi abu aganake kagak, mbo piige, inagi abu aganake kagak, mbo piige, eerulik wogorenet wundi wage nagagindak me,

Ayup 32:8

Nineenu ariyak alom nogo ti, Niniki nen koonogo yo'nirage, Omaawi Lombok Menggerak nen ninikime mambinangge, Eeke menggerak me,

Ndawi 143:10

Kat nogoba Ala aret me, Kat eeriyak mbake nogo mamunnake, Kimbirak menggendak abu obeelom Aberiniki nogo nen Tu kobappaga wo'neren nawak nduk, nappi wage, Eeru o.

Yetaya 50:4

Aakumi inomaawi lek agaarak wonogwe nogo iniki eyak wappiyoorak wone neenu arikit nduk, Aliku Itok Menggerak ALA nen, “Ndogop yu o,” yinuk, mamunnake menggerak o. Ko'lu-kii'me kubondendok paga neenik eerogo panege, Aap ambi mamunirage kenok, apuri inaruk liirogon konenggo mengga kwak, naruk liirogon konengge logokit nduk, eeppanege, Eeke menggerak.

Yetaya 59:21

At Aliku ALA nen ari logonet, “Ndi, an nen ninom wone koonogo pigin nogo yi aret. An Naberiniki kinoba pinagage logonet, noone kinambe paga pinagaminggirak nogo kobak aga'lek kinapurilogwe mamunirogwe, it kinapurilogwe nen it inapuri mamunirogwe, ndi, it inapurilogwe nen inombowologwe peebi ndaganabugun nogo mamunirogwe, eerit wundi wogwe iigak, yogondak nen nok, peebi nda'narugun abok aret yoranet wundi wogo logogun o,” yinuk, Aliku ALA nen aret yegerak o.

Ndaniyen 2:21

At nen ne eeke logorak alik koonogo pit nage, Eeke menggim ari wage paga eeriyak koonogo pege, It aap inendagembogut mippiige, kwippiige, It aap iniki warak nogo yi wone ndi wone yelok kaawak nduk eeppiige, It wone liippega nogo, yi wone ndi wone ineenu eeppiige,

Matiyut 13:11

Yogo mbareegwa, at Yetut nen, “Kit aap yi, mbogut paga mendek abu'me pinagarak wone at inikime lubuk wonagagerak nogo, kineenu arubagip nduk, Ala nen kilikkiroorak mbareegerak kwe, it aap ti perak, kiliriroorak mbarulik o.

Nappiigak 6:3

it aap Aberiniki inikime mondok liinik iniki warak logonet yogo menggaarak kineenu kero, kinenggela'me nen aap ineebe 7 leenogo mippiyaanip o.

Oroma 15:14

Noreewi o. Kit kiniki mondok obeelom yi mendek ndi mendek abok aret kineenu logonet, kit-kit aret, “At ambi mamunegak eeko logorak op aret,” mba'nuk, yokkirage agarik o.

1 Korindut 1:30

Ti kenok, at Ala nen Keritut Yetut ninom kunogo pinaneegerak me, ninom kunik logonet, at Keritut eereegerak paga yi wone ndi wone nineenu eeppinanege agaarik o. Niniki obeelom eerogo pinanege, Ala apuri at ake logowok nduk, leenogo pinanege, ndi, nit keele maarak negen wonogogurak nogo, ninonggo mbanogo punuk, wondet agago pinanege, eereegerak nogo ti, Keritut aret o.

1 Korindut 1:5

Keritut nit ninake eereegerak wone yokkirogogurak ndak-ndak, kinikime nu'lek eerogo pinagareegerak me, kit Keritut kinom kunik logonet, yi wone ndi wone yuurak inom, yi eekwi ndi eekwi kineenu ariyak inom, abok aret unde eeppinagareegerak kenok, Ala, “Wa,” yinuk, yoge minggirak.

1 Korindut 13:2

An Ala wone yorage logokit nduk, unde eeppanege, yi wone ndi wone alom neenu a'nuk, liirogon yorage, wone kote kumaarak mendek abok yelok kage, niniki abet mbake logonet, “Puut yi keebe tayo yu o,” yinuk, yoge neenok, tayo yi nage kage, eeke minggirak kwe, aakumi inabuwa mbaka'lek logonet eeke neenok perak, we aanom warogo aret eeke minggirak kagi o.

1 Korindut 13:8

Ala nen yorage kagak yorogwe, inoone lalin woppunuk yorogwe, yi wone ndi wone alom ineenu ogwe, eekwi ti, lek arigin aret kwe, aakumi inabuwa mba'nuk, eeppiinet nugwi ti perak, lek arigin lek mondok aret logogin o.

