1 Endagembogut 8:43 - Ala Wone Peenok Peebi Mbanak

⁴³ kat wonage menggenom mbogut paga wonage logonet, oone karuk konembunuk, yokkege nogo aret eeppege logomunggun o. Togop aret eeppege keenok, it kapuri aakumi Iterali nen kendage tiyanak kenok, kayuk wukwi nogo ineenu ogwe, ndi, an o wukirak yi, Ala awi wurik aret o, yinuk, ineenu ogwe, eekwi nogo ndak-ndak, yi aakumi ndi aakumi o nggween paga wonogwe yi abok aret ineenu ogo logogun o.

1 Endagembogut 8:43 ပူးပေါင်းရင်းမြစ်များ

1 Endagembogut 18:36

Ndi, Ala ake warogo wogogo menggam abu kiyoma ari wage mbareegi, aap Ala nen yoge kagak yoraga Eliya nen mi'na'nuk, tamban eeke logonet, “Abarakam inom, Itak inom, Iterali inom, inogoba Kaliku Ala wa! It Iterali inenggela'me inogoba Ala kat aret wonage ineenu ogwe, ndi, an kayeloman eeke yi, abok aret kat yo'nege keenok, eeke ineenu ogwe, eeruwak nduk,

2 Endagembogut 19:19

Kaliku ninogoba Ala kat perak, yi aakumi ndi aakumi inabu'me piigo menggam o nggween paga wonogwe yi, abok aret Ala kalik aret wonage ineenu aruwak nduk, Kaliku ALA nen aap ti, eenggime nen ninagap ndaru o, nogoba,” yinuk, tamban eereegerak.

1 Mbinineegwaarak 16:8

“At Aliku ALA, Wa, yogwi, endage kunogo yogwi, At eeke menggerak nogo yi aakumi ndi aakumi yoranet nogwe,

2 Mbinineegwaarak 6:33

kat wonage menggenom mbogut paga wonage logonet, oone karuk konembunuk, yokkege nogo aret eeppege logomunggun o. Togop aret eeppege keenok, it kapuri aakumi Iterali nen kendage tiyanak kenok, kayuk wukwi nogo ineenu ogwe, ndi, an o wukirak yi, Ala awi wurik aret o, yinuk, ineenu ogwe, eekwi nogo ndak-ndak, yi aakumi ndi aakumi o nggween paga wonogwe yi abok aret ineenu ogo logogun o.

Ndawi 102:15

Kaliku ALA nen o Tiyon obaane'me wurogo pege, Kat kabinak pindan-pindan aago logonet wage, Eeke keenok, Yi aakumi ndi aakumi abok aret Kaliku ALA kendage kumbunuk, inagabiti mbakwi, It aap inendagembogut nggween paga wonogwe nogo Abok nen kendage abu tiyanak keenok kayuk wukwi, Eeko logogun o.

Ndawi 22:27

Kaliku ALA yi o ndi o unde wonage, Yi aakumi ndi aakumi abok aret Wone lengganogo yorage, Eeke menggendak me, It aakumi o irip-irip menggaarak nogo Kaliku ALA koba abeppunuk, Melak togon kowagam wogwe, Yi aakumi ndi aakumi inanebunu lombok kat kabu'me tebe yi wa'nuk kayuk wukwi, Eeko logogun o.

Ndawi 33:14

At wonage menggim wonage logonet, aakumi nggween paga wonogwe abok aret liippiige, Eeke menggerak o.

Ndawi 86:9

Nogoba o. Kat Ala kalik aret wonage, Abu nggwok lombok wonage, eerubok mendek eeke, Eeke menggendak me, Yi aakumi ndi aakumi ogobakkigirogo piyareegindak nogo Abok aret wogo logomenggaarik, Kat kabu'me tebe yinuk, kalut eekwi, Kat kendage kunogo tiyappagit nugwi, Eeko logogun o.

Yetaya 11:9

Niyo laut yenggenak nggween kaga'lek nobarogo pereegi kwak, At Aliku ALA eeke menggerak nogo it nggween paga wonogwe abok aret ineenu arugun me, An nabuut abu alik leenak nogome At ambi nen at ambi maluk eeppegak eekwi, At ambi nen at ambi nibinogo pi nagak eekwi, Eeko logogun lek o.

Yeremiya 25:29

At Omaawi Lombok Menggerak Aliku ALA nen ari logonet, Ala agota o, yinuk, an nendage kunogo yogo menggam yime aaninggin oba pikit nduk eeke me, ti eeke logonet, it aakumi kunduk aaninggin inoba piyoorak lek mbakop? It aakumi nggween paga wonogwe yi abok aret wooluwak paga inoori woraawak nduk, yonggo nappiige me, Nit mbo nagun mondok lek, mbako logowak o.

Pelaareegerak 26:15

Togop aret me, kat kame agi mbogut irimbaga alik leenak menggenom time logonet, kiniki ale'nggen paga kapuri Iterali mendek kena wu'niya woraanuk, obeelom eeppinanege, ndi, ninombomini yorage logonet, Kinanggween mili obeelom yilak amburu inom, nggiin amburu inom, niyo eneeri negen kila-kila wungge menggim wokkiraagin o, yinuk, wone abuk nggaruk togon kumbuk mbanogo yoragagindak ndak-ndak aret wo'niragagindak nggween nogo kunduk obeelom eeppege, eeru o, yinuk, yogo logomunggup o,” yoragagerak.

Wayu 11:15

Yo'nege mbaki, nenegen wonage me, malayikat 6 inarompet oone eeko mbaka, ambi nogo nen arompet nogo oone eeke mbaki, it mbogut paga time nen inoone nggwok yogo logonet, “O nggween paga time aakumi inabu'me piinok menggam abok aret, at ninogoba inom, at leenogo mippereegerak Keritut inom, imbirak inoone konenggo logowok nduk, inabu'me ari waga o. Ari wogwe iinok, Keritut nogo nen inowe endagembogut logonet, mondok-mondok wone lengganogo yorage logogin o,” yinuk, yogwe iigirak.

1 Tamuwen 17:46

Ne yi eyom paga at Aliku ALA nen keebe waganogo an neenggime wo'nege yi aret me, koorogo paganuk, kanobak mbanogo wagangge logonet, kawuri ineegin warak Pilitin mendek abok aret kinom towe wiga agan nugu menggaarak inom, nggwiya eyonggaame menggaarak inom, kineebe kinoorak nawak nduk, wogoraagin o. Ti eeriminggirak paga aakumi o nggween paga yime menggaarak abok nen, Aakumi Iterali inogoba Ala wonage aret kogo o, yinuk, ineenu arugun.