Kolose 3:8 - ALLAH ANE WENW KET MEKE WAROGO WOKNINAKHIKHE WENE

⁸ Itithogon mekeat he, yogotak hit hinobabut ageikhe yi meke tha'bokhogonat here'isausagat. Inakla aga dageikherek iti inom, inakla hetpet ekherek iti inom, it aperek weagarinakharek iti inom, inape baga, inabok weak palhik, weak hagakharek meke asagan tha'bok igik, egarek iti inom, here'isekhe dogono.

Kolose 3:8 ပူးပေါင်းရင်းမြစ်များ

Matius 5:22

Meke re, an nen wene ageikhe yi yokhisak. Hat tha nen hagarlak hasik hakla aga dageikhe halok he, wene ageikhe hoba 'bigin werek o. Nen, hat tha nen hagarlak ageikhe yogokhe dogolik, Hat he, hebe kepu yi re! iluk isi halok he, it ap wene erlo pilinekharekma etoma wokharek lalok, ukum hoba 'bugunat o. Nen, hat tha nen, Hat he, hebe uo motok yi re! iluk isi halok he, wene hoba 'biluk weakma hetu aikmo la'agagin o.

Roma 13:13

O lia baga dogolik hagakharek hak, ninobabut mothogon hagakhe dogouok. Pesta nalok eka hagakhik, anggur apusu nalok hunu-hunu ageik, hagakharek iti hak hagasusak dek o. Yugunat param hagarinakhik, inekarli dek hagakhik, hagakharek iti hak hagasusak degat o. Wene palhik, ua palhik, hagakharek iti hak hagasusak degat o.

1 Korintus 3:3

Hit-hirat ua palhik, wene palhik, hagakhe lagap halok he, hinobabut akhuni inobaburat welagap o. Akhuni inobabut inikhogat dogolik hagakharek hak, hagakhe lagap iti nen yokhisigi o.

2 Korintus 12:20

An yabokane hinoba wisigin iti witluk nen, an nen, “It inobabut hano werekma ligin,” iluk apekhe lagei hak, dek. Weak werekma 'bithisa ageik, nen, hit nen, “At Paulus obabut hano,” iluk egethep hak, dek. Weak dogolik 'bithisa ageik, hagasunogo iluk, nelabut hiriogo. Hit-hit hinom wene yakhik, ua palhik, hinakla aga dageigik, hinekaerek hasik anek hagakhik, inabok weak thelekma palhik, limago palhik, hinekaerek nen hogorakhigik, yugunat-yaganat hagakhik, hagakhunem an wisusak iti, nayuk.

Galatia 5:15

Itithogon mekeat he, wam ekaerek nen wam ageikhe aik nen li'bilhik, warogo haumhogo nikik, hagakherek hak, hit-hit hinekaerek en itithogon hagakhe dogogun halok he, hinebe alomatlarik lasunogo iluk hinobabut hebelogo dogono o.

Galatia 5:20

inetaiken kaneke oba hakotdiluk dogolik hagakhik, akhuni inebe weak asuagaluk usarogo hagakhik, akhuni inom wim palek hagakhik, wene yakhik, ua palhik, inakla aga dageigik, inekaerek hasik anek kokhogon hagarigik, akhuni inebe opakiat meke inom hurli-hurli hagakhik, hek-hek hagakhik,

Galatia 5:26

Itithogon hagakhe dogolik, ninekaerek nen hogorakhigidegat, nit-nit ageikhe nen ageikhe inakla weak asuagaluk hagakhidegat, nit-nit ua palogo ageikhe nen ageikhe nina'it disigidegat, hagakhe dogouok o.

Efesus 4:22

Alebageik he, hinakla yi warlok ti warlok apekhe lagagip iti nen nukhetdinageisinem, hinebe alomatlarik lagagip iti nen he, hinobabut alep meke iti su nokorlogo here'isegarek hak, here'isano o.

Efesus 4:25

Nit tha'bokhogonat ninebe at Kristus iki isok hakene ninom hunik welago iti nen, inekalat egarek meke iti here'isalok, hinagarlak lak hinerugi hinom hinane eberogonat meke anek ekhe dogono o.

Efesus 4:26

Hinakla aga dageikhe halok, weak hagakhup. Hinakla aga apik werekma, Iblis nen hinakla kagalinogo iluk, o mulikin korokhogon ukigidek werek korlek, thagalogo hanoratno o.

Efesus 4:29

Wenekak uogoluk halok he, weak meke ekhe dogogup o. Wene hano meke isinem it aperek inetaiken aban meke inasuk holugun meke iti Allah nen hanorinakhunem, inetaiken horle asuagaluk, wene hano meke anek ekhe dogono o.

