Yakobus 4:11 - ALLAH ANE WENW KET MEKE WAROGO WOKNINAKHIKHE WENE

¹¹ Nagarlak lak nerugi. Hit-hit hinabok pal-pal ekhe dogosak dek o. Hinagarlak lak hinerugi aperek inabok palhik, wene inoba 'bigik, hagakhep halok he, wene Allah nen ninasuk wakhikhe wene etnogoat weak iluk u hagat, ekhe lagap iti o. Nen, wene iti weak iluk ekhe lagap halok, wene iti hinasuk hologo hagakhe lagap 'buk. Hit nen he, “Wene iti weak. Ebe hano itithogon usak meke isikhemo,” iluk u hak ekhe lagap iti o.

Yakobus 4:11 ပူးပေါင်းရင်းမြစ်များ

Lukas 6:37

Itithogon yogeisasikhesik nen, wene ageikhe men yogeisasikhe, “Allah nen wene hinoba 'binogo iluk, hit nen akhuni aperek wene inoba 'bugup o. Allah nen wene hinoba 'biluk nen, weagathinabinogo iluk, hit nen akhuni aperek wene inoba 'biluk nen, weagarinakhup o. Halok he, hit nen weak hagakhe lagap meke Allah nen thagalogo degetduagaluk, akhuni nen weagathinabiogei meke hit nen thagalogo degetdekhe dogono o.

Roma 2:1

Iti halok he, hit nagarlak lak nerugi yi. Wene it aperek anek inoba 'bekhe dogolik, hit hinekaerek hinoba korasak erlok dek o. Itithogon wene it aperek inoba 'bekhe dogoligat, hit nen it hinom ipisak tak-tagat hagakhe lagap yoma re! Hinekaerek nen wene hinoba motok 'bakhekhe lagap o.

Roma 2:13

Wene Allah nen ninasuk wakhikhe wene etnogo inilu iti baga, wene inoba meke korogo wokhekherek 'buk. Wene ebe ninasuk wakhikhe meke mothogon hagakharek meke halok, wene inoba meke korogo wokhekherek o.

Roma 7:7

Iti halok he, nit nen nikithogon ugun. Wene Allah nen ninasuk wakhikhe wene iti weak usak nogo? Motok dek o. Meke re, wene itithogon ninasuk wakhidek dogolepma re, weak hagakharek iti nikithogon nokodegat dogole o. Allah nen wene ninasuk wakhikhe iti wakhe dogolik, “Akhuni inameke, Warlok e, iluk hinakla apugup o,” iluk igidek dogolepma re, akhuni inameke meke, Warlok e, apegerek iti nokodegat dogole o.

1 Korintus 4:5

Iti nen he, wene akhuni inoba 'bigik kokhik hagasigin itinem aban asi ageidek werek korlek, hit wene inoba 'bigik kokhik hagasusak motok dek o. At ninoe Etagapogot ebe witluk nen, hibakone limago hagariogei meke thelekmatdigik, itithogon hagasugun iluk apalok inakla thebelek werek meke iti 'bualogo 'bigik, hagasisigin iti therogo dogosak o. Itithogon 'bualogo 'bisinem, Allah nen hano hagakha meke inebe tomok hogorinabusak mekeat hogorinabigin o.

2 Korintus 12:20

An yabokane hinoba wisigin iti witluk nen, an nen, “It inobabut hano werekma ligin,” iluk apekhe lagei hak, dek. Weak werekma 'bithisa ageik, nen, hit nen, “At Paulus obabut hano,” iluk egethep hak, dek. Weak dogolik 'bithisa ageik, hagasunogo iluk, nelabut hiriogo. Hit-hit hinom wene yakhik, ua palhik, hinakla aga dageigik, hinekaerek hasik anek hagakhik, inabok weak thelekma palhik, limago palhik, hinekaerek nen hogorakhigik, yugunat-yaganat hagakhik, hagakhunem an wisusak iti, nayuk.

Efesus 4:31

Inane puk weak igik, inakla aga hetperigik, inakla aga dageigik, wene oko-oko yakhik, inekalat inabok weak palhik, egarek meke iti here'isekhe dogolik, weagarinakharek meke inom tha'bokhogonat here'isekhe dogono o.

