Yakobus 1:10 - ALLAH ANE WENW KET MEKE WAROGO WOKNINAKHIKHE WENE

^10-11 Meke re, mo aninirogon yakhe dogolik, o eka tha'bet ageik, eken lologo usalok elokhoken weak ageik, hagatlagarek hak, itithogonat, it koktek inameke doalegat meke iti yi meke ti meke aban hagakho werekma inebe dek asugun meke werek iti nen he, hit aperek hinameke doalegat hinebe kogat dogolik, o eken lologo usekherek iti hak, “An nameke doalegat yi dek asiginat o. Allah nen netaga thebelogo 'banhemo welagei,” iluk, hinakla arleken akhausagat o.

Yakobus 1:10 ပူးပေါင်းရင်းမြစ်များ

Matius 5:3

“Akhuni inakla nen, An he, Allah il oba, ebe meke hasik nerlageik welagei, iluk apegarek meke iti, kok pogot oba meke apma 'bisekherekma etoma iteerek irat iti nen, inakla arleken akhekhe dogosagat o.

Matius 6:30

Oka herleka o limoke welagarek iti, yogotak hak hano welagarethek nen, hubuluk hak hetumo hundisegarek mekeat he, Allah nen inasu isu hak hano meke hagarogo 'bisekherek iti hak, hinebe hasik, hanorogo ikhinabigin dek nogo? Ikhinabiginat o. Hinetaiken Allah oba hakotdu'buk yi re!

1 Korintus 7:31

Nen,it aperek agat oba yi meke ti meke horlegarek meke iti, horligidek meke negen dogoak. Itithogon igi iti, yi meke ti meke agat oba welagarek meke tha'bokhogonat arat dek arigoo iti nen igi o.

Filipi 3:8

Itithogon hutdekhe lagei iti anek 'buk. Noe Etagapogot Yesus Kristus nilu agagi iti hano motogat o. Yi meke ti meke ninat meke hagakhe lagagi iti, weat alomarogo hagakhe lagagimo iluk, hutdekhe lageiat o. At ebe horlalok nen, nipisak hunik motok dogouogoluk, yabu aleke karelogo ulakharek hak, yi meke ti meke alep hagakhe lagagi meke iti, “Weat meke,” iluk here'isasigi iti o. Wene Allah nen ninasuk wakhikhe wene iti baga, nekaerek nen mot hagakhe lagei 'buk. It akhuni aperek inetaiken Kristus oba hakotdisinem, wene inoba meke korogo wokhalok yabokane Allah inom hunogo 'bisekherek hak, an itithogonat netaiken at oba hakotdisigimo, wene noba welageikhe meke korogo wokhasikhe iti o.

1 Timotius 6:17

Yi meke ti meke tha'bokhogonat dek asigin mekeat he, it ap koktek inetaga werek meke iti inakla nen hogorakeke dogolik, “Nameke agat oba meke yoma motok doalegat yi nen nebe hano dogogin,” iluk, apekhe dogunogo. At he, at Allah yi meke ti meke tha'bokhogonat ninakla arlekenhogon horlekhe dogoagaluk kokhogon woknisekherek etnogo nenat hanotninabigin iluk hutdekhe dogoak nen inasuk wakhe dogono.

Yakobus 4:14

Hubuluke nit wene ninoba itithogon hagatlasigin, iluk hinokodegat dogolik ekhe lagap iti re! Nit ninebe iti nena meke hakene welagorek nogo. O isa il opaki welagarethek nen ibat dek agarek iti hak, ninebe itithogonat welagorek iti o.

1 Petrus 1:24

Iti, Allah ane men iluk holal waganek werek hak, “Akhuni tha'bokhogonat he, inebe oka hakeneat o. Hano iluk hogorinakharek iti, o eken hogorakharek iti hak hogorinakharek iti. Eka puk ageik, eken lologo usasigik, hagakherek iti.

1 Yohanes 2:17

Akhuni agat oba meke inobabut inikhok hagakharek iti inom, yi meke ti meke warlok iluk hagakharek iti inom, dek arik wiriogo mekeat he, akhuni Allah akla warlok apekherek meke hagakharek meke iti anek he, iniluk motok dogogun o.