Roma 8:30 - ALLAH ANE WENW KET MEKE WAROGO WOKNINAKHIKHE WENE

³⁰ Alebat Allah nen ninebe wenakninakhikhe meke, ninayoko 'bisikhe. Itithogon ninayoko 'bisikhe meke, wene ninoba meke korogo wokhasikhesik nen, yabokane ninom ninapuke hunogo 'binanhikhemo welago. Ninebe itithogon hunogo 'binanhikhe meke at ebe hogorakho motok welageikharek meke iti hakene asuagaluk wokninakhikhe.

Roma 8:30 ပူးပေါင်းရင်းမြစ်များ

Yohanes 17:22

Nit ninebe opakiat welagorek iti hak, it itithogonat inebe opakiat dogoagaluk, an nebe hat nen kogotdanhigin hak, an nen it arat kogotdisigi o.

Yohanes 17:24

Allah nopase. Hat nen agat aban walhigidek dogolik, an nebe hetaiken hunik welagagin iti nen, hogotnakhe dogoagaluk kogotdanhigin etnogo, it hat nen haganeat woknikhigin meke emenogo inileken neoagaluk, o an dogoginmo etoma, it ninomat dogosak warlok o.

Yohanes 5:24

“It akhuni tha nen, an nane waganhe dogolik, inetaiken an la'ani ageikhe meke etnogo oba hakotdugun halok, akhuni watlatluk lageikharek erlo thogotdisalok iniluk motok dogogun meke erlo baga arat wageikhasik werek o. Iniluk motok dogogun meke iteerek ageikhasik werek iti nen, yabokane wene inoba 'bigin dek o, iluk eberogonat yokhisigi.

Roma 1:6

Akhuni yi akhuni ti akhuni inukuloak etaga tomok iti, hit akhuni o Roma meke hinom hasigat o. Hit hinebe Yesus Kristus agarumi asuagaluk hinayoko 'bisikheat o.

Roma 11:29

At Allah obabut hano nen yi meke ti meke woknisigik, ninebe wenakninakhik, hagatluk nen, yabokane ane ninat ageikhe ekherek dek.

Roma 8:1

Yogotak nit Kristus Yesus ninom hunik welago meke Allah nen wene ninoba 'biluk weagatninabigin dek o.

Roma 8:21

Itithogon werek mekeat he, yabokane Allah nen hanotdigin oba weregat o. Itinem nen, akhuni herle warek weak werekma, herle hisalogo tilinakharek hak, pogot agat yi meke ti meke tha'bokhogonat alomatdekherek meke nen obatne baga hagasik werekma, Allah nen herle hisalogo tilogo 'bisagein o. Itithogon 'bisagein iti, at a'buri inebe ninat hagarogo 'bisugunem hogorinabugun iti hak, pogot agat yi meke ti meke itithogonat ninat hagarogo 'bisugunem hogorasugunat o.

Roma 8:28

At Allah akla apalok nit ninayoko 'bisikhemo, nit at ebe ninakmu welago meke, at ninom dogolik, yi meke ti meke hano asuagaluk, hagatnisiliogo nit ninilu.

1 Korintus 1:9

At Allah nen a'but ninoe Etagapogot Yesus Kristus hinom hunik dogobageik iluk hinayoko 'bisikhe iti. Itithogon, at obabut hupulik meke nen hinayoko 'bisikhe iti nen, ebeat asigin iluk hinetaiken wene munini tirliphogon dogosak o.

1 Korintus 2:7

Wene iti Allah akla kagalek wene limago welageikhe meke pakhogon yogeisogorek. Wene iti akhuni agat oba meke inokodek mekeat he, ebekeram Allah nen yi meke ti meke winametdigidek dogolik, at nenat nit hanotninakhunem ninakla arleken akoagaluk akla apasikhe meke limagoat welageikhe.

1 Korintus 6:11

Alebageik hit aperek itithogon hagakhe lagagip mekeat he, yogotak Allah nen hinakla hano thobalogo 'binageisikhesik, hinebe at ekaerek hasik 'bakhasikhemo welagap o. Wene hinoba welageikhe meke iti, ninopase Allah Agoreke nen ninoe Etagapogot Yesus Kristus etaga baga, korogo wokhasikhesik Allah hinom dapulogo 'binageisikhemo welagap o.

2 Korintus 4:17

Nit yogotak, yi aik ti aik hagatninabiogei iti, elanma hasik herlekha'bugat negen o. Meke re, itithogonat hagatninabiogei iti baga, yabokane hogorakharek meke ikhok motok dogogin meke motok kogat ite asugun o.

Galatia 1:15

Itithogon mekeat he, at Allah obabut hano etnogo nen haganeat nagosa akla nen aban itaknakhidek werek korlegat, nebe wenaknakhikhe.

Galatia 1:6

At Allah nen, hit Kristus obabut hano meke etnogo hinom hunik dogobageik iluk hinayoko 'bisikhe mekeat he, thogotdisalok ibat nomokhogon hano wene thalek ninat meke oba ebesi laga lagap iti, an nayuk.

Galatia 5:8

Iti ninoe Etagapogot hinayoko 'bisikhe meke etnogo nen, “Inakla itithogon kagalino,” iluk ekhemo nen hinakla kagaliogei 'buk. Dek o.

