Roma 4:25 - ALLAH ANE WENW KET MEKE WAROGO WOKNINAKHIKHE WENE

²⁵ At Allah nen, nit at ane thagalogo thogotdisalok weak hagakhe lago iti nen, Yesus ebe akhuni nen wasuagaluk usa'i ageikhemo ebe wakhukhama, yabokane, “Wene hit hinoba meke korogo wokhigi,” iluk, at ninom ninapuke hunogo 'binageiluk ilugutdisikhe iti.

Roma 4:25 ပူးပေါင်းရင်းမြစ်များ

Roma 3:25

Alebageik, at Allah nen, nit akhuni weak hagakho korlek, ninakhidek obakhanini hapugutdiluk welageikhesik nen, yogotak at obabut mothogon hagakherek etnogo ekagat hagatlasuagaluk, Yesus la'i ageikhe. Wageikhemo ebe wakhunem amep usageikhe iti baga, nit akhuni ninetaiken at oba hakotdogo meke, at ninom ninapuke hunogo 'binanuagaluk la'i ageikhe. Allah nen nit akhuni ninetaiken Yesus oba hakotdogo meke, wene ninoba meke korogo wokhalok at ninom ninapuke hunogo 'binanhe dogolik, at mothogonat hagakherek iluk yogotak obabut ekagat hagatlaga iti.

Roma 5:18

Wene igi iti, men igi apigi. Ap ageikhe nen Allah ane thagalogo weak opaki hasik hagakhikhe baga, ilugun oba akhuni tha'bokhogonat wene inoba 'biluk weagatdisasikhe iti hak, ap ageikhe nen Allah ane hologo mot opaki hasik hagakhikhe baga, wene akhuni tha'bokhogonat inoba meke korogo wokhigik, inilugurinakhik, hagakhikhe.

Roma 8:3

Alep he, wene Allah nen ninasuk wakhikhe wene etnogo, nit akhuni ninobabut ninobatne dek iti nen, hano hagatninabusak erlok dek ageikhe. Erlok dek ageikhemo, nit akhuni ninobabut weak hagakho werekma, Allah ekaerek a'but nit hakene hagatlatluk, nit weak hagakhorek meke iti wene oba 'biluk obatne degetdisoagaluk la'i ageikhemo obatne degetdisikhe iti.

1 Korintus 15:17

At Kristus Allah nen ilugutdilep dekma, hit nen, Wene iti eberogonat, iluk waganhigip iti, we yugunat waganilepma, hit weak hagakhe lagagip meke iti, wene hinoba dogolep o.

2 Korintus 5:15

Nit tha'bokhogonat hasik watlageikhe iti nit ninebe ninekaerek hasik niniluk dogoagaluk watlageikhe 'buk. Nit ninebe at hasik dogoagaluk, at ebe nit ninobasik watlageikhesik nen apuke iluk ageikhe iti o.

2 Korintus 5:21

Nit Kristus ninom hunekho halok, at Allah nen ekaerek ninom hano ninapuke dapukhogon 'binanigiluk, nit ninobasigat nit ninobabut weak hagakhorek meke iti, at Kristus weak hagakhidek meke oba 'bisikhe iti o.

Galatia 1:4

Nit weak hagakhorek iti nen ninopase Allah akla nen, “Itithogon hagasuak,” iluk akla apasikhe baga, at Yesus Kristus nen nit akhuni agat oba meke yoma tilninabigiluk, etaiken nenat nit ninobabut weak motok hagakhorek meke iti ukum at ekaerek nen oba 'bakhalok watlageikhe iti.

Galatia 2:20

Nen, yogotak nebe niluk welagei yi, nekaerek nobatne baga welagei 'buk. At Kristus at nakla dogolik iluk welagarek o. At ebe Allah a'burat dogolik, nebe akmu nen an hasigat, “Nasuak,” iluk akla apasikhe baga ebe wakhukha iti. Nen, an netaiken at oba hakotdiluk werekma, at ebe nakla werekma, niluk welagarek iti.

Galatia 3:13

Allah ane baga holal waganogo 'bekhe dogolik, men isukha, “Inebe o baga meldisalok inasumo, it inebe watlasugun meke iti, Allah nen homan 'bisagein werek o,” iluk, holal waganogo 'bisukha hagat, wene Allah nen ninasuk wakhikhe wene iti baga, homan 'binanusak mot werekma, at Kristus nen ninoko palogo tilninabigiluk wene nit ninoba meke korogo at oba 'bakhasikhe iti.

