Yohanes 8:44 - ALLAH ANE WENW KET MEKE WAROGO WOKNINAKHIKHE WENE

⁴⁴ Itithogon hina'it iti, hit hinopase Iblis atma, hit nen at warlok apekherek meke itiat warlok nen hagakhe lagap iti. At Iblis iti erlo baga nenat akhuni inakherek mekeat o. At wene ebe wene akla dek iti nen, wene ebeat wene isinem inane legekherek dek iti. Iblis ekalat ekherek iti, at obabut ikhogatma ekalat ekherek iti. Inekalat egarek iti, erlo arat o.

Yohanes 8:44 ပူးပေါင်းရင်းမြစ်များ

Matius 12:34

Hit hinebe warlo nen itago meke yomarani! Akhuni nen yi wene ti wene inapema nen egarek iti, inakla kerlek dogolik kagalogo dagei agunem egarek iti nen, hit he, hinobabut weagat dogolik, wene hano meke ekhe dogosak a? Erlok dek o.

Matius 13:15

It akhuni yi inileken hidik, inasuk holhik, inakla ebekhik, hagatluk nen, inobabut hebelasumo yabokane an nen hanorinabunogo iluk, it nen inakla puk ageik, inasuk dogou-dogou hagakhik, inileken puk uagaluk, ineram nenat puk-puk hagakhik, hagakhukha o, iluk Allah nen isikhemo Yesaya nen holal waganogo 'bisikhe iti tak-tagat asuagaluk yogeisekhe lagei o.

Matius 13:38

Nen, wen iti ebe re, o agat oba yoma yi ai ti ai tha'bokhogonat o. Nen, ai hano meke ebe re, akhuni Allah apma welageikharek inebe itiat o. Nen, ai weak meke iti ebe re, at obabut motok weak meke a'buri itiat o.

Yohanes 6:70

at Yesus nen men yogeisasikhe, “An nen hit hinebe 12 oba yi wenakhinakhigi dek nogo? An nenat wenakhinakhigi mekeat, hat opakiat ageikhe Iblis mekeat welagan o,” iluk yogeisasikhe.

Yohanes 7:17

Tha nen Allah akla apekherek meke mothogon hagasusak warlok halok, an nen wene yakulisekhe lagei iti, Allah nen yakulekhe korlek iliogo, igik, Ekaerek akla nen kagalogo iliogo, igik, ekagat halok ilu asiginat o.

Yohanes 8:38

An he, nopase nipisak dogolik nileken hekhe lagagi mekeat yokhisekhe korlek, hit anek he, hinopase etnogo nen ekherek meke ane hologo hagakhe lagap o,” iluk yogeisasikhe.

Yohanes 8:41

Hit he, hinopase etnogo hagakherek meke hagakhe lagap o,” iluk yogeisekhe lageikhemo, it nen he, men yogokhukha, “A! Nit param yugunisake hagakhe dogolik itakninakha meke dek o. Nit ninopase Allah arligat o,” iluk yogokhukhama,

La'isasikhe 13:10

men yogokhikhe, “Hat hebe Iblis a'but yi re! Akhuni dalinakhik, nukhetdisigik, hagakho motok dogolik, yi meke ti meke mot hagasuogoluk hagakhunem, hat nen degetdigiluk hagakho motok welagan yi re! Ninoe Etagapogot nen, akhuni tilninabigiluk holak mothogon ya'inanhikhe meke, hat nen huk ageidegat korlotdigiluk hagakho motok welagan iti nenaluk.

La'isasikhe 24:9

Itithogon yogokhikhemo, it ap Yahudi meke ebetlake emenogo nen meneke, ukum at oba 'bekhe dogolik, “At Tertulus nen ekhe iti, eberogonat ekhe o,” iluk yogokhukha.

La'isasikhe 5:3

'Bi ageikhemo, at Petrus nen, “Ananias. Iblis nen hakla kagalhemo Allah Agoreke nukhetdiluk agat oko ebetlake mikirlogo hekaerek hasik 'bakhalok wagan iti nenaluk.

2 Korintus 11:3

Itithogon meke re, alebat at Warlo etnogo obabut kaukmo, he Hawa nukhetdisikhe hak, hit hinetaiken opakiat Kristus oba hakotdiluk at hasik karelek welagap meke nukhetdinagousak iti, nayuk ariogo.

1 Petrus 5:8

At Iblis, hinathili meke etnogo nen, singa yeke helo anini weak meke yi meke ti meke haumhogo nagaluk ane ke agan herarik nekherek iti hak, “Tha hak weagatdigin,” iluk herakhinabik liliogo iti, hinobabut hebelogo hinileken hanorogon dogono o.

2 Petrus 2:4

It malaikat Allah nen yoko usa'isa agarek meke aperek weak hagakhukhama, Allah nen here'isigidek, ukum yabokane inoba 'bigiluk nen, o mummo weakma iniki herle warek dogoagaluk usa'isasikhe iti.

1 Yohanes 1:8

Itithogonat meke re, nit nen ekhe dogolik, “Nit weak ageikhe hagakhidek,” iluk ekhe lago halok he, ninekalat ninekaerek nukhetdakhekhe lago iti nen, ebe wene ninakla motok dek o.

