Kolose 3:14 - ALLAH ANE WENW KET MEKE WAROGO WOKNINAKHIKHE WENE

¹⁴ Itithogon hagakhe dogolik, ebe kok hakene re, akhuni inebe hinakmurogon dogono. Inakmurogon welageikharek meke iti baga, hinebe opakiat motok dapukhogon dogou hagat dogogun iti.

Kolose 3:14 ပူးပေါင်းရင်းမြစ်များ

Yohanes 13:34

Itithogon yogeisasikhesik nen, wene ageikhe men yogesasikhe, “Hit nen hagakhe dogosak meke wene ket meke ageikhe yokhisak, An nen hit nakmurogon welagarek hak, hit itithogonat, hit-hit nakmu-hakmurogon hagakhe dogono o.

Yohanes 15:12

Hit nen hagakhe dogobageik nen iluk, wene ebe yiat hinasuk warogo yokhisak, An nen hit netaiken hunik welagei iti hak, hit nen itithogonat hit-hit nakmu-hakmurogon dogobageik nen iluk yokhisigi o.

Yohanes 17:23

It eberogonat inebe opakiat dogoak nen, it nen an ninom hunik, nen hat nen an nipisak hunik dogouok o. Itithogon dogogun halok, it akhuni agat oba meke nen ekhe dogolik, At he, opase nen la'i ageikhesik ebe etaiken hunik welagarek iti hak, it inebe at wogokhikhe meke etaiken hunik welagarek o, iluk inilu atluk hutdugun.

Roma 13:8

Hit he, akhuni hinoba palegeke dogosak dek. Hinoba palegeke dogou hak, hit-hit nakmu-hakmurogon hinetaiken hunik dogosak itiat o. Wene Allah nen ninasuk wakhikhe wene etnogo tha'bokhogonat tak-tagat hagasu hak, inebe nakmu-hakmurogo inetaiken hunik dogosak itiat o.

Efesus 1:4

At Allah nenat ninebe at ekaerek hasik 'bakhalok, at il oba karelek motok dogoagaluk, pogot agat aban walhigidek dogolik, wenakninakhikhe iti ebe at Kristus oba nenat wenakninakhikhe o.

Efesus 4:3

Allah Agoreke nen ninebe opakiat meke hunogo 'binanhemo dogolik, inebe hano dapukhogon welageikharek iti meke kogotdekhe dogono o.

Efesus 5:2

Akhuni nen yi meke ti meke Allah hasik 'bisalok, ebe warogo hetu hunekhunem, Allah akla hanorogo obasi hano meke liagakhe lagoukha iti hak, at Kristus nit ninebe akmutninakhikhesik nen, “It inobasik an nebe nasuak o,” iluk apasikhe baga ebe wakhukha iti baga Allah akla hano ageikhe iti hak, nit-nit nakmu-hakmurogo hagakhe dogouok o.

Kolose 2:2

Hit hinetaiken ago warek dogolik, hit-hit hinom hunik nakmu-hakmurogon dogobageik iluk itithogon hagakhe lagei o. Hit itithogon dogolik he, “Wene iti eberogonat,” iluk, hutdiluk nen, wene munini hinakla ebekhidek motok 'bogokhogon dogolik, wene Allah akla limago welageikhe wene iti hutukhogon hinilu asugun o. Wene iti, Kristus ebeat o.

1 Tesalonika 4:9

Nen, hit-hit hinagarlak lak hinerugi hinom hinakmurogon dogobageik iluk, Allah nen erlogat yakulhisiliogo iti nen, yabokane an nen nikithogon halok, “Hit hinagarlak lak hinerugi hinom hinakmurogon hagakhe dogono,” iluk, holal waganogo hinoba la'isusak. Degat o.

1 Timotius 1:5

Inetaiken Allah nen horinakhunem inekaerek inakla nen he, “An wene noba dek, nakla thiok welagei,” iluk apekhe dogolik, inetaiken eberogonat Allah oba hakotdiluk welageikharek iti nen, akhuni inakmurogon welageikharek o. Halok he, it itithogonat dogoagaluk inasuk wakhe dogono, iluk yokhikhigi iti o.

Ibrani 6:1

Iti nen he, Kristus agarumi atluk hagakhe dogosak meke wene alebageik yakulharek iti meke yakulhugu meke iti werek korlek, inarlue atluk hagakhe dogosak meke yakulhe dogouok o. O herlaga hano 'biluk iniki abel dagalharek dek iti hak, nit alep weak hagakhe lagagu meke 'bualogo here'isalok ninobabut hebelatluk ninetaiken Allah oba hakotdisugu meke iti yabokane abel dagaluok dek o.

1 Petrus 4:8

Wene kok hakene yi. Hit-hit nakmu-hakmurogon hagakhe dogolik, ageikhe nen ageikhe weagatdugun meke thagalogo motok degetdugun iti nen, hit-hit hinagarlak lak hinerugi hinom nakmu-hakmurogo motok hagakhe dogono.

2 Petrus 1:7

Allah akla warlok apekherek mothogon hagakhe dogolik, iti meke oba dukhogon, inagarlak lak inerugi inakmurogo welageikharek iti meke, ite atno. Hinagarlak lak hinerugi hinakmurogo dogolik, iti meke oba dukhogon, akhuni inebe tha'bokhogonat inetaiken hunik welageikharek iti meke, ite atno.

1 Yohanes 3:10

Allah a'buri inom, Iblis a'buri inom, ninetai ekerlogo inobabut ekagat hagatlariogo yi. Tha nen obabut mothogon hagakhidegat, agarlak lak erugi akmurinakhidegat, hagariogo halok, at iti ebe Allah a'but dek o.

1 Yohanes 3:23

At nen wene ninasuk wakhikhe iti, ebe re, “Hit hinetaiken an na'but Yesus Kristus oba hakotdiluk, at nen yokhisekhe iti hagat, hit-hit nakmu-hakmurogon dogono o,” iluk ninasuk wakhikhe itiat o.

1 Yohanes 4:21

Iti nen, at Kristus nen ninasuk wakhe dogolik, “Allah hinakmurogon dogolik, hinagarlak lak hinerugi hinakmurogonat dogono o,” iluk yoknisasikhe iti.