Matius 5:37 - ALLAH ANE WENW KET MEKE WAROGO WOKNINAKHIKHE WENE

³⁷ Hit nen, I o, uogoluk halok he, I oat usak. Nen, Dek o, uogoluk halok he, Degat usak o. Wene ninat meke ageikhe lapeli lagap halok he, Iblis obabut weak meke etnogo nen hinakla kagalhe korlek ugun o,” iluk yogeisasikhe.

Matius 5:37 ပူးပေါင်းရင်းမြစ်များ

Matius 13:19

Ai hilik aperek holagarlem usa'isikhe iti ebe it akhuni aperek Allah apma 'bisekherek wene iti inasuk holharethegat, ebe hutukhogo hutdigidek halok, at obabut weak meke etnogo wagarethek nen, wene inetaikenma ai yago meke iti henogo horlalok lagarek itiat o.

Matius 13:38

Nen, wen iti ebe re, o agat oba yoma yi ai ti ai tha'bokhogonat o. Nen, ai hano meke ebe re, akhuni Allah apma welageikharek inebe itiat o. Nen, ai weak meke iti ebe re, at obabut motok weak meke a'buri itiat o.

Matius 15:19

Inetaikenma nen weak meke ebekhik, akhuni inakhik, humi ap inagugi meke param ha'isigik, homagarlugi yugunat hagarinakhik, iniki abusak waganhik, it akhuni aperek inoba inekalat wene 'bisigik, inabok wiik-weak palhik, hagakharek iti inetaikenma nenat kagalogo dagei agunem dukhi agarek o.

Matius 5:36

Nen, yogotak he, nisi opakiat morla asugak igik, nen, yogotak nisi opakiat mirli asusak igik, isinem hinane hologo morla ageik, mirli ageik, hagakherek motok dek o. Halok he, hinukuloak iti etaga palogo hupuk palusak degat o.

Matius 6:13

Weak hagasuagaluk ninakla kagaliginmo etoma thogotdinanhidek piokthegat woknisik laga dogono. Obabut weak meke iti nen iki hakninakhunem, hat nen tilninakhe dogono. [Ninopase Hetagapogot harat dogolik, yi meke ti meke hagasusak anekma, harat hogothakho motok dogogun o. Ebeat asuak u hak, Amin,] iluk sembayan itithogon ekhe dogono.

Yohanes 17:15

Hat nen, it akhuni agat oba meke inakla nen it anek kigilogo woginabinok nen iluk kino yokhekhe lagei 'buk. At weak meke etnogo nen weagarinabigiluk inoba wagunem, hat nen therisik dogonok nen iluk yokhekhe lagei o.

Yohanes 8:44

Itithogon hina'it iti, hit hinopase Iblis atma, hit nen at warlok apekherek meke itiat warlok nen hagakhe lagap iti. At Iblis iti erlo baga nenat akhuni inakherek mekeat o. At wene ebe wene akla dek iti nen, wene ebeat wene isinem inane legekherek dek iti. Iblis ekalat ekherek iti, at obabut ikhogatma ekalat ekherek iti. Inekalat egarek iti, erlo arat o.

Efesus 4:25

Nit tha'bokhogonat ninebe at Kristus iki isok hakene ninom hunik welago iti nen, inekalat egarek meke iti here'isalok, hinagarlak lak hinerugi hinom hinane eberogonat meke anek ekhe dogono o.

Efesus 6:16

Marle pisinerisugunem piokhogon loagaluk, o tha'belek inikimo wolok lageikharek hak, inetaiken Allah oba hakotdiluk welageikharek iti meke hibiku-yogokuat wolok nekhe dogono. Wolok lagunem, Iblis obabut weak meke etnogo nen hetu marle ilugun oba hunogo pisinethisugunem, hinetaiken Allah oba hakotdiluk dogogun iti baga erlok nagulhe dogosagat o.

Kolose 3:9

Su alep meke nokorlogo la'isalok nen, yabokane ket meke ikarek hak, hit hinobabut alep hagakhe lagagip meke here'isalok, yabokane hinobabut ket meke waganhigip iti nen, hinekalat ekhe dogogup o. Hinobabut ket meke iti, Allah nenat winametdinageisikhesikmo nogo nen, at ekaerek obabut hakene hagatlatluk nen, ebe motok hutukhogon hinilu asuagaluk, eran-alebat hagathinabiogo iti o.

Kolose 4:6

Hinane yi meke ti meke hasik it aperek yogeisekhe dogolik, yi meke ti meke mayu hilhunem ituk hano egarek hak, “Wene iti hano,” iluk, waganuagaluk, hinane eanerogon yogeisekhe dogono. Itithogon yogeisugunem, it hinoba hinok waganhunem, wene oko inebe dopok yogeisobageik nen, hinilurogon dogono.

2 Tesalonika 3:3

Meke re, ninetaiken ninoe Etagapogot oba hakotdisinem, ninane hologo hagakherek meke iti nen hinetaiken horlethinakhe dogolik, at obabut motok weak meke iti nen weagathinabigiluk hagakhunem hakhisik dogogin iti nen, hinetaiken at oba hakotdiluk dogono.

Yakobus 5:12

Nagarlak lak nerugi. Wene ageikhe kok meke yi yokhisak. Allah nen wene hinoba 'binogo iluk, hit nen pogot oba meke ageikhe etaga palhik, agat oba meke ageikhe etaga palhik, ninat meke ageikhe etaga palhik, inetaga hupuk palhe dogogup. “I o,” uogoluk halok he, 'bogokhogon, “I o,” usak. Nen, “Dek o,” uogoluk halok he, 'bogokhogonat, “Dek o,” usak.

1 Yohanes 2:13

Nopase lak o. At alebageik erlo baga nen welagarek meke etnogo ebe hinilu agagisip welagap iti nen, holal waganogo hinoba la'i agei. Nen, elege nagarumi o. Hit nen at obabut weak meke etnogo arat obatne degetdisigip welagap iti nen, holal waganogo hinoba la'i agei o.

1 Yohanes 3:12

Nit nen he, at Kain ebe Iblis obabut weak meke iti a'but ageikhesik ekaerek agot meke wakhikhe iti hagat, hagasusak dek o. At nen agot wakhikhe iti, nenaluk wakhikhe. At hagakhe lageikhe meke korlo motok nen, agot hagakhe lageikhe meke mot motok, iti nenat wakhikhe o.

1 Yohanes 5:18

Nit Allah a'buri itakninakhe meke at a'but alebageik itakhikhe meke etnogo nen thetnisik werekma, at obabut weak meke etnogo nen iki haknisagein dek o. Halok he, nit weak hunik motok hagakhe dogosak dek, iluk ninilu o.