“Yabokane hano asigin,” iluk ninakla arleken akhogorek iti, erlo at Allah nenat hagatninakherek. Hit itithogon hinakla arleken kokhogon akhekhe dogoagaluk Allah Agoreke obatne baga hagathinabuak. Itithogon hagathinabuak nen, hinetaiken at oba hakotdisigip iti baga hakotdiluk werekma, at nen hinakla arleken motok akhekhe dogoagaluk hagathinakhik, hinetaikek hapugutdinagagik, hagasuak o.
Roma 12:12 - ALLAH ANE WENW KET MEKE WAROGO WOKNINAKHIKHE WENE12 Hit nen, “Yabokane at Allah nen hano hagasigin werek o,” iluk, hinakla arleken akhalok, yi aik ti aik hekhe dogolik, hinobakhanini hapugutdiluk sembayan thogotdigidek isi motok dogono o. အခန်းကိုကြည့်ပါ။ |
Roma 12:12
71 ပူးပေါင်းရင်းမြစ်များ
Iti nenat, nagarlak lak nerugi. Ninoe Etagapogot ebe aban wageidek werek korlek, hinakla puk ageidek hinobakhanini hapugutdiluk therogo dogono o. Akhuni nen wen waganekma hipiri ai ya'iluk therogo welageikharek iti hinakla hutdini o. Itithogon ai ya'iluk werek korlek miso o mo dageisi korlek nikik, usekhe korlek nikik, eran-alep nasi korlek inakla puk ageidegat, “Yabokane isarlo agunem ebe kok meke itakhagein,” iluk inobakhanini hapugutdiluk therogo welageikharek iti hak,
Hit hina'it weak hagakhe dogosak he, nina'it o. It akhuni alep inetaiken Allah oba hakotdiluk ina'it ageidek, it nen, “Eberogonat waganugun,” iluk apekhe lagoukha baga, Allah nen, “Wokhisagein,” iluk abok yogeisasikhe meke ebe waganhukha iti hagat, hit itithogonat it inobabut waganogo hagakhe dogono o.
It akhuni alebageik hagarik wagoukha meke inabok ilik wago iti, inebe doalegat ninaliluke dagakhogon inileken laknisik werek iti nen he, tha ae 'busuk tha ae 'busuk luogoluk yi meke ti meke inoba akin meke nokorlogo here'isalok lageikharek iti hak, nit ninoba akin weak irluk-marlukhogon welagarek meke iti inom, ninobabut weak hagakhorek meke ninoba dekelek motok welagarek meke iti inom, tha'bokhogonat nokorlogo here'isalok, Allah nen, “Hurli iti hurli lano,” iluk yoknisasikhe iti, ninakla nen, “Ninelokhoma piokhogon hurli iti bagaat luok,” iluk, ninobatnerogon laga dogouok o.
Meke re, nit o lia baga welagorek meke yi, ninobabut hebelogo dogosak. Ninobabut hebelogo dogolik akhuni aperek nen inasunogo iluk thin inobakha baga ikharek hak, ninetaiken Allah oba hakokthek dogolik, akhuni inebe ninakmurogon welagorek iti mekeat ikhigik, inukuloakma inasunogo iluk inukulasu a'bet meke dakulharek hak, Allah nen tilogo hanotninabigin iluk, ninakla hano welago iti mekeat dakuligik, hagakhe dogouok o.
It itithogon hagakharek mekeat he, hat he, hebe Allah a'but welagan iti nen, iti meke hagakhidek lo here'isalok dogono. Itithogon dogolik, Allah akla apekherek tak-tagat hagakhik, apma ukiluk, at hasik hagakhik, hetaiken at oba hakotdiluk welageik, akhuni hakmurinakhik, hobakhanini hapugutdiluk welageik, hobabut enago welageik, hagakhe dogeigiluk, iti mekeat kogotdekhe dogono.
At Epafras, Kristus Yesus atuaneke, ebe hit mekeat etnogo nen, heagei wathinakheat o. At nen he, hit hinakla nen, “Allah ane iti eberogonat,” iluk hutdiluk nen, hinetaiken horle atluk hinebe metegat dogolik, yi meke ti meke Allah akla apekherek hak hagakhe dogobageik iluk sembayan hit hinobasik obatnerogonat isi motogat welagarek.
Allah ebe hinilu dogolik, iti meke oba dukhogon, inetaiken thebekhogon welageikharek meke iti, ite atno. Hinetaiken thebekhogon dogolik, iti meke oba dukhogon, yi hasik ti hasik hagakhe dogolik, inobakhanini hapugutdiluk welageikharek iti meke, ite atno. Hinobakhanini hapugutdiluk dogolik, iti meke oba dukhogon, Allah apma dogolik, at akla warlok apekherek mothogon hagakharek meke, ite atno.
At Allah akla nen he, it akhuni itikmanke meke tha'bokhogonat hano motok hagarinabigin wene iti kokhogon hogorasusak mekeat apasikhesik nen akla limago welageikhe meke, at a'buri halok thelekma pakhogon yogeisagaluk isikhe. Wene iti ebe re, Kristus hit hinakla werek halok, yabokane hanothinakhunem, hogothinabugun itiat o.
It iti inobabut itithogon ekagat asigin mekeat he, hat he, an nen wene yakulisegerek meke inom, nobabut hagakherek meke inom, “Itithogon hagasigin,” iluk nakla apegerek meke inom, netaiken Allah oba hakotdiluk welagarek meke inom, nakla hapukhogon welagarek meke inom, akhuni tha'bokhogonat nakmurogon welagarek meke inom, nobakhanini hapugutdiluk welagarek meke inom, haganeat nen hutdanhe laganat o.
Ninopase Allah il oba sembayan itithogon ekhe dogolik, hit hinetaiken Allah oba hakotdiluk dogolik hagakhe lagap meke inom, akhuni aperek hinakmurogo dogolik, hinobatnerogo yomageisekhe lagap meke inom, hinakla nen, “Ninoe Etagapogot Yesus Kristus nen hano hagatninabigin,” iluk hinebe hinobakhanini hapugutdiluk welagap meke inom, nit nen hit hagakhe lagap meke iti hasik obarlikmatdigidek, eberek motok welago.
ကြော်ငြာတွေ