Yakobus 3:17 - ALLAH ANE WENW KET MEKE WAROGO WOKNINAKHIKHE WENE

¹⁷ Itithogon mekeat he, Allah nen akhuni inakla kagalhunem, inobabut kok hagakharek he, weak ageikhe hagakhidek inilaga isonhogo welageikharek iti. Itithogon dogolik, akhuni inom hanorogo welageik, inobabut enago welageik, inane hologo hagakhik, akhuni inakmurogon motok welageik, o eken hano meke ikherek iti hak, hanorogon hagakhik, akhuni aperek inelokhomake 'bisigik, aperek inoporlike 'bisigik, hagakhidegat inetaiken pere welageidegat, hanorogo hagakharek iti.

Yakobus 3:17 ပူးပေါင်းရင်းမြစ်များ

Matius 23:28

Iti hakene, akhuni nen hit hinoado itikmanke yi 'bithisugunem hano apiliogei mekeat he, hinetaiken pere dogolik, hinakla yi weak ti weak hagakhethep iti meke motok kerlek welagap iti nen, eiye! Allah weagathinabigin o!

Matius 5:8

Nen, akhuni inetaiken opakiat karelek motok welageikharek meke iti, yabokane Allah ebe ineleken hugun iti nen, inakla arleken akhekhe dogosagat o.

Matius 5:9

Nen, akhuni inom weak werekma, it aperek nen dapulogo 'bisegarek meke iti, at Allah nen he, Yi an na'buriat o, iluk yogeisagein iti nen, inakla arleken akhekhe dogosagat o.

Lukas 6:36

Halok he, ninopase akmurinakherek hak, hit nen akhuni hinakmurinakhe dogono o,” iluk yogeisasikhe.

Yohanes 1:14

Ebe Wene etnogo abat ageikhesik ninomat welagagu. Ninomat dogolik, at ebe iti Allah a'but irlagapi itago etnogo, hogorakharek meke ninileken hasugu o. At obabut hano nen, hanorogo hagatninakhik, wene ebe wene yoknisigik, hagakho motok werekma ninileken hasugu.

Yohanes 1:47

Itithogon yogokhikhemo, at Natanael Yesus oba wisigiluk wagunem, at Yesus ileken lakhalok nen, at abok men yogeisasikhe, “Ap ithi ebe Israel meke eberogonat meke. Ane pere ekherek motok dek meke ithi lakhani o!” iluk yogeisasikhemo,

La'isasikhe 9:36

O Yope etoma, he ageikhe etaga Tabita welageikhe. (Akhuni Yunani inane baga etaga Dorkas u hak, wam rusa etaga meke thalhukha.) At he iti, ninoe Etagapogot Yesus ane waganhikhesik, yi meke ti meke hano hagakhe dogolik, akhuni inameke dek meke yomageisekho motok welageikhe.

Roma 12:18

Akhuni tha'bokhogonat hinom hano dapukhogon dogouogoluk, hit hinobabut hano hagasusak meke mothogonat hagakhe dogono o.

Roma 12:9

Hit hinetaiken oba nenat akhuni hinakmurogo dogono o. Weak meke hina'it motok dogolik, hano meke hiniki a'bethogon hago dogono o.

Roma 15:14

Nagarlak lak nerugi. Hit hinobabut hano motok dogolik, yi wene ti wene hinilu motogatma, hit-hit hinasuk wat-wat usak erlok welagap iti, an nilu o.

1 Korintus 12:8

At Allah Agoreke nen, at ageikhe wene kagoukhogon ekhe dogoagaluk wogokherek. Nen, at Agoreke iti nenat, at ageikhe yi wene ti wene ilu motok atluk yogeisoagaluk wogokheregat.

2 Korintus 10:1

An Paulus Kristus obabut enago hano etnogo obabut waganogo, nekaerek nen wene ageikhe hinasuk wasik. It aperek nen he, “At ebe horokhogon ninom dogolik, obabut liokhogon wene yoknisekherek. Meke re, ebe walegat dogolik, obabut ayuk dek obatnerogon yoknisekherek,” iluk egarek meke etnogo yabokane hinoba witluk nen nobabut nayuk dek dogolik nane obatnerogon yokhisaunogo iluk, hutdubageik iluk nane liokhogon yokhisigi. It iti nen he, “Paulus lak iti, akhuni inobabut inikhogat dogolik inobabut waganogo hagariogei,” iluk ninabok weak paliogei meke iti, nobabut nayuk dek nane obatnerogon wenageisasigin iluk wene munini ebekhe lagei.

