Matius 24:31 - ALLAH ANE WENW KET MEKE WAROGO WOKNINAKHIKHE WENE

³¹ Itithogon waga dogolik, an nen it malaikat Allah nen pogot oba nen yoko usa'isa agarek meke emenogo yoko la'isa aga dogolik, napikon ane kogat pakhogon isinem, it nen akhuni an nen wenageinakhigi meke emenogo, o wema elomake, upu elomake, ilike, yike, o pogot erlomake erlomake eloma nen motok natogorinabugun o,” iluk yogeisasikhe.

Matius 24:31 ပူးပေါင်းရင်းမြစ်များ

Matius 13:41

An abat itaklasi agagi etnogo nen nagarumi malaikat yoko la'isa agunem, it nen Allah apma 'bisekherekma etoma nen, yi meke ti meke akhuni nen weak hagasuagaluk inakla kagalharek meke inom, yi akhuni ti akhuni weak hagakharek meke inom, natogorlogo 'bisalok

Matius 24:22

Weak hagatlagunem hugun iti, at Allah nen, Hurli yi hurli arat o, iluk igidek kamotdilepma, akhuni tha'bokhogonat tilinakhidek weagat atlep o. Meke re, at a'buri wenageinakhikhe meke inobasik anek, Yogo. Weak arat hegep o, iluk, hurli wasigin werek o.

Matius 24:32

At Yesus nen itithogon yogeisasikhesik, yabokane ageikhe men yogeisasikhe, “Wene yi o ara oba lisogon yokhisagein yi hutdisano o. O eka dabeligiluk hagakherek etnogo meke oba lisogon yokhisak. O ara iti eka lologo usekherethek yabokane asi'bat dageigik, eka dabelhik, hagakhunem, hinileken halok hinakla nen, Yogo. O arat hibi asigin higi, iluk hinakla hutdegethep iti hak, an nen,

Matius 25:31

At Yesus nen itithogon yogeisasikhesik, wene ageikhe men yogeisasikhe, “An abat itaklasi agagi etnogo, akhuni nen hogotnakhe korlek, it malaikat Allah nen pogot oba nen yoko usa'isa agarek meke emenogo tha'bokhogonat ninom witluk nen, an hogotnakhe korlek kok Netagapogot welagarekma dogolik,

Matius 28:18

Itithogon apekhe korlek, at Yesus ebe inalilu wageikhesik nen, men yogeisasikhe, “Allah nen he, pogot oba meke inom, agat oba meke inom, tha'bokhogonat an iteerek 'banhemo o.

Markus 13:27

Usa'aga dogolik, it malaikat Allah nen yoko usa'isa agarek meke emenogo, akhuni Allah nen wenageinakhikhe meke o wema elomake, upu elomake, ilike, yike, welageikharek meke natogorinabuagaluk, yoko pogot erlomake erlomake o yi ai ti ai eloma la'isagein o,” iluk yogeisasikhe.

Lukas 24:47

Nen, ageikhe men iluk holal waganek weregat, Hit akhuni weak hagakhe lagap meke iti, here'isalok hinbabut hebelagap halok he, Allah nen thagalogo degetdigin o, iluk, at etaga palogo wene ekhe dogolik, erlo o Yerusalem hurli nen yogeisilik, logat hurli o yi ai ti ai akhuni inukuloak etaga dopok motok yogeisilik laga dogono, iluk Allah ane holal waganek weregat o.

Yohanes 11:52

Meke re, it akhuni Yahudi meke inobasik anek isikhe 'buk. Akhuni tha'bokhogonat Allah a'buri meke o yi ai ti ai lo lagoukhasik welageikharek meke inom dapukhogon 'bisagaluk, Yesus watlasigin meke hasik isikhe.

Roma 10:18

Meke re, an nen hinok ageikhe waganusak. It he, hano wene iti inasuk holhidek werek a? Dek o. Inasuk arat holha. Allah ane baga, “It inane iti o yi ai ti ai tha'bokhogonat wialageikhesikmo re, o ilugun ilugun eloma tha'bokhogonat inasuk holhukha o,” iluk isikhemo holal waganek werek iti nen igi o.

