Matius 24:14 - ALLAH ANE WENW KET MEKE WAROGO WOKNINAKHIKHE WENE

¹⁴ Nen, Allah nen apma 'bisagein meke hano wene yi, yi akhuni ti akhuni motok inilu asuagaluk o yi ai ti ai yogeisilik lagap halok he, o ilugun hurli baga arat hagatlasigin o,” iluk yogeisasikhe.

Matius 24:14 ပူးပေါင်းရင်းမြစ်များ

Matius 10:7

'Birisa laga dogolik, men yogeisilik lano o, Ninopase Allah pogot oba meke apma 'binanigin etnogo yogotak arat 'binanigin o, iluk, yogeisilik lano o.

Matius 18:19

“Nen, wene ageikhe yi yokhisak. Hit hinebe pere a? Henagan a, an netaga baga natogosugun halok he, an nebe hinakerlekla etoma dogogin iti nen he, hit hinebe pere nen agat oba yoma dogolik, hinetaiken opakiat atluk, hit nen, Ageikhe hagatnisan, iluk, nena meke, Allah ayoko 'bugun meke iti an nopase pogot oba meke nen hinane asuk holiluk hagasiginat o,” iluk yogeisasikhe.

Matius 24:3

Itithogon yogeisalok, tom Zaitun ukul oba dageisikhesik hurek werekma, at ane waganhe lagoukha meke emenogo oba wagoukhasik inarligat dogolik, men yogokhukha, “Hat nen yoknisegen etnogo, mera nen hagatlasigin? Hat hebe wageik, o ilugun oba hagatlageik, arat hagatlasigiluk hagakhe korlek, nena meke tak hagatlagunem nit ninetaiken eketlasugun. Wene hutukhogon yoknisan,” iluk yogokhukhama,

Matius 24:6

Itithogon hagatlaga korlek, wim kagaldiluk horogat yakhunem inane hinasuk holhik, walegat yakhunem inabok holhik, hagakhe dogolik, hinetaiken aborlok ugup o. Itithogon hagatlasigin mekeat he, o ilugun hurli baga hagatlasigin meke iti abanat o.

Matius 4:23

Lagoukhama, at Yesus o Galilea eloke o tomok etoma nekhe dogolik, akhuni Yahudi meke sembayan egarekma ukisikhesik, wene hano wene yabokane ninopase Etagapogot apma 'binanigin etnogo wene yogeisigik, yi u ti u hano hagarinakhik, hagakhe lageikhe.

Matius 9:35

At Yesus o ukul kokmake, herlekha'bukmoke, ya ukigik, ta ukigik, nekhe dogolik, o it akhuni Yahudi meke sembayan egarekma ukiluk, hano wene ninopase Allah nen apma 'binanherek wene etnogo yakulisigik, yi u ti u inoba werek meke inom, inobatne dek erlok dek meke inom, hano hagarinakhik, hagarik nekhe lageikhe.

Markus 13:10

Meke re, wene hano wene yi, yi ap ti ap inukuloak etaga dopok yogeisilik lagap halok he, ilugun hurli baga arat hagatlasigin o.

Lukas 2:1

Eta mot-mot, ap kok Kaisar Agustus iti nen akhuni o yi ai ti ai tha'bokhogonat inetaga holal waganuagaluk wene ula'isikhe.

Lukas 24:47

Nen, ageikhe men iluk holal waganek weregat, Hit akhuni weak hagakhe lagap meke iti, here'isalok hinbabut hebelagap halok he, Allah nen thagalogo degetdigin o, iluk, at etaga palogo wene ekhe dogolik, erlo o Yerusalem hurli nen yogeisilik, logat hurli o yi ai ti ai akhuni inukuloak etaga dopok motok yogeisilik laga dogono, iluk Allah ane holal waganek weregat o.

Lukas 4:5

Itithogon yogokhikhemo, yabokane Iblis nen Yesus wolok, tom upu baga 'bi dageisikhesik etoma nen o agat oba yi ai ti ai koktek inetagapogot welageikharek obake tha'bokhogonat yegekhogon winametdiluk opaki hasik ileken lakhoagaluk yakulikhikhe.

La'isasikhe 1:2

at opase nen ebe pogot oba wolok dageisikhe iti hurli, holal waganogo la'i agagi iti o. At ebe pogot oba aban dageigidek werek korlek, at agarumi wenago inebe inayoko 'biluk la'isagaluk hagakhikhe meke emenogo Allah Agoreke obatne baga inasuk wakhikhe.