Efesus 5:2

Akhuni nen yi meke ti meke Allah hasik 'bisalok, ebe warogo hetu hunekhunem, Allah akla hanorogo obasi hano meke liagakhe lagoukha iti hak, at Kristus nit ninebe akmutninakhikhesik nen, “It inobasik an nebe nasuak o,” iluk apasikhe baga ebe wakhukha iti baga Allah akla hano ageikhe iti hak, nit-nit nakmu-hakmurogo hagakhe dogouok o.

Titus 2:14

Nit alep Allah ane here'isalok yi weak ti weak hagakhe lagagu iti nen niniki herle warogo negen haknisik werekma, at Yesus Kristus nen he, “It inebe an nekaerek na'buri atluk nen, inobabut hano meke akilukhogon hagakhe dogoak nen, inebe herle hisalogo inoko paligiluk, an nebe watlasigin,” iluk isikhe.

Ibrani 8:3

It ap Allah iteerek inougi koktek inebe tomok meldisegarek iti, yi meke ti meke Allah wogokhik, inako warikhik, hagakhe dogoagaluk meldisegarek iti hak, nit ninoe Allah iteerek kok iti, yi meke ti meke aperek nit ninobasik Allah wogosusak werek o.

Ibrani 9:28

at Kristus meneke nit akhuni weak hagakhorek meke degetdisagaluk iki opaki hasigat kambing sapi Allah warekhe lagoukha iti hak, at ebe watlageikhesik, yabokane wisigin iti, nit weak hagakhorek meke degetdisagaluk wisigin 'buk. Dek o. Nit akhuni, at wagunem elokhoma therogo welagorek meke hanotninabigiluk wisigin o.

1 Petrus 1:21

Ebe watlageikhesikmo Allah nen ilugutdiluk hogorakhe dogoagaluk meldisikhemo, hinetaiken Allah oba hakotdiluk, “Yabokane at nen hanotninabigin,” iluk oba eberek welagap iti.

1 Petrus 2:24

Nit ninobabut weak hagakhe lagagu meke iti, akhuni watlatluk yi meke ti meke hagakharek dek iti hak, nit weak meke here'isalok, niniluk dogolik Allah akla warlok meke hagakhe dogoagaluk, nit weak hagakhe lagagu meke korogo, at Kristus oba 'bakhasikhemo, ebe o baga meldiluk wakhukha iti. At ebe li'bik-la'bakhogon wakhukha iti baga, hit hanothinakhikhe iti.

1 Petrus 3:18

Nit akhuni weak hagakhorek iti hasik niniki ilugun oba, at Kristus yabokane watlageidek dogeigiluk opaki hasigat watlageikhe. Ninebe Allah oba woknisik lagaluk, at obabut mothogon hagakherek meke nen, nit ninobabut korlo hagakhorek meke hasik watlageikhe iti. Ebe nit akhuni meke iti wakhukhama watlageikhe mekeat he, agoreke meke iti Allah nen ilugutdisikhe iti.

1 Yohanes 2:2

At ebe itithogon turlem heisogo dogolik, nit yi weak ti weak hagakhorek meke thagalogo degetdisalok hotninakherek. Itithogon hotninakherek iti nit weak hagakhorek meke ninobasik anek 'buk. At he, yi akhuni ti akhuni agat oba meke tha'bokhogonat weak hagakharek meke inobasik ninomat hotninakherek o.

A'bikaka 5:9

Itithogon etai ket meke yakulogo wakhe dogolik, “Hat anek he, arat hakhukhama watlagagitik, u a e, Akhuni tha'bokhogonat inukuloak etaga tomok, inane tomok, u a e, Inoado tomok, inaila tomok, u a e, Hat hamep oba Allah hasik oko palogo 'bisalok, u a e, Iteerek agatik, u a e, Thuesika uanat meke baga holal waganek dikilik iti, u a e, Waganiluk nen, sirlo 'begarek iti hak, u a e, Iki apusu tetnekhogon 'bisukha meke iti, u a e, Erlogat 'bukalusak, u a e. It iti inoko palogo 'bisasigitik, u a e, Ninopase Allah hasik hagakhe dogoagaluk, u a e, Inukuloak etaga, Allah iteerek, thaligin, u a e, Inebe kogat meldisasiginmo, u a e, It nen akhuni agat oba meke, u a e, Inapma 'bisalok hagasik dogogun, u a e,” iluk etai wakhunem hisigi.

A'bikaka 7:14

Nitema itithogon waganhunem nen, an nen he, “Noe, an nokodek. Hat anek hilu welagan o,” iluk yogokhunem, at nen he, men yoknekhe, “It akhuni yoma agat oba werekma akhuni aperek nen yi aik ti aik doalegat hagarinakhunem, Allah nen tilinakhikhemo, inasu Domba Eak amep oba arat kut motok thobalega meke o.