Efesus 1:11

At Allah nen, “Yigithogon hagatlasuak, tigithogon hagatlasuak,” iluk akla apekherek tak-tagat yi meke ti meke tha'bokhogonat hagakhunem hagatlagarek iti nen, “It inebe an nekaerek na'buri asuak,” iluk wenago 'binanhikhemo, iteerek agagu iti o.

Efesus 1:5

At Allah ninebe akmu nen, ekaerek akla nenat, “Yesus Kristus nen, it woginakhunem an na'buri asuak,” iluk, haganeat nen ninebe wenago wokninakhikhe iti o.

Efesus 2:6

Ninilugutdinanhikhemo, nit Kristus Yesus ninom hunik werekma, yabokane at ninom pogot oba kok dogolik it aperek ninapma hagasik dogoagaluk ninom meldinanhikhe iti.

Efesus 3:11

Erloma, at Allah nen yigithogon hagatninabigiluk akla apasikhe meke iti, at ninoe Etagapogot Kristus Yesus nen hagasuagaluk la'i ageikhemo, ebe hagakhikhe iti o.

Efesus 4:4

Allah nen hinayoko 'bekhe dogolik, “An nen hanothinabigin o,” iluk, abok opakiat meke yokhisasikhe hak, at ebe opakiat meke hinom hunikhik, Agoreke opakiat meke waganhik, hagakhigip iti o.

Kolose 3:4

Ebekho werekma, at Kristus ninebe yabokane niniluk motok dogoagaluk hagatninakherek meke etnogo thelegat wagunem, hit at hinomat thelekma atlukmo hogothinabugun iti o.

2 Timotius 2:11

Wene men iluk egarek yi eberogonat o, Nit at ninom watlago meke halok, at ninom niniluk motok dogogunat o.

Ibrani 9:15

Iti halok he, wene warogo alebageik wokninakhikhe meke iti baga dogolik, nit ninasuk warek dek weak hagakhe lagagu iti baga ninebe herle warek hakene welagagu meke. Itithogon werekma, at Allah nen Kristus watlageikhe iti baga herle hialninakhikhesik, nit at nen wanisasikhe meke ninom hundiluk, hano ikhok motok dogogin meke woknisagaluk, wene ket meke warogo wokninabiluk, Kristus ebe turlem heisogo meldisikhe.

1 Petrus 2:9

Meke re, hit anek he, “At Allah nen hano hagatninabiogo,” iluk abok yogeisilik loagaluk, hinebe o mummo werekma, at ebe elalinat lia motok welagarek oba wisuagaluk hinayoko 'bisikhesik, hti at a'buri asuagaluk wenakhinakhik, at ebe iteerek koktek dogoagaluk meldinagagik, hinukuloak etaga at ekaerek ukuloak etaga meke thalogo 'binagagik, “Nekaerek na'buri,” iluk hinebe wokhinakhik, hagakhikhe iti.

1 Petrus 3:9

Akhuni aperek nen hit weak hagathinakhunem, hit nen oko weagarinakhup o. Nen, inane sagun weak yokhisugunem, hit nen oko hinane sagun yogeisugubat o. Oko re, Allah nen inebe hanorinabuagaluk, ayoko 'bekhe dogono. Yabokane at nen hano meke wokhisagaluk hinayoko 'bisikhe iti nen, hit nen oko hano meke wogeisekhe dogono.

1 Petrus 5:10

Werekma, at Allah ebe hogorakho motok dogogun iti hak, hit Kristus hinom hunik werekma hinomat hogothinakho dogoagaluk hinayoko 'bisikhemo, yogotak ya herlekha'bugat anek hinoba yi aik ti aik hekhe dogoluk, yabokane, at obabut hano motok etnogo nen, hinetaiken aban meke thirliphogon hagathinakhik, hinetaiken horlethinakhik, hinobatnethinakhik, hapuguthinakhik, hagasigin o.

2 Petrus 1:10

Iti nen, nagarlak lak nerugi. Hinebe Allah nen wenakhinakhikhesik hinayoko 'bisikhe iti, eberogonat hagatlasuagaluk, hit nen hinobatnerogo hagakhe dogono. Itithogon hagakhe dogogun halok, hinetaiken Allah baga hakotdiluk welagap meke here'isalok dukhugun dek o.

A'bikaka 17:14

Itithogon iteerek 'biluk, Domba Eak etnogo wim inom yabuogoluk hagasugun mekeat he, at Domba Eak ebe akhuni koktek meke inom, motok inetagapogot meke inom, tha'bokhogonat inoe etagapogot siakthek aratma re, a'buri wenageinabiluk inayoko 'bisekhemo inobabut at hasik hupukhogon hagakharek meke emenogo, at werekmake atluk, inom nen, at helo yeke hakene etnogo agarumi inom inobatne degetdisagun o,” iluk yoknekhe.

A'bikaka 19:9

Itithogon isinem holhirikmo nen, at malaikat etnogo nen men yoknekhe, “It akhuni Domba Eak age negen ikhekhe dogolik, pesta isago nasuagaluk inayoko 'bega meke inakla arleken hakhoak o, iluk holal waganin o,” iluk yoknekhesik, yabokane yoknekhe dogolik, “Wene yi re, eberogonat Allah nen ekhe meke o,” iluk yoknekhe.