2 Korintus 6:6

Itithogon hekhe dogoligat, ninobabut weak hagakhidek karelek dogolik, hano wene ninilu welageik, ninobakhanini hapugutdiluk welageik, ninobabut enago welageik, hagakhe lago. At Allah Agoreke ninakla dogolik akhuni inebe eberogonat ninakmurogon welago.

2 Korintus 7:11

At Allah akla warlok apekherek oba hinakla weak atluk nen, “Napik nen weak hagakhima,” iluk hinobabut hebelatluk nen, hano meke obatnerogo hagakhik, wene hinoba dek mothogon hagakhik, hinakla aga dageigik, hinayuk ageik, “Paulus ninom abuk atlo o,” iluk noba ebekhik, hinakla agaken thok-thok hagakhik, at weak hagakhikhe werek iti ikirluk oba ula'isigik, hagakhep iti lakhani! Itithogon hagakhe dogolik hit weak agekhe hagakhidek wene hinoba meke korogo motok la'isegep o.

2 Korintus 9:10

At Allah nen it ai yakharek meke ai wogeisigik, hipiri ebe noagaluk wogeisigik, hagakherek iti. Itithogonat, at nenat, ai yasuagaluk palisegarek hak, hinobabut it aperek yomageisekhe dogosak iti meke wokhisigik, nen ai yakhunem eken kokhogon isu hak, it aperek hinakmu nen yomageisugunem kogotdigik, hagasigin o.

Efesus 5:9

O erlo hano meke nen eken hano mekeat ikherek hak, akhuni o lia baga dogolik yi meke ti meke hanorogo mothogonat inetaiken oba nen eberogonat hagakharek iti o.

Filipi 1:11

Yi meke ti meke ai yakhunem erlo kok atluk eken ikherek hak, at Yesus Kristus nen hagathinakhe dogogin oba, hinobabut mothogon hagakho motok aperek inomat obarluk hagakhe dogogun halok, at ebe wagunem, akhuni aperek nen Allah heagei wakhik, hogorakhik, hagasugun o.

Filipi 4:8

Nagarlak lak nerugi. Wene ilugun oba yi ageikhe yokhisak. Hinakla ebekhe dogolik, hanorogon hagakhik, hogorinabusak meke hagakhik, hagariogei meke oba ebekhe dogono. Iti ebe re, wene eberogonat meke oba ebekhik, hogorasusak meke oba ebekhik, mothogon hagakharek meke oba ebekhik, weak meke thogotdiluk hano anek hagakharek meke oba ebekhik, inobabut heanerogon hagakharek meke oba ebekhik, inoba la'buk usak meke oba ebekhik, ebekho motogat dogono.

Kolose 1:10

Itithogon hinilu atluk nen, ninoe Etagapogot akla hanorogo, at warlok apekherek meke mothogon anek hagakhe dogosagat. Yi meke ti meke ai yakhunem erlo kok atluk nen eken hano ikherek hak, hit Allah obabut hinilu aga dogolik, yi meke ti meke hano meke hagakhe dogosak iti.

1 Tesalonika 2:7

Itithogon mekeat, inagosa lak nen ineagei alelogo woginabiluk nen hagasik welageikharek hak, nit hit ninom dogolik alelogo hakhisik dogolik hagakhe lagagu iti o.

1 Timotius 5:21

Wene yokhigi meke iti, hat nen he, akhuni aperek helokhoma 'bisigik, aperek hoporlike 'bisigik, hagakhidek inom tak-tagat yogeisekhe dogono, iluk Allah inom, Kristus Yesus inom, inil obaat, malaikat Allah nen wenageinakhikhesik yoko usa'isa agarek meke inom, inil obaat yokhigi iti o.

2 Timotius 2:24

At tha nen ninoe Etagapogot atuaneke hagakhe dogolik, itithogon hagasusak dek. Akhuni tha'bokhogonat inobabut liokhogon hanorogon inom dogosak o. Obabut obakhanini hapugutdiluk dogolik, akhuni wene hanorogon yakulisekhe dogosak o.

Titus 1:15

Allah nen akhuni aperek at hasik 'bakhalok hanorinakhe meke halok, it inobasik yi meke ti meke hano anek 'bisalok werek o. Itithogonat meke re, it aperek inetaiken Allah oba hakotdigidek dogolik, inakla apiliogei meke inom, eberiogei meke inom, weagat werek iti nen, it inobasik yi meke ti meke hano dek. Weak anek werek o.

