Matius 5:8 - ALLAH ANE WENW KET MEKE WAROGO WOKNINAKHIKHE WENE

⁸ Nen, akhuni inetaiken opakiat karelek motok welageikharek meke iti, yabokane Allah ebe ineleken hugun iti nen, inakla arleken akhekhe dogosagat o.

Matius 5:8 ပူးပေါင်းရင်းမြစ်များ

La'isasikhe 15:9

It ninat hagarinakhik, nit ninat hagatninakhik, hagakhidek o. It nen Yesus ane eberogonat iluk waganhukhama, at nen inaklake horinakhikhe iti.

1 Korintus 13:12

Yogotak ya, inamukhak ileken weak werek korlek inileken lakhegarek hak, ninamukhak weak meke lakhekhe lago. Meke re, yabokane ebeat meke hutukhogon lakhagun o. Yogotakne, wene ato aperek anek ninilu welago. Mekeat he, yabokane at Allah nen an nebe hutukhogon ilu iti hak, an nen at Ebe hutukhogon nilu asigin o.

2 Korintus 7:1

Halok he, nagarlak lak nerugi. Hinebe nakmu lak o. At Allah nen itithogon dogogun iluk abok yoknisasikhe iti nen, ninebe inom, ninetaiken inom, weak hagakhorek meke iti, hanorogo horogo here'isauwok o. Itithogon here'isalok, Allah ebe ninayuk dogolik, ninebe at hasik 'bisalok dogouok nen, ninetaiken 'bogokhogon horletdekhe dogouok o.

Titus 1:15

Allah nen akhuni aperek at hasik 'bakhalok hanorinakhe meke halok, it inobasik yi meke ti meke hano anek 'bisalok werek o. Itithogonat meke re, it aperek inetaiken Allah oba hakotdigidek dogolik, inakla apiliogei meke inom, eberiogei meke inom, weagat werek iti nen, it inobasik yi meke ti meke hano dek. Weak anek werek o.

Ibrani 10:22

At ebe etoma werekma, nit ninakla nen, “Nit weak hagakho,” iluk ninakla wene munini ebekhorek meke hano hotninakhik, ninoado baga i elokhoken hano meke baga thobalninakhik, hagakhikhe iti nen, ninetaiken opakiat at oba hakotdiluk ninayuk dekhogon, at oba horokhogon ukekhe dogouok o.

Ibrani 12:14

Hit hinebe karelogo Allah meke 'bisigidek dogogun halok he, at ebe hinileken hugun motok dek iti nen,akhuni tha'bokhogonat hinom hano dapulik dogolik, hinebe at hasik 'bisalok weak hagakhidek hano karelek motok dogouogoluk hinobatnerogon hagakhe dogono o.

Ibrani 9:14

It inoado itikmanke meke hasik sapi amep erlok dek meke baga erlok hano horinakhe lagoukha. Halok he, nit Kristus amep kok meke baga, “Wene hinoba dek,” iluk ninakla thelekhogon erlok motok 'binanherek o. Nit Allah iluk welagarek meke akla hanorogo hagakhe dogoagaluk, domba isi hano meke Allah warekhe lagoukha iti hak, at Kristus Allah Agoreke ikhok motok welagarek meke obatne baga, watlaga dogolik, ebe Allah wogokhikhe iti baga, nit alebat dek asigin meke we yugunat hagakhe lagagu meke, at nen, “Wene hinoba dek,” iluk, at amep oba ninakla thelekhogon 'binanhikhemo welago.

Yakobus 3:17

Itithogon mekeat he, Allah nen akhuni inakla kagalhunem, inobabut kok hagakharek he, weak ageikhe hagakhidek inilaga isonhogo welageikharek iti. Itithogon dogolik, akhuni inom hanorogo welageik, inobabut enago welageik, inane hologo hagakhik, akhuni inakmurogon motok welageik, o eken hano meke ikherek iti hak, hanorogon hagakhik, akhuni aperek inelokhomake 'bisigik, aperek inoporlike 'bisigik, hagakhidegat inetaiken pere welageidegat, hanorogo hagakharek iti.

Yakobus 4:8

Hit Allah oba dopokhogon welagap halok he, at meneke hit hinoba dopokhogon wisiginat o. Hit weak hagakhe lagap meke iti, hiniki bagake horogo here'isekhe dogono o. Hinetaiken pere meke yi re! Hinakla weak meke horogo la'isekhe dogono o.

1 Petrus 1:22

Ebe wene iti hinasuk holhe dogolik, hinakla nen weak meke horogo la'isalok, hinagarlak lak hinerugi Allah a'buri meke aperek eberogonat hinakmurogon hagakhe lagap iti, hinom hunik motok dogolik nakmu-hakmurogon hagakhe dogono.

A'bikaka 22:4

Itithogon hagakhe dogolik, Allah etaga it inilhaoak oba holal waganekma, it nen at elokhoken inileken hekhe dogogun o.