La'isasikhe 11:28

It wagoukha iti meke, ap ageikhe etaga Agabus iti, Allah Agoreke nen akla kagalhikhemo, melageikhesiknen men yogeisasikhe, “O yi ai ti ai tha'bokhogonat hipiri no kogat hugun o,” iluk yogeisasikhe. Yogeisasikhe iti, ebe ap etaga Klaudius ebe kok dogolik hagasik werekma hagatlageikhe iti.

La'isasikhe 17:6

O lakhe dogolik, Paulus lak inebe dek nen, Yason men, Allah a'buri ebetlake men, iniki korlo lisogo ap koktek pemerintah meke inoba wogosik wagoukha. Wogosik wagoukhasik nen, inane kokhogonat men yogeisasukha, “Ap o yi ai ti ai elokhoken weagatdilik liliogei meke emenogo yoma wageikhasikmo,

La'isasikhe 19:27

Iti nen, nit niniki nen itithogon hagakhe lago meke yi ninabok weak palugun o. Meke re, nit ninabok anek weak palugun 'buk. Ninagona kok Artemis ai kok halek yi, hogorasusak dek iluk inakla apekhe dogolik, Artemis akhuni o propinsi Asia meke tha'bokhogonat men, o yi ai ti ai meke men, inomat at apma ukiluk dogolik hogorariogei meke thagalogo degetdugun iti!” iluk yogeisasikhe.

La'isasikhe 20:25

An hit nagarlak lak nerugi tha'bokhogonat wene Allah apma ukiluk dogogun iti wene yokhisilik nekhe lagei iti, hurli yogotak yi baga nen, hit nen yabokane nelokhoken hinileken neagun dek o, iluk an nilu.

Roma 10:18

Meke re, an nen hinok ageikhe waganusak. It he, hano wene iti inasuk holhidek werek a? Dek o. Inasuk arat holha. Allah ane baga, “It inane iti o yi ai ti ai tha'bokhogonat wialageikhesikmo re, o ilugun ilugun eloma tha'bokhogonat inasuk holhukha o,” iluk isikhemo holal waganek werek iti nen igi o.

Kolose 1:23

Halok he, hano wene hinasuk holhigisip hinakla nen, “Yabokane hano asigin,” iluk, apasigip meke iti, hinetaiken aborlok iluk kolelogo here'igidek hinobatnerogonat hago dogono. Hano wene iti, at nen yi ai ti ai akhuni inebe tha'bokhogonat yogeisasikhe wene iti yogeisilik nekhe dogoagaluk, an Paulus nayoko 'bisikhe iti.

Ibrani 1:6

Iti nen, at Allah nen a'but opakiat itago agat oba yoma usa'i ageikhe itinem, it malaikat yigithogon yogeisasikhe, “Hit an nagarumi malaikat tha'bokhogonat, at anek oba hakokthek dogolik hogorakhe dogono o,” iluk yogeisasikhe.

Ibrani 2:5

Nit nen, “Yabokane agat ket meke baga dogogun,” iluk ekhe lago iti dogolik, Allah nen it malaikat meke inane hologo dogoagaluk kok meldisasikhe 'buk. Dek o.

A'bikaka 14:6

Itithogon higirik oba nen, yabokane at malaikat ageikhe wene hano wene motok dogogin meke akhuni agat oba meke inukuloak etaga tomok, inane tomok, inoado tomok, inaila tomok, yogeisilik pogot obake hitluk lagunem lakhigi.

A'bikaka 16:14

Mokat iti inebe Iblis agarumi meke akhuni inoba duk i agunem hagasusak dek meke elalinat hagakharek meke etnogoat o. It itithogon dukhi ageikhasik nen, Allah obatne horleakma yi meke ti meke hagasusak erlok anek etnogo ai wi asigin iti baga wim inom yabuogoluk, ap inetagapogot o yi ai ti ai natogorinabuogoluk, wim yoko laga lageikha hisigi.

A'bikaka 3:10

Itithogon 'bisasigin iti, an nen, Hinobakhanini hapugutdiluk dogono, iluk yokhisasigi meke iti, nane hologo mothogon hagakhe lagap iti nen, o yabokane akhuni agat oba yoma welageikharek meke tha'bokhogonat inabut paligiluk, yi aik ti aik inoba 'bisagein iti hekhe korlek, hit anek he, an nen napma hano hakhisik dogogin o.