Yohanes 3:36 - ALLAH ANE WENW KET MEKE WAROGO WOKNINAKHIKHE WENE

³⁶ Halok he, tha nen etaiken Allah a'but oba hakotdiliogo halok, iniluk dogogun meke iti ite agasik werek o. Meke re, tha nen, at a'but iti ane holhidek kolelogo here'isiliogo halok, iniluk motok dogogun meke iti ite asigin dek o. At he, Allah akla aga at oba motok 'biluk dogogin o.

Yohanes 3:36 ပူးပေါင်းရင်းမြစ်များ

Matius 25:46

it akhuni iti yi aik ti aik hekhe dogogun oba motok dogoagaluk la'isagein o. Mekeat he, it Allah ane hologo hagakhe dogogun meke iti iniluk motok dogogunmo etoma 'bisagein o,” iluk yogeisasikhe.

Markus 16:16

Yogeisilik lagunem it akhuni aperek nen wene iti eberogonat iluk apagun meke ima usa'inabugun meke, Allah nen tilinabigin mekeat he, it aperek wene iti eberogonat iluk waganugun dek meke Allah nen wene inoba 'biluk weagarinabigin o.

Lukas 3:6

Itithogon hagakhep halok, Allah nen akhuni tilninabigin meke ageikhe la'i agunem hinileken hugun o,” iluk, Yesaya nen holal waganogo 'bisikhe meke tak-tagat, at Yohanes nen itithogon yogeisilik nekhe lageikhe iti.

Yohanes 1:12

Itithogon thogotdisukha meke re, it akhuni aperek nen, at ebe waganiluk nen, inetaiken at oba hakotdisukhama, Allah a'buri ebeat meke asuagaluk iterinakhikhe.

Yohanes 10:28

Noporlik nekhe korlek, it iniluk motok dogoagaluk inilugurinakhe dogogin iti nen, it inebe watlatluk nuk asugun dek o. It an niki baga werek korlek, it ap aperek nen tilogo woginabusak erlok dek o.

Yohanes 3:3

Itithogon yogokhikhemo, at Yesus nen, men yogokhikhe, “Akhuni Allah nen inebe yabokane inapuke ket itaginakhidek halok, at apma 'bisekherekma etoma inileken hugun motok dek o, iluk, nane eberogonat yokhekhe lagei,” iluk yogokhikhemo,

Yohanes 4:36

Ebe arat palho halok he, ap ageikhe ai yakherek meke inom, nen, ageikhe eken palherek meke inom, ipisak inakla arleken akhoagaluk, yogotak at ageikhe eken paliogo meke iti oko horliliogoat o. Oko horliliogo iti ebe re, eken palogo natogorlogo 'begarek iti hak, akhuni iniluk motok dogoagaluk natogorlogo 'bisiliogo itiat o.

Yohanes 5:24

“It akhuni tha nen, an nane waganhe dogolik, inetaiken an la'ani ageikhe meke etnogo oba hakotdugun halok, akhuni watlatluk lageikharek erlo thogotdisalok iniluk motok dogogun meke erlo baga arat wageikhasik werek o. Iniluk motok dogogun meke iteerek ageikhasik werek iti nen, yabokane wene inoba 'bigin dek o, iluk eberogonat yokhisigi.

Yohanes 6:58

Nen, hipiri pogot oba nen usa'ageikhe meke yi, hit hinopa lak neke lagoukha meke inebe watlaga lagoukha iti hakene dek mekeat he, ap tha nen hipiri ebe meke yi nasi halok, iluk motok dogogin o,” iluk yogeisasikhe.

Yohanes 8:51

Nen, tha nen an nane hologo hagakhe dogogin halok he, watlageidek iluk motok dogogin o, iluk eberogonat yokhisigi o,” iluk yogeisekhe lageikhemo,

La'isasikhe 14:2

Waganhukhama, it akhuni Yahudi meke ebetlake nen, wene iti inasuk holiluk, eberogonat iluk inakla apigidek meke nen, it akhuni itikmanke meke Allah a'buri ina'it asuagaluk inakla kagalhe lagoukha.