1 Yohanes 2:21

An nen wene holal waganogo hinoba la'i agei iti, ebeat wene hinokodek nen 'buk. Hinilu welagap iti nenat la'i agei o. Nen, inekalat egarek iti erlo, Allah ebeat meke nen 'buk. Erlo ninat, iluk hiniluat o.

1 Yohanes 2:4

Meke re, tha nen, “An he, Allah ebe nilu,” iluk ekhe dogoligat he, at nen wene ninasuk wakherek wene iti hologo mothogon hagakhidek halok he, at ekalat ekherek iti. Halok he, ebe wene iti akla motok dek o.

1 Yohanes 3:12

Nit nen he, at Kain ebe Iblis obabut weak meke iti a'but ageikhesik ekaerek agot meke wakhikhe iti hagat, hagasusak dek o. At nen agot wakhikhe iti, nenaluk wakhikhe. At hagakhe lageikhe meke korlo motok nen, agot hagakhe lageikhe meke mot motok, iti nenat wakhikhe o.

1 Yohanes 3:15

Inagarlak lak inerugi motok ina'it welageikharek meke iti, it inebe tomok akhuni inakharek mekeat o. Nen, it akhuni inakharek meke iti, inebe tomok naburlal-haburlal iteerek ageidek motok werek o, iluk ninilu o.

Yudas 1:6

Nen, at Allah nen it malaikat yoko usa'isa agarek meke hagasusak meke supurogo wogeisasikhe mekeat he, it ninat meke inagarlak lak hagasusak meke inakhane pok lalok inekaerek inaila here'isukhama, Allah nen herle motok dogogin meke baga iniki herle warogo o motok mummo agat abel wemake 'bisasikhemo werek iti. Itithogon motok dogoluk nen, yabokane akhuni ukum kokhogon inoba 'bigin itinem, it inomat inoba 'bigiluk nen, iniki herle hisalinabigin iti hinakla ebetni.

A'bikaka 13:14

Itithogon ageikhe hagakhe laga iti, at helo yeke hakene kok alep meke etnogo nen, elalin meke at il oba hagakhe dogoagaluk iteerek 'bekhe meke etnogo ebe hagakhe dogolik, akhuni agat oba welageikharek meke ekalat nukhetdisekhe laga. Itithogon nukhetdisekhe dogolik, it akhuni emenogo nen, helo yeke hakene kok meke karok oba palekma ebe watlasusak meke apuke the ageikhe meke etnogo ebe hakene alino hagarogo kaneke ageikhe hagasuagaluk yogeisekhemo ebe hagakha lakhigi.

A'bikaka 2:10

At Iblis nen hit hinakla kagaluagaluk, ap hit meke ebetlake iniki herle warogo 'bisamo, iniki 10 baga nen yi aik ti aik hekhe dogogun iti re, hinayuk agup o. Yi aik ti aik itithogon hagathinakho korlek, hinetaiken an noba hakotdiluk, an ninom hunik werekma watlasugun halok he, tha nen ae a'busuk weak tha nen ae a'busuk weak lagunem, it inobatne ageikharek meke oko kare-kare mitago wogeisegarek iti hak, oko naburlal-haburlal hagathinabigin o.

A'bikaka 21:8

Itithogon mekeat he, it akhuni aperek inayuk holik meke inom, inetaiken Allah oba hakotdigidek meke inom, Allah alilo meke hagakharek meke inom, akhuni inakharek meke inom, param ha'isigik, ha'isoagaluk hagakhik, hagarek meke inom, elo dek elalinat inakharek meke inom, inetaiken kaneke oba hakotdiluk dogolik, hogorakharek meke inom, inekalat egarek meke tha'bokhogonat inom, i laut hetu meke yekelek werekma, hotali al hakene obasi weak meke etaga belerang inom-inom amulok nasi motok welagarekma etoma inobolukmo la'isagein. La'isagein iti, inebe alebageik elanma hasik watlatlukmo nen, yabokane watlasugun meke itiat o,” iluk yoknekhe.

A'bikaka 22:15

Itithogon mekeat he, it akhuni aperek weak inalilo meke yeke hagakharek hak hagakharek meke inom, it elo dek elalin inakharek meke inom, it param ha'isigik, ha'isoagaluk hagakhik, hagakharek meke inom, it akhuni inakharek meke inom, it inetaiken kaneke oba hakotdiluk dogolik hogorakharek meke inom, it inape baga nen nukhetdisigik, yi meke ti meke hagakhe dogolik, nukhetdisigik, hagakharek meke inebe tomok inom, tha'bokhogonat o kota iti abel itikmanke dogogun o,” iluk yoknekhe.

A'bikaka 9:11

Nen, it iti inoe kok etagapogot hagasik welagarek meke, at malaikat Allah nen wema baga kilinmo usa'i ageikhemo welagarek meke etnogoat. At iti etaga, nit ninane baga, weagarinakherek meke u hak, it akhuni Ibrani meke inane baga etaga Abadon igik, nen, it akhuni Yunani meke inane baga, Apolion igik, egarek meke lakhigi.