Roma 4:6 - ALLAH ANE WENW KET MEKE WAROGO WOKNINAKHIKHE WENE

⁶ At Allah nen itithogon hagarinakherek ilu, at Daud nen men isikhe, “Akhuni nen, Allah akla hanorogo ageikhe hagakhidekmaat nen, wene inoba meke korogo wokhalok, inom inapuke hunogo 'bisekherek, iluk, inakla arleken akhoak o,” iluk isikhesik holal men waganogo 'bisikhe,

Roma 4:6 ပူးပေါင်းရင်းမြစ်များ

Matius 25:19

Itithogon agatma thaldisikhesikmo inoe etnogo welageikhesik nen yabokane wageikhesik, Uang wogeisasigi emenogo it nen yabokane meren thabukha iluk, waisasikhemo wagoukhama,

Roma 1:17

Allah nen men isikhemo holal waganogo 'bekhe dogolik, “Akhuni inetaiken an noba hakotdisinem nen, an nen wene inoba meke korogo wokhalok yabokane inapuke an ninom hunetlatluk iniluk motok dogogun o,” iluk isikhemo holal waganogo 'bisukha hagat, Allah ninom yabokane ninapukhe itithogon hunetlasusak, iluk, hano wene iti baga thelekmatdisikhe. Allah ninom yabokane ninapuke hunetlasusak wene iti ebe re, ninat ageikhe hagasugun oba nen 'buk. Ninetaiken at oba hakotdiluk erlo baga nen piokhogon hurli ekapul oba dogogun iti baga, Allah ninom yabokane ninapuke hunetlatluk dogogun o.

Roma 3:27

Itithogon hagatninakherek halok he, ninekaerek nen hogorakhekhe dogosak a? Hogorakhausak motok dek aga o. Nikithogon nen hogorakhausak dek aga? nit ninekaerek nen wene Allah nen ninasuk wakhikhe wene mothogon hagarekhe lago nen ninapuke hunogo 'binanhikhe a? Dek o. Ninetaiken at oba hakotdisinem, at nenat hunogo 'binanherek iti nen, hogorakhausak erlok dek.

Roma 4:11

Oado aperlagap meke itithogon aban palek dek dogolik etaiken Allah oba hakotdisikhemo re, at Allah nen, “Wene hoba meke korogo wokhigirik, hapuke nipisak hunogo 'bagagi,” iluk yogokhikhe. Itithogon hagakhikhemo yogokhikhe iti, inetaiken ekerlogo dogoagaluk, “Hoado aperlagap meke palan,” iluk yogokhikhemo nen palikhikhemo re, ekagat ageikhe iti. Iti nen, akhuni inoado aperlagap meke itithogon palek dek dogolik, inetaiken Allah oba hakotdegarek meke tha'bokhogonat nen, inopase Abraham at o. It itithogon inetaiken Allah oba hakotdisinem nen, at nen, “Hinobabut mothogon hagakhe dogou hak hinetaiken noba hakotdegepma, wene hinoba meke korogo wokhigirik hinapuke ninom hunogo 'binagagi iti arat o,” iluk yogeisekheregat.

Roma 4:24

Nit ninobasik inomat yoknisasikhe o. Halok he, nit meneke, ninetaiken ninopase Allah ninoe Etagapogot Yesus watlageikhesikmo nen ilugutdisikhe meke etnogo baga hakotdogorek iti nen, at nen, “Hinobabut mothogon hagakhe dogou hak, hinetaiken noba hakotdegepma, wene hinoba meke korogo wokhigirik hinapuke ninom hunogo 'binagagi itiat o,” iluk yoknisekheregat.

Roma 4:5

Meke re, akhuni aperek nen Allah akla hanorogo yi meke ti meke hagakhidek dogoligat, inakla nen, “It akhuni aperek nen Allah ebe inakla meanetdekhe lageikha mekeat he, at nen, it wene inoba meke erlok korogo degetdisalok yabokane inapuke at inom hunobo 'bisekherek,” iluk inetaiken at oba hakotdisinem nen, at nen, “Hinobabut mothogon hagakhe dogou hak, hinetaiken an noba hakotdegepma wene hinoba meke korogo wokhigirik, hinapuke ninom hunogo 'bagagi itiat o,” iluk yogeisekheregat.

