Roma 1:16 - ALLAH ANE WENW KET MEKE WAROGO WOKNINAKHIKHE WENE

¹⁶ Hano wene iti Allah obatneatma, ebekeram akhuni Yahudi meke, nen yabokane, akhuni itikmanke meke, inetaiken Yesus Kristus oba hakotdegarek meke tha'bokhogonat tilinakherek iti nen, an nekarli degat hano wene iti yogeisilik nekherek iti.

Roma 1:16 ပူးပေါင်းရင်းမြစ်များ

Markus 8:38

Akhuni yoma inobabut weak dogolik Allah ane inom dopokhogon welageidek, yi weak ti weak hagariogei meke iti hinomat dogolik, it inilhanem tha nen, An Yesus agot, igik, an nane iti yogeisigik, u re, ape ekarli halok, an abat itaklasi agagi etnogo yabokane nopase hogorakho motok welageikharek hak hagatlatluk, it malaikat Allah ekaerek hasik yoko usa'isa agarek meke emenogo ninom witluk, At yi an nagot, iluk nane pakhogon u re, nekarliat asigin o,” iluk yogeisasikhe.

Lukas 9:26

At tha nen, An Yesus agot, igik, an nane iti yogeisigik, akhuni inil oba pakhogon u ekarli halok he, an abat itaklasi agagi meke yi nen meneke, yabokane an nebe hogotnakhik, nopase hogorakhik, malaikat Allah ekaerek hasik yoko la'isa agarek meke emenogo hogorinakhik, hagakhe korlek waga dogolik nen, At yi an nagot, iluk nane pakhogonat u nekarliat asigin o.

Yohanes 7:35

it ap Yahudi meke inougi koktek emenogo nen, it-it ekhe dogolik, men isukha, “Ap yi o koma lalok werekma, nit at herarik lalok ninom abuk asugun dek nen yoknisekhe apegep. Ap nit meke olirok akhuni Yunani meke werekma inoba lagoukhasik werekma inoba lalok nen, akhuni Yunani meke wene yakulisekhe dogeigiluk ekhe apegep a?

La'isasikhe 3:26

Allah nen, wene iti warikhikhe hak, hit weak hagakhe lagap meke hinebe tomok hinoporlike here'isoagaluk a'but ebe hanothinabigin meke hit tak hinoba usa'i ageikhe iti,” iluk inasuk wakhikhe.

Roma 10:17

Meke re, hano wene iti, Kristus abok yogeisa lagunemat inasuk holharek o. Nen, wene inasuk holilugat, inetaiken at oba hakotdegarek o.

Roma 15:19

At ebe hutduagaluk yi meke ti meke hagakhik, hogorasuagaluk yi meke ti meke elalinat hagakhik, obatnerogon hagakhikhe. Allah Agoreke etnogo obatne bagaat hagakhikhe iti. Hagakhe korlek, an he, o Yerusalem eloma nen dagak-pagak piokthek o Ilirikum eloma, at Kristus wene hano wene iti hutukhogon yogeisilik wagei.

Roma 15:29

An arat 'bithisa agei halok he, at Kristus nen hit hinobasik woknikhikhe meke tha'bokhogonat wokhisa isigin apigi.

Roma 2:9

At Allah re, akhuni inoado baga anek ileken hisalok, aperek elokhoma 'bisigik, aperek oporlike 'bisigik, hagakherek dek iti nen, it akhuni aperek inobabut weak hagakho motok welageikharek meke inebe tomok nen, hinet warogo yi aik ti aik hoagaluk hagarinabigin. Mekeat, it akhuni aperek inobabut hano hagakho welageikharek meke, inebe tomok nen, inebe hogorinakharek meke men, inalon halinakharek meke men, inetaiken hapukhogon welageikharek meke men, wogeisagein o. Itithogon hagarinabigin iti, it alebageik meke hakene Yahudi meke men, yabokane meke hakene, akhuni itikmanke meke, inukuloak etaga tomok aperek men, inomat, ipisak tak-tagat anek hagarinabigin o.

Roma 4:11

Oado aperlagap meke itithogon aban palek dek dogolik etaiken Allah oba hakotdisikhemo re, at Allah nen, “Wene hoba meke korogo wokhigirik, hapuke nipisak hunogo 'bagagi,” iluk yogokhikhe. Itithogon hagakhikhemo yogokhikhe iti, inetaiken ekerlogo dogoagaluk, “Hoado aperlagap meke palan,” iluk yogokhikhemo nen palikhikhemo re, ekagat ageikhe iti. Iti nen, akhuni inoado aperlagap meke itithogon palek dek dogolik, inetaiken Allah oba hakotdegarek meke tha'bokhogonat nen, inopase Abraham at o. It itithogon inetaiken Allah oba hakotdisinem nen, at nen, “Hinobabut mothogon hagakhe dogou hak hinetaiken noba hakotdegepma, wene hinoba meke korogo wokhigirik hinapuke ninom hunogo 'binagagi iti arat o,” iluk yogeisekheregat.

1 Korintus 15:2

Hano wene yokhisa agagi wene itiat hiniki a'bethogon hago dogogun halok he, iti bagaat tilhinabiogo. Itithogon meke re, hit we yugunat alomarogo hinetaiken Allah oba hakotdisigip welagap halok he, erlok dek o.

1 Korintus 2:2

An hit ninom dogolik, nakla nen wene werlek meke ebekhidek, at Yesus Kristus hasik ebekhe dogolik, kok hak he, at ebe o harokhogon meldiluk wakhukha wene itiat anek ebesigin o, iluk nakla apasigi.