Titus 3:2

It Allah a'buri iti nen, akhuni aperek inabok weak palhidegat, inane puk weak wenageisigidegat, it aperek nen inobabut ekagat hutdisoagaluk akhuni tha'bokhogonat inobasik inobabut enago hanorogonat hagakhe dogoagaluk inasuk wakhe dogonoat.

Ibrani 12:11

Ninasuk wakhe korlek etaat ninakla hano agarek dek. Ninakla weak agarek mekeat he, yabokane ninasuk wakharek iti baga, ninasuk warek welagorek meke, yi meke ti meke eken ikherek iti hak, ninobabut hano enago dogolik mothogon anek hagakhe dogogun iti.

Ibrani 12:14

Hit hinebe karelogo Allah meke 'bisigidek dogogun halok he, at ebe hinileken hugun motok dek iti nen,akhuni tha'bokhogonat hinom hano dapulik dogolik, hinebe at hasik 'bisalok weak hagakhidek hano karelek motok dogouogoluk hinobatnerogon hagakhe dogono o.

Yakobus 1:17

Ninopase Allah pogot oba meke etnogo nenat yi meke ti meke hano meke woknisigik, hano motok meke woknisigik, usaknisa agarek iti. At nenat pogot obake lia welagarek meke iti winametdisikhesik nen, at ebe ninat hagatlageik, abel dagakhogon mum ageik, lia ageik, hagakherek dek.

Yakobus 1:5

Meke re, at Allah obabut hano nen akhuni tha'bokhogonat akmu dogolik wenageisigidek wogeisekherek iti nen, hit aperek hinakla kagalek dek halok, at kino yogosumo hinakla kagaliginat o.

Yakobus 2:13

Hit nen he, akhuni hinakmurinakhidek halok he, Allah nen akmuthinakhidek, wene hinoba 'biginat o. Meke re, akhuni aperek inakmurogon welageikharek meke iti Allah nen initema waganhe dogolik wene inoba 'bisagein dek o.

Yakobus 2:4

hit hinobabut motok weak hagakhe dogolik, hit-hit, “At iti kok. Nen, at iti erlok dek,” iluk penago 'bisekhe lagap iti.

Yakobus 3:15

Itithogon hagakharek iti Allah nen inakla kagalhunem hagakharek 'buk. Erlo at Iblis nenat inakla kagalhunem akhuni agat oba meke inobabut inikhogat dogolik, warlok apegarek meke hagakharek o.

Yakobus 4:8

Hit Allah oba dopokhogon welagap halok he, at meneke hit hinoba dopokhogon wisiginat o. Hit weak hagakhe lagap meke iti, hiniki bagake horogo here'isekhe dogono o. Hinetaiken pere meke yi re! Hinakla weak meke horogo la'isekhe dogono o.

1 Petrus 1:22

Ebe wene iti hinasuk holhe dogolik, hinakla nen weak meke horogo la'isalok, hinagarlak lak hinerugi Allah a'buri meke aperek eberogonat hinakmurogon hagakhe lagap iti, hinom hunik motok dogolik nakmu-hakmurogon hagakhe dogono.

1 Petrus 2:1

Iti nen, hit weak hagakhe lagap meke iti motok here'isalok dogono o. Akhuni aperek nukhetdisigik, hinetaiken pere hagakhik, ua palhik, hinekalat nen akhuni aperek inabok weak palhik, hagakhe lagap iti, here'isekhe dogono o.

1 Petrus 2:18

Hit aperek, hinougi inatuaneke welagap meke iti, it inapma dogolik, inobabut hano enago meke inobasik anek hinayukhogon inane hologo hagakhe dogosak 'buk. At he, inobabut korlo meke inomat hinayukhogon inane hologo hagakhe dogono.

1 Yohanes 3:18

Halok he, na'buri o. Nit nen akhuni aperek ninakmurinakhidek dogoligat he, ninape baga anek he, “Ninakmurinakhe dogouok o,” iluk ekhe dogosak erlok dek o. At he, inebe ninakmurinabiluk, niniki baga nen eberogonat yomageisekhe dogouok o.

1 Yohanes 3:3

Nit ninakla nen, “Itithogon hagatlasugun,” iluk oba eberek welagorek meke ninebe tomok nen, at Kristus ekaerek ebe karelek welagarek iti hak, nit itithogonat karelekhe dogosak o.