Roma 4:7

“It akhuni inasuk warek dek korlo hagakharek meke, Allah nen thagalogo here'isigik, weak hagakharek meke, thebelogo here'isigik, hagakhe meke inakla arleken akhoak o.

Roma 4:9

“Inakla arleken akhoak o,” iluk isikhe iti nen, it akhuni inoado aperlagap meke palek meke inobasik anek isikhe a? At he, it inoado aperlagap palek dek meke hasik inomat isikhe a. Alebageik wene men ogo apigi, Abraham etaiken Allah oba hakotdisikhemo re, at nen, “Hat hobabut mothogon hagakhe dogou hak, hetaiken noba hakotdegenma, wene hoba meke korogo wokhigirik, hapuke nipisak hunogo 'bagagi itiat o,” iluk yogokhikhe.

1 Korintus 1:30

At Allah nenat hit Kristus Yesus hinom hunik dogobageik iluk 'binageikhemo welgap iti. Wene ninakla kagalek dogou hak, Yesus ebeat woknisasikhe. Itithogon woknisasikhemo, at nen Allah ninom yabokane ninapuke dapulogo 'binanhik, ninebe Allah hasik 'binanhik, tilninakhik, hagakherek.

2 Korintus 5:21

Nit Kristus ninom hunekho halok, at Allah nen ekaerek ninom hano ninapuke dapukhogon 'binanigiluk, nit ninobasigat nit ninobabut weak hagakhorek meke iti, at Kristus weak hagakhidek meke oba 'bisikhe iti o.

Galatia 3:14

At Allah nen Abraham hanotdisikhe hak, yi akhuni ti akhuni tha'bokhogonat Kristus Yesus inom hunekhunem hanorinabuagaluk, Yesus watlageikhe iti. At itithogon watlageikhesik oba nen, Allah Agoreke wokhisagein iluk abok tak yoknisasikhe etnogo, ninetaiken at oba hakotdisinem woknisekherek iti.

Galatia 4:15

Hit alebat hinobabut akilukhogon hagakhe lagagip etnogo, yogotak hinobabut nikithogon hagatlagasip welagap. Inileken hemelogo wogeisegarek dogolepma, hit hinobabut hinileken hemelogo woknetlebat iluk, hinabok pakhogonat usak welagei.

Efesus 1:3

Ninoe Etagapogot Yesus Kristus opase Allah itiat hogorakhe dogouok o. Nit Kristus ninom hunik werekma, at Allah nenat hano meke tha'bokhogonat ninetaiken hasik pogot oba nen woknisasikhemo welago.

2 Timotius 1:9

At Allah nen ninebe tilninakhik, at ekaerek a'buri asuagaluk ninayoko 'bigik, hagakhikhe iti, nit nen ageikhe hagakhugu baga ninayoko 'bisikhe 'buk. At he, Allah obabut hano nen, ebekeram yi meke ti meke aban winametdigidek dogolik, yabokane Kristus Yesus hagasigin oba hanotninabigiluk, ekaerek akla apalok ninayoko 'bisikhe iti.

Yakobus 2:18

It aperek nen itithogon isinem men usak, “Hat nen he, Netaiken Allah oba hakotdiluk welagei ekhe lagan iti. Nen, an nen niki baga nen yomageisekhe lagei iti. Halok he, hat hiki nen yomageisigidek dogolik, hetaiken anek Allah oba hakotdiluk welagei iluk ekhe lagan iti, ebe ki? Inugutnean ta. An anek he, Netaiken Allah oba hakotdigirik welagei, iluk, niki baga nen, yomageisekhe lagei meke ekagat werek iti, inugutheageinat o,” iluk yogeisausak o.

2 Petrus 1:1

Nagarlak lak nerugi. An Simon Petrus Yesus Kristus nen, at atuaneke dogoagaluk nayoko 'biluk la'ani ageikhemo wagagi. Iti, at ebe Allah at dogolik, obabut mothogon anek hagakherek etnogo nen, hit ninom tak-tagat ninetaiken at oba hakotdugunem tilninabiogo meke, wene yi holal waganogo hinoba la'i agei iti.