1 Endagembogut 2:22 - Ala Wone Peenok Peebi Mbanak

²² Yoge mbareegi, aap endagembogut Talomo nen at agalo yoge, “Kwe Tunem mendek Abitak ti, at Aroniya koloorak, nonggop nduk yo'nege agandik? At noweeluk aret me, nobaane'me ninowe endagembogut ariyak ti kunduk, op mba'nuk, yo'nege agandik? Ndi, ti yo'nege logomenggendik, aap Ala unde Abiyatat inom, kwe Teruya aagaluk Yowap inom, it kunduk, at abu'me mban logorak yo'niriyak mbakendak ya?”

1 Endagembogut 2:22 ပူးပေါင်းရင်းမြစ်များ

2 Tamuwen 12:8

at ogoba Tawun awi o nggwok abe wurik nogo wogoge, at ogoba Tawun akuwi at ogome logowak nduk wogoge, ndi, it aakumi Yekura mendek inom, Iterali mendek inom, inowe endagembogut logonet, inarum logowak nduk mippege, eereegirak kwe, ti meek mba'nuk, Ambinom wo'niruwak, mbake kenok ti, wogoriyak aret kwe,

2 Tamuwen 16:21

Yoge mbareegi, at Akitoben nen Abatalom yoge logonet, “At Ndawut akuwi ayeloman mendek wogo aap endagembogut awi o nggwok abe wurik yi, arum piinok nagaarak wonogwe nogo, kinom nogo yege logot o. Kinom nogo yit namenggendak kogoba konengge logomenggerik, Yi mendek ndi mendek obari ndi wuke menggi kwak eerit nage agaarik o, yemenggerak nogo, it aakumi Iterali mendek konenggo logomenggaarik, kat kabu'me mban kuwak eeri wogo logogun o,” yinuk, yoreegerak.

1 Endagembogut 1:11

Togop eeke mbareegi, at Natan nogo nen Talomo agalo kwe Mbatiyeba owagam nage nagagerik, yoge logonet, “At ninowe endagembogut Ndawut eenggo'lek kagak, kwe Kagit aagaluk Aroniya ninowe endagembogut agaarak nogo, kat muk konenggendak ilik, lek a?

1 Endagembogut 2:15

Yoge mbareegi, at Aroniya nen kwe Mbatiyeba yoge, “Nogoba Ndawut obaane'me an aret Iterali inowe nendagembogut logorak keenu aret o. It aakumi Iterali mendek abok nen inowe nendagembogut logorak nombakaarak kwe, ena laganogo nawuluk Talomo aret nogoba obaane'me endagembogut agaarak ti, Aliku ALA iniki koonggerak paga agaarak o.

1 Mbinineegwaarak 3:2

Ambokan ndarak ti, aakumi Nggetut mendek inowe endagembogut Talamayi apuluk kwe Maaka aagaluk aap endage Abatalom aret.

1 Mbinineegwaarak 3:5

apuri ndaganabeegerak ti, Amiyen apuluk kolaga Mbatiyeba wagangge nagagerik, apuri ineebe 4, ambi Tiyamuwa, Tobap, Natan, Talomo aret ndaganake,

Matiyut 20:22

Yoge mbareegi, at Yetut nen, “Kit nggino yo'nugwi ti, kineenggo'lek logonet, nggino yo'nogo ogotik o. An nagi toolak nagin nogo ti, kit noorak op mbakop?” Yorage mbareegi, it nen, “E o. Nit noorak op aret o.”

Marakut 10:38

Yogo mbareegwa, at Yetut nen, “Kit yo'nugwi ti, kineenggo'lek logonet, yo'nogo ogotik. An nagi toolak nagin ti, kit noorak op mbakop? Aakumi yiime wuppiigwi kwak an ambi eeppanugun ti, kit eeppinagarak op mbakop?”

Yakobut 4:3

Ndi, kit ando Ala nen wokkiraawak nduk nggino yogo monggotak kwe, kiniki nengge nogo mugurok nogo logonet, lek eerogo patuwok nduk, kiniki abu alik koombunuk yogwi me, wokkiraagin mondok lek o.