1 Korintus 15:52

Opaki hasik, inilaga dapok iluk 'bekelageikharek hak, pikon ane o ilugun kobokhogon hukhagein o. Itithogon hukhasinem, akhuni watlagoukha meke inebe hirli ageidek ikhok motok dogogin meke agouwak hagarogo inilugurinabiluk nen, nit tha'bokhogonat ninebe ninat hagatninabigin o.

Efesus 1:10

Wene at akla limago welageikhe iti ebe, yabokane hagatlasusak oba hagatlasi agunem, at nen yi meke ti meke pogot oba welagarek meke inom, agat oba welagarek meke inom, tha'bokhogonat dapukhogon Kristus arligat apma 'bisagein meke hasik abok yoknisasikhe itiat o.

1 Tesalonika 4:16

Ninoe Etagapogot pogot oba nen usa'agunem, it malaikat meke inoe kok meke ane kokhogon igik, Allah apikon ane huthasinem ane kokhogon igik, isinem, akhuni Kristus inom hunik dogolik watlagoukha meke tak inilugurinabigin o.

2 Tesalonika 2:1

Nagarlak lak nerugi. Ninoe Etagapogot Yesus Kristus ebe witluk nen, at ninom opakimo dogouogoluk natogotninabi isigin iti hasik, hinasuk tetnokhogon wasik.

Ibrani 12:19

ane pikon ane hakene kokhogon igik, isinem Allah ane kokhogon ekhe dogolik, wene yigithogon isikhe, “Akhuni inom, domba sapi inom, tom yi iniki hakha ago halok he, inebe helekit oba pike motok inatno o,” iluk inasuk wakhunem holhukhasik, inasuk holek dogosak motok erlok dek ageikhemo, it nen, “At ane iti yabokane ageikhe inom yoknisausak dek o,” iluk inane obatnerogon kino isukha.

A'bikaka 1:20

Nen, husagal ebe 7 meke niki ebeke hago werekma hegen etnogo inom, lampu yibakharek meke isok tilik ebe 7 meke emas meke hagarek inom, hileken hegen etnogo, wene limago wene meke iti, pakhogon yokhisik o. Husagal ebe 7 meke hegen iti ebe re, it malaikat Allah a'buri gereja 7 meke natogokharek meke therisik welageikharek iti hisegen o. Nen, lampu yibakharek meke ebe 7 meke iti ebe, it Allah a'buri gereja 7 meke natogokharek meke itiat hisegen o,” iluk yoknekhe.

A'bikaka 11:15

Itithogon hisigirik oba nen, it malaikat inebe 7 baga emenogo, inebe 6 oba inapikon arat ane huthegasik oba nen, ageikhe apikon ane huthasinem, pogot oba nen inane kogat yigithogon isinem holhi, “Alep akhuni agat oba meke nen inapma 'bisalok hagasik welagoukha meke, yogotak ninopase Etagapogot Allah nen ninoe Kristus nen tilninabuagaluk meldisikhe meke etnogo ipisak nen inapma arat 'binagasik, at Kristus nen haknisik motok-motok dogogin o,” iluk ekhe lageikha.

A'bikaka 7:1

Itithogon nileken hisigirik oba nen, oporlik he, ap malaikat inebe 4 oba pogot erlomake-erlomake upuke-wemake ilike-yike hisakne hubetha wagarekmake, ilugun thebelek metek dogolik, hisakne 4 nenat agat obake hubetha waga dogolik oka aborlogotdigik, i laut yekelekmake hubetha ageik, hagasunogo iluk iniki hago werekma lageisigi o.

A'bikaka 8:2

Itithogon welagama nen, yabokane nileken lakhigi meke, malaikat inebe 7 baga Allah nen pikon ane kok meke hakene ebe 7 baga nenat wogeisasikhemo, at elokhoma metek werekma lageisigi.