1 Korindut 14:26

Ti kenok, nit nonggop yuwok o, noreewi. Kit kuwak eeppunuk logonet, aap ambi nen ndawi tiyaniyak mbake kenok tiyangge, ambi nen wone ambi mamuniroorak mbake kenok mamunirage, ambi Ala nen paganogo yoge kagak, yoroorak mbake kenok yorage, ambi, it ambi inoone lalin negen woppunuk, yoroorak mbake kenok yorage, ambi, “Togop yigi o,” yinuk, abut laganogo yoroorak mbake kenok yorage, yi eeriyak ndi eeriyak ti abok aret eeko logonet, it Ala apuri iniki nu'lek eerogo piyoorak kenok mban eeko logonip o.

1 Korindut 14:6

Togop me, noreewi o. An kinowagam wage logominggirik, Ala nen paganogo yo'nege kagak, yokkirage, wone ambi liirogon kineenu eeppinagage, Ala wone yokkirage, wone mamunggirage, eeka'lek logonet, we noone lalin aret woppunuk, yokkiroorak mban kinowagam wage neenok, “Yi nano eeppinanikit nduk wagarak?” nombarumunggup nogo lek a?

1 Korindut 2:11

Aap ambi iniki mbake nogo, it ando ineenggo'lek iigak, at alik eenu menggerak ti ndak-ndak, Ala mbake nogo Ala Aberiniki alik mban eenu menggerak.

1 Korindut 2:16

“Ala iniki mbake menggerak nogo, ta nen eenu me, at mamuniriyak op mbakop? Mondok lek aret o,” yinuk, yereegerak liiru mbanak aret wonage kwe, Keritut iniki mbake nogo unde monggoorak nit aret o.

2 Korindut 1:12

Nit eerit nogo logonet, liippunuk eerit nogo monggoorak kwe, kit kinenggela'me logonet perak, mondok iya lombok eeko nogogurak nogo, abeko logonet, it aakumi nggween paga mendek iniki koombunuk agan nugwi kwak agan nugwi, kinamendek kolaawok nduk, wone eegu nobat yokkirogwe, ti eeko logolik o. Ata, Ala niniki kunik nen omaawi eeppinanege kagak, mondok abet kenok mban kenom paganogo yokkirogo nogogurak nogo mban abe'nage kenok, “Op eekoorak me, ia!” yinuk, niniki ale'nggen mbako ogoorik o.

2 Korindut 11:6

Noone ninggin negen ari minggirak kwe, neenu logonet ari minggirak kineenu aret o. Nit kinenggela'me logonet, eerit nogo nogogurak nogo ti, abok aret kineenu me, ngge yokkiroobok aga o.

2 Korindut 2:14

Yime wagagirak wonage me, Ala nen mbo panulik o. It aap wim nambuppunuk, “Wi!” iraawak nduk, aap waka'ngget awuri inom ndegen-ndegen aago kombogonak wogo mengga kwak, nit ndak-ndak ninowe Keritut eegin tiyak ari kenok ninom ndegen-ndegen aago mondok tiyanak nugwi me, Ala mondok alut eeko logowok o. Obari obeelom wiganinuk nage menggi kwak, Keritut eeke menggerak obeelom wone nit paga nen wiganinuk nage logowak nduk, Ala nen eeppinanege menggerak.

2 Korindut 4:6

At Ala nen ari logonet, “O apit me eya aruwak o,” yinuk, eya eereegerak nogo inom, ndi, Ala mondok tiyanak, “Wi!” ugwi nogo, Keritut enete liippunuk, yelok kogo logowok nduk, ninikime eya ee'ninabeegerak nogo inom, ti eebe ambit Ala nen mban aret eereegerak o.

2 Korindut 6:6

niniki mondok abe paga yokkirogwe, nit wone nineenu abok aret kineenu eeppinagagwi, ninaanaganggenggwi lek kwi'ndak logonet yokkirogwe, kinabuwa nen yanggorogon kinaruk wakwi, Aberiniki ninom kunik logonet mamunggirogwe, nineebi mbaka'lek ninom abu kunik logonet yokkirogwe,

2 Korindut 8:7

Kit kiniki abet mbakwi, iniki ale'nggen paga konenggwi iigak yorogwe, Ala ari menggerak wone kineenu ogwe, kiniki abe paga yeenggwaaranet nugwi, kiniki kunik ee'ninakwi, eekwi ti nogo abok aret nggwok wigak ari me, aakumi inabuwa nen inake kuwak eeriyak yi nogo inom ndak-ndak nggwok aret eeko logobagip nduk, yokkiragi o.