Roma 4:17 - ALLAH ANE WENW KET MEKE WAROGO WOKNINAKHIKHE WENE

¹⁷ Wene iti hasik Allah nen Abraham men yogokhikhe, “Yi akhuni ti akhuni inukuloak etaga doalegat inopase re, hat meldagagi o,” iluk yogokhikhemo holal waganogo 'bisukha. Itithogon yogokhikhemo at Abraham akla nen, “At Allah akhuni warek meke inilugurinakhik, nen, yi meke ti meke dek meke ane baga weregetdigik, hagakherek meke nen abok yoknekhe iti eberogonat yoknekhe o,” iluk etaiken oba hakotdisikhe iti.

Roma 4:17 ပူးပေါင်းရင်းမြစ်များ

Matius 3:9

Nen, hinakla nen, Abraham iti nit ninopase iluk, apugup o. At Allah nen Abraham a'buri negen helekit yi meke erlok hagasusak o.

Yohanes 5:21

Nen, an nopase nen akhuni warek meke inilugurinakherek iti hak, a'but an nen itithogonat inilugurinabigin, iluk nakla apegerek meke inebe tomok inilugurinakherek.

Yohanes 5:25

Nen, akhuni warek meke nen, an Allah a'but nane inasuk holugun oba aban werek mekeat he, arat asi agasik werek o. It nane inasuk holugun meke halok, iniluk atluk iniluk motok dogogun o, iluk, eberogonat yokhisigi o.

Yohanes 6:63

Allah Agoreke nen akhuni inilugurinakherek o. Nen, akhuni agat oba meke inobatne baga ageikhe hagasusak erlok dek o. Meke re, wene an nen yokhisekhe lagei iti, Allah Agoreke nenat ekherek meke nogo nen he, akhuni inilugurinakherek wene yokhisekhe lagei o.

La'isasikhe 15:18

itithogon ninilu asuagaluk haganeat yoknisasikhemo, holal waganogo 'bisukha iti.

Roma 3:29

At Allah nit akhuni Yahudi meke anek ninopase nogo? It itikmanke meke ninomat ninopase dek nogo? Eberogonat akhuni itikmanke meke ninomat ninopase o.

Roma 4:18

At Abraham nen, “An nen itago meke itithogon hagatlasugun,” iluk akla apausak motok dekmaat nen, “Eberogonat hagatlasigin,” iluk etaiken Allah oba hakotdiluk motok hagakhe lageikhe iti baga, Allah nen, “Hat nen itago meke motok doalegat yigithogon asugun o,” iluk abok yogokhikhe tak-tagat, yi akhuni ti akhuni inukuloak etaga doalegat inopase Abraham at ageikhe iti.

Roma 4:2

At ekaerek nen hano hagakhikhe baga, Allah nen, “Wene hoba meke korogo wokhigirik, hapuke nipisak hunogo 'bagagi o,” iluk yogotlepma re, ekaerek nen hogorakhelep o. Meke re, Allah il oba hogorakhausak erlok dek welageikhe iti.

Roma 8:11

At Allah nen, Kristus Yesus watlageikhesikmo ilugutdisikhemo, at Agoreke hinakla dogolik, hinebe itikmanke watlagathep meke yi hiniluguthinabiginat. Iti re, at Agoreke nen Kristus ebe watlageikhesikmo ilugutdisikhe etnogo hinakla welagarek iti nen hiniluguthinabigin o.

Roma 9:11

It ap inebe pere iti, inebe itaklageidek inobabut hano hagakhik, weak hagakhik, hagakhidek werek korlek, at Allah akla nen apalok witaberogo 'bisasikhe iti ebeat atluk dogoagaluk,

Roma 9:26

An nen akhuni o ageikhe meke hasik, Hit he, an na'buri dek o, iluk isigi mekeat, yabokane it o etoma meke hasigat, O yoma an niluk welagarek meke na'buri o, iluk igin,” iluk isikhemo at Hosea nen holal waganogo 'bisikhe.

1 Korintus 1:28

At Allah akla nenat, akhuni agat oba meke nen hogorakhe dogolik kogotdegarek meke iti, degetdisagaluk, it akhuni agat oba meke inakla nen, “It iti inebe kepu meke, motok ina'it meke, inetaga dek meke,” iluk apegarek meke iti, Allah nen wenago 'bisalok inayoko 'bisikhe.

1 Korintus 15:45

Wene itithogon iluk, Allah ane holal waganhe dogolik, “Ap Adam alebageik meke iti, ebe iluk meke winametdisikhe,” iluk holal waganogo 'bisukha. Mekeat he ap Adam yabokane meke iti, Agoreke nen inilugurinakherek meke wageikhe.

1 Timotius 6:13

Allah akhuni ninebe inom, yi meke ti meke inom, tha'bokhogonat ninilugutninakherek meke etnogo il obaat, Kristus Yesus akhuni nen ap Pontius Pilatus oba wolok lagoukhama, ane eberogonat pakhogon yogokhikhe etnogo il obaat, wene yi hasuk warogo yokhisigin.

Ibrani 11:12

Itithogon itakhasikhe iti nen, agun Abraham ebe yaman ageikhesik watlasusak negen welageikhe mekeat he, at ebe opakiat meke nen itago meke inebe husagal pogot oba doalegat welagarek iti hak inom, lelaga i laut yekelek yipitla welagarek iti hakene inom, doalegat iniki wenesusak motok erlok dek wialagoukha iti.

Ibrani 11:3

Allah ane baga nen pogot agat yi meke ti meke tha'bokhogonat ninileken hekhe lago yoma re, nit nen, “Ninileken hogorek dek meke baga walhasikhemo werek,” iluk, ninetaiken at oba hakotdiluk hutdusak o.

Ibrani 11:7

At ap Nuh meneke, etaiken Allah oba hakotdiluk, yi wene ti wene yabokane hagatlasigin meke Allah nen husupi yogokhikhemo ebe ileken higidek mekeat he, “Eberogonat hagatlasigin meke yoknekhe higi,” iluk Allah ane holek dogolik, ku ageikhe at a'buri inom tilinabusak meke halhikhe. Itithogon halhikhemo, Allah nen akhuni ukum inoba 'biluk inebe inakhikhe mekeat he, at Nuh arligat anek he, etaiken Allah oba hakotdisikhe iti baga, Allah nen, “At hano,” iluk tilhikhe.

1 Petrus 2:10

Hit alebat, Allah hinom huni welageidek mekeat he, yogotak hinebe Allah a'buri agap o. Nen alebat, hit nen, “Allah ninebe akmu werek,” iluk hinokodek welagagip mekeat he, yogotak, “Ninebe Allah akmu nen wokninakhikhemo welago,” iluk hinilu agap o.

2 Petrus 3:8

Meke re, nagarlak lak nerugi. Hinebe nakmu lak o. Wene opakiat yi obarlikmatdugup. Ninoe Etagapogot akla apekhe dogolik, niniki opakiat welagorek iti, 1.000 tahun hakene apekherek. Nen, 1.000 tahun iti, niniki opakiat welagorek iti hakeneat apekherek. Ipisak tak-tagat anek apekherek o.