Kolose 3:16 - ALLAH ANE WENW KET MEKE WAROGO WOKNINAKHIKHE WENE

¹⁶ Akhuni inameke doalegat meke inikierek welageikharek hak, hit nen, Kristus ane itiat hinetaikenma obatnerogon 'biluk dogolik, hinakla kagalogoat, hit-hit wene hinasuk wat-wat hagakhe dogolik, wene hit nen yakulisigik, it nen yakulhisigik, hagakhe dogono. Yakulisekhe dogolik, Allah hasi etai Mazmur meke wakhik, etai Allah hogorakharek meke wakhik, Allah Agoreke nen hinakla kagalhunem, etai ket kagalogo wakhik, hagakhe dogolik, hinetaikenma nen Allah heagei wakhe dogono.

Kolose 3:16 ပူးပေါင်းရင်းမြစ်များ

Matius 26:30

Wene itithogon yogeisasikhesik nen, etai Allah etai ageikhe watluk dukhisukhasik nen, tom Zaitun oba dageisukha.

Lukas 2:51

Itithogon iluk, at Yesus agosa opase inom o Nazaret dagei agoukhasik dogolik, at agosa opase inane hanorogon hologo hagakhe lageikhe. Nen, agosa nen, wene emenogo tha'bokhogon etaikenma waganhikhesik eberek motok welageikhe.

Yohanes 15:7

Hit an ninom hunik dogolik nane hinakla werek halok, nena meke hit warlok meke an kino yoknisumo wokhisaumo horlagunat o.

Roma 10:17

Meke re, hano wene iti, Kristus abok yogeisa lagunemat inasuk holharek o. Nen, wene inasuk holilugat, inetaiken at oba hakotdegarek o.

Roma 15:14

Nagarlak lak nerugi. Hit hinobabut hano motok dogolik, yi wene ti wene hinilu motogatma, hit-hit hinasuk wat-wat usak erlok welagap iti, an nilu o.

1 Korintus 14:15

Halok he, an nikithogon hagasik. Yigithogon hagasigin. Sembayan iti, Allah Agoreke nen yoknekhe korlek inane nokodek meke baga elalinat igik, ninekaerek ninane baga ninetaiken hutdiluk nen igik, igin o. Nen, etai iti Allah Agoreke nen yoknekhe korlek inane nokodek meke baga elalinat wakhik, ninekaerek ninane baga netaiken hutdiluk nen wakhik, hagasiginat o.

1 Korintus 14:26

Halok he, nagarlak lak nerugi. Nikithogon hagakhe dogosak. Yigithogon hagakhe dogosak o. Hit hinebe natogotdiluk, at ageikhe nen Allah aetai isa igik, at ageikhe nen wene thekekhogon yakulhisigik, at ageikhe nen Allah akla wene yokhisigik, at ageikhe nen wene inane hinokodek meke baga elalinat isinem, at ageikhe nen hit hinane baga mothogon yokhisigik, hagakhe dogolik, Allah a'buri inetaiken ago warogo yi wene ti wene tha'bokhogonat erlogat itithogon ekhe dogosak o.

Efesus 1:17

Hit hinobasik he, ninoe Etagapogot Yesus Kristus opase Allah hogorakho motok welageikharek meke etnogo nen, hinakla motok kagalek meke wokhisigik, at ebe hutukhogon hutdubageik nen yakulhisigik, hagakhe dogoak nen iluk, Agoreke wokhisoagaluk ayoko 'bekhe lagei.

Efesus 5:17

Hinetaiken abit dogosak dek o. At ninoe Etagapogot akla warlok apekherek meke itiat erlo hera'iluk mothogon hagakhe dogono.

Efesus 5:19

Hit-hit wenekak ekhe dogolik, etai Mazmur meke igik, etai Allah meke igik, etai Allah hogorakharek meke igik, wakharek meke itiat waganiluk ekhe dogono. Hinetaiken oba nen etai isa igik, ekaka igik, wakhe dogolik, ninoe Etagapogot ebe hogorakhe dogono.

Efesus 5:26

At Kristus nen itithogon hagakhikhe iti, nit Allah a'buri tha'bokhogonat ninebe ninoba nino'ban dek, ninoado hurarlo dek, hano dogou hak, at il oba ukum ninoba dek, hano motok karelek dogoagaluk, ninebe ima usa'inanhunem, at ane etnogo baga, thobalogo 'binaniluk, at ekaerek hasik bakhagaluk ebe watlageikhe iti o.