1 Timotius 3:11

Iti hagat he, it iti inagugi inalaga isonhogo hagakhe dogolik inahusupi weak ilik nekharek dek meke halok, weak hagasuagaluk inakla kagalhunem inetaiken inekaerek nen therogo welageikharek meke halok, inobabut mothogon hagakharek meke halok, inobabut iti hakene halok, inaguni yomageisegarek meke dogoagaluk meldisausak o.

2 Timotius 3:3

akhuni inebe inakmurogo welageidek ina'irat welageik, it aperek inom korlo hagatdiluk thagalogo here'isalok dogou ina'it welageik, inabok weak palhik, inobabut akla aga apik awulagamhogon hagakhik, hano meke hagasu ina'it dogolik,

Titus 2:3

Iti hagat, it humi inarluetek meke iti, akhuni Allah apma dogolik, inobabut mothogon hagakharek hak, hagakhe dogolik, akhuni aperek nen inabok weak palhidegat, inougi koktek inapma welageikharek hak, i anggur eken apusu apma negen dogolik, inoba la'buk nekarek itithogon nikidegat dogolik, it nen it aperek hanorogon hagakhe dogosak hasik, yakulisekhe dogoagaluk inasuk wakhe dogonoat o.

Yakobus 1:16

Nagarlak lak nerugi. Hinebe nakmu o. Hinekaerek nen nukhetdakhaunogo iluk yokhisigi iti o.

Yakobus 1:19

Nagarlak lak nerugi.Hinebe nakmu lak o. Wene yi hinakla eberek dogono o. Hinebe tomok wene hinasuk ibat ibat holiluk nen, hinane baga nen erogat igik, hinakla aga dagei agunem hinetaiken thebelogo dogoluk nen erogat igik, hagakhe dogono o.

Yakobus 1:25

Nit akhuni herle warek negen werekma, wene hano wene Allah nen ninasuk warogo 'bogokhogon yoknisekherek iti baga hialninakherek. Halok he, tha nen wene iti asuk anek holiluk nen, obarlikmatdekherek 'buk. Hutukhogon hutdiluk, oba eberek motok dogolik, wene iti mothogon hagakhe halok, yi meke ti meke hagakhunem, Allah nen akla arlekenhogon yomakhekhe dogogin o.

Yakobus 2:8

Meke re, hit nen mothogon hagakhe dogosak meke yi. Allah nen ninasuk wakhe dogolik wene kok, men isikhe, “Hit hinekaerek hinebe hinakmurogon welagathep iti hak, it akhuni aperek hinom welagap meke iti hinakmurogon dogono,” iluk isikhemo, holal waganhukha meke werek iti tak-tagat hagakhe dogogun halok, mothogon hano hagakhe dogogun o.

Yakobus 5:10

Nagarlak lak nerugi. Haganeat it ap Allah ane yogeisekhe lagoukha meke emenogo nen, “Ninopase Etagapogot nen ekhe mekeat yokhisekhe lago,” iluk yogeisugunem, it akhuni aperek nen inebe weagarinakhe korlegat, inakla puk ageidek inobakhanini hapugutdiluk welagoukha meke emenogo inobabut waganini o!

Yakobus 5:7

Iti nenat, nagarlak lak nerugi. Ninoe Etagapogot ebe aban wageidek werek korlek, hinakla puk ageidek hinobakhanini hapugutdiluk therogo dogono o. Akhuni nen wen waganekma hipiri ai ya'iluk therogo welageikharek iti hinakla hutdini o. Itithogon ai ya'iluk werek korlek miso o mo dageisi korlek nikik, usekhe korlek nikik, eran-alep nasi korlek inakla puk ageidegat, “Yabokane isarlo agunem ebe kok meke itakhagein,” iluk inobakhanini hapugutdiluk therogo welageikharek iti hak,

Yakobus 5:9

Nagarlak lak nerugi. Itithogon therogo dogolik, Allah nen wene hinoba 'binogo iluk, hit-hit ekhe dogolik, “Nagarlak iti hagariogo na'it o,” iluk inabok palhidek dogono o. At Allah nenat wene akhuni inoba 'bigik, kokhik, hagasigin iti holagapema horok asi aga iti 'bikhani!

1 Petrus 2:1

Iti nen, hit weak hagakhe lagap meke iti motok here'isalok dogono o. Akhuni aperek nukhetdisigik, hinetaiken pere hagakhik, ua palhik, hinekalat nen akhuni aperek inabok weak palhik, hagakhe lagap iti, here'isekhe dogono o.