Efesus 5:4

Param ha'isegarek meke abok igik, wene inetaiken dek egarek meke igik, inekarlimo meke hasik asagun abok igik, usak dek meke iti igidegat he, Allah at heagei wakhe dogono o.

Kolose 3:5

Iti nen he, hinobabut hinikhogat dogolik, hinakla nen yi warlok ti warlok apegethep meke iti warogo here'isekhe dogono. Hinobabut iti, param ha'isegarek iti inom, inakla nen, warlok iluk wosi nekarek iti inom, inetaiken nen nekerethek inoba agaken dageikherek iti inom, inileken lageisalok inakla nen warlok apegarek iti inom, kaneke oba hakokthek dogou hak, inakla nen, “Yi meke ti meke, an meke anek dogolep,” iluk apegarek iti inom, hinobabut iti meke tha'bokhogonat warogo here'isekhe dogono.

Kolose 3:9

Su alep meke nokorlogo la'isalok nen, yabokane ket meke ikarek hak, hit hinobabut alep hagakhe lagagip meke here'isalok, yabokane hinobabut ket meke waganhigip iti nen, hinekalat ekhe dogogup o. Hinobabut ket meke iti, Allah nenat winametdinageisikhesikmo nogo nen, at ekaerek obabut hakene hagatlatluk nen, ebe motok hutukhogon hinilu asuagaluk, eran-alebat hagathinabiogo iti o.

1 Timotius 1:20

It weak itithogon hagakharek iti, inebe aperek he, Himeneus Aleksander ipisak nen Allah abok weak palhe lagoukhama, yabokane inobabut hebelatluk weak hagakhidek thogotduagaluk inebe Iblis wogokhima werek iti o.

Ibrani 12:1

It akhuni alebageik hagarik wagoukha meke inabok ilik wago iti, inebe doalegat ninaliluke dagakhogon inileken laknisik werek iti nen he, tha ae 'busuk tha ae 'busuk luogoluk yi meke ti meke inoba akin meke nokorlogo here'isalok lageikharek iti hak, nit ninoba akin weak irluk-marlukhogon welagarek meke iti inom, ninobabut weak hagakhorek meke ninoba dekelek motok welagarek meke iti inom, tha'bokhogonat nokorlogo here'isalok, Allah nen, “Hurli iti hurli lano,” iluk yoknisasikhe iti, ninakla nen, “Ninelokhoma piokhogon hurli iti bagaat luok,” iluk, ninobatnerogon laga dogouok o.

Yakobus 2:7

Nen, ninoe Etagapogot etaga hano liliogo meke etnogo etaga palogo ebe iteerek agagip meke iti, it inameke doalegat meke iti nenat, at etaga weagatdiliogei apigi o.

1 Petrus 2:1

Iti nen, hit weak hagakhe lagap meke iti motok here'isalok dogono o. Akhuni aperek nukhetdisigik, hinetaiken pere hagakhik, ua palhik, hinekalat nen akhuni aperek inabok weak palhik, hagakhe lagap iti, here'isekhe dogono o.

2 Petrus 2:18

Akhuni aperek inagarlak lak inerugi korloat hagakho korlek nen, here'isalok dukhisuogoluk hagakhunem, inetaiken nen nukunem yabokane weak hagasuagaluk, it ap iti inekaerek hogorakhekhe dogolik we yugunat inekalat inakla kagalhe dogogun.

2 Petrus 2:7

Itithogon inakhe dogolik, at Lot anek, obabut mothogon Allah warlok meke hagakhunem, it akhuni etoma meke inekarli dek weak hagakhe lagoukha baga, at akla korlo ago motok werekma Allah nen tilhikhe iti.

Yudas 1:13

Nen, ageikhe re, i laut kok yekelekma hoklabu hulalek-dekalekhogon aninirogo motok hagakhe dogolik, wosirlagap hagarogo lia'i agarek iti hak, it iti yugunat hagakhe dogolik, inekarli dek weak hagariogei. Husagal 'bitok-'batok lagarek hak, Allah nen it iti motok o mum hikhakthekma dogoagaluk inobolukmo 'bisagein werek o.

Yudas 1:8

Itithogonat, it akhuni iti ina'bi hiliogei thalek inetaiken dek dogolik, inekaerek inebe weagatdakhigik, ninopase Etagapogot inakla meanetdigik, pogot oba hogorinakharek meke iti inabok weak igik, hagariogei.

A'bikaka 16:9

Itithogon aik nen hali yagalinakhemo inoba kokhogon nasinem hinet wakhe dogolik, Allah akla aga inoba 'biluk weagarinabusak tak-tagat weagarinakhe laga mekeat he, at ebe hogorasuogoluk weak hagakhe lageikha meke thogotdisalok, inobabut hebelageidek dogolik, it nen, “Allah ebe nikitlatlep e,” iluk Allah etaga motok weagatdekhe lageikha hisigi.