Kolose 1:28

Iti nen, nit nen he, wene Kristus abok iti pakhogon akhuni tha'bokhogonat inebe dopok yogeisilik laga lago. Itithogon yogeisekhe lago iti baga, inebe dopok Kristus inom hunik dogolik, inetaiken horle atlukmo, Allah oba wogosik wisuogoluk, ninakla kagalek motok dogolik, inasuk wakhik, wene yakulisigik, hagarik laga lago iti o.

Kolose 1:9

Hinabok itithogon isinem ninasuk holhosik, nit nen hit hinobasik sembayan igik, Allah ayoko 'bigik, thogotdigidek isi motogat welago. Itithogon isinem Allah Agoreke nen hinakla kagalhunem, hinakla motok kagalogo wene hutdiluk nen, at Allah akla warlok apekherek meke iti hit nen, hutukhogon hinilurogon dogobageik iluk ayoko 'bekhe lagoat o.

Kolose 4:6

Hinane yi meke ti meke hasik it aperek yogeisekhe dogolik, yi meke ti meke mayu hilhunem ituk hano egarek hak, “Wene iti hano,” iluk, waganuagaluk, hinane eanerogon yogeisekhe dogono. Itithogon yogeisugunem, it hinoba hinok waganhunem, wene oko inebe dopok yogeisobageik nen, hinilurogon dogono.

1 Tesalonika 4:18

Iti nenat, wene iti baga hit-hit hinakla hanorogon, hinetaiken ago wat-wat ekhe dogono o.

2 Tesalonika 3:15

Itithogon mekeat he, hinom wim palek negen hagakhe dogogup o. We, “Ninagarlak lak ninerugi Allah a'buri mekeat,” iluk, inasuk hanorogon wakhe dogono o.

1 Timotius 6:17

Yi meke ti meke tha'bokhogonat dek asigin mekeat he, it ap koktek inetaga werek meke iti inakla nen hogorakeke dogolik, “Nameke agat oba meke yoma motok doalegat yi nen nebe hano dogogin,” iluk, apekhe dogunogo. At he, at Allah yi meke ti meke tha'bokhogonat ninakla arlekenhogon horlekhe dogoagaluk kokhogon woknisekherek etnogo nenat hanotninabigin iluk hutdekhe dogoak nen inasuk wakhe dogono.

2 Timotius 3:15

Hat hebe elege baga nenat Allah ane holal waganek iti hilu motok welagatek iti, hakla eberek motok dogosak o. Itithogon dogolik, hetaiken Kristus Yesus oba hakotdiluk werekma, Allah nen tilhabusak meke hutdinogoluk, at ane holal waganek iti bagaat hakla erlogat kagalusak werek o.

Titus 3:6

Allah nen Agoreke woknisasikhe iti ebe, Yesus Kristus ninebe tilninakherek meke etnogo nenat kokhogon ninoba usa'i ageikhe.

Yakobus 1:5

Meke re, at Allah obabut hano nen akhuni tha'bokhogonat akmu dogolik wenageisigidek wogeisekherek iti nen, hit aperek hinakla kagalek dek halok, at kino yogosumo hinakla kagaliginat o.

Yakobus 3:17

Itithogon mekeat he, Allah nen akhuni inakla kagalhunem, inobabut kok hagakharek he, weak ageikhe hagakhidek inilaga isonhogo welageikharek iti. Itithogon dogolik, akhuni inom hanorogo welageik, inobabut enago welageik, inane hologo hagakhik, akhuni inakmurogon motok welageik, o eken hano meke ikherek iti hak, hanorogon hagakhik, akhuni aperek inelokhomake 'bisigik, aperek inoporlike 'bisigik, hagakhidegat inetaiken pere welageidegat, hanorogo hagakharek iti.

Yakobus 5:13

Hit aperek hinakla weagat welagap halok he, sembayan ekhe dogono o. Nen, hit aperek hinakla arleken akhekhe lagap halok he, etai Allah aetai wakhe dogono o.

1 Yohanes 2:14

Yekerugi na'buri o. Ninopase Allah hinilu agasigip welagap iti nen, holal waganogo hinoba la'i ageik, hit nopase lak, at alebageik erloma nen welagarek meke etnogo ebe hinilu agagisip welagap iti nen holal waganogo hinoba la'i ageik, hit elege nagarumi, hit hinobatne werekma Allah ane hinakla werekmaat, at obabut weak meke arat obatne degetdisigip iti nen, holal waganogo hinoba la'i ageik, hagakhi iti o.