1 Korintus 2:4

Itithogon dogolik, akhuni inawene an nakla kagalek oba, nane hano baga, nobatnerogon yokhisasigi dek o. At Allah Agoreke obatne baga, yokhisasigimo, ebeat ageikhemo, hinileken hasigip.

1 Korintus 9:12

Hit nen, it aperek meke itithogon wogeisausak erlogat halok he, nit ebe iteerek meke aperek woknisausak dek nogo a? “Woknisausak erlogat o,” iluk yogeisekhe lagei. Itithogon mekeat he, nit aperek woknisoagaluk ekhe lago dek. Hano wene Kristus hagakhikhe wene iti, nit nen yogeisilik lagunem agolak palunogo iluk, yi meke ti meke aperek woknisausak iluk igidek ninobakhanini hapugutdiluk here'isekhe lago.

1 Korintus 9:18

Halok he, an niki oko nena meke woknisusak? Iti ebe yi. Oko woknisu hak, hano wene iti oko dek werlegat yokhisilik nekhe dogolik, nakla hano welagei iti o. Itithogon yogeisugunem, oko woknisusak tak-tak mekeat, itithogon aperek woknikhunem waganhidek welagarek iti hano.

2 Korintus 2:12

An o Troas etoma wagagi hak, hano wene Kristus hagakhikhe etnogo wene, akhuni etoma meke hano asuak nen iluk wene yogeisoagaluk ninoe Etagapogot nen holak yaknikhikhemo yogeisekho welagagi.

2 Korintus 4:4

Itithogon werek iti, it akhuni agat oba meke inopase Iblis etnogo nen inetaiken Allah oba hakotdigidek meke iti, inetaiken mumerinakhikhemo werek o. At Kristus Allah hakene atma, ebe hogorakharek wene, hano wene iti nen liarinabusak mekeat he, liarinabinogo iluk, inetaiken mumerinakhikhemo werek iti o.

2 Korintus 9:13

Itithogon yomageisekhe dogogun iti baga, it Allah a'buri o Yudea meke nen, “It akhuni Korintus meke Kristus hagakhikhe wene hano wene etnogo waganhukhasik, Ninobabut mothogon hagakhe dogogun o, iluk isukha tak-tagat hagariogei. Itithogon hagakhe dogolik it meke aperek warlok ageidek nit yomaknisigik, it aperek tha'bokhogonat yomageisigik, hagakha o,” iluk hinobabut ekagat paldiluk Allah hogorasugunat o.

Galatia 1:7

Ebe re, wene hano wene ninat ageikhe welagarek dekmaat o. Mekeat he, it akhuni aperek nen hano wene Kristus nen hagakhikhe wene iti meke ninat hagarogo nukhethinabuogoluk yokhisiliogei iti nenat igi o.

1 Tesalonika 2:13

Nit nen wene Allah ane etnogo yokhisasugumo, hit nen, “Wene iti akhuni inane meke dek o. Allah aneat o,” iluk waganhigip iti, eberogonat Allah aneat waganhigip o. Iti nen nit huk ageidek Allah heagei wakho motok welago. At Allah nen hit hinetaiken Kristus oba hakotdisigip meke hinakla kagalho motok welagarek o.

1 Timotius 1:11

Nen, wene iti mothogon, hano wene etnogo an nen yogeisilik nekhe dogoagaluk noba 'bisikhe. Hano wene iti, Allah hogorakhik, heagei wakhik, hagakhorek meke etnogo aneat o.

2 Timotius 1:12

Itithogon la'ani ageikhemo nekhe lagei iti nen, it akhuni nen yi aik ti aik hagatnakho korlegat, netaiken ebe nilu meke oba hakokthek welagei, iluk nekarli ageidek, nakla pugat welagei. At nen he, “An meke yi haknarik dogono. Haknarik werekma, hurli an nebeat wisigin o,” iluk, noba 'biluk nayoko 'bisikhe meke iti, ekaerek obatne baga erlok haknarik dogogin o, iluk nakla nen hutdekhe lagei.

2 Timotius 1:16

Itithogonat meke re, at Onesiforus a'buri inom anek he, hibiku-yogoku nakla hanorogo netaiken thebeli iriogei iti, ninoe Etagapogot nen akmurogon hagasik dogoak o. An niki herle warek werekma noba wisu ekarli degat,

2 Timotius 1:8

Itithogon wokhisekherek iti, ninoe Etagapogot abok akhuni aperek yogeisausak hekarli dekhogon pakhogonat yogeisigik, nen, an at hasigat niki herle warogo 'banhama welagei yi hasik, hekarli dek halonhogo welageik, hagakhe dogono. Itithogon hagakhe dogolik, akhuni aperek nen hano wene iti hasik, yi aik ti aik hagatninakho korlegat, an Allah obatne baga welagarek hagat, hobakhanini hapugutdiluk dogono.

Ibrani 4:12

At Allah ane ekherek iti, karok elak abel ebelak-ebelak motok mago iti hakene dek o. Meke re, at ane iti, iluk meke obatneak elaklak weak motok dogolik, inoak elekenma ukigik, inamukok elola ukigik, hagasu hak, inakla inetaiken oba hakha lagarethek nen, inakla apegarek meke inom, inetaiken nen warlok apegarek meke inom, ileken erlok penakherek.

1 Petrus 4:16

Mekeat he, akhuni aperek nen, “Hat Kristus agot, hebe Kristen meke,” iluk yi aik ti aik hagathinakha halok, hinekarli agup o. “An Kristus agot halogat at etaga meke an netaga thalogo yokniriogei iti hanoat o,” iluk Alah hogorakhe dogono.