Matius 14:27 - ALLAH ANE WENW KET MEKE WAROGO WOKNINAKHIKHE WENE

²⁷ Itithogon isukhama, at Yesus nen he, “Hinagot akma. Nagarumi. An nebeat waga lagei. Halok he, hinayuk agup o,” iluk yogeisasikhemo,

Matius 14:27 ပူးပေါင်းရင်းမြစ်များ

Matius 14:28

At Petrus nen he, “Noe. Hat hebeat halok he, an hoba i agoum obake wisik nen he, Eme o, iluk yoknom,” iluk yogokhikhemo

Matius 17:7

at Yesus inoba wageikhesik, inebe iki hageinakhe dogolik, “Hinayuk dekhogon melatni o,” iluk yogeisasikhemo,

Matius 28:10

Hogorakhukhama, at Yesus nen he, “Hinayuk agup o. An nagarumi emenogo o Galilea dagouak nen, yogeisa lani o. Etoma dageiluk inileken 'bitneagun o,” iluk yogeisasikhe.

Matius 28:5

Nen, at malaikat etnogo nen it humi emenogo yogeisekhe dogolik, “Hinayuk agup o. Hit nen, Yesus o baga meldiluk wakha etnogo hinileken 'bikhauwogoluk wagap iti an nilu o.

Matius 9:2

ap ageikhe iki isok aborlok dek welageikhe meke thabuleka dit talogo noge ekherekma witik werek korlek yerogo wolok oba wagoukhama, at Yesus nen he, “It iti inetaiken an noba hakotdegasik nen wolok wageikha higi,” iluk, ileken ekagat hisalok nen, ap iki isok aborlok dek meke etnogo men yogokhikhe, “Na'but o. Hakla arleken akhan. Hat weak hagakhe lagan meke re, an nen thagalogo degetdigi o,” iluk yogokhikhe.

Lukas 1:13

at malaikat etnogo nen, “Zakharia! Hayuk agun o. Hat sembayan ekhe lagan etnogo, Allah arat asuk holhe o. Hage Elisabet iti eak abat itasigin o. Itasumo nen etaga Yohanes thalino.

Lukas 1:30

Itithogon ebekhe lageikhemo, at malaikat etnogo nen, “Maria neru o. Hayuk agun o. At Allah nen hebe akmu hagathakhesik oba hotok ekhe o.

Lukas 12:32

“Halok he, hit Allah a'buri domba hakene opakimo hulogo ukiluk welageikharek meke hinebe herlekha'bugat meke yi, nagarlak lak nerugi o! Allah nen hit at apma 'binageigiluk akla apekhesik werek iti, hinayuk agup o.

Lukas 2:10

Inayuk agoukhama, at malaikat etnogo nen, men yogeisasikhe, “Hinayuk agup o. Lakhani, hano wene akhuni tha'bokhogonat inakla arleken akhagun meke, yokhisa wagei o.

Lukas 5:10

Iti hak, at Simon agarlak lak inom hunik meke Zebedeus a'buri Yakobus Yohanes ipisak, itithogonat inayuk ageikhemo, at Yesus nen Simon men yogokhikhe, “Hayuk agun o. Ikan waganhe lagan iti hak, hurli yogotak nen, akhuni woginabik nekhe dogogin o,” iluk yogokhikhe.

Yohanes 16:33

ageikhe men yogeisasikhe, “Hit an ninom hunik dogolik, hinakla hapukhogon dogobageik nen iluk, wene iti tha'bokhogonat yokhisigi o. Hit akhuni agat oba meke nen yi aik ti aik hagathinakhe dogogun o. Meke re, akhuni agat oba meke arat obatne degetdisigima iti, hinayuk dekhogon dogono,” iluk yogeisasikhe.

Yohanes 6:20

Inayuk motok agoukhama, at Yesus nen, men yogeisasikhe, “Nagarumi. Hinagorakma. An nebeat waga lagei. Halok he, hinayuk agup o,” iluk yogeisasikhemo,

La'isasikhe 23:11

Itithogon yogeisasikhemo wolok ukisukhama, o itinem hibako, ninoe Etagapogot Paulus alilu melasi ukiluk nen, men yogokhikhe, “Hat nen, wene an nobasik o Yerusalem yoma pakhogon yogeisegen iti hak, yabokane o Roma etoma itithogon pakhogon yogeisa liginat iti nen, hetaiken hapukhogon dogono o,” iluk yogokhikhe.