1 Yohanes 2:24

Nen, hit he, wene alebat hinasuk holhigip meke iti, hinakla waganiluk nen, eberek motogat dogono. Itithogon eberek dogogun halok he, hinebe ninopase Allah a'but Yesus ipisak hinom hunik dogogun o.

1 Yohanes 2:27

At Kristus nen Allah Agoreke wokhisasikhemo hinakla dogolik, yi meke ti meke hasik, ekalat yakulhisigidek, eberogonat anek yakulhisiliogo iti nen, akhuni aperek nen wene hit yakulhisausak erlok dek o. Wene at nen yakulhisiliogo meke iti mothogonat hagakhe dogolik, Kristus hinom hunik motogat dogono o.

A'bikaka 14:3

Itithogon inane doalegat ekhe dogolik, Allah ebe kok welagarekma obolukmo werek korlek, it Allah nen winametdisasikhe meke aperek inebe 4 oba emenogo inom, ap inarluetek emenogo inom, inil oba etai ket meke yakulogo it akhuni ebetlake yakulu'buk inokodek meke, it akhuni inebe 144.000 agat oba nen arat tilinakhe meke emenogo anek inilumo etai wakhe lageikha inane holhi.

A'bikaka 15:3

Itithogon dogolik, etai at Musa Allah atuaneke etnogo inom, Domba Eak etnogo inom, ipisak inaetai wakhe dogolik men ekhe lageikha, “Allah ninopase, u a e, Hat hobatne horleakma re, u a e, Yi meke ti meke hagasusak anekma, u a e, Elalin kokhogon inayuk meke anek hagakhetek o, u a e, Hat yi akhuni ti akhuni inopase Hetagapogot dogolik, u a e, Mothogon anek hagarinakhetek, u a e, Hano anek hagarinakhetek, u a e, Ninopase, u a e. Ninopase Hetagapogot hat harligat karelogo dogolik, u a e, Akhuni ukum inoba 'bigik, kokhik, hagakhe dogolik, u a e, Akhuni tha'bokhogonat inil oba, u a e, Eberogonat motok hagakhen o, u a e, Akhuni inukuloak etaga tomok tha'bokhogonat, u a e, Hapma ukitluk, u a e, Initibagal yukukhogon, u a e, Hogothakhik, heagei wathakhik, hagakhunem, u a e, It akhuni thani hak nen hat inayuk dek dogolik, u a e, Hogothakhidek huk asusak, u a e, Dek, u a e,” iluk etai wakhe lageikha nasuk holhi.

A'bikaka 19:10

Itithogon yoknekhe lagama, an nen at malaikat etnogo apma ukiluk nitibagal yukukhogon hogorasigiluk hagakhi mekeat he, at nen yoknekhe dogolik, “Dek. Dek. Itithogon hogotnabusak dek o. An nebe hat inom, hagarlak lak inom, ninom tak-tagat o. Wene Yesus nen yoknisasikhe meke yogeisilik nekharek meke iti, at Allah Agoreke nen inakla kagalogo yogeisugunem yogeisegarek iti, wene erlo at Yesus nen yoknisasikhe itiat o. Halok he, at Allah at hogorasusak o,” iluk yoknekhe.

A'bikaka 5:9

Itithogon etai ket meke yakulogo wakhe dogolik, “Hat anek he, arat hakhukhama watlagagitik, u a e, Akhuni tha'bokhogonat inukuloak etaga tomok, inane tomok, u a e, Inoado tomok, inaila tomok, u a e, Hat hamep oba Allah hasik oko palogo 'bisalok, u a e, Iteerek agatik, u a e, Thuesika uanat meke baga holal waganek dikilik iti, u a e, Waganiluk nen, sirlo 'begarek iti hak, u a e, Iki apusu tetnekhogon 'bisukha meke iti, u a e, Erlogat 'bukalusak, u a e. It iti inoko palogo 'bisasigitik, u a e, Ninopase Allah hasik hagakhe dogoagaluk, u a e, Inukuloak etaga, Allah iteerek, thaligin, u a e, Inebe kogat meldisasiginmo, u a e, It nen akhuni agat oba meke, u a e, Inapma 'bisalok hagasik dogogun, u a e,” iluk etai wakhunem hisigi.