Yakobus 5:20 - ALLAH ANE WENW KET MEKE WAROGO WOKNINAKHIKHE WENE

²⁰ wene yi hinakla ebetni o. Tha nen weak hagakhe dogolik, ekaerek nen mirlokhogon nuk asi lagunem, at ageikhe nen apuke suguluk Allah oba wolok waga halok he, ebe watlasusak tak-tak mekeat tilhik, weak kogat hagakhe meke iti thagalogo degetdigik, hagasigin o iluk, werek iti hinakla nen hutdekhe dogono o.

Yakobus 5:20 ပူးပေါင်းရင်းမြစ်များ

Yohanes 5:24

“It akhuni tha nen, an nane waganhe dogolik, inetaiken an la'ani ageikhe meke etnogo oba hakotdugun halok, akhuni watlatluk lageikharek erlo thogotdisalok iniluk motok dogogun meke erlo baga arat wageikhasik werek o. Iniluk motok dogogun meke iteerek ageikhasik werek iti nen, yabokane wene inoba 'bigin dek o, iluk eberogonat yokhisigi.

Roma 11:14

An nagarlak lak nerugi ninukuloak etaga opakiat meke, Allah nen aperek tilinabuagaluk, an nen itithogon hagakhe lagei iti baga, inakla aga dageiluk ua paluagaluk hagakhe lagei.

1 Korintus 1:21

At Allah akla motok kagalek iti nen, men isikhe, “Akhuni agat oba meke nen, inekaerek inawene kagoukhogon egarek iti nen, an nebe inilu asusak erlok dek o. It aperek nen wene ebe wene yogeisilik lagunem, it akhuni agat oba meke nen apekhe dogolik, Wene iti akhuni kepu meke nen egarek hakene iliogei, iluk isi korlegat, it aperek nen, Wene iti eberogonat, iluk apagun meke halok, an nen tilinabiginat o,” iluk oba la'buk iluk ekaerek nenat isikhe.

1 Korintus 9:22

It akhuni inetaiken aban meke Kristus hasik woginabigiluk an nobabut netaiken aban meke thalek welagei. It akhuni tha'bokhogonat inobabut hagakharek tomok hagakhe lagei iti, it meke aperek tilinabigiluk itithogon hagakhe lagei o.

1 Timotius 4:16

Itithogon hagakhe dogolik, hekaerek hasik inom, it akhuni aperek yakulisekhe lagan meke inobasik inom, hobabut hebelogo dogono. Hobabut hebelogo dogolik, hakla puk ageidek, iti mekeat hagakho motok dogono. Itithogon hagakhe dogogin halok, hekaerek nen hebe tiligik, akhuni aperek hano holiogei meke inebe tilinakhik, hagasigin o.

Filemon 1:19

An Paulus itithogon nomat noba welagei, iluk tha'bokhogonat iti oko paligin meke nekaerek niki nen holal waganhi iti o. An nen, hat hano wene yakulhikhigimo hekaerek hebe hasik hano meke ite agatik welagan iti, nomat hoba 'bigima palegeke hoba werek iluk yokhisusak mekeat he, an itithogon usak dek. Hekaerek hiluat o.

Yakobus 1:15

Yabokane ninakla nen yi meke ti meke warlok weak apogorek meke iti, humi nen ineagei itaginakharek hak, ninakla aga halok, eak itago weak hagakhorek iti. Nen, weak hagakhorek meke iti horle aga halok he, eak itago ninebe watlagorek iti.

Yakobus 1:21

Iti nenat, yi weak ti weak hinekarli dek hagarik nekhethep meke iti here'isigik, weak kogat hagarik nekhe lagap meke iti here'isigik, hagakhe dogono o. Wene hano wene Allah nen hinakla ai yago 'bisikhe meke iti baga erlok tilhinabusak iti nen, hinetaiken thebekhogon at apma ukiluk, at nen wene hinakla kagaliogo meke iti waganhe dogono o.

Yakobus 5:15

It nen inetaiken Allah oba hakotdiluk, sembayan ugun iti baga, ninoe Etagapogot nen hinoba u meke iti dek asuagaluk hano hagathinakhik, hit aperek weak hagakhep meke werek halok, thagalogo degetdisigik, hagasigin o.

Yakobus 5:19

Nagarlak lak nerugi. Hinagarlak lak hinerugi meke ageikhe ebe wene here'isalok mirlokhogon nuk asi laga halok, hit aperek nen yabokane apuke suguluk Allah oba wolok wisugun iti hasik,

1 Petrus 4:8

Wene kok hakene yi. Hit-hit nakmu-hakmurogon hagakhe dogolik, ageikhe nen ageikhe weagatdugun meke thagalogo motok degetdugun iti nen, hit-hit hinagarlak lak hinerugi hinom nakmu-hakmurogo motok hagakhe dogono.

A'bikaka 20:6

It akhuni alebageik watlagoukha meke yabokane warek motok dogoagaluk ukum inoba 'biluk inasumo watlasugun. Mekeat he, it aperek alebageik inapuke inilugurinabiluk nen, inebe Allah hasik 'bisagein meke iti anek he, inakla arleken motok akhagun o. It iti yabokane watlageidek dogolik, inebe Allah inom, Kristus inom, ipisak iteerek atluk, o mo dageigik, usigik, hagakhe korlek, 1.000 tahun oba, it Kristus inom akhuni inapma 'bisalok hagasik dogogun hisigi.