Roma 4:15

Wene Allah nen ninasuk wakhikhe wene iti baga, Allah akla aga ninoba 'bekherek. Wene ninasuk wakhikhe iti wakhidek dogolepma re, wene thagalogo weak hagariogei, iluk ilep degat o.

Roma 5:9

At Kristus amep ulabogo watlageikhe iti baga, wene ninoba meke korogo wokhalok Allah ninom yabokane ninapuke 'binanhikhesik nogo nen, yabokane Allah akla aga ninoba 'bisinem tilninabigin dek nogo? Tilninabiginat o.

Roma 8:1

Yogotak nit Kristus Yesus ninom hunik welago meke Allah nen wene ninoba 'biluk weagatninabigin dek o.

Galatia 3:10

Nen, Allah ane baga holal men waganogo 'bisukha, “Wene an nen inasuk wakhigimo holal waganek werek iti tha'bokhogonat akhuni inasuk holiluk nen, mothogon hagakharek dek halok, inebe dopok homan 'bisagein werek o,” iluk isikhemo, holal waganogo 'bisukha hak, it akhuni aperek nen wene Allah nen ninasuk wakhikhe wene etnogo mothogon hagasuogoluk, inetaiken iti baga hakotdiluk welageikharek meke, Allah nen homan 'bisagein weregat o.

Efesus 5:6

It akhuni Allah ane mothogon hagasu'buk meke nen, wene igi itithogon hagakharekma, Allah akla aga dageiluk weagarinabigin iti nen, it aperek nen inane we yugunat ekhe dogolik, “Weak meke itithogon hagasumo hanoat,” iluk nukhetdinagunogo.

1 Tesalonika 5:9

Allah akla aga nit ninoba 'biluk weagatninabigiluk wenakninakhikhe dek. Ninoe Etagapogot Yesus Kristus nen tilogo hanotninabuagaluk wenakninakhikhe o.

Ibrani 10:29

Iti hak, it akhuni nen Allah a'but mekeat he, inisok nen thagalogo here'isigik, Allah nen nit ninom hunisuogoluk Kristus watlageikhe iti baga, amep oba hano horinakhikhe mekeat he, yabokane inakla meanetdisigik, Allah obabut hano meke Agoreke etnogo inane sagun yogokhik, hagakho halok he, wene motok akin meke inoba 'biluk weagarinabigin o.

Ibrani 2:3

Iti hak, nit yogotak tilninabusak wene kok iti ninobakhanini here'isagun halok, weagatninabiginat o. Ebekeram he, wene at ninoe Etagapogot ebe nenat akhuni aperek yogeisasikhemo inasuk hokhukha meke nen hutukhogon yoknisasukha meke eberogonat hagatlageikhe.

Ibrani 3:18

Allah nen wenageisekhe dogolik wene hupuk yigithogon palhikhe, “An nen, Hit thet walagun, iluk abok yokhisasigi etnogo, thet walagun motok dek o,” iluk yogeisasikhe iti thani nogo? Iti it akhuni Allah ane hologo mothogon hagakhidek here'isekhe lagoukha meke emenogo apigi.

Ibrani 3:19

It iti inetaiken Allah oba hakotdigidek hagakhe lagoukha iti nen, thet wala ukusak motok erlok dek ageikhe, iluk nit yogotak hutdekhe lago o.

A'bikaka 21:8

Itithogon mekeat he, it akhuni aperek inayuk holik meke inom, inetaiken Allah oba hakotdigidek meke inom, Allah alilo meke hagakharek meke inom, akhuni inakharek meke inom, param ha'isigik, ha'isoagaluk hagakhik, hagarek meke inom, elo dek elalinat inakharek meke inom, inetaiken kaneke oba hakotdiluk dogolik, hogorakharek meke inom, inekalat egarek meke tha'bokhogonat inom, i laut hetu meke yekelek werekma, hotali al hakene obasi weak meke etaga belerang inom-inom amulok nasi motok welagarekma etoma inobolukmo la'isagein. La'isagein iti, inebe alebageik elanma hasik watlatlukmo nen, yabokane watlasugun meke itiat o,” iluk yoknekhe.